Read Samba Leko Ibraniŋko bəraa 6 Bible Online

Ibraniŋko bəraa 6 - Samba Leko bible

Ibraniŋko bəraa 6

¹Kə̀ aakíin də, báà ɛɛ̀m númú, kə̀ insánke nɛ́b gbàád bìá. In bəraa rə, tə́ kə̀ wúl bèl aa nɛ́ŋə̀ páá rə kíin. In bəd də yóo' sɔ̀gǹmbìá, bít lɛ́'ǹ daànmbə̀ in bəraa dá bə́n aàn valə́ roó.

²Insánke baptisma piìnmbə̀ luùm gɔ̀ŋ gɔ̀ŋ yílú, insánke nɛɛ̀n zígǹmbə̀ yílú, insánke díímke val bəd bə̀ yílú, bít insánke fágə́n aa dá kuùm zèd kə̀ zèd də yílú.

³Aa yée in aa báan ma'ǹ doó, dáà Vɛnɛ́b pii bə́n kpaŋì gə́ roó.

⁴Sɔ̀d leè nɛ́b aa lɛ́' ìì dàà tɛ́mbagké boò rə, bə̀ dá taà yaàn sɔ̀gǹ sɔ̀ŋ gú? Kùm bə̀ bèrì Vɛnɛ́b laa nyɛdkè rú. Bə̀ bèd in piìnmbə̀ aa lɛgə́ paà rə yàá. Bə̀ bɔ̀b Nwul Gìdńnì kə̀ nɛ́b kambəd kíin.

⁵Bə̀ gàb yàá vɛ́nà, Vɛnɛ́b nwɔŋ gə́, sɔ̀ɔ̀n yàá, bə̀ gàb kpɛŋsɛ́l zèd kam bəraa dáà yaànà númú rə bə̀ yàá.

⁶Zá sɛŋ aa nɛ́b bagké luùm bəraa rə, lɛ́' bə̀ dàà tɛ́mbagké boòì rə, nɛ́ŋə̀ bán bə̀ aànmbə̀ sɔ̀gke kpaŋ́ gá. Kàandə, bíd bə̀ bág Vɛnɛ́b Wàà tə́ puu ní sɔ̀ŋ, téélɛŋké ba. Bít bə̀ dúlə̀ tə́ nɛ́b zùúm númú.

⁷Màìgə́, yɛ́b nyəə nwan wəl aa tə́ naŋ̀ dəì sɛŋ gə́ kóólé, bít inluùm bəraa vúg yɛ́b bərə, lɛ̀b yɛb sɔ̀ɔ̀nkè bərì zɔ̀ŋ aa bə̀ làmə̀ bərə gə́, Vɛnɛ́b mà'ù pə̀dkèá.

⁸Zá inluùm aa lɛ̀b tə́ kusá, kə̀ fɔ̀g ní rə gə́, kə̀ pɛ̀sə́ naà sé. Vɛnɛ́b dáù nwɔŋyɛɛ̀l ma'nàá, bít laa dáù kíìn dúúnàá.

⁹Zá kóó dáà bə́ gám tə́ kə̀ aakíin, ɔ̀dzéd mə́ í'sɛ̀lbə̀ bərá, bə́ nyìì tə́ kə̀ tɛ́m zígke kə̀ aíra. Bə́ gàb yàá, íí tə́ kpaŋ̀ sɔ̀ɔ̀nú, kpaŋ̀ aa dá ii aàn súúke rú roó.

¹⁰Kə̀ aakíin də, Vɛnɛ́b gə́, nɛ́ŋə̀ wɔ̀ɔ̀làá. Yid bɔ̀' tù' íí bəraa íí tə́ ma'ǹ də gá, yid bɔ̀' í'sɛ̀l aa íí kə̀ oòrə gá, yid bɔ̀' tùsaa íí mà' Vɛnɛ́b nɛ́b gìdń bəd bə̀ nyàamdoorú, bít bə́ŋyée sɔ̀ŋ də gá.

