Read Samba Leko Kolosia 3 Bible Online

Kolosia 3 - Samba Leko bible

Kolosia 3

¹Dáà íí díímì valə́ kə̀ Krístù tə́ gə́, ìì sàà in bəraa lɛgə́ paà, zɔ̀ŋ aa Krístù kùm bə Báá Vɛnɛ́b nɛɛ̀n váànú roó.

²Ìì sàà in bəraa lɛgə́ paà roó. Zá ìì sàà in bəraa zɔ̀ŋə yɛ́b bərə sí.

³Kàandə, val kò' ii yàá, bít gɔ̀ŋsə́ íí tə́ mə́'ke kə̀ Krístù ra, Vɛnɛ́b naú.

⁴Gɔ̀ŋsə́ vɛ́nà bə̀ íí rə, Krístù ra, bít sɛŋ aa dáà vúgǹnà bərə gə́, aí kɔ̀ íí dá vúgǹ kə̀ oò tá, bít íí dá kaŋsɛ́l laa nyɛdkè oò kíìn bɔbàá.

⁵Aa dá sɔɔ̀n də, ìì lò' in zɔ̀ŋə yɛ́b bə bə̀ bəraa aí tɛ́m bərə kíìn kóólé' labsə̀ ma'ǹmbìá, in nyìb bìá, inlɛ'kè vaksə́ tɛ́m bə bìá, bít in zùúm í'ǹmbìá (Kàandə kuùmbə̀ nɛ́d in zùúm bə̀ í'ǹ də, də́ŋ tə́ kə̀ vɔɔm pɔ̀bm̀bə̀ nə́ŋ̀ní).

⁶Aarə, invaksə́ boò bəraa rə bòórú, Vɛnɛ́b nɔ̀m dáà taà yaànnà nɛ́b aa bə̀ məəù ləə̀nmbə̀ rə yílú.

⁷Nyàam íí kùm kə̀ aakíin də, sɛŋ də, invaksə́ bəraa rə bə̀ ləə sə̀n gààd íí gɔ̀ŋsə́ rú.

⁸Zá bə́ŋyée, làà ìì lɛ́' in bəraa rə kíìn kóólé' nɔ̀má, tɛ́m yɛ̀ɛ́l vaksá, zeekéá, muurá, sínkɔ̀ nwɔŋ vaksə́ nə́ŋ̀má oò vúg aí gú' bə sí.

⁹Ìì dùg gúsuúm bəd ɔ̀dnə́ŋ̀ yílə́ sí. Kàandə, lɛ́' íí dàà nɛɛ̀n aa nyàam íí kùmà rú doorú rə yàá, kə̀ nɛɛ̀n aa íí mà' rú rə tá.

¹⁰Bə́ŋyée gə́, kóó nɛ́ɛ̀réè aí tə́ŋú, bíl nɛ́ŋə̀ puu yàá. Sɛŋ gə́ kóólé, lúŋ íí zəgə̀ tə́ kúnú. Kàanyée gə́, kə̀ aakíin də, gàb íí dáù taà kuràá.

¹¹Kə̀ aakíin də, kóó ìì kùm nɛ́b aa bàg Vɛnɛ́b síndoó, kóó ìì kùm *Yahudu bərá, kóó ìì kùm nɛ́b aa nàà gàb doó, kóó ìì kùm nɛ́b aa nàà gàb síndoó, kóó ìì kùm nɛ́b aa gàb in síndoó, kóó ìì kùm nɛ́b gəlké bərá, kóó ìì kùm kɔ̀' bərá kə̀ nɛ́b aa kɔ̀' síndoó, aarə mà' in nə́ŋ̀má sé. Zá Krístù ləə gààrì obə́n yílú, kə̀ wálke bə́n kə̀ oòra. Bə́ŋyée gə́, bə́n nɛ́b oò bərá.

¹²Íí kùmì Vɛnɛ́b nɛ́b *gìdń bərá. Vɛnɛ́b í' ii yàá, bít sààvúŋ iiyà bə̀ yaaì kùm kə̀ obəǹ tá. Kə̀ taàbìá, ɛ̀g ìì gàb ɔ̀dnə́ŋ̀ búúrá. Ìì kùm nɛ́b tɛ́m sɔ̀ɔ̀nkè bə̀ kə̀ ɔ̀dnə́ŋ̀á, nɛ́b tɛ́m lə́ə́ke bə̀ bərá, nɛ́b tɛ́m ɔ̀gke bə̀ bərá, bít nɛ́b tɛ́m sidké bərá.

