Read Samba Leko Titus 2 Bible Online

Titus 2 - Samba Leko bible

Titus 2

¹Zá ám gə́, nwɔŋ aa ń dá gáàm də kóólé, oò kùm insánke nwɔŋ wɔ̀ɔ̀lə̀ aa vúgà Núúboòd Gìdńnú roó.

²M̀ bàà nɛ́b vɔ̀ɔ̀m dooro bəd boò mà' in aa dáá síndə sí. Boò kùm nɛ́b ɔ̀gke bərá, nɛ́b in bə̀ gabm̀ bərá. Boò kùm və̀'kè tɛ́mbagké rú, kə̀ í'sɛ̀lá, bít boò sìd kúnú.

³Kə̀ aarə kíin sɔ̀ŋ, m̀ bàà wɔ̀ɔ̀d kɛ́ɛ̀m bəd boò kùm *gìdń, boò gɔ̀ŋsə́ rú. Boò kùm nɛ́b gú' vaksə́ bə̀ gáàm bəd sí, sínkɔ̀ boò kùm barəm kɔ̀' sí. Zá boò sán nɛ́b bəd insɔ̀ɔ̀nkè bərá,

⁴bɔ̀b boò sán nɛ́b kɛ́ɛ̀m bəd boò í' vɔ̀ɔ̀m boò bərá, kə̀ yɛb boò bərá.

⁵Boò kùm nɛ́b yíl boò bə̀ uùnná, bít boò mà' labsə̀ sí. Boò kùm nɛ́b kɛ́ɛ̀m yiìl bə̀ sɔ̀ɔ̀n bərá. Nɛ́b kɛ́ɛ̀m bəd boò kùm nɛ́b vɔ̀ɔ̀m bə̀ ləə̀n bərá, bɔ̀b nɛ́b bəd boò *gám nwɔŋ vaksə́ Vɛnɛ́b nwɔŋ yílə́ sí.

⁶Ìì tɔ̀g yɛb vɔ̀ɔ̀m bəd kɔ̀, kə̀ aarə kíni, boò kùm yɛb yíl boò bə̀ uùn bərá.

⁷Ám kɔ̀ kə̀ yíl ám bìá, ǹ ì' gə́, ń nɛ́d tù' sɔ̀ɔ̀n bə̀ ma'ǹ in gə́ kóólé rú. Insánke ń gə́ kóólé oò kùm vɛ́nà, bít ǹ kùm nɛ́d yíl ɔ̀gke bìá.

⁸Nwɔŋ ámbə̀ oò kùm wɔ̀ɔ̀làá, bɔ̀b nɛ́b bəd boò bɔ̀b m álǹmbə̀ bə wərə̀ sí. Kə̀ aakíin də, ń dá taà ɔ̀dmáàn ḿ bəd sə́ə́mnúù daanàá. Kə̀ taàbìá, bə̀ bɔ̀b taà nwɔŋ vaksə́ nə́ŋ̀ gáàmbə̀ obə́n yílə́ gá.

⁹M̀ bàà kɔ̀' bəd gə́, boò ləə báá boò tììkpɛ̀ŋá, boò kɔ̀ boò mà' in aa dáá bə̀ tɛ́m sɔɔ̀n doó, in gə́ kóólé ba. Məə boò dàà nwɔŋ aa bàà bə̀ rə sí,

¹⁰bít bɔ̀n boò pà' in nə́ŋ̀má sí. Boò ì' yíl boò nɛ́ŋə̀ wɔ̀ɔ̀làá, nɛ́ŋə̀ sɔ̀ɔ̀ná sɛŋ gə́ kóólé. Tù' boò gə́ kóólé, oò kàŋ kúnú, bɔ̀b nɛ́b bəd boò bàà gə́, insánke Vɛnɛ́b Nɛ́d Nɛ́ŋə̀ bə̀ Súùn bə́n bə̀ tə́ sɔ̀ɔ̀ní.

¹¹Kàandə, Vɛnɛ́b ì'à í'sɛ̀l gbà'á oò yérə, bɔ̀b nɛ́b bəd gə́ kóólé boò súú kúnú.

¹²Pə̀dkè aarə, sán bə́n in aa sɔ̀ɔ̀n Vɛnɛ́b síndə lɛ́'ǹ daànmbìá, bít kə̀ inlɛ'kè vaksə́ zɔ̀ŋə yɛ́b bə bə̀ kóólé məə̀n daànmbìá. Zá báà uùn yíl bə́n da, kə̀ wɔ̀ɔ̀làá, bít kə̀ sɔ̀ɔ̀ná, Vɛnɛ́b númú.

¹³Pə̀dkè aarə, sán bə́n làmkè gbà'á bɔbm̀bìá. Kə̀ taàbìá, bə́n tə́ən taà nwáàn kə̀ tɛ́m zígkeá, nyàm aa Vɛnɛ́b gbà'á bə́n kaŋsɛ́l laa nyɛdkè dáà yaànà ba, sɛŋ aa Nɛ́d Nɛ́ŋə̀ bə̀ Súùn bə́n Yéésù Krístù dáà bídǹnà bəroó.

¹⁴Yéésù pii gɔ̀ŋsə́ oò obə́n bòórú, bɔ̀b obə́n bə̀ káàn ke'ǹmbə̀ invaksə́ rú kóólé. Nyɛ́' bə́n yàá, bɔ̀b báà kuùm nɛ́b oò bərá, oò nə́ŋ̀ní, bít tə́ í'ǹ bɔ̀b báà ma'ǹ bəǹ tù' sɔ̀ɔ̀n bərá.

¹⁵Aa yée nwɔŋ aa ń dá nɛ́b aa bə̀ tə́ən kiìn də sáàn doó. Ǹ dìì boò bə̀ kpɛŋsɛ́l piìnmbìá, bít boò bə̀ álǹmbə̀ kə̀ váàndoá. Ǹ dàà nɛ́ŋə̀ nə́ŋ̀má boò tə́ŋú, ɛ̀g oò gɔ̀n n sí.