Read Samba Leko Ibraniŋko bəraa 10 Bible Online

Ibraniŋko bəraa 10 - Samba Leko bible

Ibraniŋko bəraa 10

¹Sèl ìì zá' in aa yóo' indaŋ̀mbə̀ gə́, pii bə́n nyìsə̀ nyɛdkè in vɛ́nà bə̀ bəd sé. Pii bə́n nyìsə̀ diíŋ insɔ̀ɔ̀nkè bəraa dáà yaànnà rə bìá. Nɛ́b aa bə̀ tə́ indaŋ̀mbə̀ ləə̀n də, bə̀ yaà Vɛnɛ́b səǹ kə̀ sadaka luùm aarə ní, zèd gə́ kóólé. Zá sadaka bəraa rə, bə̀ bán nɛ́b bəd nyɛ́'ǹmbə̀ gá.

²Dáà indaŋ̀mbə̀ dákíìn báàn nɛ́b bəd bí'ǹmbə̀ nyɛdkè gə́, dáà nyà'aa bə̀ dàà sadaka bəraa bə̀ tə́ piìn də yàá; dáà nyà'aa nɛ́b Vɛnɛ́b bə̀ pɔ̀bm̀ bəd bə̀ bílì nyɛdkèá, bít bə̀ kìì tɛ́m nwuukè kə̀ invaksə́ boò bəd sɔ̀ŋ gá.

³Zá sadaka bəraa rə, sèl zá' nɛ́b bəd invaksə́ boò bəraa bə̀ mà' roó, zèd gə́ kóólé.

⁴Kàandə, nààváàn nyɛ̀lə́m, kə̀ vəəváàn nyɛ̀lə́m tá, bə̀ bán invaksə́ boò bəd pa'ǹ zá'ǹmbə̀ gá.

⁵Kə̀ taàbìá, sɛŋ aa Krístù sɛŋ də́ŋ yaànmbə̀ zɔ̀ŋə yɛ́b bərə, bàà Vɛnɛ́b: «Ń í' sadaka sé, sínkɔ̀ in piìnmbə̀ sé. Zá ń kùd máà nɛ́ŋə̀ sisá.

⁶Tɛ́m sɔ̀ɔ̀n n kə̀ in aa bə̀ luu *gannyàgə̀lə́ rə gá, sínkɔ̀ kə̀ sadaka invaksə́ bəd bə̀ daàn gá.

⁷Kàanyée gə́, mə́ bàà: ‹Vɛnɛ́bá, mə́ yóo, mə́ yaà tùsaa ń í' rə ma'ǹmbìá, kìínmbə̀ bádmíìn máá yílú, núúboòd indaŋ̀mbə̀ bə̀ rú rə kíin.› »

⁸Éèn də̀gə̀ də̀gə̀ rə, bàà: «Ń kìì làmkè kə̀ sadaka sé, ń kìì làmkè kə̀ in bəraa wéé bə̀ tə́ən piìn də kɔ̀ sé. Tɛ́m làm m kə̀ in bəraa bə̀ luu *gannyàgə̀lú, bɔ̀b invaksə́ lɛ́'ǹ daànmbə̀ rə sé.» Sadaka bəraa bə̀ pii yée gə́ kóólé, ìì pii indaŋ̀mbə̀ bòórú.

⁹Bít bàà zəg sɔ̀ŋ: «Vɛnɛ́bá, mə́ yóo, mə́ yaà in aa ń í' rə ma'ǹmbìá.» Kə̀ aakíin də, Vɛnɛ́b vúŋ lɛ́l taà sadaka bəraa nyàamdoorú roó, bít pɛ́n kə̀ sadaka Krístù bìá.

¹⁰Kàandə, Yéésù Krístù mà' zə́' tùsaa Vɛnɛ́b í' roó. Kə̀ taàbìá, mà' bí' bə́n taà gìdń kə̀ si' oò aa pii sadaka sɛŋ nə́ŋ̀ní, də́ŋ sə̀ní sɛŋ gə́ kóólé bə̀ roó.

¹¹*Nɛ́b láŋsə́ bə̀ ma'ǹ bəd gə́ kóólé, bə̀ tə́ diìn, tù' boò bəd ma'ǹmbə̀ sɛŋ gə́ kóólé. Bə̀ tə́ sadaka boò piinàá, sadaka aa bán bə̀ invaksə́ pa'ǹ zá'ǹmbə̀ gá roó.

¹²Krístù pii sadaka oò sɛŋ nə́ŋ̀ní tə́ŋtə́ŋ, invaksə́ bəd bìá. Sadaka aarə, də́ŋ sə̀ní sɛŋ gə́ kóólé bìá, bít bòórú gə́, dáá kùm tə́ oò mə̀ə̀d ba, Vɛnɛ́b nɛɛ̀n váànú.

