Read Samba Leko 1 Timote 4 Bible Online

1 Timote 4 - Samba Leko bible

1 Timote 4

¹Vɛnɛ́b Nwul Gìdń bààì nyɛdkè' nɛ́b kambəd lɛ́' bə̀ dá tɛ́mbagké boò kíìn daanàá, sɛŋ bəraa dá dugǹ kə̀ bòd doó. Bə̀ dá nwul gúsuúm bə̀ bəd insánke bagàá, boò ra bə̀ kùmsə̀n *malaika vaksə́ bərá.

²Insánke luùm bəraa rə, vúgà nɛ́b gú' bàrə̀b bə̀ bəd naú, bít kə̀ nɛ́b gúsuúm bə̀ bəd naú. Bə̀ tə́ baàn bənə́ tə́ənnə́ insánke vɛ́nà bə̀ i'nàá, bít tɛ́m boò bəd val yàá.

³Nɛ́b gúsuúm bə̀ bəraa rə, yaà bə̀ sán nɛ́b bəd gə́, bə̀ bàà sɔ̀ɔ̀n kéèn pa'ǹmbə̀ sé, bít bə̀ dàŋ tə́ kíìn inlíìnmbə̀ kambəd líìnmbìá. Zá Vɛnɛ́b séé inlíìnmbə̀ bəraa rə, bɔ̀b nɛ́b bagké bəraa bə̀ gàb vɛ́nà rə, boò líí kúnú, sɛŋ aa bə̀ nyɛ̀m Vɛnɛ́b, bɔ̀b oò bə̀ mɔ̀'ǹmbə̀ roó.

⁴In aa Vɛnɛ́b séé rə gə́ kóólé, insɔ̀ɔ̀ná, in nə́ŋ̀má laàn lɛ́'ǹmbə̀ sé. Zá báà ke'ǹ in bəraa rə kíìn kóólé, kə̀ Vɛnɛ́b mɔ̀'ǹmbìá.

⁵Kàandə, Vɛnɛ́b nwɔŋ, kə̀ Vɛnɛ́b nyɛɛ̀mbə̀, bí' sə̀n inlíìnmbə̀ bəraa rə *gìdń Vɛnɛ́b naú.

⁶Dáà ń pii ɔ̀dkudvɛɛ̀l ń í'sɛ̀lbə̀ bəd insánke aa ìì gə́, ń nɛ́d Yéésù Krístù tù' sɔ̀ɔ̀n bə̀ ma'ǹná. Ń dá diìn gɔ̀ŋsə́ ń záànmbə̀ kə̀ insánke sɔ̀ɔ̀n aa ɛ̀g tɛ́mbagké bə́n Yéésù Krístù rú roó, kə̀ insánke vɛ́nà bìá, bít kə̀ insánke aa ń bàg sɛŋ gə́ kóólé doó.

⁷Zá súúsu tɛdń bəraa nɛ́b bəd tə́ udǹ yérə, lɛ́' ǹ dàà kúnú. Ǹ sán kuùmbə̀ kìínmbə̀ nɛɛ̀n aa Vɛnɛ́b í' ǹ kùm dú rə kíin.

⁸Insánán sisú bə̀ tə́ sɔ̀ɔ̀ní zɔ̀gɔ̀. Zá kuùmbə̀ kə̀ nɛɛ̀n aa Vɛnɛ́b í' ìì kùm də kíin də, sɔ̀ɔ̀n kàn sə̀n in gə́ kóólé. Kàandə, Vɛnɛ́b bàà dàà gə́, báan gɔ̀ŋsə́ aa bə́ŋyée rə bɔbàá, bít kə̀ gɔ̀ŋsə́ *Gìdń aa dáà yaànnà númú roó.

⁹Nwɔŋ aa yée də́ŋì tɛ́m zígǹmbə̀ ba, bít kóó nɛ́ɛ̀réè oò kè' kúnú.

¹⁰Kàandə, dáà bə́n tə́ən tù' ma'nàá, bít bə́n tə́ən nɔŋ̀ gə́, aarə bə́n zígǹ tɛ́m bə́n tə́ Vɛnɛ́b galə̀ ba. Oòra kùmsə̀n Nɛ́d Nɛ́ŋə̀ bə̀ Súùn nɛ́b bəd kóólé bìá, aa kàn nɛɛ̀n də, nɛ́b bagké bərá.

¹¹Ǹ bàà nɛ́b bagké bəd nwɔŋ aa yóo, bít ǹ dìì bə̀ sáànmbìá.

¹²Ǹ dàà nɛ́ŋə̀ nə́ŋ̀má oò ná' n sí. Kàandə, bə́ŋ̀ ń tə́ wàà də̀bá. Aa dá sɔɔ̀n də, ǹ kùm nɛ́b bagké bəd kóólé in də́'ke boò ra, kə̀ nwɔŋ gámke ń da, kə̀ tù' ń da, kə̀ í'sɛ̀l ń da, kə̀ tɛ́mbagkéá, bít kə̀ nyɛdkè ń da.

¹³Yaà máá wə́ə̀n naà gə́, ǹ nɔ̀ŋ Núúboòd Gìdń gádǹmbə̀ nɛ́b bəd tə́ŋú, ǹ ùd bə̀ bít ǹ sán bə̀ Vɛnɛ́b nwɔŋá.

¹⁴Yid ǹ bɔ̀m tù' ma'ǹmbə̀ kə̀ in tɛdńní bə̀ aa ń kə̀ naà rə sí. In tɛdńní bə̀ aarə, ḿ bɔ̀bà kə̀ nwɔŋ aa vúgà Vɛnɛ́b naà roó, sɛŋ aa *dam bəd gə̀b zíg n nɛɛ̀n yílə́ roó.

¹⁵Aa yée nwɔŋ aa ń dá ko'ǹ ám tɛ́mú roó, bít in aa ń dá diìn ma'ǹmbə̀ roó. Kə̀ aakíin, tù' ń bəd dá taà ɛɛ̀m númú, bít dá bé'míìn nɛ́b bəd kóólé núùrú.

¹⁶Ǹ nwán yíl ń da, kə̀ insánke ń tá. Ǹ dìì tù' sɔ̀ɔ̀nkè bəd ma'ǹmbə̀ ní. Ń mà'ì kə̀ aakíin gə́, ń dá yíl ń kíìn súúnàá, kə̀ nɛ́b aa tə́ən kiìn də tə́ kóólé.