Read Samba Leko Ibraniŋko bəraa 11 Bible Online

Ibraniŋko bəraa 11 - Samba Leko bible

Ibraniŋko bəraa 11

¹Nɛ́ŋə̀ aa tə́ kə̀ tɛ́mbagké naà rə, gàb yàá, bəǹ dá in aa bəǹ zíg tɛ́m bərə kíìn bɔbàá. Tɛ́mbagké mà' sùnú, nɛ́ŋə̀ zíg taà tɛ́m in aa bé' bèd síndə ba.

²Vɛnɛ́b kè' nɛ́b aa nyàamdoorú rə, tɛ́mbagké boò bòórú.

³Kə̀ tɛ́mbagkéá, bə́n gabm̀ taá, Vɛnɛ́b nwɔŋ kùd sə̀n lɛg kə̀ yɛ́b tá. Kàandə, in bəraa bə́n tə́ən bé'ǹ yée kóólé, ma'míìn kə̀ in aa bé'míìn gá roó.

⁴Kə̀ tɛ́mbagkéá, Abɛl pii taà Vɛnɛ́b sadaka aa sɔ̀ɔ̀n kàn Kainu bə̀ roó. Tɛ́mbagké oò bòórú, bə̀ kè'ù taà kìínmbə̀ nɛ́ŋə̀ wɔ̀ɔ̀lə̀ kíin, sɛŋ aa Vɛnɛ́b kè' sadaka oò roó. Tɛ́mbagké oò aarə bòórú, val kò'ù yérə máá, bə̀ tə́ bə́n taà nwɔŋ oò gámàá.

⁵Vɛnɛ́b pà' ná' Enɔk lɛgú, tɛ́mbagké oò bòórú; oò gə́, val kò'ù sé. Nɛ́ŋə̀ nə́ŋ̀má sàà bɔ̀b Enɔk sé. Kàandə, Vɛnɛ́b pà' ná'ùwì oò sunú. Núúboòd Gìdń bàà gə́, sɛŋ aa bə́ŋ̀ Vɛnɛ́b pà' ná' Enɔk lɛgə́ síndə máá, Enɔk sɔ̀ɔ̀n Vɛnɛ́b yàá.

⁶Kàandə, nɛ́ŋə̀ aa kə̀ tɛ́mbagké naà síndə, bán sɔ̀ɔ̀nkè Vɛnɛ́b bə̀ bɔbm̀bə̀ gá. Kə̀ aakíin də, màn aa gbarà Vɛnɛ́b səǹ də, oò gàb kúnú, Vɛnɛ́b túrú, bít mà' nɛ́b aa tóò yaànà oò səǹ də sɔ̀ɔ̀nkè tə́ kúnú.

⁷Kə̀ tɛ́mbagkéá, Nuhu kè' taà nwɔŋ bəraa Vɛnɛ́b gbád bààù, dá taàn in bəraa bə́ŋ̀ bé' síndə yílə́ roó. Nuhu ləə Vɛnɛ́b yàá, nyì' kə̀ə̀rá, bít kə̀ə̀raa rə rú, oòra kə̀ ligə̀ oò tá, bə̀ súú taà Vɛnɛ́b aa ləə rə bòórú. Vɛnɛ́b aa ləə rə bòórú, Nuhu ì' gə́, in aa nɛ́b bəd mà' zɔ̀ŋə yɛ́b bərə, invaksá. Tɛ́mbagké aarə bòórú, Vɛnɛ́b ɛ̀gə̀ taà kə̀ nɛ́ŋə̀ wɔ̀ɔ̀lə̀ kíin.

⁸Kə̀ tɛ́mbagkéá, Abraham ləə taà Vɛnɛ́bá, sɛŋ aa Vɛnɛ́b dɛ̀rə̀ roó. Abraham ɛ̀m yɛ́b aa Vɛnɛ́b bàà dàà bəǹ dáù piìn kìínmbə̀ valligə̀ kíin də ba. Abraham zá' dàà yɛ́b oòra, gàb zɔ̀ŋ aa tə́ ɛɛ̀m bərə sé.

