Read Samba Leko 1 Tesalonika 4 Bible Online

1 Tesalonika 4 - Samba Leko bible

1 Tesalonika 4

¹Bítsɔ̀ŋ, ɔ̀dkudvɛɛ̀l bərá, bə́ sán iiyà, nɛɛ̀n aa íí dá kuùm dú, dá Vɛnɛ́b sɔɔ̀n dú roó. Bít íí kùm tə́ kə̀ nɛɛ̀n aarə kíin. Zá bə́ŋyée bə́ tə́ ii kíìn dɛràá, bít bə́ tə́ ii nyɛɛ̀m Báátììkpɛ̀ŋ Yéésù nə́gə́lú' ìì mà' sɔ̀ɔ̀n oò kàn aarə sɔ̀ŋ.

²Kə̀ aakíin də, íí gàb insánke aa bə́ pii iiyà Báátììkpɛ̀ŋ Yéésù nə́gə́lə́ rə yàá.

³Aa yée in aa Vɛnɛ́b í' roó' Vɛnɛ́b í' ìì kùm *gìdńná, bít ìì gú' yíl aí bə̀ kə̀ invaksə́ kilə̀ bə̀ wáàlǹná.

⁴Kóó nɛ́ɛ̀réè, aí tə́ŋú, oò gàb kéèn oò pa'ǹmbə̀ kə̀ nɛɛ̀n aa dá kuùm dú *gìdń doó, kə̀ ɔ̀dnə́ŋ̀ káŋ̀mbìá,

⁵bít oò dàà inlɛ'kè vaksə́ tɛ́m bə bə̀ oò ləə gààd oò yílə́, kìínmbə̀ nɛ́b aa bə̀ bàg Vɛnɛ́b síndə kíin sí.

⁶Kóó nɛ́ŋə̀ nə́ŋ̀má oò mà' ɔ̀dkudvɛɛ̀l oò invaksə́ sí, sínkɔ̀ oò yɛ̀l ɔ̀dkudvɛɛ̀l oò in aa kə̀ naà rə sí. Kàandə, Báátììkpɛ̀ŋ dá nɛ́b aa bə̀ tə́ in luùm bəraa ma'ǹ də búúd í'nàá, kə̀ nɛɛ̀n aa bə́ bàà iiyà rú, bít gbád bə́ bàà iiyà rú nyɛdkè rə kíin.

⁷Kə̀ aakíin də, Vɛnɛ́b dɛ̀d bə́nnà báà kuùm invaksə́ kilə̀ bə̀ wáàl lú sí, zá báà kuùm *gìdńná.

⁸Kə̀ taàbìá, nɛ́ŋə̀ aa là' lɛ́' insánke aarə, là' lɛ́' nɛ́ŋə̀ gá, zá là' lɛ́' Vɛnɛ́b aa tə́ ii Nwul Gìdń oò piìn doó.

⁹Íí sàà boò bári núúboòd í'sɛ̀l nwɔŋ ɔ̀dkudvɛɛ̀l bəd tə́ŋə́ gá; kə̀ aakíin də, kə̀ yíl aí bìá, Vɛnɛ́b sán ii nɛɛ̀n aa íí dá ɔ̀dnə́ŋ̀ bəd í'ǹ dú aí bòdbə rə yàá.

¹⁰Simá, íí mà' tə́ kə̀ aarə kíin, kə̀ ɔ̀dkudvɛɛ̀l Krístù bə̀ bəraa Makedoniya yɛ́b bərə kóólé. Zá bə́ tə́ ii kíìn nyɛmàá, ìì mà' sɔ̀ɔ̀n oò kàn aarə kíìn sɔ̀ŋ.

¹¹Ìì nɔ̀ŋ kuùmbə̀ kə̀ tɛbàá, ìì pìì nɛ́ŋə̀ nwɔŋú sí, bít ìì zàn yíl íí kə̀ yíl aí bə̀ ní, kìínmbə̀ nɛɛ̀n aa bə́ bàà ii rə kíin.

¹²Kə̀ aakíin də, kumsɛ́l aí bə̀ dá taà nɛ́b aa bàg Vɛnɛ́b síndə sɔɔnàá, bít íí bán taà kuùmbə̀ nɛ́ŋə̀ nə́ŋ̀ dùù gá.

¹³Ɔ̀dkudvɛɛ̀l bərá, bə́ í' ìì gàb vɛ́nà nɛ́b aa val kòd bə̀ rə yílú, bɔ̀b ìì kùm kə̀ tɛ́m nwuukè kìínmbə̀ nɛ́b kam bəraa bə̀ kə̀ tɛ́m zígke naà síndə kíin sí.

¹⁴Kàandə, dáà bə́n ke'ǹ yàá, val kò' Yéésù yàá, bít díímì valə́ gə́, nɛɛ̀n aarə rú, bə́n ke'ǹ yàá, nɛ́b aa bə̀ bàg Yéésù rə, val kòd bə̀ì gə́, Vɛnɛ́b dá bə̀ díìm valú kə̀ Yéésù kíin.

¹⁵Kə̀ aakíin də, aa yée nwɔŋ aa bə́ tə́ ii baàn, nɛɛ̀n aa insánke Báátììkpɛ̀ŋ bə̀ bàà rú roó' nɛ́b aa báan báàn kuùmbə̀ kə̀ gɔ̀ŋsá, sɛŋ aa Báátììkpɛ̀ŋ dáà bídǹnà bərə, gbád bə́n ɛɛ̀m lɛgə́ paà kə̀ nɛ́b aa val kòd bə̀ rə gá.

¹⁶Kàandə, Vɛnɛ́b kə̀ yíl oò bìá, dɛ̀d nwɔŋì gə́, *malaika bəd gààd dɛ̀d nwɔŋ yàá, bít Vɛnɛ́b íl yaa gàsì gə́, Báátììkpɛ̀ŋ lɛgə́ paà bə̀ kə̀ yíl oò bə̀ má dáà kíìn símàá' nɛ́b aa bə̀ bàg Krístù rə, éèn sɔ̀d bə̀ dá sə̀n díìm valú;

¹⁷bít nɛ́b aa báan kuùm kə̀ gɔ̀ŋsə́ sɛŋ aarə bərə, pà' bə̀ dá bə́n ná'ǹ lɛgú, mɔbú, bɔ̀b dáàn sáŋ̀mbə̀ kə̀ Báátììkpɛ̀ŋ nwulú. Bít kə̀ aakíin də, sɛŋ gə́ kóólé, báan kuùm kə̀ Báátììkpɛ̀ŋ tá.

¹⁸Ìì pii ɔ̀dnə́ŋ̀ bəd kpɛŋsɛ́l aí bòdbə kə̀ insánke bəraa roó.