Read Samba Leko 1 Tesalonika 5 Bible Online

1 Tesalonika 5 - Samba Leko bible

1 Tesalonika 5

¹Ɔ̀dkudvɛɛ̀l í'sɛ̀lbə̀ bərá, íí sàà boò bári núúboòd sɛŋ aa taà rə yílə́ sé, kə̀ sɛŋ bəraa in bəraa dá taàn dú rə yílə́ sé.

²Kàandə, íí gàb yàá sɔ̀ɔ̀nkè kə̀ yíl aí bìá, sɛŋ aa Báátììkpɛ̀ŋ dáà yaànà bərə, nɛ́ŋə̀ gàb gá, kìínmbə̀ lííro tóò yaànà tígə́lə́ rə kíin.

³Sɛŋ aa nɛ́b bəd dá baàn: «In gə́ kóólé, tə́ kə̀ tɛbàá, bít gbò'kè nə́ŋ̀má síndə,» kə̀ nwɔŋ aa nuù yée kíinní, bə̀ dá bə̀ kíìn bɔ̀'nàá. Nwuukè boò rə, dá kuùm kìínmbə̀ nwuukè aa bɔ̀b sáá nɛ́ŋ kéèndo bàgə̀l bə̀ rə kíin, bə̀ bán nuùn súùnmbə̀ nwuukè aarə rú gá.

⁴Zá aí gə́, ɔ̀dkudvɛɛ̀l bərá, íí kùm zɔ̀ŋ diíŋdo bə sé, bít nyàm aarə oò nyíri kìínmbə̀ lííro kíin sí.

⁵Kə̀ aakíin də, íí kóólé íí yɛb zɔ̀ŋ nyɛdkè rú bə̀ bərá, íí yɛb nyàámbərə̀ bə̀ bərá. Bə́n nɛ́b tígə́lú bə̀ bəd gá, sínkɔ̀ bə́n nɛ́b zɔ̀ŋ diíŋdo rú bə̀ bəd gá.

⁶Kə̀ aakíin də, báà ləə̀n ləəm kìínmbə̀ nɛ́b kam kíin sí; zá kùm báà nwáàn kúnú, bít nyəə báà widǹ badn sí.

⁷Tígə́lú, nɛ́ŋə̀ ləə taà ləəmá, bít tígə́lú, nɛ́ŋə̀ nyəə wìd taà badnná.

⁸Zá obə́n gə́, bə́n nɛ́b nyàámbərə̀ bə̀ bərá, bít nyəə báà widǹ badn sí. Tɛ́mbagké kə̀ í'sɛ̀l tá, boò kùm kə̀ pán kíin, obə́n naú, bít tɛ́m zígke súúke bə̀ kɔ̀, oò kùm kìínmbə̀ gɔ̀' yílə́ bə̀ aa bə̀ kùd kə̀ ba' rə kíin.

⁹Kə̀ aakíin də, Vɛnɛ́b zíg bə́n, báà í'ǹ búúd nɔ̀m oò rú sí, zá báà bɔbm̀ súúke kə̀ Báá bə́n Tììkpɛ̀ŋ Yéésù Krístù ra.

¹⁰Kàandə, val kò' Krístù obə́n bòórú, bɔ̀b sɛŋ aa dáà yaànà bərə, kóó báà kuùm kə̀ gɔ̀ŋsá, sínkɔ̀ val oò kò' bə́n kúnú, báà kuùm kə̀ oò tá.

¹¹Kə̀ aakíin də, ìì pii ɔ̀dnə́ŋ̀ váàndo íí bòdba, bít ìì kpɛ́ŋ ɔ̀dnə́ŋ̀ bərá, kìínmbə̀ nɛɛ̀n aa íí tə́ ma'ǹ dú bə́ŋyée rə kíin.

¹²Ɔ̀dkudvɛɛ̀l mə́ í'sɛ̀lbə̀ bərá, bə́ tə́ ii kíìn nyɛmàá, ìì káŋ nɛ́b aa bə̀ tə́ tù' ma'ǹ aí tə́ŋə́ roó, nɛ́b bəraa Báátììkpɛ̀ŋ sààvúŋ bə̀, bɔ̀b boò ì' ii kpaŋ̀á, bít boò tɔ̀gi kíìn doó.

