Read Samba Leko Ibraniŋko bəraa 4 Bible Online

Ibraniŋko bəraa 4 - Samba Leko bible

Ibraniŋko bəraa 4

¹Vɛnɛ́b bàà dàà bə́n gə́, báan kíìn báàn piìnmbə̀ zɔ̀ŋ aa bəǹ kùd bə́n báan kuùm nyiìn kə̀ obəǹ tə́ rə rú. Báà gú'ǹ yíl bə́n da. Nɛ́ŋə̀ nə́ŋ̀má aí tə́ŋú, oò bə́'à yaàn piìnmbə̀ nyiiké aarə rú sí.

²Bə́n kiìnnà *Nwɔŋ Puu Sɔ̀ɔ̀nkè nyiiké rú bə̀ kìínmbə̀ nɛ́b aa bə̀ kùmà fɔ̀gú rə kíin kóólé. Bə̀ kìì nwɔŋ yàá. Zá mà' pɛ̀sə́ boò tɛ́m bə sé. Kàandə, nwɔŋ aa bə̀ kììà rə, bə̀ kè' kə̀ tɛ́mbagké sé.

³Zá nɛ́b aa bə́n tə́ən bagǹ də gə́, bə́n piìn tə́ nyiiké rú, Vɛnɛ́b nwɔ̀m in bàà taà: «Máá nɔ̀mú rə, mə́ nwɔ̀m in aa yóo: ‹Ìì bɔ̀b piìnmbə̀ zɔ̀ŋ aa mə́ kùd bə̀ kuùm nyiìnmbə̀ kə̀ máá tə́ rə bə gá!› » Gám nwɔŋ aarə, kàandə má, sɛŋ də mà' zə́' tù' oòì sɛŋ aa séé yɛ́b dú roó.

⁴Kàandə, zɔ̀ŋ nə́ŋ̀ tə́ Núúboòd Gìdńnú, gám nwɔŋ tə́ sɛŋ nə́ŋsínà yílú: «Vɛnɛ́b kùm nyìì sɛŋ nə́ŋsínà ba, kə̀ tù' oò bəraa mà' rə gə́ kóólé.»

⁵Bə̀ bààì zɔ̀ŋ aa bə́ŋyée bə́n gádǹ yée bə sɔ̀ŋ: «Ìì bɔ̀b piìnmbə̀ zɔ̀ŋ aa mə́ kùd bə̀ kuùm nyiìnmbə̀ kə̀ máá tə́ rə bə gá sə́g sə́g.»

⁶Nɛ́b aa éèn də̀gə̀ də̀gə̀ bə̀ kììà Nwɔŋ Puu Sɔ̀ɔ̀nkè nyiiké bìá, bít ìì bɔ̀b piìnmbə̀ nyiiké rú síndə, kàandə, bə̀ ləə Vɛnɛ́b sé. Zá nɛ́b kam bəraa dá bɔbm̀ piìnmbə̀ zɔ̀ŋ nyiiké aa rú rə túrú.

⁷Kə̀ taàbìá, Vɛnɛ́b və̀d zíg taà sɛŋ puu nə́ŋ̀ sɔ̀ŋ, bə̀ dɛ̀d: «Nyà'aa yóo.» Zèd pa' sína, Vɛnɛ́b yaà gám taà nwɔŋ aarə kə̀ Dauda gúsá, bàà: «Íí kìì Vɛnɛ́b pə̀gə̀lib nwɔŋì nyà'aa gə́, ìì kpɛ́ŋ tɛ́m íí sí.»

⁸Kə̀ aakíin də, dáà Yosuwa pii nɛ́b bəd nyiiké Vɛnɛ́b bə̀ì gə́, Vɛnɛ́b gám nwɔŋ ɔ̀d bòórú nyàm ɔ̀d nə́ŋ̀ yílə́ sɔ̀ŋ gá.

⁹Kə̀ aakíin də, nyiiké aarə, lúŋ tə́ nyiiké Vɛnɛ́b bə̀ aa sɛŋ nə́ŋsínà bə, sɛŋ aa séé kə̀ in gə́ kóólé roó.

¹⁰Kàandə, màn aa pìì nyiiké aa Vɛnɛ́b kùd də rú rə, kùm dá nyiìn tù' oò rú, kìínmbə̀ Vɛnɛ́b kùm nyì' tù' oò bərú rə kíin.

¹¹Ogə́ báà nɔŋ̀ piìnmbə̀ nyiiké aarə rú. Báà ma'ǹ kóó nɛ́ŋə̀ nə́ŋ̀má yi' oò vàd kìínmbə̀ nɛ́b aa nyàam bə̀ kùmà fɔ̀gú, bə̀ ləə Vɛnɛ́b síndə kíin sí.

¹²Vɛnɛ́b nwɔŋ aa gám də, tə́ kə̀ gɔ̀ŋsá, tə́ tù' sɔ̀ɔ̀nkè ma'nàá. Wùù kànsə̀n yɛ́rə̀ bùúd aa kàd iirə kóólé nwùùkè roó. Pìì dá wə́ə̀n níŋsə́ rú. Nɛɛ̀n aarə rú, Vɛnɛ́b nwɔŋ pìì dá wə́ə̀n nɛ́ŋə̀ tɛ́mú kàani. Vɛnɛ́b nwɔŋ tə́ inselké nɛ́ŋə̀ tɛ́mú bə̀ fágàá, bít kə̀ in aa nɛ́ŋə̀ í' roó.

¹³Vɛnɛ́b naà gə́, *inmə́'ke nə́ŋ̀má sé. In bəraa séé rə gə́ kóólé, oò núùrú gə́, tə́ záání. Bít bàà báan dáàn in aa bə́n ma'ǹ də gə́ kóólé i'ǹ Vɛnɛ́b númú, kə̀ yíl bə́n da.

¹⁴Kə̀ taàbìá, kò' báà kudǹ tɛ́mbagké aa bàà bə́n tə́ən i'ǹ yérə kíìn sɔ̀ɔ̀nkè, kàandə, bə́n tə́ən kə̀ *láŋsə́ gààd gbà'á aa na' dá wə́ə́ lɛgə́ paà, Vɛnɛ́b númú rə naú' Yéésù ra, Vɛnɛ́b Wàá.

¹⁵Bə́n tə́ən kə̀ *láŋsə́ gààd gbà'á aa gàb vɛɛmsɛ́l bə́nnì kóólé rə naú. Kàandə, də́' bə̀ ɛ̀g *láŋsə́ gààd gbà'á aarə kə̀ kpaŋ̀ luùm gɔ̀ŋ gɔ̀ŋ. Zá oò gə́, pí' invaksə́ rú sé.

¹⁶Báà gbadǹnà kə̀ tɛ́m gágkeá, *Vɛnɛ́b gààd mə̀ə̀d pə̀dkè bə̀ ba, bɔ̀b báà bɔbm̀ tɛ́m buurúmá, kə̀ pə̀dkèá, bɔ̀b obə́n bə̀ láŋ̀mbə̀ bə, sɛŋ aa bə́n í'ǹ dú rə ba.