Read Samba Leko Ibraniŋko bəraa 3 Bible Online

Ibraniŋko bəraa 3 - Samba Leko bible

Ibraniŋko bəraa 3

¹Kàanyée gə́, ɔ̀dkudvɛɛ̀l mə́ nɛ́b gìdń bərá, íí nɛ́b aa Vɛnɛ́b dɛ̀riyà sə̀n yóo, ìì ɛ̀g Yéésù ra, Vɛnɛ́b tùmə̀wà sùnú, bə̀ yaà oò kùm *láŋsə́ gààd gbà'á tɛ́mbagké aa bàà bə́n tə́ən i'ǹ də bìá.

²Kə̀ aakíin də, mà' tù' bəraa Vɛnɛ́b bàà oò mà' rəì kóólé sɔ̀ɔ̀nkè, kìínmbə̀ Musa mà' tù' oò bəd Vɛnɛ́b númú rə kíin.

³Màn aa wə̀' wúl lə, kànsə̀n wúl kə̀ kaŋsɛ́lá. Nɛɛ̀n aarə rú, Yéésù dá Musa kaàn kə̀ kaŋsɛ́l kàani.

⁴Kə̀ aakíin də, wúl gə́ kóólé, nɛ́ŋə̀ wə̀ə̀ sùnú. Zá Vɛnɛ́b séé sə̀n in bəd gə́ kóólé.

⁵Musa gə́, mà' tù'ì sɔ̀ɔ̀nkè Vɛnɛ́b wúuú. Oòrə, nɛ́d tù' bə̀ ma'ǹ aa gám nwɔŋ in bəraa dáà yaànà nwúndù rə yílə́ roó.

⁶Zá Krístù gə́, mà' tù' kə̀ tɛ́m nə́ŋ̀ní Vɛnɛ́b wúuú, kə̀ Wàà yíl bə̀ oò kíin. Bə́n kuùm sə̀n nɛ́b oò yiìl bə̀ bərá, dáà lɛ́' bə́n daàn váàndo bə́n sé, bít lɛ́' bə́n daàn tɛ́m zígke bə́n aa bə́n tə́ən kə̀ kùlə́ ma'ǹ də síngə́ roó.

⁷Kə̀ taàbìá, kìínmbə̀ nɛɛ̀n aa Nwul Gìdń bàà rə kíin: «Dáà íí kìì Vɛnɛ́b nwɔŋ aa tə́ gáàm nyà'aa rəì gə́,

⁸ìì kpɛ́ŋ tɛ́m íí, kìínmbə̀ íí gbəŋ̀ tə́ kíìn kə̀ oò, sɛŋ aa də́' íí ɛ̀gə̀ kə̀ kùrú, fɔ̀gú rə kíin sí.

⁹Nɛɛ̀n aa bə̀ bé' tù' mə́ bəraa mə́ mà' kə̀ boò tə́ zèd laa iirə rə má, doo íí bəd də́' bə̀ ɛ̀g máà fɔ̀gú.

¹⁰Kə̀ taàbìá, mə́ mà' taà nɔ̀m kə̀ nɛ́b aa roó. Bít mə́ bàà: ‹Sɛŋ gə́ kóólé, tɛ́m boò dá kuùm zɔ̀ŋ bùúd kə̀ máára; nɛ́b aarə, bə̀ bɔ̀b kpaŋ̀ mə́ bəd sé.›

¹¹Kə̀ taàbìá, mə́ nwɔ̀m in nɔ̀m mə́ yílú, mə́ bàà: ‹Bə̀ bɔ̀b piìnmbə̀ zɔ̀ŋ aa mə́ kùd bə̀ kuùm nyi'ǹmbə̀ kə̀ máá tə́ rə bə gá!› »

¹²Ɔ̀dkudvɛɛ̀l mə́ í'sɛ̀lbə̀ bərá, ìì gú' yíl íí ra; nɛ́ŋə̀ nə́ŋ̀má aí tə́ŋú, oò kùm kə̀ tɛ́m vaksə́ naà sí, oò dàà tɛ́mbagké oò sí, bít lìb oò bí' Vɛnɛ́b galə̀ pɛŋ sí.

¹³Aa dá sɔɔ̀n də gə́, ìì pii ɔ̀dnə́ŋ̀ bəd váàndo íí bòdba, sɛŋ gə́ kóólé, sɛŋ aa íí bɔ̀b kpaŋ̀ də gə́ kóólé. Kə̀ nɛɛ̀n aa Núúboòd Gìdń bàà rə kíin gə́, ìì mà: «Nyà'aaní.» Núúboòd Gìdń tə́ bə́n kíìn baanàá, bɔ̀b kóó nɛ́ŋə̀ nə́ŋ̀má oò dàà yíl oò invaksə́ záá oò lɛ́'ù sí, bít oò məə bagǹmbə̀ sí.

¹⁴Kàandə, bə́n kuùm sə̀n Krístù ɔ̀dzéd tùsú bə̀ bərá, dáà bə́n ko'ǹ tɛ́m zígke vɛ́nà bə̀ aa bə́n bɔbm̀mà sɛŋ aa sɔ̀d dú rəì və̀'kè, yaà bɛ́d tə́ zé gə́ roó.

¹⁵Aa yée nwɔŋ aa Núúboòd Gìdń bàà roó: «Íí kìì Vɛnɛ́b pə̀gə̀libì nyà'aa yée gə́, ìì kpɛ́ŋ tɛ́m íí kìínmbə̀ doo íí bəd gbəŋ̀ kə̀ Vɛnɛ́b də kíin sí.»

¹⁶Kə̀ aakíin də, nɛ́b déè kìì sə̀n Vɛnɛ́b pə̀gə̀lib, bít bə̀ gbəŋ̀ taà kə̀ oò gú? Máàn nɛ́b aa Musa vúŋ bà Misra yɛ́b bə reè?

¹⁷Kə̀ nɛ́b déè Vɛnɛ́b mà' taà nɔ̀m zèd laa iirə gú? Kə̀ nɛ́b invaksə́ bə̀ ma'ǹ bərá, bít kə̀ nɛ́b bəraa yi' bə̀ vàl bəd fɔ̀gú roó.

¹⁸Kə̀ nɛ́b déè Vɛnɛ́b nwɔ̀m in, bàà taà: «Ìì bɔ̀b piìnmbə̀ zɔ̀ŋ aa mə́ kùd bə̀ kuùm nyi'ǹmbə̀ kə̀ máá tə́ rə bə gá» gú? Gám kə̀ nɛ́b aa bə̀ ləə nwɔŋ oò síndoó.

¹⁹Kə̀ aakíin də, báà ɛgǹ bə́ŋ̀ gè. Bə̀ bɔ̀b piìnmbə̀ síndə, nɛɛ̀n aa bə̀ bàg Vɛnɛ́b síndə bòórú.