Read Samba Leko 1 Timote 5 Bible Online

1 Timote 5 - Samba Leko bible

1 Timote 5

¹Ǹ ál nɛ́d dooro kə̀ kpɛŋsɛ́l sí. Zá ǹ gámə̀ nwɔŋ kìínmbə̀ báá ḿ kíni. Ǹ ál yɛb vɔ̀ɔ̀m də̀b bəd kìínmbə̀ ɔ̀dkudvɛɛ̀l ń í'sɛ̀lbə̀ bəd kíni.

²Nɛ́b kɛ́ɛ̀m dooro bəd kɔ̀, ǹ kò' bə̀ kìínmbə̀ nà'ám bəd kíin; yɛb kɛ́ɛ̀m bèlzá bəd kɔ̀, ǹ kò' bə̀ kə̀ tɛ́m nyɛdkèá, kìínmbə̀ kun kɛ́ɛ̀m ń bəd kíni.

³Ǹ káŋ val kɛ́ɛ̀m bəraa bə̀ kə̀ nɛ́ŋə̀ láŋ̀mbə̀ naà síndoó.

⁴Zá dáà val kéèn nə́ŋ̀ tə́ kə̀ yɛb bəd naú, sínkɔ̀ yɛb kàá bəd naà gə́, boò sán bə̀ in kíìn nyɛdkè tɛ́mbagké rú, boò ligə̀ tɛ́mú. Boò mà' tù' sɔ̀ɔ̀nkè kàà boò bəd, kə̀ nà'á boò bəd yiilú. Aa yée kùmsə̀n insɔ̀ɔ̀n aa Vɛnɛ́b núùrú roó.

⁵Val kéèn aa tə́ val kéèn vɛ́nà rə, aa kə̀ nɛ́ŋə̀ láŋ̀mbə̀ naà síndoó. Oò gə́, zíg tɛ́m oò tə́ Vɛnɛ́b ba, bít tígə́l kə̀ nyàámbərə̀ tá, tə́ diìn Vɛnɛ́b nyɛɛ̀mbìá, dɛ̀d Vɛnɛ́b oò láŋ bəǹ kúnú.

⁶Zá val kéèn aa kùm tə́ in aa í' rə ní seèl də, oò gə́, val kò'ù yàá, kóó dáà tə́ kə̀ gɔ̀ŋsə́ má.

⁷M̀ bàà nɛ́b bəd nwɔŋ aa yée kə̀ kpɛŋsɛ́lá, bɔ̀b nɛ́b bəd boò bɔ̀b *Eklisiya bəd álǹmbə̀ sí.

⁸Dáà nɛ́ŋə̀ nə́ŋ̀ kò' kùd kun oò bəd sé, bít aa kàn nɛɛ̀n də, kò' kùd nɛ́b aa oò yiìl lə síngə́, oò gə́, làà lɛ́' tɛ́mbagké oò yàá. Kànsə̀n nɛ́ŋə̀ aa bàg Vɛnɛ́b síndə kə̀ invaksə́ ma'ǹmbìá.

⁹Val kéén aa *Eklisiya bəd bə̀ dáù ɛgǹ kə̀ val kéén kíin də, oò kùm kə̀ zèd laa toora, bít oò kùm nɛ́ŋə̀ aa pà' váàn nə́ŋ̀ní roó.

¹⁰Dáà val kéén aa gád íí dáù páàn val kɛ́ɛ́m kam tə́ŋə́ rə, ìì gàbə̀ kúnú, kə̀ tù' sɔ̀ɔ̀n oò bəraa mà' roó. Nyàam də, zàn yɛb oò bərì sɔ̀ɔ̀nkèì? Sí' sɛ̀ɛ́n bəd béeì? Láŋ nɛ́b bagké bəd bée kə̀ tɛ́m yádkeì? Láŋ nɛ́b aa bə̀ tə́ búúd í'ǹ də béeì? Mà' tù' sɔ̀ɔ̀nkè bée sɛŋ gə́ párì?

¹¹Zá val kɛ́ɛ̀m bəraa bə̀ dòò síndə gə́, ìì gád bə̀ sí. Kàandə, inselké boò ɛ̀mì váàn ɔ̀d bídǹ pa'ǹmbə̀ bə gə́, lɛ́' bə̀ dá Krístù kíìn daanàá,

¹²bít bə̀ dá pí'ǹ Vɛnɛ́b fágə́nú. Kàandə, bə̀ kɛ̀d nwɔŋ aa gám bə̀ dúgà kə̀ Krístù nyàam númú rə yàá.

¹³Bítsɔ̀ŋ, bə̀ lɛɛ̀mì sɛŋ boò bɔ̀'ǹmbə̀, gəə̀l piìnmbə̀ ligə̀ kə̀ ligàá. Zá aa kàn nɛɛ̀n sɔ̀ŋ də, bə̀ bíl nɛ́b nwɔŋ bə̀ kpaàm bərá, bít nɛ́b gú' bə̀ bərá. Bə̀ tə́ nwɔŋ aa páá bə̀ síndə piinàá, kə̀ nwɔŋ bəraa sɔ̀ɔ̀n síndə gámàá.

