Read Samba Leko 2 Timote 3 Bible Online

2 Timote 3 - Samba Leko bible

2 Timote 3

¹Sèl ǹ gàb in aa kíìn sɔ̀ɔ̀nkè' nyàm bəraa dá dugǹ kə̀ bòd də bə gə́, sɛŋ gbò'kè dáà kíìn yaanàá.

²Nɛ́b bəd dá yíl boò ní í'nàá. Bə̀ dá ɔ̀dzéd kó'ǹ kə̀ basá. Bə̀ dá kùlú ma'nàá, bít bə̀ dá yíl pa'nàá. Bə̀ dá nwɔŋ vaksə́ gáàm Vɛnɛ́b yílú, bít bə̀ ləə báá boò kə̀ nà' boò tə́ gá. Bə̀ mɔ̀' nɛ́ŋə̀ nə́ŋ̀má gá, bə̀ káŋ in *gìdń nə́ŋ̀má gá.

³Bə̀ kùm kə̀ í'sɛ̀l naà gá, nɔ̀m boò bəd bɛ́d bə gá. Bə̀ dá kuùm nɛ́b nwɔŋ vaksə́ bə̀ gáàm ɔ̀dnə́ŋ̀ yílú. Bə̀ nwán yíl boò gá. Bə̀ kùm kə̀ tɛ́m buurúm naà gá, bít bə̀ dá kuùm nwɔŋ sɔ̀ɔ̀n ɔ̀dmáàná.

⁴Bə̀ dá kuùm nɛ́b nɛ́ŋə̀ bə̀ záàn bərá. Bə̀ sèl in aa bə̀ tə́ ma'ǹ də gá, zá bə̀ dá nyiìn kə̀ yíl pa'kéá. Bít bə̀ dá in aa tɛ́m boò í' rə ma'nàá, bə̀ í' Vɛnɛ́b gá.

⁵Nɛ́b bəd núùrú gə́, bə̀ dá yíl boò i'ǹ bənə́ kumnə́ tə́ kìínmbə̀ nɛɛ̀n aa Vɛnɛ́b í' rə kíin. Zá bə̀ məə kpɛŋsɛ́l Vɛnɛ́b bə̀ aarə, bɔ̀b oò mà' tù' obənə́ gɔ̀ŋsə́ rú sí. Ám kɔ̀ ǹ vúg kíìn nɛ́b luùm bəraa rə tə́ŋú.

⁶Kàandə, nɛ́b kam boò tə́ŋú, bə̀ pìì nɛ́b bəd wúuú, bít mà' bə̀ bí' nɛ́b kɛ́ɛ̀m bəraa bə̀ tə́ vɛɛmké rə, boò ləə bənə́ kúnú. Nɛ́b kɛ́ɛ̀m bəraa rə, bə̀ nyìì tə́ kə̀ invaksá, bít bə̀ pii yíl boò tə́ inlɛ'kè vaksə́ tɛ́m bə bə̀ luùm gɔ̀ŋ gɔ̀ŋú.

⁷Nɛ́b kɛ́ɛ̀m bəraa rə, bə̀ tə́ in sáàn sɛŋ gə́ kóólé, zá bə̀ bán nwɔŋ sɔ̀ɔ̀n gabm̀bə̀ sɔ̀ɔ̀nkè sé.

⁸Nyàamdoorú kìínmbə̀ Yannes kə̀ Yambere tá, bə̀ məə Musa nwɔŋ də kíin, nɛɛ̀n aarə rú, nɛ́b vaksə́ bəraa yée kɔ̀ bə̀ məə nwɔŋ sɔ̀ɔ̀n yàá. Yílə boò yɛɛ̀l yàá. Tɛ́mbagké rú gə́, bə̀ nɛ́b tɛdń bərá, bə̀ kə̀ pɛ̀sə́ naà sé.

⁹Zá bə̀ bɔ̀b dáànmbə̀ kə̀ númú gá. Kàandə, nɛ́b bəd kóólé bə̀ dákíìn bé'nàá, bə̀ kèéd bərá, kìínmbə̀ nɛɛ̀n aa taà kə̀ Yannes kə̀ Yambere tə́ rə kíin.

¹⁰Zá ám gə́, Timote, ń kùmsə̀n nɛ́ŋə̀ aa kìì gàb insánke mə́ roó, kə̀ nɛɛ̀n aa mə́ kùm dú roó. Ń gàb in aa mə́ í' ma'ǹmbə̀ rə yàá, kə̀ tɛ́mbagké mə́ tá. Ḿ bé' nɛɛ̀n aa mə́ kùm dú, nɛ́d tɛ́m sidké bìá, bít nɛ́d í'sɛ̀lbə̀ rə yàá. Ḿ bé'à nɛɛ̀n aa nyàam mə́ í'à búúd dú rə yàá.

¹¹Bít ń gàb in aa mà' máà Antakiya bìlú, Ikonium bìlú, bít kə̀ Listra bìlə́ rə yàá. Ḿ bé'à búúd bəraa bə̀ í' máà wərə̀ rə yàá. Zá búúd aarə kóólé, Báátììkpɛ̀ŋ vúŋ lɛ́' máàì rú wərà.

¹²Bít kóó nɛ́ɛ̀réè, í'ì kuùmbə̀ kə̀ nɛɛ̀n aa Vɛnɛ́b í' rə kíin, Yéésù Krístù rú gə́, bə̀ dáù búúd í'nàá.

¹³Zá nɛ́b vaksə́ bə̀ bəd, kə̀ nɛ̀n gúsuúm bə̀ bəd tə́ gə́, bə̀ dá ɛɛ̀m númú invaksə́ rú. Bə̀ dá nɛ́b kam záánàá, bít bə̀ dá yíl boò bə̀ záàn kɔ̀.

¹⁴Zá ám gə́, Timote, ǹ dìì və̀'kè vɛ́nà rú, kə̀ nɛɛ̀n aa ń sánà rə kíin, bít kə̀ nɛɛ̀n aa ń kè'à rə kíni. Ń gàb nɛ̀n ń aa sánnà in də yàá.

¹⁵Ń gàb Núúboòd Gìdń, sɛŋ aa bɔ̀b bə́ŋ̀ ń tə́ wàà bɛ̀ŋ́sə̀ roó. Núúboòd Gìdń aarə, dá n sə̀n báàn ingabké piìnmbìá, ingabké aa dá n aàn súúke kpaŋú, kə̀ tɛ́mbagkéá, Yéésù Krístù rú roó.

¹⁶In aa bádmíìn zɔ̀ŋə Núúboòd Gìdńnú rə gə́ kóólé, vúgà Vɛnɛ́b Nwul Gìdń naú. In aa rú wərə̀ rə, nɛ́ŋə̀ dákíìn báàn pa'ǹmbìá, nɛ́b bəd in sáànmbə̀ yílə́ wərà, boò bə̀ láŋ̀mbə̀ bə kə̀ kùrú, boò bə̀ álǹmbə̀ kə̀ kùrú, bít boò bə̀ i'ǹmbə̀ nɛɛ̀n aa bə̀ dá kuùm dú kə̀ gɔ̀ŋsə́ wɔ̀ɔ̀lə̀ roó.

¹⁷Núúboòd Gìdń gə́, sán nɛ́b Vɛnɛ́b tù' bə̀ ma'ǹ bəd nɛɛ̀n aa bə̀ dá tù' sɔ̀ɔ̀nkè bəd gə́ kóólé ma'ǹ dú roó.