Read Samba Leko Ibraniŋko bəraa 1 Bible Online

Ibraniŋko bəraa 1 - Samba Leko bible

Ibraniŋko bəraa 1

¹Nyàamdoorú rə, Vɛnɛ́b gám nwɔŋ kə̀ doo bə́n bəd kə̀ *gbantumsə̀ oò bəd gúsá. Gám bə̀ nwɔŋ sɛŋ zùúm, kə̀ kpaŋ̀ luùm gɔ̀ŋ gɔ̀ŋ.

²Zá sɛŋ bəraa yɛ́b tə́ bɛ́dǹ kə̀ naà bə́ŋyée gə́, Vɛnɛ́b gám bə́n nwɔŋ kə̀ Wàà oòra. Kə̀ oòra, séé taà yɛ́b kə̀ lɛg tá. Sààvúŋ̀ rə, bàà gə́, bəǹ dáù in bəraa bəǹ séé rə kíìn piìn kóólé, kìínmbə̀ valligə̀ kíìn.

³Vɛnɛ́b wàà kùmsə̀n Vɛnɛ́b laa nyɛdkè kaŋsɛ́l bìá. Oòrə, kùm tə́ nɛɛ̀n aa Vɛnɛ́b kùm dú roó. Kò' in bəraa Vɛnɛ́b séé rə gə́ kóólé tə́ kə̀ nwɔŋ oò kpɛŋsɛ́l bìá. Zɔ̀ŋ aa mà' bí' nɛ́b bəd gìdń kə̀ sadaka aa mà' kə̀ yíl oò bə̀ piìnmbə̀ rə gə́, na' dá kùm lɛgə́ poú, oò gààd mə̀ə̀d ba, Vɛnɛ́b nɛɛ̀n váànú.

⁴Vɛnɛ́b Wàà yaà bíl nɛ́ŋ gbàároá, kànsə̀n *malaika bərá. Nə́gə́l aa Vɛnɛ́b yaà piiù rə, kànsə̀n *malaika bəd nə́gə́l kə̀ pɛ̀sá.

⁵Kàandə, Vɛnɛ́b bàà bèd *malaika nə́ŋ̀: «Ámda ń kùmsə̀n Wàà mə́ra, sɔ̀d nyà'aa yóo, máára mə́ kùmsə̀n báá ḿ da» sé. Bít bàà bèd kóó *malaika nə́ŋ̀má: «Máá kuùm bóò ra, bít oò kɔ̀ dá kuùm Wàà mə́ra» sé.

⁶Zá sɛŋ aa Vɛnɛ́b dáà wàà mɔ̀dǹ oò tuùm zɔ̀ŋə yɛ́b bərə yaà wə́ə́ kə́d bə gə́, bàà: «Vɛnɛ́b *Malaika bəd kóólé, boò káŋ̀ kúnú.»

⁷Aa yée nwɔŋ aa Vɛnɛ́b gám *malaika bəd yílə́ roó: «Vɛnɛ́b dá *malaika oò bəd bí'ǹ nwulá, bít nɛ́b tù' bə̀ ma'ǹ oò bəd kɔ̀ laa mɛ́lá.»

⁸Zá Wàà oò yílə́ gə́, Vɛnɛ́b bàà: «Vɛnɛ́bá, gààd mə̀d ámbə̀ gə́, bə̀ zígə̀ zèd kə̀ zèd bìá. Ń ləə Gààd ń tə́ kə̀ wɔ̀ɔ̀làá.

⁹Ń í' in wɔ̀ɔ̀làá, bít ń zèè invaksá. Kə̀ taàbìá, Vɛnɛ́b ḿ tɔ̀b m taà gààd kílə́m yílú, bít pii n taà tɛ́m làmkèá. Mà' kàandə, ń kànsə̀n ɔ̀b ḿ bərá.»

¹⁰Bítsɔ̀ŋ bàà: «Báátììkpɛ̀ŋá, ámda ń kùd sə̀n yɛ́bá, sɛŋ aa sɔ̀d dú rə rú, bít kə̀ nɛɛ̀n ám bìá, ń séé taà lɛgá.

¹¹In bəraa kóólé, dákíìn bɛ́ràá. Zá ám gə́, ń dá kuùm zèd kə̀ zèrá. In bəraa rə kóólé, bə̀ dá doòn kə̀ gɔ̀' kíin.

¹²Ń dá bə̀ kadǹ kìínmbə̀ dàál kíin, bə̀ dá bə̀ pɛ́ɛ̀n kìínmbə̀ gɔ̀' kíin. Zá ám gə́, ḿ pɛ́n bə gá, ń doo bə gá kɔ̀.»

¹³Vɛnɛ́b gə́, baànmbə̀ *malaika oò nə́ŋ̀: «Yaà ǹ kùm zɔ̀ŋə máá nɛɛ̀n váànú, máà bí' ɔ̀dmáàn ḿ bəd kìínmbə̀ zɔ̀ŋ dun bə̀ ná'ǹ ń kíin» zé rə, bàà bèd sé.

¹⁴Nɛ́b déè kùmsə̀n *malaika bəd gú? Boò ra bə̀ kùmsə̀n nwul bəraa bə̀ tə́ Vɛnɛ́b tù' láŋ̀ ma'ǹ bəroó. Vɛnɛ́b tùm bə̀, dá boò láŋ nɛ́b aa bəǹ dá bə̀ súùn də ba.