¹³Sɛŋ aa na' kə̀ lɛgə́ paà roó, yaà wə́ə́ kə̀ bə́ŋyée kíin zé, tə́ nwáàn wərà. Vɛnɛ́b oò lə́ə́ sína ɔ̀dmáàn oò bəd oò dun dùú.

¹⁴Kàandə, kə̀ sadaka nə́ŋ̀ní, mà' bí' Vɛnɛ́b nɛ́b bərì *gìdńná, zèd kə̀ zèd bìá.

¹⁵Nwul Gìdń kɔ̀ tə́ bə́n baanàá. Kə̀ aakíin də, bə́ŋ̀ bàà:

¹⁶«Báátììkpɛ̀ŋ bàà' sɛŋ bəraa rə taàì gə́, máá *gú'dúgke mə́ tabm̀ kə̀ boò ra. Gú'dúgke rə, dá kuùm kə̀ aakíin' máá indaŋ̀mbə̀ mə́ ma'ǹ boò tɛ́mú, máá bádǹ inselké boò rú.»

¹⁷Bít bàà zəg sɔ̀ŋ: «Sèl mə́ zá' invaksə́ boò bəd gá, bít sèl mə́ zá' tù' vaksə́ boò bəraa ìì tə́ ma'ǹ də gá.»

¹⁸Kə̀ taàbìá, sɛŋ aa Vɛnɛ́b lɛ́' dàà bə̀ invaksə́ boò bəd də, bə̀ mà' sadaka, bɔ̀b invaksə́ boò bəd lɛ́' boò daamíìn kíin sɔ̀ŋ gá.

¹⁹Ɔ̀dkudvɛɛ̀l mə́ í'sɛ̀lbə̀ bərá, kə̀ Yéésù nyɛ̀lə́m aa za' roó, bə́n bɔbm̀ taà kpaŋ̀ piìnmbə̀ kə̀ tɛ́m gágkeá, zɔ̀ŋ gìdń aa kàn nɛɛ̀n də rú.

²⁰Kèd bə́n kpaŋ̀ puu yàá, taàn daànmbə̀ gɔ̀saa tab bə̀ və̀d kə̀ zɔ̀ŋ gìdń doó. Kèd bə́n kpaŋ̀ kə̀ yíl oò aa pii sadaka roó.

²¹Bə́n tə́ən kə̀ *láŋsə́ gààd gbà'á naú, oòra kùmsə̀n nɛ́d yíl bə̀ Vɛnɛ́b yiilú.

²²Báà gbadǹnà Vɛnɛ́b sunú, kə̀ tɛ́m vɛ́nà bìá, bít kə̀ tɛ́mbagké aa nyìì kə̀ tɛ́m zígke vɛ́nà bə̀ roó. Inselké vaksə́ bə́n tɛ́mú bə̀ sugmíìn yàá, bít si' bə́n kɔ̀ sugmíìn tə́ kə̀ wəl nyɛdkèá.

²³Kò' báà kudǹ tɛ́mzígke aa bàà bə́n tə́ən nwɔŋ oò i'ǹ də kúnú. Kàandə, báan kíìn báàn kuùmbə̀ kə̀ vɛ́nà, nwɔŋ aa Vɛnɛ́b bàà dàà rə, dákíìn ma'mínàá.

²⁴Bòórú gə́, báà seèl sɛŋ gə́ kóólé, nɛɛ̀n aa báan ɔ̀dnə́ŋ̀ láŋ̀ dú roó, bɔ̀b báà kaŋ̀ kə̀ í'sɛ̀lá, bít kə̀ tù' sɔ̀ɔ̀nkè ma'ǹmbìá.

²⁵Bít báà kpɛdǹ yaàn wáàlǹmbə̀ kə̀ nɛ́b bagké bəd tə́, kìínmbə̀ nɛ́b kambəd bə̀ lɛɛ̀m ma'ǹmbə̀, bə̀ yaà gá rə kíin sí. Zá báà piìn ɔ̀dnə́ŋ̀ bəd váàndo bə́n bòdba, bɔ̀b yaà boò wál kɔ̀. Báà piìn ɔ̀dnə́ŋ̀ bəd váàndo bə́n bòdbə gbàákù, Báátììkpɛ̀ŋ sɛŋ wə́ə́ì kə́d ba.

²⁶Kàandə, dáà bə́n gabm̀ vɛ́nà sína, bít bə́n tə́ən taà invaksə́ ma'ǹ kə̀ sòòd gə́, sadaka nə́ŋ̀má dá bə́n báàn invaksə́ pa'ǹ zá'ǹmbə̀ sɔ̀ŋ sé.

