Read Samba Leko 1 Timote 3 Bible Online

1 Timote 3 - Samba Leko bible

1 Timote 3

¹Nwɔŋ aa yée də́ŋì tɛ́m zígǹmbə̀ ba' Dáà nɛ́ŋə̀ nə́ŋ̀ í'ì kuùmbə̀ nɛ́b bagké bəd nɛ́d yíl bə̀ gə́, aarə í' tù' sɔ̀ɔ̀ná.

²Aa dá sɔɔ̀n də, nɛ́b yíl bə̀ gə́, boò bɔ̀b in nə́ŋ̀má oò bə̀ álǹmbə̀ bə sí. Oò kùm kə̀ kéèn nə́ŋ̀ní. Oò nyəə badn gbàákù sí. Oò kùm kə̀ inselké sɔ̀ɔ̀ná. Oò mà' in aa dáá síndə nɛ́b bəd tə́ŋə́ sí. Oò sí' sɛ̀ɛ́n bəd kúnú. Oò bán nɛ́b bəd in kíìn sáànmbə̀ sɔ̀ɔ̀nkè.

³Oò kùm nɛ́d wìdkè bə̀ sí, oò kùm nɛ́d nə́gə̀d bə̀ nə́'ǹ sí. Zá oò kùm nɛ́ŋə̀ ɔ̀gkeá, oò kùm nɛ́d álsɛ̀l bə̀ sí, sínkɔ̀ nɛ́ŋə̀ ba' bə̀ í'ǹ sí.

⁴Oò gàb kíìn ligə̀ oò nwáànmbə̀ sɔ̀ɔ̀nkè. Oò sán yɛb oò bəd boò ləə nwɔŋ oòra, boò káŋ̀ kúnú.

⁵Kàandə, nɛ́ŋə̀ bán ligə̀ oò ko'ǹmbə̀ síngə́, ééleè dá taà báàn Vɛnɛ́b *Eklisiya bəd nwáànmbə̀ gú?

⁶Tə́ nɛ́ŋə̀ aa bə́ŋ̀ sɔ̀g kíìn naà rə gə́, boò mà'ù oò kùm nɛ́d yíl bə̀ sí. Nɛ́ŋə̀ aarə, kamgə́, dá yíl pa'nàá, bít fág bə̀ dáù ko'ǹ kə̀ nɛɛ̀n aa fág bə̀ kò' Sámbàŋyɛ́rə̀ rə kíin.

⁷Aa dá sɔɔ̀n də, oò bɔ̀b nə́gə́l sɔ̀ɔ̀ná, nɛ́b aa bàg Yéésù síndə númú. Kàandə, bɔ̀b oò dàà sə́ə́mnúù sí. Kàan síngə́, dákíìn kɛ́ɛ̀m Sámbàŋyɛ́rə̀ zàŋwà rú.

⁸Diakre bəd, boò kùm nɛ́b yíl lə́ə́ke bə̀ bərá. Boò kùm nɛ́b gú' bàrə̀b bə̀ bəd sí, sínkɔ̀ nɛ́d badn zùúm bə̀ nyəə̀n sí. Bít boò í' basaa dá bə̀ sə́ə́mnúù piìn də sí.

⁹Kàandə, boò kò' *inmə́'ke aa Vɛnɛ́b vú' ì' bə́nnà tɛ́mbagké rú roó, kə̀ inselké nyɛdkèá.

¹⁰Aa dá sɔɔ̀n də, boò kɔ̀, nɛ́b bagké bəd də́' boò ɛ̀g bə̀ sína, bə̀ kə̀ invaksə́ naà síngə́ roó, bít bòórú gə́, boò páá bə̀ taà tùsú.

¹¹Nɛ́b aa bə̀ tə́ nɛ́ŋə̀ láŋ̀ bə nɛ́b bagké bəd tə́ŋə́ rə, kɛ́ɛ̀m boò bəd kɔ̀ boò nyəə badn gbàákù sí. Boò kùm nɛ́b kɛ́ɛ̀m yíl ləəkè bə̀ bərá, boò gám nwɔŋ vaksə́ ɔ̀dnə́ŋ̀ bəd yílə́ sí. Zá boò bán yíl boò kíìn nwáànmbìá, bít boò kùm nɛ́b bəraa nɛ́ŋə̀ dákíìn báàn tɛ́m zígǹmbə̀ boò bə, in gə́ kóólé rú roó.

¹²Diakre bəd gə́ kóólé, boò pà' kéèn nə́ŋ̀ní. Sɛŋ aarə bəní, boò nwán yɛb boò bəd kíìn sɔ̀ɔ̀nkè, kə̀ ligə̀ boò sɔ̀ɔ̀nkè.

¹³Kàandə, nɛ́b aa bə̀ tə́ nɛ́ŋə̀ láŋ̀ ba, bə̀ mà' tù' sɔ̀ɔ̀n də, wál bə̀ dá kuùm zɔ̀ŋ káŋke ba, kə̀ nɛ́b bagké bəd tá. Bít bə̀ dákíìn báàn nwɔŋ gáàmbə̀ kə̀ tɛ́m zígkeá, tɛ́mbagké rú, kə̀ wálke kə̀ Yéésù Krístù ra.

¹⁴Mə́ tə́ seèl ámbə̀ yaàn bé'ǹmbə̀ záàn zɔ̀gɔ̀. Zá mə́ wə́ə́ wərə̀ kə̀ báŋ síngə́, máá n núúboòraa yée báràá, bɔ̀b ǹ gàb nɛɛ̀n aa báá n kuùm dú Vɛnɛ́b kun bəd tə́ŋə́ rə kúnú. Boò gàb nɛɛ̀n aa bə̀ dá kuùm dú rə kúnú. Kàandə, nɛ́b kun bəraa rə, bə̀ kùmsə̀n Vɛnɛ́b galə̀ Eklisiya. *Eklisiya kùmsə̀n in bəraa kò', bít nwán vɛ́nà roó.

¹⁶Vɛ́nà, nɛ́ŋə̀ nə́ŋ̀má bánə̀ məə̀nmbə̀ gá. Tə́ gbà'á, *inmə́'ke Vɛnɛ́b bagǹmbə̀ bə́n bə̀ roó! Yaà ì' yíl oò kə̀ nɛ́ŋə̀ sisá. Nwul Gìdń ì' gə́, oò tə́ wɔ̀ɔ̀làá, bít *malaika bəd bé'ù yàá. Nɛ́b tù' bə̀ ma'ǹ oò bəd ùd nwɔŋ oò zɔ̀ŋə yɛ́b bə kóólé. Nɛ́b aa zɔ̀ŋə yɛ́b bərə kóólé, bə̀ bagə̀ yàá. Vɛnɛ́b pà' ná'ùwì lɛgə́ poú, kaŋsɛ́l laa nyɛdkè oò rú.