¹¹Zá in aa bə́ í' rə gə́, kóó nɛ́ɛ̀réè aí tə́ŋú, oò ì' kpɛŋsɛ́l tù' bə̀ ma'ǹ luùm oò aarə, yaà oò wə́ə́ sɛŋ aa gɔ̀ŋsə́ oò dá bɛ́dǹ bərə zé, bɔ̀b in aa íí zíg tɛ́m bərə, oò bɔbmíìn kúnú.

¹²Bə́ í' ìì kùm nɛ́b murə̀ bə̀ bəd sí; zá ìì màg nɛ́b bagké bəraa ìì tə́ in sidǹ, bít bə̀ bɔ̀b in aa Vɛnɛ́b bàà dàà bəǹ dá bə̀ piìn doó.

¹³Sɛŋ aa Vɛnɛ́b bàà dàà kə̀ Abraham nwɔŋ də, nwɔ̀m in bəǹ dáù ma'ǹ kə̀ aa bəǹ bàà rə kíin. Bé' nɛ́ŋ gbàáro nə́ŋ̀má in nwɔɔ̀mbə̀ oò nə́gə́lú sín yée gə́, bít nwɔ̀m in oò nə́gə́lú ní,

¹⁴bàà: «Mə́ nwɔ̀m in yàá, máan nɛɛ̀n zígǹ yílú, bít máan yɛb kàá bəd piìn zùúm.»

¹⁵Abraham nwán in aarə kə̀ tɛ́m sidkéá. Kə̀ taàbìá, bɔ̀b taà in aa Vɛnɛ́b bàà dààù roó.

¹⁶Màìgə́, nɛ́b bəd nwɔ̀m in nì gə́, bə̀ nwɔ̀m kə̀ nɛ́ŋə̀ aa kàn bə̀ rə nə́gə́lá, bít in nwɔmké aarə, tág sə̀n pìrə̀ zibké boò tə́ŋə́ kóólé.

¹⁷Zá Vɛnɛ́b í' nɛ́b bəraa bàà bəǹ dàà bə̀, boò dá insɔ̀ɔ̀n bəǹ bɔbm̀ kìínmbə̀ valligə̀ kíin də i'ǹmbə̀ gə́, bəǹ bìn nwɔŋ aa bàà bəǹ dàà bə̀ yérə gá. Kə̀ taàbìá, bíd nwɔ̀m zəg taà in nwɔŋ aa bàà dàà rə yílə́ sɔ̀ŋ.

¹⁸Pii bə́n in tə́ iira, in aarə binmíìn bə gá' nwɔŋ baàn daànmbìá, kə̀ in nwɔmkéá. Ma'míìn gá, baànmbə̀ Vɛnɛ́b dá gúsuúm dugǹ in bəraa rə yílə́ gə́ roó. Kə̀ aakíin də, nɛ́b aa nùù bə́n tə́ən mə́'ǹ oò səǹ də, pii bə́n váàndo tə́ kúnú, bɔ̀b báà zígǹ tɛ́m, tɛ́m zígke aa bàà dàà bə́n də ba.

¹⁹Tɛ́m zígke aa yérə, obə́n naà gə́, tə́ kìínmbə̀ bəŋ aa tab kò' bə̀ díí kə̀ kə̀ə̀d də kíin. Tab bə̀ və́'ù kíìn sɔ̀ɔ̀nkè. Tɛ́m zígke bə́n pii bə́n kpaŋ̀ wə́ə̀nmbə̀ Vɛnɛ́b sunú, zɔ̀ŋ aa gìd taà nɛɛ̀n də rú.

²⁰Éèn Yéésù pìì sə̀n wərə̀ kə̀ obə́n da, bít pìì obə́n bìá. Bíl *láŋsə́ gààd gbà'á sɛŋ gə́ kóólé bìá, kìínmbə̀ Malkisadaka kíin.