Read Samba Leko Ibraniŋko bəraa 12 Bible Online

Ibraniŋko bəraa 12 - Samba Leko bible

Ibraniŋko bəraa 12

¹Obə́n gə́, sedako bəd zùúm láŋ bə̀ páá bə́n tə́ tə́ŋú. Kàanyée gə́, làà báà lɛ́'ǹ inpi'kè aa tə́ bə́n daŋ̀ piìnmbə̀ tɛ́mbagké kpaŋ́ rə kíìn kóólé. Làà báà lɛ́'ǹ invaksə́ aa tə́ bə́n pe'ǹ bərə kúnú, bít báà piìn yíl bə́n kə̀ zɔ̀ŋtá, tɛ́mbagké kpaŋú.

²Ɛ̀g báà wádǹ núù bə́n Yéésù ba, tɛ́mbagké bə́n dìì tə́ oò ba; sɔ̀dke rú, kə̀ bɛ́dke rú. Yéésù sìd yàá, sɛŋ aa bág bə̀ lò'ù téélɛŋké bəroó. Oò gə́, nùù sə́ə́mnúù val aarə bə̀ sé. Kàandə, ɛ̀g bé' tɛ́m làmkè aa tə́ù nwáàn númú rə yàá, bít bə́ŋyée gə́, kùm tə́ *Vɛnɛ́b gààd mə̀ə̀d nɛɛ̀n váànú bə̀ rú.

³Ìì sèl nɛɛ̀n aa sìd búúraa nɛ́b invaksə́ bə̀ ma'ǹ bərì í'ù roó, bɔ̀b ìì mú' sí, bít ìì lɛ́' tɛ́mbagké íí sí kɔ̀.

⁴Kàandə, nə́gə̀raa íí tə́ nə́'ǹ kə̀ invaksə́ yérə, íí nə́' bə́ŋ̀ wə́ə́ val zɔ̀ŋə́ sé.

⁵Yid íí bɔ̀m nwɔŋ váàndo bə̀ piìn bəraa Vɛnɛ́b gámi, kìínmbə̀ íí yɛb oò bəd kíin də yèè? Bàà: «Wàà mə́ra, Báátììkpɛ̀ŋ álnnì gə́, ɛ̀g ǹ gɔ̀n sí. Bít màìgə́ í' n búúrì gə́, tɛ́m oò dìg n sí.

⁶Kàandə, Báátììkpɛ̀ŋ ál nɛ́ŋə̀ aa í' roó, bít í' nɛ́ŋə̀ aa gàbə̀ kìínmbə̀ wàà oò kíin də búúrá.»

⁷Ìì sìd búúd íí bərá, kìínmbə̀ báá tə́ sə̀n wàà álǹ kíin. Kə̀ aakíin də, búúd bəraa rə, bə̀ ì' gə́, Vɛnɛ́b ɛ̀gi tə́ kìínmbə̀ yɛb oò bəd kíin. Wàà nə́ŋ̀ túrú, bóò í'ù búúd géè?

⁸Dáà Vɛnɛ́b ál ii kìínmbə̀ yɛb oò bəd kíin síngə́, ogə́ íí yɛb oò vɛ́nà gá. Íí tə́ kìínmbə̀ yɛb wáàl bəd kíin.

⁹Sèl báà zá'ǹ báá bə́n bəraa zɔ̀ŋə yɛ́b bəroó. Bə̀ ál bə́n tə́ kúnú, bít bə́n ləə̀n bə̀ tə́ kúnú. Aa kàn nɛɛ̀n də, Báá bə́n aa lɛgə́ paà roó, báà lə́ə̀n yíl bə́n oò dùú, bɔ̀b báà bɔbm̀ kə̀ *gɔ̀ŋsə́ aa bɛ́d bə gá roó.

