Read Samba Leko 1 Tesalonika 2 Bible Online

1 Tesalonika 2 - Samba Leko bible

1 Tesalonika 2

¹Ɔ̀dkudvɛɛ̀l mə́ í'sɛ̀lbə̀ bərá, íí gàb yàá sɔ̀ɔ̀nkè kə̀ yíl aí bìá, dááke bə́ aa aí kàrú yée, tɛdńní sé.

²Íí gàb yàá, sɛŋ aa báà yaànnà aí səǹ də, bə̀ í' bə́ búúd, Filipiya bìlú, bít bə̀ dúl bə́ kúnú. Zá Vɛnɛ́b gə́, kpɛ́ŋ bə́ tɛ́m, bɔ̀b báà bàà ii *Nwɔŋ Puu Sɔ̀ɔ̀nkè aa vúgà oò naà roó, kóó nə́gə̀d zùúm bərú.

³Nwɔŋ aa dɛ̀d bə́ ùri yérə, gúsuúm tɛdń gá, sínkɔ̀ inselké vaksə́ gá. Bə́ sàà nɛ́b bəd záàn lɛ́'ǹmbə̀ gá kɔ̀.

⁴Zá bə́ gám nwɔŋ kìínmbə̀ nɛɛ̀n aa Vɛnɛ́b í' rə kíin. Kàandə, də́' ɛ̀g bə́ kúnú, bít pii bə́ Nwɔŋ Puu Sɔ̀ɔ̀nkè oòra. Bə́ sàà aa dá nɛ́b bəd sɔ̀ɔ̀n də gá, zá bə́ sàà Vɛnɛ́b aa tə́ inselké bə́ tɛ́mú bə̀ ɛgǹ kudǹ doó.

⁵Íí gàb yàá, gám bə́ bèri nwɔŋ kə̀ gú' làmkè sé. Nwɔŋ aa bə́ gám yérə, bə́ í' ba' bɔbm̀bə̀ aí naà gá. Vɛnɛ́b kùmsə̀n sedako bə́ ra!

⁶Bə́ sàà kaŋsɛ́l nɛ́ŋə̀ nə́ŋ̀má naà sé, aí naà sé, sínkɔ̀ nɛ́b kambəd naà sé.

⁷Kàandə má, bá ii kíìn báàn gbà'á bə́ i'ǹmbìá, kìínmbə̀ *Yéésù Krístù gbantumsə̀ kíin. Aa kàn nɛɛ̀n də, bə́ kùm kə̀ tɛ́m ɔ̀gkeá, sɛŋ aa bə́ aí kàrú roó, kìínmbə̀ wàà nuù tə́ yɛb oò bəd nwáàn də kíin.

⁸Í'sɛ̀l aa bə́ kə̀ aí rə, bə́ í' ii *Nwɔŋ Puu Sɔ̀ɔ̀nkè aa vúgà Vɛnɛ́b naà rə baànmbə̀ ní gá. Zá bə́ í' ii gɔ̀ŋsə́ bə́ piìnmbə̀ kɔ̀. Obə́ gə́, í'sɛ̀l bə́ ká' kàn nɛɛ̀nì aí yílú gbàákù!

⁹Ɔ̀dkudvɛɛ̀l mə́ í'sɛ̀lbə̀ bərá, sèl íí zá' nɛɛ̀n aa bə́ mà' tù' rú rəì vɛ́nà, bít bə́ mú' kə̀ tù' kpɛŋké ma'ǹmbìá' bə́ mà' tù' tígə́l kə̀ nyàámbərə̀ tá, bɔ̀b báà pii nɛ́ŋə̀ nə́ŋ̀má aí tə́ŋú tù' sí, sɛŋ aa bə́ tə́ *Nwɔŋ Puu Sɔ̀ɔ̀nkè aa vúgà Vɛnɛ́b naà rə baàn bəroó.

¹⁰Aíra íí kùmsə̀n sedako bə́ bərá, íí kə̀ Vɛnɛ́b tá, nɛɛ̀n aa bə́ kùm dú kə̀ aí, íí nɛ́b bagké bəd doó' bə́ kùm kə̀ nyɛdkèá, kə̀ wɔ̀ɔ̀làá, bít bə̀ bɔ̀b in nə́ŋ̀má obə́ bə̀ álǹmbə̀ bə sé.