⁹Kə̀ tɛ́mbagkéá, kùm taà kìínmbə̀ sɛ̀ɛ́n kíin, yɛ́b aa Vɛnɛ́b bàà dààù rə ba. Isiyaku kə̀ Yakubu tá, bə̀ ləə dìí rú, kìínmbə̀ Abraham ləə rə kíin. Vɛnɛ́b bàà dàà bà nwɔŋ luùm nə́ŋ̀ní.

¹⁰Kàandə, Abraham tə́ bìl aa bèl oò dá kuùm və̀'kè rə nwánàá. Bìl aa Vɛnɛ́b kùd dá sə̀ní də́'nàá, bít dá sìní wəə̀n doó.

¹¹Kə̀ tɛ́mbagkéá, Saratu kɔ̀, nɛɛ̀n aa dòò rú, kùm ziid dú yérə kóólé, Vɛnɛ́b piiù kpɛŋsɛ́l wàà bə̀ lɛbm̀ yàá. Kàandə, zíg tɛ́m, bàà nwɔŋ aa Vɛnɛ́b bàà dàà bəǹ də, dákíìn ma'mínàá.

¹²Abraham dòò sààì vadǹmbìá. Zá yaà bíl nɛ́b zùúm bəd doo boò ra. Nɛ́b bəd də, bə̀ ká' kə̀ dùdù yɛb aa lɛgə́ paà rə kíin, bít kə̀ nyìŋsə́ aa nwuu gbà'á kàd bərə kíin.

¹³Nɛ́b bəraa rə kóólé, val kò' bə̀ yàá, tɛ́mbagké rú. Bə̀ bɔ̀b insɔ̀ɔ̀nkè bəraa Vɛnɛ́b bàà dàà bəǹ dá bə̀ piìn də sé. Zá bə̀ bé' insɔ̀ɔ̀nkè bəraa rə zɔ̀ŋ bùúd ba, bít bə̀ dɔ̀m bə̀ zɔ̀ŋ bùúd ba. Bə̀ gàb yàá, bənə́ sɛ̀ɛ́n bərá, bít bənə́ tə́ənnə́ kìínmbə̀ nɛ́b bəraa nùù bə̀ dàà yɛ́b boò rə kíin, zɔ̀ŋə yɛ́b ba.

¹⁴Nɛ́b aa bə̀ gám nwɔŋ kə̀ aakíin də, bə̀ ì' nyɛdkè, bənə́ tə́ənnə́ yɛ́b puu aa bənə́ dáánnə́ ləə̀n bərə saanàá.

¹⁵Dáà sèl bə̀ zá' yɛ́b aa zá' bə̀ dàà rəì gə́, bə̀ dá kpaŋ̀ kíìn bɔbm̀ bídǹmbìá.

¹⁶Zá vɛ́nà bə̀ gə́, bə̀ í' zɔ̀ŋ ləə̀nmbə̀ sɔ̀ɔ̀ná, zɔ̀ŋ ləə̀nmbə̀ lɛgə́ paà bìá. Kə̀ taàbìá, Vɛnɛ́b nùù taà sə́ə́mnúù baànmbə̀ bəǹ Vɛnɛ́b boò sé. Kàandə, kùd bə̀ bìl gbà'á nə́ŋ̀ yàá.

¹⁷Kə̀ tɛ́mbagkéá, Abraham kè' nwɔŋ aa Vɛnɛ́b bàà dààù rə yàá. Kə̀ taàbìá, kè' taà wàà nə́ŋgùm oò Isiyaku piìnmbə̀ kìínmbə̀ sadaka kíin, sɛŋ aa Vɛnɛ́b də́' ɛ̀gə̀ roó. Abraham də, nɛ́ŋə̀ aa Vɛnɛ́b bàà dààù nwɔŋ doó, bít kàandə máá, kè' yàá, bəǹ dá wàà nə́ŋgùm bəǹ piìn kìínmbə̀ sadaka kíin. Nyàam də, Vɛnɛ́b bààù: «Kə̀ Isiyaku ra, ń dá taà yɛb kàá bəraa Vɛnɛ́b bàà dàà n də bɔbàá.»

¹⁹Abraham sèl oò tɛ́mú gə́, bə̀ Vɛnɛ́b dá Isiyaku kíìn díìm valú. Abraham bíd bɔ̀b Isiyaku kìínmbə̀ díímà valú kíin.

