Read Samba Leko Titus 1 Bible Online

Titus 1 - Samba Leko bible

Titus 1

¹Núúboòraa vúgà máá mə́ Pol, Vɛnɛ́b kɔ̀'váàn naú, *Yéésù Krístù gbantumsàá. Vɛnɛ́b tùm máà, bɔ̀b máà àà nɛ́b aa sààvúŋ bə̀ rə, boò kè' Yéésù Krístù ra. Bít tùm máà, bɔ̀b boò gàb vɛ́nà kíìn sɔ̀ɔ̀nkè. Bít vɛ́nà aarə, ì' nɛ́b bəd nɛɛ̀n aa bə̀ dá kuùm dú, kə̀ nɛɛ̀n aa Vɛnɛ́b í' rə kíin doó.

²Vɛnɛ́b tùm máà, bɔ̀b máà bàà nwɔŋ tɛ́m zígke *gɔ̀ŋsə́ aa bɛ́d bə gá rə yílú kɔ̀. Gɔ̀ŋsə́ aa bɛ́d bə gá rə, Vɛnɛ́b bàà dàà sùnú, bít Vɛnɛ́b gə́, dùg gúsuúm gá. Vɛnɛ́b bàà dàà nwɔŋ aarə, bɔ̀b bə́ŋ̀ séé yɛ́b sé.

³Sɛŋ aa və̀d zíg də bə kɔ̀, vúŋ nwɔŋ oòra, kə̀ nwɔŋ tumké oò aa pii máà roó. Bít máà bàà nɛ́b bəd kə̀ kpaŋ̀ aa Vɛnɛ́b Nɛ́d Nɛ́ŋə̀ bə̀ Súùn bə́n pii mə́ roó.

⁴Mə́ tə́ən núúboòraa báràá, Titus, ámda ń kùmsə̀n wàà vɛ́nà bə̀ mə́, tɛ́mbagké aa wál bə́n də bìá. Mə́ nyɛ̀m Báá bə́n Vɛnɛ́b kə̀ Yéésù Krístù Nɛ́d Nɛ́ŋə̀ bə̀ Súùn bə́n tá, boò mà' n pə̀dkèá, bít boò pii n tɛbàá.

⁵Mə́ dàànnà yɛ́b aa wəl tə́ŋú, bə̀ dɛ̀d Kereta rə rú, bɔ̀b mà' m̀ bɛ́'à tù' bəraa mə́ daànnà wərə̀ roó; bít sàà ǹ zíg nɛ́b gbàád *Eklisiya bə̀ bəd bìl bərú kóólé. Sèl ǹ zá' bə̀ in bəraa mə́ ì' n doó.

⁶Nɛ́ŋ gbàáro déè gə́ kóólé, boò bɔ̀b in nə́ŋ̀má oò bə̀ álǹmbə̀ bə sí. Oò kùm kə̀ kéèn nə́ŋ̀ní, bít yɛb oò bəd kɔ̀, boò kùm nɛ́b bagké bərá. Boò bɔ̀b in nə́ŋ̀má boò bə̀ álǹmbə̀ bə sí, sínkɔ̀ boò kùm kə̀ nɛ́b aa ìì ləə nɛ́ŋə̀ síndə kíin sí.

⁷Kə̀ aakíin də, nɛ́ŋ gbàáro *Eklisiya bə̀ gə́, boò bɔ̀b in nə́ŋ̀má oò bə̀ álǹmbə̀ bə sí. Kàandə, oòrə nɛ́d Vɛnɛ́b tù' bə̀ ma'ǹná. Oò pà' yíl sí, oò mà' nɔ̀m sí, oò nyəə badn gbàákù sí. Oò kùm nɛ́d nə́gə̀d bə̀ nə́'ǹ sí, oò í' ba' gbàákù sí.