¹³Ìì sìd ɔ̀dnə́ŋ̀ íí bòdba, bít lɛ́' ìì dàà ɔ̀dnə́ŋ̀ invaksə́ bəraa mà' ii rə kíìn íí bòdba, nɛ́ŋə̀ nə́ŋ̀ í'ì ɔ̀dnə́ŋ̀ luùnmbə̀ gə́ roó. Lɛ́' ìì dàà ɔ̀dnə́ŋ̀ invaksə́, kìínmbə̀ Báátììkpɛ̀ŋ lɛ́' dàài rə kíin.

¹⁴Bít aa kàn nɛɛ̀n də, ìì kùm kə̀ í'sɛ̀l kə̀ ɔ̀dnə́ŋ̀á. Í'sɛ̀l dá sə̀n báàn wálke sɔ̀ɔ̀n piìnmbìá.

¹⁵Mə́ nyɛ̀m tɛbə̀ aa Krístù pii bə́n də, oò nwán ii tɛ́má. Kə̀ aakíin də, kə̀ tɛbə̀ aa roó, Vɛnɛ́b dɛ̀d wál bə́n taá, kìínmbə̀ bə́n in bəraa si' nə́ŋ̀ní bə̀ rə kíin. Ìì mɔ̀' Vɛnɛ́bá.

¹⁶Krístù nwɔŋ, kə̀ gbaŋə̀ oò tə́ kóólé, oò kùm aí rú. Ìì sán Vɛnɛ́b nwɔŋá, bít ìì tɔ̀g ɔ̀dnə́ŋ̀ bəd íí bòdba, kə̀ ingabké gbà'á aa íí kə̀ naà roó. Nàà *báà káŋ̀ Vɛnɛ́b kə̀ tɛ́m bə́n tə́ kóólé, kə̀ ingabkéá. Nàà báà káŋŋə̀ kə̀ náb núúboòrú bə̀ bərá, náb Vɛnɛ́b bə̀ káŋ̀á, bít kə̀ náb *gìdń bərá.

¹⁷In aa bə́n tə́ən ma'ǹ doó, sínkɔ̀ bə́n tə́ən baàn də gə́ kóólé, báà dɛdǹ Báátììkpɛ̀ŋ Yéésù nə́gə́lá, kə̀ mɔ̀'ǹmbə̀ oò bə̀ kə̀ Báá Vɛnɛ́bá.

¹⁸Kɛ́ɛ̀m bərá, ìì ləə vɔ̀ɔ̀m íí bərá, kìínmbə̀ nɛɛ̀n aa dá Báátììkpɛ̀ŋ Vɛnɛ́b sɔɔ̀n dú rə kíni.

¹⁹Vɔ̀ɔ̀m bərá, ìì í' Kɛ́ɛ̀m íí bərá, ìì mà' bə̀ in aa dá bə̀ nɔ̀m ma'ǹ də sí.

²⁰Yɛb bərá, ìì ləə báá íí bəd kə̀ nà' íí bəd tá, aa yée kùmsə̀n in aa Báátììkpɛ̀ŋ tə́ nwáàn aí naà roó.

²¹Báá bərá, ìì gám yɛb íí bəd nwɔŋ kə̀ kpɛŋsɛ́l sí, bɔ̀b kpɛŋsɛ́l boò oò bɔ̀b sí.

²²Kɔ̀' bərá, ìì ləə nɛ̀n íí bəraa zɔ̀ŋə yɛ́b bəroó. Ìì mà' tù' boò núùrú, sɛŋ aa ìì tə́ ii nwáàn də ní, bɔ̀b boò mɔ̀' ii kíìn sí. Zá ìì ləə bə̀ kə̀ tɛ́m ɔ̀gkeá, kìínmbə̀ íí tə́ Báátììkpɛ̀ŋ tù' ma'ǹ kíin.

²³Kóó tù' aí bə̀ aa íí tə́ ma'ǹ doó, ìì mà' kə̀ tɛ́m íí tə́ kóólé, kìínmbə̀ íí tə́ Báátììkpɛ̀ŋ tù' ma'ǹ kíin, zá nɛ́b bəd tù' ní gá.

²⁴Sèl ìì gàb kúnú, Báátììkpɛ̀ŋ dá ii mú'sɛ̀l dùm kíìn ká'nàá. Íí dá gbaŋə̀ bəraa zíg nɛ́b oò bəd kìínmbə̀ valligə̀ kíin də kíìn bɔbàá. Kàandə, nɛ̀n vɛ́nà bə̀ aa íí tə́ù tù' ma'ǹ də, kùmsə̀n Krístù ra.

²⁵Zá màn aa mà' tə́ invaksə́ rə, dá invaksə́ dùm oò bɔbàá, kìínmbə̀ nɛɛ̀n aa mà' invaksə́ rú rə kíin. Kàandə, Vɛnɛ́b gə́, pɛ̀d nɛ́ŋə̀ bə sé.