²⁰Kə̀ tɛ́mbagkéá, Isiyaku zíg taà Yakubu kə̀ Isuwa tá nɛɛ̀n yílú, sɛŋ bəraa dáà yaànnà númú rə bìá.

²¹Kə̀ tɛ́mbagkéá, Yakubu zíg taà Yusufu yɛb nɛɛ̀n yílú, sɛŋ aa val dáù ko'ǹ bəroó. Tə́b gbà' ba, bít káŋ Vɛnɛ́bá.

²²Kə̀ tɛ́mbagkéá, Yusufu gám taà nwɔŋ sɛŋ aa nɛ́b Israila bə̀ bəd bə̀ dá vúgǹ kə̀ Misra yɛ́b bərə yílú, sɛŋ aa val tə́ù ko'ǹ bəroó; bít bàà bə̀ taà in aa bə̀ dá ma'ǹ kə̀ níŋsə́ oò bəd doó.

²³Kə̀ tɛ́mbagkéá, Musa bóò bəd ìì mə́'ù taà sòò toora, sɛŋ aa bə̀ lɛ̀bə̀ bəroó. Bə̀ bé' gə́, wàà sɔ̀ɔ̀ná, bít ìì nùù də́dǹ gààd indaŋ̀mbə̀ məə̀n daànmbə̀ sé.

²⁴Firaona wàà kéèndo, bə̀ Musa wàà bəǹ da. Zá kə̀ tɛ́mbagkéá, Musa kàŋ bíl nɛ́d gbàáro gə́, məə taà ke'ǹmbìá, nɛ́b bəd bə̀ tə́ù dɛdǹ oò Firaona wàà kéèndo aarə wàà gə́ roó.

²⁵Í' kàn nɛɛ̀n búúd bé'ǹmbə̀ kə̀ Vɛnɛ́b nɛ́b bəd tá, kə̀ kiìnmbə̀ tɛ́mlàmkè sɛŋ zɔ̀gɔ̀ní invaksə́ rú gə́ roó.

²⁶Oò gə́, í' pɛ̀d búúd í'ǹmbə̀ Krístù bòórú, kə̀ gbaŋə̀ bəraa Misra yɛ́b bərə bɔbm̀bə̀ gə́ roó. Kàandə, zíg tɛ́m oò mú'sɛ̀l dùm aa dáà yaànà númú rə ba.

²⁷Kə̀ tɛ́mbagkéá, Musa zá' dàà taà Misra yɛ́bá, də́dǹ má mà'ù kə̀ gààd nɔ̀m sé. Kùm və̀'kèá, kìínmbə̀ bé' Vɛnɛ́b aa bé'míìn gá rə tə́ kíìn kíin.

²⁸Kə̀ tɛ́mbagkéá, mà' taà *Paska bìá. Bít pii nɛ́b Israila bə̀ bəd kpaŋ̀, boò vád in nyɛ̀lə́m boò ligə̀ waàl ba, bɔ̀b *malaika val bə̀ oò lòd yɛb éèn də̀gə̀ də̀gə̀ bə̀ boò bəraa Israila rə sí.

²⁹Kə̀ tɛ́mbagkéá, nɛ́b Israila bə̀ bəd ìì ta'à taà nwuu yɛ̀ɛ́l gbà'á, kìínmbə̀ tə́ yɛ́b wadké bə kíni. Zá nɛ́b Misra yɛ́b bə bə̀ bəd bə̀ í' ma'ǹmbə̀ kə̀ boò kíin gə́, wəl lòd bə̀ yàá.

³⁰Kə̀ tɛ́mbagkéá, mawol aa nɛ́b Yeriko bìlə́ bə̀ bəd wə̀ə̀ bə̀ báán kə̀ bìl boò rə, wɔb yàá, sɛŋ aa nɛ́b Israila bə̀ bəd líb bə̀ taà wərə̀ nyàm nə́ŋ̀ní bə sɛŋ nə́ŋsínà roó.

³¹Kə̀ tɛ́mbagkéá, Rahab nɛ́ŋ kéèndo labsə̀ bə̀, val kò'ù kə̀ nɛ́b kam bəraa ləə Vɛnɛ́b síndə tə́ sé, nɛɛ̀n aa sí' sɛ̀ɛ́n bəraa bə̀ tə́ nɛ́b bəd piìn bàgələ́ rə, kə̀ tɛ́m làmkè roó.