¹⁰Báá bə́n bəraa zɔ̀ŋə yɛ́b bərə, bə̀ í' bə́n búúd sɛŋ zɔ̀gɔ̀ní, kə̀ nɛɛ̀n aa dá bə̀ sɔɔ̀n də kíin. Zá Vɛnɛ́b gə́, í' bə́n búúd, bɔ̀b obə́n bə̀ kudǹmbìá. Kàandə, í' báà kuùm gìdń kə̀ obəǹ kíin.

¹¹Sɛŋ aa bə̀ tə́ bə́n álǹ lə, bə́n kiìn tɛ́m làmkè gá. Tɛ́m nwuu bə́n kúnú. Zá bòórú gə́, nɛ́b aa bə̀ tə́ búúraa bé'ǹ də, ìì bɔ̀b sə̀n insɔ̀ɔ̀n aa búúraa tə́ lɛbm̀ doó. Àà bà tɛbə̀ aa wál kə̀ gɔ̀ŋsə́ wɔ̀ɔ̀lə̀ tə́ roó.

¹²Íí ɔ̀gì tɛ́mbagké íí rú. Kàanyée gə́, ìì mà' tɛ́mbagké íí bíd oò kùm və̀'kèá.

¹³Ìì kùm kpaŋ̀ sɔ̀ɔ̀nú. Kàandə, nɛ́b aa tɛ́mbagké boò ɔ̀g də, boò bɔ̀b sí, zá boò súú kúnú.

¹⁴Ìì sàà kuùmbə̀ kə̀ tɛbàá, kə̀ nɛ́b bəd kóólé, bít kuùmbə̀ kə̀ gɔ̀ŋsə́ *gìdńná. Kàandə, íí kùm kə̀ gɔ̀ŋsə́ síngə́, nɛ́ŋə̀ nə́ŋ̀má bán Báátììkpɛ̀ŋ bé'ǹmbə̀ gá.

¹⁵Ìì gú' yíl íí ra, kàandə, nɛ́ŋə̀ nə́ŋ̀má aí tə́ŋú, nùù oò bíd bòórú, oò dàà Vɛnɛ́b pə̀dkè sí. Nɛ́ŋə̀ nə́ŋ̀má oò kùm kə̀ téé nyááke aa tə́ kaŋ̀, bít tə́ nɛ́b bəd búúd í'ǹ kə̀ mɛ̀n oòrə kíin sí. Nɛ́ŋə̀ aa kə̀ aakíin də, dá nɛ́b zùúm kíìn yɛɛ̀l aí tə́ŋú.

¹⁶Ìì gú' yíl íí ra. Nɛ́ŋə̀ nə́ŋ̀má aí tə́ŋú, oò mà' labsə̀ sí, oò kùm kìínmbə̀ Isuwa kíin sí. Kàandə, Isuwa káŋ Vɛnɛ́b sé. Oòrə, wàà də̀gə̀ də̀gə̀ bìá, zá pà' lɛ́b gbà'á oòrə kə̀ gbèd magàá.

¹⁷Bə́n gabm̀ yàá, bòórú zɔ̀gɔ̀ gə́, í' báá bəǹ oò zíg bəǹ nɛɛ̀n yílú, í' sɔ̀gǹmbə̀ kə̀ in bəraa mà' nyàam doó, sàà kə̀ kpə̀ə́ǹá, zá bɔ̀b sé.

¹⁸Aí gə́, íí kə̀ nɛ́b Israila bə̀ bəd kíin sé. Kàandə, boò gə́, gbad bə̀ yaaì Sinai kɔ̀l ba, bít bə̀ bé' laa yɛ̀ɛ́l gbà'á, tígə́l gbà'á, zabnwulá,

¹⁹bít bə̀ kìì yaa gàsá, kə̀ pə̀gə̀lib nwɔŋ nə́ŋ̀á. Pə̀gə̀lib nwɔŋ də, mà' bə̀ də́dǹ kíìn gbàákù. Bít bə̀ nyɛ̀m Vɛnɛ́b, bənə́ kiinə́ pə̀gə̀lib nwɔŋ aarə sɔ̀ŋ sí.