¹¹Íí gàb yàá, bə́ kùm kə̀ kóó nɛ́ɛ̀réè aí tə́ŋú, kìínmbə̀ wàà bóò tə́ kə̀ yɛb oò bəd kíin.

¹²Bə́ pii ii váàndoá, bít bə́ kpɛ́ŋi kúnú, bə́ nyɛ̀m Vɛnɛ́b kə̀ váàndoá, bɔ̀b ìì kùm kìínmbə̀ nɛɛ̀n aa Vɛnɛ́b í' rə kíìn. Oòra tə́ ii sə̀n dɛràá, bɔ̀b ìì bɔ̀b gààd bəǹ da, kə̀ kaŋsɛ́l laa nyɛdkè bəǹ da.

¹³Nwɔŋ ɔ̀ɔ̀raa bə́ dàà Vɛnɛ́b mɔ̀'ǹmbə̀ síndə, sɛŋ aa bə́ ùri Vɛnɛ́b nwɔŋ də, íí kìì yàá, bít íí kè' kìínmbə̀ nɛ́ŋə̀ nwɔŋ kíin sé. Zá íí kè' kìínmbə̀ Vɛnɛ́b nwɔŋ kíin; aarə tə́ vɛ́nà. Kə̀ aakíin də, oòrə mà' tù' tə́ nɛ́b aa íí tə́ bagǹ də tɛ́mú.

¹⁴Kàandə, ɔ̀dkudvɛɛ̀l mə́ bərá, íí taà búúd luùm aarə rú ní, kìínmbə̀ *Eklisiya Yahudiya yɛ́b bə bə̀ bəd kíin. Boò rə, bə̀ kùmsə̀n Vɛnɛ́b nɛ́b bərá, bít bə̀ tə́ Yéésù Krístù bagàá. Nɛ́b íí bəd í' ii sə̀n búúrá, kìínmbə̀ nɛ́b kam bəraa *Yahudu bəd í' bə̀ búúd də kíin.

¹⁵Nɛ́b aa yée, boò ra bə̀ lò' sə̀n Báátììkpɛ̀ŋ Yéésù ra, kə̀ *Vɛnɛ́b gbantumsə̀ bərá, bít bə̀ tɔ̀gə̀d bə́ sùnú. Bə̀ sɔ̀ɔ̀n Vɛnɛ́b sé, bít bə̀ kùmsə̀n nɛ́b bəd kóólé ɔ̀dmáàná!

¹⁶Bə̀ tə́ nɔŋ̀ obə́ bə̀ daŋ̀mbə̀, báà bàà nɛ́b aa bàg Vɛnɛ́b síndə nwɔŋ aa dá bə̀ súùn də sí. Kə̀ aakíin də, bə̀ tə́ invaksə́ aa bə̀ mà' sɛŋ gə́ kóólé rə ɔ̀d ma'ǹ zəgàá. Zá yaà dá bɛ́dǹ kə̀ naà gə́, Vɛnɛ́b nɔ̀m yaà pí'ì boò yílú.

¹⁷Obə́ gə́, ɔ̀dkudvɛɛ̀l bərá, sɛŋ aa bə́n pɛdǹ sɛŋ zɔ̀gɔ̀ rə, bə́n pɛdǹ kə̀ núùá, zá tɛ́mú gə́, bə́n tə́ən ɔ̀dba. Bə́ í' aí bə̀ bídǹ dáàn bé'ǹmbìá. Kə̀ taàbìá, bə́ nɔ̀ŋ taà, bɔ̀b bíd dá báà bé' ii kúnú.

¹⁸Bə́ í' kidǹ bídǹmbə̀ aí kàrú. Máára mə́ Pol la, sɛŋ zùúm, mə́ nɔ̀ŋ taà dáànmbìá, zá *Satan dàŋ bə́ yàá.

¹⁹Kə̀ aakíin də, aíra íí kùmsə̀n tɛ́mzígke bə́ra, tɛ́mlàmkè bə́ra, bít kə̀ mə̀ə̀lə̀ aa bá báàn kùlə́ ma'ǹmbə̀ kə̀ kùrú, sɛŋ aa Báá bə́n Tììkpɛ̀ŋ Yéésù Krístù dáà bídǹnà bəroó.

²⁰Èè, aíra íí kùmsə̀n kaŋsɛ́l bə́ra, bít kə̀ tɛ́mlàmkè bə́ ra!