³²Dáà máá ii kíìn báàn nwɔŋ gáàmbə̀ zùúm nɛ́b luùm bəraa yée yílú. Mə́ bɔ̀b sɛŋ nwɔŋ bə̀ gáàm *Gedeyon yílú, Barag yílú, Samson yílú, Yɛbta yílú, Dauda yílú, Samuel yílú, bít kə̀ *Vɛnɛ́b gbantumsə̀ bəd yílə́ gá.

³³Kə̀ tɛ́mbagkéá, nɛ́b bəraa kə̀ aakíin də, nə́' bə̀ kè' taà yɛ́b bərá, bə̀ mà' taà in wɔ̀ɔ̀làá, bít bə̀ bɔ̀b taà in aa Vɛnɛ́b bàà dàà roó; bə̀ ke' taà gbàálnyìg bəd gúsá,

³⁴bə̀ fə́' taà laa kpɛŋsɛ́l bə̀ bərá, nùù bə̀ súú taà yɛ́rə̀ búúraa dá bə̀ lodǹ də rú. Bə̀ nɛ́b vɛɛmsɛ́l bə̀ bərá, zá bə̀ bíl nɛ́b kpɛŋsɛ́l bə̀ bəd yàá. Bə̀ nɛ́b bùm bə̀ nə́'ǹ sɔ̀ɔ̀n bərá, bít bə̀ nìŋ sóózè sɛ̀ɛ́n bəd yàá.

³⁵Kə̀ tɛ́mbagkéá, nɛ́b kɛ́ɛ̀m bəd bə̀ bé' taà nɛ́b boò bəd díím taà valú, bɔ̀b boò bə̀ bídǹ bɔbm̀bìá. Nɛ́b kambəd val kòd bə̀ búúrú, bə̀ məə kíìn yíl boò bəd káàn ke'ǹmbìá. Kàandə, bə̀ í' díìmbə̀ valú, bídǹ bɔbm̀bə̀ gɔ̀ŋsə́ aa sɔ̀ɔ̀n kàn nɛɛ̀n doó.

³⁶Nɛ́b kambəd gə́, lòò bə̀ bí' bə̀ kèérá, bít bə̀ zìb bə̀ kúnú. Nɛ́b kambəd kɔ̀, bə̀ tab bə̀ kə̀ sɛ̀gsɛ́gá, bít bə̀ pál bə̀ wúltígə́l bə̀ rú.

³⁷Làà bə̀ lòd nɛ́b kambəd kə̀ bəŋá. Nɛ́b kambəd kɔ̀, bə̀ və̀l bə̀ tə́ŋtəŋú, kə̀ in aa bə̀ dɛ̀d síì roó, bə̀ lòd bə̀ kə̀ yɛ́rə̀ bùúrá, bə̀ gəə̀l zɔ̀ŋ kə̀ zɔ̀ŋá, bə̀ páá bɛ̀rə̀ kúlá, sínkɔ̀ vəə kúlá. Bə̀ í' bə̀ búúrá. Bə̀ tɔ̀gə̀d bə̀ kə̀ nwɔŋ saasɛ́lá.

³⁸Boò gə́, bə̀ kànì ləə̀nmbə̀ zɔ̀ŋə yɛ́b ba. Bə̀ gəə̀l fɔ̀gú, kə̀ kɔ̀l ba, kìínmbə̀ nɛ́b aa bə̀ nìŋ bə̀ rə kíin. Bə̀ kùm vɔ̀gú, kə̀ libú.

³⁹Nɛ́b aarə kóólé, Vɛnɛ́b gám nwɔŋ sɔ̀ɔ̀nkèì boò yílú, tɛ́mbagké boò bòórú. Zá bə̀ bɔ̀b in aa Vɛnɛ́b bàà dàà bəǹ dá bə̀ piìn də sé.

⁴⁰In aa wə́ə́ kàandə, Vɛnɛ́b bàà bəǹ dá bə́n insɔ̀ɔ̀nkè nə́ŋ̀ piinàá. Kə̀ aakíin də, mà' bəǹ dá bə́n bí'ǹ gìdń kə̀ boò tá, sɛŋ nə́ŋ̀ní ba.