¹³Ìì káŋ bə̀ kúnú, ìì í' bə̀ tùsaa bə̀ tə́ ma'ǹ aí tə́ŋə́ rə bòórú, ìì kùm kə̀ tɛbə̀ íí bòdba.

¹⁴Ɔ̀dkudvɛɛ̀l mə́ í'sɛ̀lbə̀ bərá, bə́ tə́ ii kíìn nyɛmàá' ìì tɔ̀g nɛ́b murə̀ bə̀ bərá, ìì pii nɛ́b aa kə̀ váàndo naà síndə váàndoá, ìì láŋ nɛ́b vɛɛmké bərá, ìì kùm kə̀ tɛ́m sidké kə̀ nɛ́b bəd gə́ kóólé.

¹⁵Ìì gú' yíl íí ra, bɔ̀b kóó nɛ́ŋə̀ nə́ŋ̀má oò bí' ɔ̀dnə́ŋ̀ invaksə́ kə̀ invaksə́ sí, zá ìì sàà sɛŋ gə́ kóólé, insɔ̀ɔ̀nkè ma'ǹmbə̀ íí bòdba, bít kə̀ nɛ́b bəd kóólé.

¹⁶Ìì kùm sɛŋ gə́ kóólé kə̀ tɛ́m làmkèá,

¹⁷ìì dàà Vɛnɛ́b nyɛɛ̀mbə̀ sí.

¹⁸Sɛŋ gə́ kóólé, ìì mɔ̀' Vɛnɛ́b in gə́ kóólé yílú; aa yée in aa Vɛnɛ́b dɛ̀d aí naà roó, aí gɔ̀ŋsə́ rú, kə̀ wálke kə̀ Yéésù Krístù ra.

¹⁹Ìì mà' in aa dá Nwul Gìdń tù' daŋ̀ də sí.

²⁰Ɛ̀g ìì gɔ̀n nwɔŋ aa vúgà Vɛnɛ́b naà rə sí.

²¹Zá ɛ̀g ìì kùd in gə́ kóólé' ìì kò' in aa tə́ sɔ̀ɔ̀nkè roó,

²²bít ìì dìì zɔ̀ŋ bùúrá, kə̀ invaksə́ gə́ kóólé.

²³Mə́ nyɛ̀m Vɛnɛ́b aa tə́ ii tɛbə̀ piìn də, oò bí' ii *gìdńná, oò nwáni kúnú, oò nwán nwul íí ra, nyì' íí ra, kə̀ si' íí ra, lígə́d oò kùm bə sí; sɛŋ aa Báátììkpɛ̀ŋ Yéésù Krístù dáà bídǹnà bərə bìá.

²⁴Màn aa dɛ̀riyà bə̀ yaà ìì kùm kə̀ obəǹ tə́ rə, dá in aarə kíìn ma'nàá; kàandə, oòrə nɛ́d tù' bə̀ ma'ǹ sɔ̀ɔ̀ná.

²⁵Ɔ̀dkudvɛɛ̀l bərá, ìì nyɛ̀m Vɛnɛ́b obə́ yílú kɔ̀.

²⁶Ìì dɔ̀m ɔ̀dkudvɛɛ̀l bəraa wərə̀ rə gə́ kóólé, dɔ̀m ìì pà' ɔ̀dnə́ŋ̀ naú.

²⁷Mə́ tə́ ii nɛɛ̀m taŋ̀ Báátììkpɛ̀ŋ nə́gə́lú, ìì gád núúboòraa yée kə̀ zɔ̀ŋtá, ɔ̀dkudvɛɛ̀l bəd gə́ kóólé númú.

²⁸Mə́ nyɛ̀m pə̀dkè Báá bə́n Tììkpɛ̀ŋ Yéésù Krístù bə̀ oò kùm kə̀ aí tá.