Read Samba Leko 1 Tesalonika 3 Bible Online

1 Tesalonika 3 - Samba Leko bible

1 Tesalonika 3

¹Yaà dá bɛ́dǹ kə̀ naà rə, bə́ bán nwánke aarə sidǹmbə̀ sɔ̀ŋ sé. Kàanyée gə́, sèè bə́ pà' kuùmbə̀ Atena bìlú ní,

²bít bə́ tùm Timote, ɔ̀dkudvɛɛ̀l bə́ aa mà' Vɛnɛ́b tù' kə̀ obə́ tə́ roó, dá oò bàà *Nwɔŋ Puu Sɔ̀ɔ̀nkè Krístù bìá. Bə́ tùmə̀ rə, dá oò kpɛ́ŋi tɛ́mbagké íí rú;

³bɔ̀b nɛ́ŋə̀ nə́ŋ̀má aí tə́ŋú, oò dàà boò í'ù búúd luùm aa bə́n tə́ən í'ǹ bə́ŋyée sí. Íí gàb yàá kə̀ yíl aí bìá, búúd luùm bəraa rə, bə̀ tə́ in bəraa Vɛnɛ́b zíg obə́n bə̀ rə tə́ŋú.

⁴Kə̀ aakíin də, sɛŋ aa bə́ kùmà kə̀ aí tə́ rə, mə́ bàà ii gə́, bá n búúd kíìn í'nàá; aarə yaà wə́ə́ taá, aí kɔ̀ íí gàbì sɔ̀ɔ̀nkè.

⁵Kə̀ taàbìá, mə́ bán nwánke aarə sidǹmbə̀ gá yée gə́, mə́ tùm taà Timote dá oò ɛ̀g nɛɛ̀n aa tɛ́mbagké íí kùm dú roó. Mə́ zíg tɛ́m Sámbàŋyɛ́rə̀ də́' oò ɛ̀gi sí, bít tùsaa bə́ mà' rə, oò bíl tù' tɛdń sí.

⁶Zá bə́ŋyée, Timote bírà aí kàrú rə, bít àà báà nwɔŋ sɔ̀ɔ̀nkè aí bə̀ tɛ́mbagké rú, bít kə̀ í'sɛ̀l aí bìá. Bàà bə́ gə́, sɛŋ gə́ kóólé, íí zíg inselké íí tə́ obə́ ba, kə̀ í'sɛ̀lá, bít íí í' bə́ tə́ bé'ǹmbə̀ kìínmbə̀ nɛɛ̀n aa obə́ kɔ̀ bə́ í' ii bé'ǹmbə̀ rə kíin.

⁷Kə̀ aakíin də, ɔ̀dkudvɛɛ̀l bərá, sɛŋ aa bə́ tə́ búúrú, kə̀ nwuukè bərú rə, tɛ́mbagké aí bə̀ pii bə́ sə̀n váàndoá.

⁸Zá íí kùm və̀'kè kə̀ wálke aí bə̀ kə̀ Báátììkpɛ̀ŋ yée gə́, obə́ kɔ̀ bə́ŋyée bə́ tə́ taà kuùm kə̀ gɔ̀ŋsá.

⁹Bə́ tə́ kə̀ tɛ́m làmkè gbà'á, Vɛnɛ́b númú, aí bòórú. Bə́ mɔ̀' Vɛnɛ́bì gbàákù, tɛ́m làmkè aa bə́ tə́ bɔbm̀ aí yílə́ rə bòórú.

¹⁰Tígə́l kə̀ nyàámbərə̀ tá, bə́ tə́ Vɛnɛ́b nyɛɛ̀m kə̀ váàndoá, bɔ̀b oò pii bə́ kpaŋ̀ bíd báà bé' ii kə̀ yíl obə́ bìá, bɔ̀b piìn zəgǹmbə̀ aí bə̀ in aa nyɛ́d tɛ́mbagké íí rú roó; bɔ̀b tɛ́mbagké íí oò bɔ̀b kpɛŋsɛ́lá.

¹¹Báá bə́n Vɛnɛ́b kə̀ yíl oò bìá, kə̀ Báá bə́n Tììkpɛ̀ŋ Yéésù tá, boò kùd bə́n səǹ kpaŋ̀á, bɔ̀b dá báà bé' ii kúnú!

¹²Mə́ nyɛ̀m Báátììkpɛ̀ŋ oò mà', bɔ̀b í'sɛ̀l aa íí kə̀ ɔ̀dnə́ŋ̀ bəd íí bòdba, bít kə̀ nɛ́b bəd kóólé rə, kàŋ oò dáá númú, kə̀ í'sɛ̀l aa bə́ kə̀ aí rə kíin.

¹³Kə̀ aakíin də, dá tɛ́m íí bəd kpɛŋsɛ́l piinàá, íí dá kuùm *gìdńná, bít invaksə́ nə́ŋ̀má íí kùm kə̀ naà Báá bə́n Vɛnɛ́b númú gá; sɛŋ aa Báá bə́n Tììkpɛ̀ŋ Yéésù dáà bídǹnà bə, kə̀ nɛ́b *gìdń oò bəd tə́ kóólé roó.