Read Samba Leko Ibraniŋko bəraa 5 Bible Online

Ibraniŋko bəraa 5 - Samba Leko bible

Ibraniŋko bəraa 5

¹*Láŋsə́ gààd gbà'á gə́ kóólé, sàà ìì vúŋ ìì sááù nɛ́b bəd tə́ŋú, bɔ̀b nɛ́b bəd kóólé tù' ma'ǹmbìá' in tɛdńní bə̀ bəd piìnmbìá, kə̀ sadaka tá, invaksə́ aa nɛ́b bəd mà' rə bòórú.

²*Láŋsə́ gààd gbà'á gə́, nɛ́ŋə̀ kə̀ obə́n kíin yée gə́, dákíìn báàn nɛ́b aa bə̀ tə́ bɔ̀bm̀ də, búúd ɛgǹ bé'ǹmbìá, kə̀ nɛ́b aa bə̀ gàb Vɛnɛ́b nwɔŋ síndə tá.

³Bít kàandə, kə̀ yíl oò bə̀ má, pii sadaka nɛ́b bəd invaksə́ bə̀ ní gá, zá invaksə́ oò bə̀ kɔ̀.

⁴Nɛ́ŋə̀ nə́ŋ̀má bán yíl pa'ǹmbə̀, baànmbə̀ bəǹ *láŋsə́ gààd gbà'á sé. Kə̀ dɛdké Vɛnɛ́b bə̀ ní, nɛ́ŋə̀ dá taà bíìl *láŋsə́ gààd gbà'á, kìínmbə̀ *Aruna bíl lə kíin.

⁵Krístù má, pà' yíl oò baànmbə̀ bəǹ *láŋsə́ gààd gbà'á rə, bàà sé. Zá Vɛnɛ́b bààù: «Ámda ń kùmsə̀n Wàà mə́ra, sɔ̀d nyà'aa yóo, máára mə́ kùmsə̀n Báá ḿ da.»

⁶Bàà núúboòrú sɔ̀ŋ: «Ń dá kuùm *nɛ́d láŋsə́ bə̀ ma'ǹ sɛŋ gə́ kóólé bìá, kìínmbə̀ Malkisadaka kíin.»

⁷Sɛŋ aa Yéésù kùm zɔ̀ŋə yɛ́b bərə, nyɛ̀m Vɛnɛ́b aa dáù báàn súùnmbə̀ valə́ roó, kə̀ oò bə̀ wɔ̀bm̀bìá, kə̀ kpə̀ə́ǹ gbà'á páàlǹmbə̀, bít kə̀ nyímwəl za'ǹmbìá. Bít Vɛnɛ́b kɔ̀ kè' nyɛmsɛ́l oò yàá, nɛɛ̀n aa ləəù rú rə bòórú.

⁸Kóó nɛɛ̀n aa kùm dú Vɛnɛ́b Wàà rə má, sán Vɛnɛ́b ləə̀nmbìá, búúraa bé' rə rú kóólé.

⁹Yéésù kùm nyɛdkè gə́, yaà bíl nɛ́d yíl bə̀ *gɔ̀ŋsə́ aa bɛ́d bə gá rə bìá, nɛ́b aa tə́ nwɔŋ oò ləə̀n kóólé rə bìá.

¹⁰Bít Vɛnɛ́b bààù, oò *láŋsə́ gààd gbà'á, kìínmbə̀ Malkisadaka kíin.

¹¹Mə́ tə́ kə̀ nwɔŋ naà zùúm, baànmbə̀ nwɔŋ aarə yílú. Krístù kùmsə̀n *láŋsə́ gààd gbà'á, kìínmbə̀ Malkisadaka kíin. Zá gbò'ì aí bə̀ baàn i'ǹmbìá. Kàandə, íí náŋ tə́ kíìn Vɛnɛ́b nwɔŋ kiìnmbìá.

¹²Dáà bə́ŋyée íí dá nɛ̀n bəd kíìn bílàá. Zá íí bàà líb boò sán bənə́ Vɛnɛ́b nwɔŋ aa núúboòrú, gbò' sə́n doó. Íí də́ŋì gbèd kpɛŋké líìnmbìá, bít íí bə̀ bənə́ í'nnə́ vuùm uùmbə̀ ní.

¹³Màn aa tə́ yíl oò zaàn kə̀ vuùm də, bə́ŋ̀ wàà bɛ̀ŋ́sə̀wàá, bán in wɔ̀ɔ̀lə̀ pɛdǹmbə̀ kə̀ invaksə́ gá.

¹⁴Kàandə, nɛ́b gbàád bərì bánì gbèd kpɛŋké líìnmbìá, bə̀ sán yíl boò yàá. Bə̀ bánì sɔ̀ɔ̀n pɛdǹmbə̀ kə̀ vaksá.