Read Samba Leko Ibraniŋko bəraa 13 Bible Online

Ibraniŋko bəraa 13 - Samba Leko bible

Ibraniŋko bəraa 13

¹Báà daàn ɔ̀dnə́ŋ̀ í'ǹmbə̀ bə́n bòdbə, kìínmbə̀ ɔ̀dkudvɛɛ̀l Krístù bə̀ bəd kíin sí.

²Yid ìì bɔ̀m sɛ̀ɛ́n sí'ǹmbə̀ sí. Nɛ́b kambəd ìì mà' kàani, bə̀ sí' taà *malaika bəd boò yiilú. Zá gabm̀bə̀ *malaika bəd də, bə̀ gàb sé.

³Sèl ìì zá' nɛ́b aa wúltígə́l bə̀ rú roó, kìínmbə̀ aí kɔ̀, íí tə́ wúltígə́l bə̀ rú kə̀ boò tə́ kíin. Sèl ìì zá' nɛ́b aa bə̀ tə́ bə̀ búúd í'ǹ doó, kìínmbə̀ aí kɔ̀ bə̀ í' ii búúd tə́ kə̀ boò tə́ kíin.

⁴Báà daàn nɛ́b bəd kóólé, boò káŋ kéèn pa'ǹmbìá, sínkɔ̀ váàn pa'ǹmbìá. Nɛ́b aa bə̀ pà' ɔ̀dnə́ŋ̀ì rə, boò wál kilə̀ kə̀ nɛ́ŋə̀ ɔ̀d gbaarú sí. Kàandə, Vɛnɛ́b dá nɛ́b aa bə̀ tə́ labsə̀ ma'ǹ də kíìn fágàá.

⁵Ìì dàà í'sɛ̀l ba' bə̀ oò ləə gààd aí yílə́ sí. Zá ìì kìì tɛ́m làmkè kə̀ in aa íí kə̀ naà roó. Kàandə, Vɛnɛ́b bàà: «Mə́ dàà n gá, bít làà mə́ lɛ́' n gá.»

⁶Kə̀ taàbìá, báà baàn kə̀ tɛ́m zígke vɛ́nà bìá: «Báátììkpɛ̀ŋ yaà tə́ mə́ sə̀n láŋ̀ ba, mə́ nùù də́dǹ kə̀ in nə́ŋ̀má gá. Nɛ́ŋə̀ gə́, dá mə́ níì báàn ma'ǹmbə̀ gú?»

⁷Sèl ìì zá' nɛ́b gbàád yíl bə̀ bəraa bə̀ ùri Vɛnɛ́b nwɔŋ nyàamdoorú roó. Ìì sèl nɛɛ̀n aa bə̀ kùm dú aí tə́ŋú, nɛɛ̀n aa bə̀ wál lə roó, bít ìì màg tɛ́mbagké boò ra.

⁸Yéésù Krístù gə́, pɛ́n bə gá. Dá kuùm zèd kə̀ zèrá, níiná, kə̀ nyà'aa yóo, bít sɛŋ gə́ kóólé.

⁹Báà daàn insánke puu bəd boò páá bə́n kpaŋ̀ vaksə́ rú sí. Zá aa dá sɔɔ̀n də gə́, tɛ́mbagké bə́n oò kpɛŋ̀ kə̀ pə̀dkè Vɛnɛ́b bìá. Báà daàn indaŋ̀mbə̀ nwɔŋ bəraa inlíìnmbə̀ yílə́ rə, boò ləə sə̀n gààd obə́n tɛ́mú sí. Nɛ́b aa bə̀ tə́ indaŋ̀mbə̀ nwɔŋ luùm bəraa bagǹ də, gbá' bə̀ in nə́ŋ̀má sé.

¹⁰*Nɛ́b láŋsə́ bə̀ ma'ǹ bəraa bə̀ tə́ tù' ma'ǹ dìí *gìdńnú rə, bə̀ kə̀ kpaŋ̀ naà, in aa bə́ pii Vɛnɛ́b bə̀ káŋ̀ obə́ *gannyàgə̀lə́ rə líìnmbə̀ sé.

¹¹*Láŋsə́ gààd gbà'á àà gɔ̀g nyɛ̀lə́m zɔ̀ŋ gìdń aa kàn nɛɛ̀n də rú, bɔ̀b invaksə́ bəd bə̀ sugǹná. Zá gɔ̀g bəraa rə, bə̀ luuà bìl bòórú.

¹²Kə̀ taàbìá, Yéésù kɔ̀ val kò'ùwà bìl gbà'á bòórú, bɔbm̀ *bí'ǹmbə̀ nɛ́b bəd gìdń kə̀ nyɛ̀lə́m oòra.

¹³Báà vúgǹ bìl bòórú, bɔ̀b báà wáàl kə̀ oòra. Báan sidǹ nɛɛ̀n aa bə̀ tə́ bə́n ɛgǹ gɔɔ̀n dú, kə̀ oò kíin yérə kúnú.

