Read Samba Leko 1 Tesalonika 1 Bible Online

1 Tesalonika 1 - Samba Leko bible

1 Tesalonika 1

¹Núúboòraa vúgà máá mə́ Pol naú, Silas naú, kə̀ Timote naú. Bád bə́ pii *Eklisiya bəraa ìì kùm Tesalonika bìlə́ roó, báá bə́n Vɛnɛ́b nɛ́b bərá, bít kə̀ Báátììkpɛ̀ŋ Yéésù Krístù nɛ́b bərá. Bə́ dɔ̀mi yàá. Bə́ nyɛ̀m Vɛnɛ́b oò mà' ii pə̀dkèá, bít oò pii ii tɛbàá.

²Sɛŋ gə́ kóólé, bə́ tə́ Vɛnɛ́b mɔ̀'ǹ aí yílú, íí kóólé, bít bə́ tə́ diìn Vɛnɛ́b nyɛɛ̀mbə̀ aí yílú.

³Kə̀ aakíin də, sèl bə́ tə́ zá'ǹ Báá bə́n Vɛnɛ́b númú, nɛɛ̀n aa íí tə́ tù' ma'ǹ kə̀ tɛ́mbagké íí roó, nɛɛ̀n aa í'sɛ̀l aí bə̀ tə́ ii kpɛŋsɛ́l piìn dú roó, kə̀ nɛɛ̀n aa tɛ́m zígke íí aa Báá bə́n Tììkpɛ̀ŋ Yéésù Krístù bərə kùm dú və̀'kè roó.

⁴Ɔ̀dkudvɛɛ̀l mə́ í'sɛ̀lbə̀ bərá, bə́n gàb yàá, Vɛnɛ́b í' ii yàá, sààvúŋi yaà ìì kùm nɛ́b bəǹ bərá, yaà ìì kùm kə̀ obəǹ tá.

⁵Kàandə, *Nwɔŋ Puu Sɔ̀ɔ̀nkè aa bə́ bàà ii rə, bə́ gám kə̀ gú' ní gá, zá bə́ bàà ii kə̀ kpɛŋsɛ́l kɔ̀, kə̀ láŋke Nwul Gìdń bìá. Bít mə́ gàb yàá, Nwɔŋ Puu Sɔ̀ɔ̀nkè aa mə́ tə́ baàn yérə, nwɔŋ sɔ̀ɔ̀ná. Íí gàb nɛɛ̀n aa bə́ kùm dú aí tə́ŋú, bɔ̀b aí bə̀ sɔ̀ɔ̀nkè ma'ǹmbə̀ rə yàá.

⁶Bít aí gə́, íí màg obə́ra, bít íí màg Báátììkpɛ̀ŋá. Íí í' búúrì gbàákù, bít kàandə má, íí kè' Vɛnɛ́b nwɔŋ kə̀ tɛ́m làmkè Nwul Gìdń bìá.

⁷Kə̀ aakíin də, nɛ́b bagké bəraa Makedoniya yɛ́b bəroó, kə̀ aa bəraa Akaya yɛ́b bərə tá, bə̀ mà' kìínmbə̀ aí kíin.

⁸Éèn Báátììkpɛ̀ŋ Vɛnɛ́b nwɔŋ vúgà aí kàrú, Makedoniya yɛ́b ba, bít kə̀ Akaya yɛ́b bə̀ ní gá. Zá nɛ́b bəd bə̀ kìì tɛ́mbagké íí aa Vɛnɛ́b bərə nwɔŋ oò yàá, zɔ̀ŋ gə́ kóólé. Obə́ gə́, bə́ í' nwɔŋ aarə gáàmbə̀ sé.

⁹Boò kóólé, bə̀ ùd bə́ nɛɛ̀n aa íí kè' bə́ rú, nɛɛ̀n aa íí dàà vɔɔm dú, íí bí'à núù Vɛnɛ́b naú, bɔbm̀ ma'ǹmbə̀ Vɛnɛ́b galə̀ bít Vɛnɛ́b vɛ́nà bə̀ tù' roó.

¹⁰Bə́ŋyée kùm íí tə́ Vɛnɛ́b Wàà aa dáà yaànnà lɛgə́ paà rə nwánàá. Vɛnɛ́b wàà rə, Yéésù aa Vɛnɛ́b díímə̀ valə́ roó, aa dá bə́n súùn Vɛnɛ́b nɔ̀m aa dáà yaànnà númú rə rú roó.