Read Samba Leko 2 Timote 2 Bible Online

2 Timote 2 - Samba Leko bible

2 Timote 2

¹Wàà mə́ Timote, ǹ dàà pə̀dkè Vɛnɛ́b bə̀ oò pii n kpɛŋsɛ́l Yéésù Krístù rú.

²Nwɔŋ aa ń kììà mə́ tə́ baàn sedako zùúm bəd númú rə, m̀ bàà nɛ́b aa nɛ́ŋə̀ dá tɛ́m kíin báàn zígǹmbə̀ boò ba, boò kɔ̀ bə̀ dá nɛ́b kambəd nwɔŋ aarə kíin sáàn doó.

³Pɛ̀d ǹ gàb búúd bəraa kə̀ máá tá, kìínmbə̀ ń Yéésù Krístù sóózè sɔ̀ɔ̀n kíin.

⁴Sóózè aa tə́ tù' ma'ǹ bə́ŋyée rə, pii yíl oò tùsaa ɛ̀g sóózè tù' síndə ma'ǹmbə̀ gá, dáà í'ì tùsaa bəǹ tə́ ma'ǹ də, oò sɔ̀ɔ̀n nɛ́ŋ gbàáro bəǹ kíìn gə́ roó.

⁵Nɛ́b aa bə̀ tə́ nɔg nuùn də́'ǹ mə̀ə̀lə̀ bə̀ bɔbm̀ də kɔ̀, bə̀ tə́ kàani. Dáà bə̀ bàg nɛɛ̀n aa indaŋ̀mbə̀ bàà rú rə kíin síngə́, bə̀ bɔ̀b dùm bə gá.

⁶Nɛ́d in bə̀ laàm aa tə́ tù' gbò'kè ma'ǹ də, aa dá sɔɔ̀n də, éèn gbád oò líí sə̀n in aa làm lɛsú rə kə̀ nɛ́b bərá.

⁷Ǹ sèl nwɔŋ aa mə́ tə́ən baàn yóo, kàandə, Báátììkpɛ̀ŋ dá n kíìn láŋ̀ bə, bɔ̀b ǹ gàb nwɔŋ bəraa nyɛ́d də kíìn kóólé.

⁸Sèl ǹ zá' Yéésù Krístù, màn aa díím valə́ roó; oòra kùmsə̀n Dauda kuná, kìínmbə̀ *Nwɔŋ Puu Sɔ̀ɔ̀nkè aa mə́ tə́ baàn də bàà rə kíin.

⁹Nwɔŋ Puu Sɔ̀ɔ̀nkè aa bòórú, mə́ tə́ taà búúd bé'nàá. Bə̀ tab mə́ kə̀ sɛ̀gsɛ́gá, kìínmbə̀ mə́ nɛ́d yíl bə̀ lo'ǹ kíni. Zá Vɛnɛ́b nwɔŋ gə́, tabmíìn kɔ̀ sé.

¹⁰Kə̀ taàbìá, mə́ tə́ taà in bəraa kóólé siràá, nɛ́b aa Vɛnɛ́b sààvúŋà rə bòórú; bɔ̀b boò kɔ̀ boò bɔ̀b súúke aa Yéésù Krístù naà roó, bít kə̀ kaŋsɛ́l laa nyɛdkè aa bɛ́d bə gá roó.

¹¹Nwɔŋ bəraa nɛ́ŋə̀ dákíìn báàn tɛ́m zígǹmbə̀ bərə yóo: «Dáà val kòd bə́nnì kə̀ oò tə́ gə́, báan kuùm kə̀ oò tá, kə̀ gɔ̀ŋsá.

¹²Dáà bə́n sidǹnì tɛ́mbagké rú gə́, báan gààd ləə̀n kə̀ oò tá. Dáà bə́n məə̀nnì gə́, oò kɔ̀ dá bə́n kíìn məə̀n daanàá.

¹³Dáà bə́n kə̀ tɛ́mbagké naà síngə́, oò gə́, pɛ́n bə gá, dìì tə́ nwɔŋ aa bàà dàà rə ba. Kàandə, oò gə́, bán yíl oò bə̀ məə̀n daànmbə̀ gá.»

¹⁴Sèl ǹ zá' bə̀ nwɔŋ bəraa rə kíìn kóólé, bít ǹ tɔ̀g bə̀ Vɛnɛ́b númú, boò ál kə̀ ɔ̀dnə́ŋ̀ bəd nwɔŋ kambəd yílə́ sí. Álsɛ̀l bəraa rə, pii bə̀ insɔ̀ɔ̀n nə́ŋ̀má gá, zá dá nɛ́b aa bə̀ tə́ álsɛ̀l bəraa rə zɛŋ̀ də tɛ́mbagké yɛɛlàá.

¹⁵Ǹ nɔ̀ŋ yíl ámbə̀ i'ǹmbə̀ Vɛnɛ́b númú, kə̀ nɛɛ̀n aa dáù sɔɔ̀n də kíin, kìínmbə̀ nɛ́d tù' bə̀ ma'ǹ aa nùù sə́ə́mnúù kə̀ tù' oò síndə kíin, bít kə̀ nɛ́d nwɔŋ sɔ̀ɔ̀n bə̀ baàn kə̀ kpaŋ̀ wɔ̀ɔ̀lə̀ kíin.