¹⁴Bə́n kə̀ bìl gbà'á aa dá ləə̀n zèd kə̀ zèd də naà, zɔ̀ŋə yɛ́b bə sé; bə́n tə́ən taà saàn bìl sɔ̀ɔ̀n aa dáà yaànà númú rə bɔbm̀bìá.

¹⁵Báà daàn Vɛnɛ́b káŋke piìnmbə̀ Yéésù nə́gə́lə́ sí. Káŋke bə́n oò kùm kìínmbə̀ sadaka kíin. Káŋke aarə, kùmsə̀n nɛɛ̀n aa bàà bə́n tə́ən nyɛ́'ǹ kə̀ gúsá, oòra kùmsə̀n Báá bə́n Tììkpɛ̀ŋ doó.

¹⁶Yid ìì bɔ̀' sɔ̀ɔ̀nkè ma'ǹmbə̀ sí, bít pɛ̀l ìì gàb in aa íí kə̀ naà rə íí bòdba. Ma'ǹmbə̀ kə̀ aakíin də, tə́ kə̀ sadaka kíin; sɔ̀ɔ̀n Vɛnɛ́b tə́ kúnú. Kàandə, sadaka luùm aa kə̀ aakíin də, sɔ̀ɔ̀n sə̀n Vɛnɛ́bá.

¹⁷Ìì ləə nɛ́b gbàád íí bərá, ìì bàg indaŋ̀mbə̀ boò ra. Boò ra ìì tə́ sə̀n nyì' íí bəd nwánàá. Kàandə, bàà bə̀ dá nwɔŋ dáàn bí'ǹ Vɛnɛ́b númú, tùsaa bə̀ mà' rə yílú. Dáà íí ləə bə̀ì gə́, mà' bə̀ dá tù' boò bəd zə́'ǹ kə̀ tɛ́m làmkèá. Kàan síngə́, mà' ìì dá tù' rə zə́'ǹ kə̀ tɛ́m nwuukèá; aarə gbá' ii in nə́ŋ̀má gá.

¹⁸Ìì dìì Vɛnɛ́b nyɛɛ̀mbə̀ kə̀ obə́ra. Bə́n gabm̀ yàá vɛ́nà, bə́n tə́ən kə̀ inselké sɔ̀ɔ̀n naú. Kàandə, sɛŋ gə́ kóólé, bə́n í'ǹ tù' sɔ̀ɔ̀n ma'ǹmbìá.

¹⁹Mə́ tə́ ii kíìn nyɛmàá, ìì nyɛ̀m Vɛnɛ́b kə̀ máára, bɔ̀b oò bí' máà aí sə̀n kə̀ báŋ.

²⁰Mə́ nyɛ̀m Vɛnɛ́b tɛbə̀ bə̀ oò pii ii insɔ̀ɔ̀nkè bəraa íí í' rə gə́ kóólé, bɔ̀b ìì mà' kə̀ in bəraa í' roó. Vɛnɛ́b kùmsə̀n màn aa díím Báá bə́n Tììkpɛ̀ŋ Yéésù, bɛ̀rə̀ yibə̀ gbà'á valə́ roó. Vɛnɛ́b díímə̀ nyɛ̀lə́m aa zà' rə bòórú. Nyɛ̀lə́m oò aarə, mà' sə̀n *gú'dúgke aa dá kuùm zèd kə̀ zèd doó. Mə́ nyɛ̀m Vɛnɛ́b oò mà' obə́n dú, in aa dáù sɔɔ̀n də kə̀ Yéésù Krístù ra. Kaŋsɛ́l oò kùm Yéésù Krístù naú, zèd kə̀ zèrá! Oò kùm kàani!

²²Ɔ̀dkudvɛɛ̀l mə́ í'sɛ̀lbə̀ bərá, mə́ tə́ ii kíìn nyɛmàá, ìì zɛ̀ŋ nwɔŋ tɛ́m gágke bə̀ máa yée kə̀ tɛ́m sidkéá, kàandə, nwɔŋ aa mə́ báriyà núúboòraa rú yée, bùùd sé.

²³Mə́ í' ii baànmbìá, ìì gàb kúnú, ɔ̀dkuvɛɛ̀l í'sɛ̀lbə̀ bə́n Timote vúgì wúltígə́l bə̀ rú. Yaà wə́ə́ì zɔ̀ŋə kə̀ báŋ gə́, máá ɛɛ̀m kə̀ oò tá, sɛŋ aa máá ii dáàn ɛgǹ bəroó.

²⁴Ìì dɔ̀m nɛ́b gbàád íí bəraa wərə̀ rə kə̀ Vɛnɛ́b nɛ́b gìdń bəd tə́ kóólé. Ɔ̀dkudvɛɛ̀l Vɛnɛ́b nɛ́b gìdń bəraa Italiya yɛ́b bə kə̀ máá tə́ rə, bə̀ dɔ̀mi yàá.

²⁵Vɛnɛ́b oò mà' ii pə̀dkèá, íí kóólé!