²⁰Kàandə, bə̀ bán indaŋ̀mbə̀ aa Vɛnɛ́b pii yée sidǹmbə̀ gá: «Ingalə̀wàá, sínkɔ̀ nɛ́ŋàá, pig kɔ̀l aarəì gə́, làà boò lò'ù kə̀ bəŋá.»

²¹In də mà' də́dǹ kàn nɛɛ̀n yée gə́, Musa bàà: «Də́dǹ mà' mə́ tə́ gbàákù, mə́ tə́ taà niŋàá.»

²²Zá aí gə́, gbad íí yaaì Siyona kɔ̀l ba, bìl aa Vɛnɛ́b galə̀ kùd doó, Urusalima bìl lɛgə́ paà bìá, bìl aa *malaika bəd bə̀ mà' wálke rú roó.

²³Gbad íí yaaì wálke Vɛnɛ́b yɛb də̀gə̀ də̀gə̀ bə̀ rú. Nɛ́b aarə, nə́gə́l boò bádmíìn tə́ lɛgə́ poú. Gbad íí yaaì Vɛnɛ́b, nɛ́ŋə̀ aa tə́ nɛ́b bəd kóólé fágǹ də sunú. Gbad íí yaaì nɛ́b wɔ̀ɔ̀lə̀ bəraa nwul boò bíl nyɛdkè rə sunú.

²⁴Aí gə́, gbarí yaaì Yéésù sunú, màn aa mà' *gú'dúgke puu kə̀ nyɛ̀lə́m oò aa mà' tù' kàn Abɛl nyɛ̀lə́m doó.

²⁵Ìì gú' yíl íí ra! Ìì məə nɛ́ŋə̀ aa tə́ ii nwɔŋ baàn də zɛŋ̀mbə̀ sí. Nɛ́b bəraa bə̀ məə nɛ́ŋə̀ aa tə́ bə̀ nwɔŋ baàn zɔ̀ŋə yɛ́b bərə zɛŋ̀mbə̀ rə, bə̀ súú búúrú sé. Zá obə́n gə́, sɔ̀d leè báan taà súùn gú, məə bə́n daàn nwɔŋ aa Vɛnɛ́b tə́ bə́n baàn dəì zɛŋ̀mbə̀ gə́ roó?

²⁶Sɛŋ aa gám nwɔŋ Sinai kɔ̀l yílə́ rə, wá' yɛ́bá. Zá bə́ŋyée gə́, bàà dàà bə́n nwɔŋ aa yóo: «Sɛŋ nə́ŋ̀ tə́ sɔ̀ŋ, máá yɛ́b ní wá'ǹ gá, má lɛg wá'ǹ kɔ̀.»

²⁷Nwɔŋ bəraa bə̀ bàà: «Sɛŋ nə́ŋ̀ tə́ sɔ̀ŋ» yérə, tə́ kíìn i'ǹ nyɛdkè, in bəraa séémíìn zɔ̀ŋə yɛ́b bərə gə́ kóólé, bɔ̀b dákíìn dugàá. In aa wáá gá rə, dá sìní nyɛ́ràá.

²⁸Kə̀ taàbìá, báà mɔ̀'ǹ Vɛnɛ́bá; kàandə, bə́n tə́ən gààd yɛ́b aa wáá bə gá rə bɔbàá. *Báà káŋ̀ Vɛnɛ́bá, báá n ma'ǹnə̀ tùsaa dáù sɔɔ̀n doó, kə̀ oò bə̀ káŋ̀mbìá, bít kə̀ də́dǹ nuùnmbə̀ kə̀ oòra.

²⁹Kàandə, Vɛnɛ́b bə́n kùmsə̀n laa in bə̀ dú'ǹná.