²⁷Obə́n gə́, dàà bə́n tə́ də́dǹ ní, kə̀ in aa dáà yaànà roó. Taà kùmsə̀n baànmbə̀ Vɛnɛ́b fágə́ná, bít kə̀ laa kpɛŋké aa dá Vɛnɛ́b ɔ̀dmáàn bəd dú'ǹ doó.

²⁸Nɛ́ŋə̀ aa kɛ̀d Musa indaŋ̀mbə̀ì rə gə́ kóólé, bə̀ dáù kíìn lo'nàá, kóó búúd má ɛ̀g bə̀ bé'ù bə gá, nɛ́b bəd iira, sínkɔ̀ toora, bə̀ mà' sedakoì invaksə́ aa mà' rə yílə́ gə́ roó.

²⁹Nɛ́ŋə̀ aa ɛ̀g Vɛnɛ́b Wààì kə̀ in tɛdń kíin, nɛ́ŋə̀ aa ɛ̀g gɔ̀n nyɛ̀lə́m *gú'dúgke bə̀ aa bí'ù gìdń də yàá, bít dúú nwul pə̀dkè bəì rə gə́, búúraa dá bé'ǹ də, dá nɛɛ̀n taàn dú.

³⁰Kàandə, bə́n gabm̀ màn aa bàà: «Máára máá sə̀n nɛɛ̀n pɛ́nàá, máára mááù sə̀n búúd í'ǹ invaksə́ aa mà' rə bòórú», bít bàà sɔ̀ŋ: «Báátììkpɛ̀ŋ dá nɛ́b oò bəd kíìn fágǹ» də yàá.

³¹Vɛnɛ́b galə̀ kò' nɛ́ŋə̀ì gə́, in də́dǹ gbà'á bìá.

³²Sèl ìì zá' sɛŋ aa íí kùm nyàamdoorú roó. Sɛŋ bəraa rə bərə, sɛŋ aa íí bíl nɛ́b bagké bəd də, íí í' búúd gbàákù. Zá íí dìì sɔ̀ɔ̀nkè nə́gə̀raa rə rú.

³³Sɛŋ kam gə́, bə̀ dúli kúnú, bít bə̀ tɔ̀gəri kíìn nɛ́b zùúm tə́ŋú, bít sɛŋ kam kɔ̀, íí kè' kíìn nɛ́b aa bə̀ tə́ bə̀ ma'ǹ kàandə láŋ̀mbə̀ ba.

³⁴Kə̀ aakíin də, ɛ̀g íí bé' nɛ́b wúltígə́lú bə̀ bəd búúd tə́ kúnú. Bít sɛŋ aa bə̀ kè' gbaŋə̀ íí bəd də, íí kè' yàá kə̀ tɛ́m làmkèá, boò bɔ̀' kúnú. Kàandə, íí gàb yàá, bənə́ tə́ənnə́ kə̀ gbaŋə̀ sɔ̀ɔ̀n aa dá ləə̀n zèd kə̀ zèd də naú.

³⁵Kə̀ taàbìá, ìì bɔ̀' tɛ́m zígke íí sí. Kàandə, dá ii mú'sɛ̀l dùm gbà'á piinàá.

³⁶Íí í' sidǹmbə̀ tɛ́mbagké rú, bɔ̀b ma'ǹ zə́'ǹmbə̀ tùsaa Vɛnɛ́b í' roó, bídǹ bɔbm̀bə̀ in aa bàà dàà roó.

³⁷Kə̀ aakíin də, kìínmbə̀ Núúboòd Gìdń bàà rə kíin: «Bítsɔ̀ŋ, nyɛ́d tə́ sɛŋ zɔ̀gɔ̀ní, sɛŋ də bùùd sé, màn aa dáà yaànnà rə, dáà kíìn yaanàá, náŋà gá.

³⁸Kə̀ aakíin də, nɛ́ŋə̀ aa kùm tə́ wɔ̀ɔ̀lə̀ máá núùrú rə, dá kuùm kə̀ gɔ̀ŋsá, kə̀ tɛ́mbagkéá. Zá bírì bòórú gə́, mə́ kìì tɛ́m làmkè kə̀ oò sɔ̀ŋ gá.»

³⁹Obə́n gə́, bə́n kuùm kìínmbə̀ nɛ́b aa bə̀ bíd bòórú, bít bə̀ tə́ yíl boò bɔ̀'ǹ də kíin gá. Zá obə́n gə́, bə́n tə́ən kə̀ tɛ́mbagké naú, bít bə́n tə́ən kpaŋ̀ súúke bə̀ ba.