Read Samba Leko 2 Tesalonika 1 Bible Online

2 Tesalonika 1 - Samba Leko bible

2 Tesalonika 1

¹Núúboòraa vúgà máá mə́ Pol naú, Silas naú, kə̀ Timote naú. Bád bə́ pii *Eklisiya bəraa Tesalonika bìlə́ roó, Báá bə́n Vɛnɛ́b nɛ́b bərá, bít Báátììkpɛ̀ŋ Yéésù Krístù nɛ́b bərá.

²Bə́ dɔ̀m ii yàá. Bə́ nyɛ̀m Vɛnɛ́b, kə̀ Báátììkpɛ̀ŋ Yéésù Krístù tá, boò mà' ii pə̀dkèá, bít boò pii ii tɛbàá.

³Ɔ̀dkudvɛɛ̀l í'sɛ̀lbə̀ bərá, aa dá sɔɔ̀n də gə́, báà dìì Vɛnɛ́b mɔ̀'ǹmbə̀ aí yílú. Aarə tə́ wɔ̀ɔ̀lə̀ sɔ̀ɔ̀nkè, báà mà' kúnú. Kàandə, tɛ́mbagké íí kàŋ ɛ̀m tə́ númú gbàákù. Bít í'sɛ̀l aa íí kə̀ ɔ̀dnə́ŋ̀ bəd íí bòdbə rə, kàŋ ɛ̀m tə́ númú.

⁴Kə̀ taàbìá, bə́ tə́ taà kùlə́ ma'ǹ kə̀ aíra, *Eklisiya bəd tə́ŋú, nɛɛ̀n aa íí tə́ diìn sɔ̀ɔ̀nkè ma'ǹmbə̀ rə bòórú, bít nɛɛ̀n aa íí tə́ diìn və̀'kè tɛ́mbagké rú, búúd bəraa íí tə́ bé'ǹ də rú roó.

⁵Aarə kùmsə̀n in aa ì' gə́, Vɛnɛ́b dá fágə́n oò ma'ǹ kə̀ wɔ̀ɔ̀lə̀ roó. Kàandə, in aa íí tə́ sidǹ kóólé roó, íí dákíìn də́ŋ̀ kuùmbə̀ gààd oò aa íí tə́ búúd bé'ǹ oò bòórú rə rú.

⁶Kə̀ aakíin də, Vɛnɛ́b mà' dá in aa tə́ wɔ̀ɔ̀lə̀ rə kíìn bɛ́'nàá, dá nɛ́b aa bə̀ tə́ ii búúd í'ǹ də búúd í'nàá;

⁷bít dá ii tɛbə̀ piinàá, nɛ́b aa íí tə́ búúd í'ǹ doó, bít dá bə́ tɛbə̀ piìn kɔ̀. In aarə dá taàn sɛŋ aa Báátììkpɛ̀ŋ Yéésù dáà vúgǹnà bə lɛgə́ paà, kə̀ *malaika kpɛŋsɛ́l bə̀ oò bəd tə́ roó.

⁸Dáà síìmmà lɛgə́ poú, laa yɛ̀ɛ́lú, yaà dá nɛ́b aa kè' Vɛnɛ́b nwɔŋ síndə búúd í'nàá, kə̀ nɛ́b aa ləə Báá bə́n Tììkpɛ̀ŋ Yéésù Krístù *Nwɔŋ Puu Sɔ̀ɔ̀nkè síndə tá.

⁹Bə̀ dá fágə́n aa bɛ́d bə gá rə bɔbàá. Bə̀ dá kuùm zɔ̀ŋ bùúd kə̀ Báátììkpɛ̀ŋá, bít bə̀ dá kuùm zɔ̀ŋ bùúd kə̀ kpɛŋsɛ́l kaŋsɛ́l laa nyɛdkè oò bìá.

¹⁰Sɛŋ aa dáà yaanà bərə, nɛ́b *gìdń oò bəd gə́ kóólé, bə̀ dáù kíìn káŋàá. Bít nɛ́b aa bə̀ tə́ù bagǹ də gə́ kóólé, bə̀ dáù ɛgǹ kə̀ í'sɛ̀lá. Aí kɔ̀ kə̀ yíl aí bìá, ìì kùm nɛ́b aarə tə́ŋú. Kàandə, íí kè' *Nwɔŋ Puu Sɔ̀ɔ̀nkè aa bə́ bàà ii rə yàá.

¹¹Kə̀ taàbìá, bə́ tə́ taà diìn Vɛnɛ́b nyɛɛ̀mbə̀ aí yílú. Bə́ tə́ Vɛnɛ́b bə́ dɛdǹ, oò mà' ii, bɔ̀b ìì də́ŋ kíìn kuùmbə̀ və̀'kè, gɔ̀ŋsə́ aa dɛ̀riyà rə rú. Kə̀ kpɛŋsɛ́l oòra, insɔ̀ɔ̀nkè bəraa íí sèl ma'ǹmbə̀ rə gə́ kóólé, oò ma'míìn kúnú, bít oò bí' tùsaa tɛ́mbagké íí tə́ ma'ǹ də nyɛdkèá.

¹²Kə̀ aakíin də, aíra íí dá sə̀n Báátììkpɛ̀ŋ Yéésù nə́gə́l káŋàá, bít aí kɔ̀ oòra dá ii sə̀n káŋàá. In bəraa rə kóólé, dá ma'míìn kə̀ pə̀dkè Vɛnɛ́b bə́n bìá, bít kə̀ pə̀dkè Báátììkpɛ̀ŋ Yéésù Krístù bìá.