¹⁶Ǹ nùù nwɔŋ kpaàmbə̀ tɛdń bərá, nwɔŋ bəraa dáá kə̀ tɛ́mbagké síndoó. Kàandə, nɛ́b aa bə̀ tə́ nwɔŋ bəraa ko'ǹ tɛ́mú rə, bə̀ dá diìn kuùmbə̀ zɔ̀ŋ bùúd kə̀ Vɛnɛ́bá.

¹⁷Nɛ́b aa bə̀ tə́ in luùm aarə sáàn də, nwɔŋ boò bəd tə́ kìínmbə̀ núgúl aa yád tə́ ɛɛ̀m númú rə kíin. Hymenus kə̀ Filetus tá, bə̀ tə́ nɛ́b aa bə̀ tə́ in bəraa sáàn də tə́ŋú.

¹⁸Boòra bə̀ kùmsə̀n nɛ́b luùm bəraa áá bə̀ dàà vɛ́nà kpaŋ̀ doó. Bə̀ tə́ gúsuúm nwɔŋ bəd gáàm gə́, bə̀ bàà gə́, bə́n nɛ́b bagké bəd gə́, bə́n díìmmì valú gbòód, díímke val bəd bə̀ ɔ̀d númú sɔ̀ŋ sé. Kə̀ nwɔŋ aa roó, bə̀ mà' nɛ́b zùúm kambəd dàà tɛ́mbagké boò yàá.

¹⁹Kə̀ aakíin, wúl bèl aa Vɛnɛ́b páá sə̀n də, dá ləə̀n və̀'kèá. Aa yée nwɔŋ aa bád bə wərə̀ roó: «Báátììkpɛ̀ŋ gə́, gàb nɛ́b oò bəd yàá.» Bítsɔ̀ŋ: «Kóó nɛ́ɛ̀réè, bàà kà' yàá kə̀ yíl oòra, bəǹ Báátììkpɛ̀ŋ nɛ́ŋə̀ gə́, oò dàà invaksə́ ma'ǹmbìá.»

²⁰Wúl gbà'á nə́ŋ̀ú gə́, ń dá nyiŋə̀ aa bə̀ kùd kə̀ bəŋzɔ', sínkɔ̀ kə̀ ba' rə bɔbm̀ ní gá. Zá in ɔ̀d kambəd tə́ sɔ̀ŋ, bə̀ kùd kə̀ tééá sínkɔ̀ kə̀ buná. In kambəd gə́, ma'ǹmbə̀ kə̀ tù' pɛ̀sə́ bə̀ bərá, bít ɔ̀d kambəd kɔ̀, ma'ǹmbə̀ kə̀ tù' sɛŋ gə́ kóólé.

²¹Nɛ́b bəd kɔ̀ bə̀ tə́ kə̀ aarə kíin. Nɛ́b aa bə̀ dààì invaksə́ ma'ǹmbìá, bít bə̀ nyɛ́' yíl boòì rə, bə̀ dá kuùm gɔ̀ŋ. Kumsɛ́l boò dá kuùm *gìdńná, bít dá nɛ̀n boò kíìn sɔɔnàá, bít bə̀ dákíìn báàn tù' sɔ̀ɔ̀nkè bəd gə́ kóólé ma'ǹmbìá.

²²Nùù ǹ dàà in bəraa tə́ yɛb də̀b bəd tɛ́m pa'ǹ də kúnú. Ǹ sàà wɔ̀ɔ̀làá, tɛ́mbagkéá, í'sɛ̀lá, tɛbàá, kə̀ nɛ́b aa bə̀ tə́ Báátììkpɛ̀ŋ kpəə̀n dɛdǹ kə̀ tɛ́m nyɛdkè rə tá.

²³Zá nùù ǹ dàà nwɔŋ kpaàmbə̀ tɛdń bəd kə̀ nɛ́b bərá. Ń gàb yàá àà bə̀ sáá álsɛ̀l bərá.

²⁴Kàandə, nɛ́d Báátììkpɛ̀ŋ tù' bə̀ ma'ǹ gə́, oò mà' álsɛ̀l sí. Zá oò kùm nɛ́ŋə̀ tɛ́m yádke bìá, kóó nɛ́ɛ̀réè númú. Oò kùm nɛ́ŋə̀ sɔ̀ɔ̀n nɛ́b bəd in bə̀ sáànná, nɛ́d nwɔŋ bə̀ sidǹná.

²⁵Aa dá sɔɔ̀n də, oò sán nɛ́b bəraa bə̀ tə́ nə́gə̀d zá'ǹ kə̀ oòrə in kə̀ tɛ́m ɔ̀gkeá. Kamgə́, Vɛnɛ́b dá bə̀ láŋ̀ bə, bə̀ dá tɛ́m boò kíìn pɛ́nàá, bə̀ dáàn sɔ̀gàá, bə̀ dá vɛ́nà tɛ́mbagké rú bə̀ kíìn gabàá.

²⁶Kàandə, bíd bə̀ dá yílə boò kíìn bɔbàá. Nùù bə̀ dáàn vúgǹ Sámbàŋyɛ́rə̀ zàŋwà rú. Oòra kò' bə̀ sùnú, bít mà' bə̀ sə̀n boò ləə in aa bəǹ í' roó.