Read Samba Leko Ibraniŋko bəraa 2 Bible Online

Ibraniŋko bəraa 2 - Samba Leko bible

Ibraniŋko bəraa 2

¹Kə̀ taàbìá, kò' báà kudǹ nwɔŋ sɔ̀ɔ̀n aa bə́n kiìn də kíìn sɔ̀ɔ̀nkè, bɔ̀b báà pɛdǹ kə̀ Vɛnɛ́b sí.

²Nyàamdoorú rə, Vɛnɛ́b pii iiyà Musa indaŋ̀mbìá, *malaika bəd naú. Indaŋ̀mbə̀ aarə, və̀' sɔ̀ɔ̀n. Bít màn aa kɛ̀d indaŋ̀mbə̀ yàá, ləəù síndə, bə̀ dáù búúd í'nàá.

³Kàanyée gə́, ééleè nùù báan taà súùn Vɛnɛ́b fágə́n aa yée rú gú, dáà ɛ̀g bə́n gɔɔ̀n súúke nwɔŋ aarəì gə́ roó? Báátììkpɛ̀ŋ kə̀ yíl oò bìá, sɔ̀d bàà bə́n sə̀n súúke nwɔŋ aa roó. Bítsɔ̀ŋ, nɛ́b aa bə̀ kììà rə, bàà yaà bə̀ nyɛ́' bə́n sə̀n nwɔŋ aa Yéésù bàà roó.

⁴Sɛŋ aarə bəní, Vɛnɛ́b dìì sedako boò bəd bəní, kə̀ inkɔrə bərá, in də́dǹ bə̀ tó'ǹ bərá, bít kə̀ inwulubə̀ luùm gɔ̀ŋ gɔ̀ŋ ma'ǹmbìá. Bítsɔ̀ŋ, gàm nɛ́b bəd Nwul Gìdń kɔ̀, bɔ̀b boò mà' kə̀ in sɔ̀ɔ̀ná, kə̀ nɛɛ̀n aa í' rú rə kíin.

⁵Kə̀ aakíin də, Vɛnɛ́b pii *malaika bəd kpɛŋsɛ́l, bɔ̀b boò ləə gààd yɛ́b aa dáà yaanà númú, bə́n tə́ən nwɔŋ oò gáàm bə́ŋyée rə bə sé.

⁶Zá Núúboòd Gìdń zɔ̀ŋ nə́ŋ̀ bə gə́, nɛ́ŋə̀ nə́ŋ̀ bàà Vɛnɛ́b: «Vɛnɛ́bá, nɛ́ŋə̀ gə́ níì, ń dáù taà seèl gú? Sínkɔ̀ *Nɛ́ŋ Váàndo Wàà rə níì, ń dáù taà ko'ǹ kudǹ gú?

⁷Zá ń lə́ə́ù yíl *malaika bəd dùù sɛŋ zɔ̀gɔ̀, ḿ piiù kaŋsɛ́l laa nyɛkèá, bít ń lə́ə́ù kìínmbə̀ gààd kíin.

⁸Bít ń lə́ə́ in gə́ kóólé tə́ oò dun dùú.» Sɛŋ aa Vɛnɛ́b lə́ə́ in gə́ kóólé oò dun dùù rə, in nə́ŋ̀má nyɛ́d kúnú, oò bə̀ ləə̀nmbə̀ síngə́ sé. Zá bə́ŋyée gə́, bə́ bé' in gə́ kóólé ləəù sé.

⁹Zá báà ɛgǹ bə́ŋ̀ gè' Vɛnɛ́b lə́ə́ Yéésù yíl *malaika oò bəd dùù sɛŋ zɔ̀gɔ̀. Kàandə, kə̀ pə̀dkè Vɛnɛ́b bìá, val kò' taà Yéésù nɛ́b bəd kóólé bòórú. Bít bə́ŋyée bə́n bé'ǹnə̀ bə̀ tə́ù kíìn káŋàá, bít bə̀ tə́ù ləə̀n búúd val bə̀ aa bé' rə bòórú.

¹⁰Kə̀ aakíin də, Vɛnɛ́b aa séé bít kò' sə̀n in bəd kóólé rə, oò bí' Yéésù gìdńná, búúd bəraa bé' rə bòórú, bɔbm̀ aànmbə̀ yɛb oò bəd zùúm kaŋsɛ́l laa nyɛdkè oò rú. Kàandə, Yéésù kùmsə̀n nɛ́d yíl bə̀ aa àà bə̀ súúke kpaŋ́ roó.

¹¹Yéésù mà' bí' nɛ́b bəd kóólé gìdń invaksə́ boò rú, bít nɛ́b aa nyɛ́' bə̀ rə kóólé, bə̀ tə́ báá nə́ŋ̀ní. Kə̀ taàbìá, Yéésù kìì tɛ́m làmkè kə̀ boò bə̀ dɛdǹmbə̀ ɔ̀dkudvɛɛ̀l bərá.

¹²Bít bàà: «Báá Vɛnɛ́bá, máá nwɔŋ gáàm ám nə́gə́lú, ɔ̀dkudvɛɛ̀l mə́ bəd tə́ŋú, máan káŋ̀ ɔ̀dkudvɛɛ̀l mə́ bəraa wál lə tə́ŋú.»

¹³Bít bàà sɔ̀ŋ: «Máá tɛ́m mə́ zígǹ ám ba, Vɛnɛ́bá.» Bítsɔ̀ŋ bàà: «Eere mə́ yóo, kə̀ Vɛnɛ́b yɛb aa pii mə́ rə tá.»

¹⁴Kə̀ aakíin də, yɛb bəraa dɛ̀d bà rə, bə̀ tə́ si' nə́ŋ̀ní, bít nyɛ̀lə́m nə́ŋ̀ní. Yéésù kə̀ yíl oò bìá, yaà bíl tə́ kìínmbə̀ boò kíin. Mà' kàandə, bɔ̀b Sámbàŋyɛ́rə̀, nɛ́ŋə̀ aa tə́ val kpɛŋsɛ́l ko'ǹ naà rə lo'ǹmbìá.

¹⁵Bít kə̀ aakíin də, Yéésù bìnlɛ́' nɛ́b aa ìì kùm kìínmbə̀ kɔ̀' kíin boò gɔ̀ŋsə́ rú rəì kóólé, nɛ́b aa ìì kùm kə̀ də́dǹ val bə̀ tɛ́mú roó.

¹⁶Kàandə, vɛ́nà, yaà *malaika bəd láŋ̀mbə̀ bə gá, zá yaà Abraham yɛb kàá bəd láŋ̀mbə̀ ba.

¹⁷Kə̀ taàbìá, yaà dá ɔ̀dkudvɛɛ̀l bəd lúŋ̀ in gə́ kóólé rú, bɔbm̀ kuùmbə̀ *láŋsə́ gààd gbà'á boò aa nyìì kə̀ tɛ́m buurúmá, tə́ tù' ma'ǹ Vɛnɛ́b sunú, bɔ̀b nɛ́b bəd ká'ǹ ke'ǹmbə̀ invaksə́ boò bə rú.

¹⁸Kə̀ aakíin də, dáà kíìn báàn yaànmbìá, nɛ́b aa inzááke pà' bə̀ rə láŋ̀mbə̀ ba. Kàandə, kə̀ yíl oò bə̀ má, bé' búúd yàá, bít záá bə̀ ɛ̀gə̀ yàá.