⁸Zá oò kùm nɛ́ŋə̀ sɛ̀ɛ́n bə̀ ke'ǹná, nɛ́ŋə̀ insɔ̀ɔ̀n bə̀ í'ǹná, nɛ́ŋə̀ yíl bə̀ uùnná, nɛ́ŋə̀ wɔ̀ɔ̀làá. Oò kùm nɛ́ŋə̀ *gìdńná, bít oò wùù yíl oò kúnú.

⁹Kò' oò kùd nwɔŋ sɔ̀ɔ̀n aa dáá kə̀ insánke roó. Kə̀ aakíin, dá taà báàn nɛ́b kambəd kpɛŋsɛ́l piìnmbə̀ kə̀ insánke vɛ́nà bìá, sínkɔ̀ nɛ́b aa bə̀ í' nwɔŋ aarə bagǹmbə̀ síndə álǹmbìá.

¹⁰Kàandə, nɛ́b bəd tə́ zùúm, aa kàn nɛɛ̀n də, *Yahudu bəraa bə̀ bíl nɛ́b bagké bəd də tə́ŋú, bə̀ nə́' nə́gə̀d tə́ kə̀ insánke vɛ́nà bìá. Bə̀ tə́ nɛ́b kambəd záánàá, kə̀ nwɔŋ tɛdń bərá.

¹¹Ǹ ke' bə̀ gú' kíìn sɔ̀ɔ̀nkè, kàandə, bə̀ sàgə̀d nɛ́b zùúm bəd ligə̀ tə́ kúnú, kə̀ insánke bəraa sɔ̀ɔ̀n nɛ́b bəd sáànmbə̀ síndoó. Bə̀ sán nɛ́b bəd in kə̀ aakíin də, bə̀ í' ba' bɔbm̀bìá.

¹²Nyàam də, nɛ́ŋə̀ nə́ŋ̀ nɛ́b Kereta yɛ́b bə bə̀ bəd tə́ŋə́ ní, gám nwɔŋ kə̀ nɛ́d in bə̀ gabm̀ kíin, bàà: «Nɛ́b Kereta yɛ́b bə bə̀ bəd gə́, sɛŋ gə́ kóólé, bə̀ nɛ́b gúsuúm bə̀ bərá, bə̀ nɛ́b vaksə́ bərá, bə̀ nɛ́b vɛɛmké bərá; bə̀ sèl inlíìnmbə̀ líìn nyíìnmbə̀ boò bàgəlú ní.»

¹³Sedako aa mà' yée, sedako sɔ̀ɔ̀ná! Kə̀ taàbìá, ǹ ál bə̀ kə̀ váàndoá, bɔ̀b boò kùm kə̀ tɛ́mbagké və̀'kèá,

¹⁴bít boò bàg súúsu bəraa *Yahudu bəd tə́ bagǹ də sí, boò bàg indaŋ̀mbə̀ bəraa nɛ́b bəd séé rə sí. Nɛ́b aarə, lɛ́' bə̀ dàà vɛ́nà kpaŋ̀ yàá.

¹⁵Nɛ́b aa nyɛd Vɛnɛ́b númú rə gə́ kóólé naà gə́, in gə́ kóólé tə́ nyɛdkèá; zá nɛ́b nyìb bə̀ bəd, kə̀ nɛ́b aa bə̀ bàg Vɛnɛ́b síndə naà gə́, in nə́ŋ̀má nyɛd sé. Kàandə, ingabké boò kə̀ inselké boò bəd tá, tə́ diíŋdoá.

¹⁶Bə̀ bàà nyɛdkè dág, bənə́ gabmnə́ Vɛnɛ́b yàá, zá tù' boò bəd gə́, kə̀ nɛ́b Vɛnɛ́b bə̀ bagǹ bəd kíin sé. Bə̀ nɛ́b zeeké bərá, nɛ́b yíl kpɛŋké bərá, bít mà' bə̀ bán insɔ̀ɔ̀n nə́ŋ̀má gá.