¹⁴Aa mə́ í' rə, val kɛ́ɛ̀m bəraa dòò síndə, bíd boò paàl vɔ̀ɔ̀má, boò lɛ̀b yɛb bərá, boò nwán ligə̀ boò ra, bɔ̀b ɔ̀dmáàn bə́ bəd boò gám nwɔŋ vaksə́ obə́ yílə́ sí.

¹⁵Kàandə, val kɛ́ɛ̀m kambəd məə bə̀ dàà kpaŋ̀ sɔ̀ɔ̀n yàá, bít bə̀ bàg tə́ *Satan.

¹⁶Dáà nɛ́ŋ kéèndo nə́ŋ̀ bagké tə́ kə̀ val kɛ́ɛ̀m kambəd naà oò yiìl gə́, oò láŋ bə̀ kíìn ba; oò dàà tù' *Eklisiya naà ní sí, bɔ̀b *Eklisiya kɔ̀ oò láŋ val kɛ́ɛ̀m bəraa bə̀ kə̀ nɛ́ŋə̀ láŋ̀mbə̀ naà síndoó.

¹⁷*Dam bəraa bə̀ tə́ tù' sɔ̀ɔ̀n ma'ǹ nɛ́b bagké bəd tə́ŋə́ rə, boò káá bə̀ mú'sɛ̀l dùm boò kíìn gə̀b iira. Aa kàn nɛɛ̀n də, aa bəraa bə̀ tə́ Vɛnɛ́b nwɔŋ baanàá, bít bə̀ tə́ nɛ́b bəd Vɛnɛ́b nwɔŋ sáàn sɛŋ gə́ kóólé roó.

¹⁸Kàandə, Núúboòd Gìdń bàà: «Nɛ́b bəd bə̀ tə́ in aa bə̀ dɛ̀d blé, kìínmbə̀ fɔ̀gwà kíin də tiìn gə́, bə̀ mà' nàà ɛ̀m sə̀n yílú wərə̀, bɔ̀b oò tìì kúnú. Màìgə́ nàà bəraa rə bə̀ tə́ ɛɛ̀m blé aarə yílə́ gə́, ǹ tab bə̀ saadwà gú' bə sí. Ǹ dàà bə̀ boò fù' zɔ̀gɔ̀.» Bít «Nɛ́ŋə̀ aa tə́ tù' ma'ǹ də, boò kááù sòò ba' oò kúnú.»

¹⁹Nɛ́ŋə̀ nə́ŋ̀ pè' *dam aa nɛ́d bagké bəd tə́ŋə́ rəì kə̀ gúsuúm nwɔŋ gə́, ǹ kè' nwɔŋ oòrə sí, sedako oò kùm sína iira, sínkɔ̀ toora.

²⁰Nɛ́b yíl bə̀ bəraa ìì mà' invaksə́ rə kóólé, ǹ ál bə̀ *Eklisiya bəd númú, bɔ̀b nɛ́b kam bəraa rə kɔ̀, boò nùù də́dǹ invaksə́ ma'ǹmbə̀ kə̀ aakíin.

²¹Mə́ tə́ən kpaŋ̀ piìn Vɛnɛ́b númú, Yéésù Krístù númú, bít kə̀ *malaika sɔ̀ɔ̀n bəraa Vɛnɛ́b sààvúŋ də númú. M̀ mà' nwɔŋ bəraa rə kə̀ tùsá, bít ǹ káŋ indaŋ̀mbə̀ bəraa yóo. M̀ pɛ̀l nɛ́b bəd sí, bít sèè ǹ vúŋ nɛ́ŋə̀ nə́ŋ̀má tùsaa rə rú sí.

²²Gbád ǹ zíg nɛ́ŋə̀ nə́ŋ̀má nɛ́d yíl bə̀, nɛ́b zùúm bəd númú sí. Ǹ pá' yíl ámbə̀ invaksə́ aa nɛ́b kam mà' sə̀n də rú sí. Zá ǹ nwán yíl ń da, ǹ kùm nyɛdkèá.

²³Kə̀ aakíin də, ń nɛ́d mad bə̀ yée gə́, ǹ nyəə wəl ní sí. Aa dá sɔɔ̀n də gə́, ǹ nyəə badn zɔ̀gɔ̀, bɔ̀b oò láŋ n kúnú, bàgə̀l ń oò bɔ̀b mad sí.

²⁴Nɛ́b kam invaksə́ vúg, bɔ̀b bə́ŋ̀ fágə́n ma'míìn sé. Zá nɛ́b kambəd bə̀ gə́, fágə́n taà sína, yaà vúgmíìn taá.

²⁵Bít kàandə, tù' sɔ̀ɔ̀n bəd éèn dá vúgmíìn tə́ kàani, kóó dáà mə́' tə́ kíìn máá, dákíìn vúgǹ vɛ́nà.