Read Samba Leko Ibraniŋko bəraa 7 Bible Online

Ibraniŋko bəraa 7 - Samba Leko bible

Ibraniŋko bəraa 7

¹Malkisadaka kùmsə̀n gààd Salima bìá, bít *nɛ́d láŋsə́ bə̀ ma'ǹ lɛgə́ paà bìá. Nɛ́ɛ̀m Abraham tóò bídǹnà, nə́' dá kànà gààd bəd kə̀ bùm də, Malkisadaka ɛ̀m dá sáŋ kə̀ oòra, bít zígə̀ nɛɛ̀n yílú.

²Abraham in aa ɛ̀mà kə̀ naà rə, pɛ̀l zɔ̀ŋ kób, zɔ̀ŋ nə́ŋ̀ gə́, pii Malkisadaka ra. Nə́gə́l aa Malkisadaka rə, í' tə́ baànmbə̀: «Gààd wɔ̀ɔ̀lə̀ bìá.» Bítsɔ̀ŋ, kùmà gààd Salima bìá, aarə í' tə́ baànmbə̀: «Gààd tɛbə̀ bìá.»

³Nɛ́ŋə̀ nə́ŋ̀má gàb Malkisadaka báá oò sé, nà'á oò sé, dooù nə́ŋ̀má sé. Nɛ́ŋə̀ nə́ŋ̀má gàb sɛŋ aa bə̀ lɛ̀bə̀ bərə sé, sínkɔ̀ sɛŋ aa val dáù ko'ǹ bərə sé. Zá oòrə, lúŋ tə́ Vɛnɛ́b Wàá, *nɛ́d láŋsə́ bə̀ ma'ǹ yíl bìá, sɛŋ gə́ kóólé.

⁴Ìì ɛ̀g nɛɛ̀n aa Malkisadaka kùm nɛ́ŋ gbàáro roó! In aa doo bə́n Abraham nə́' bɔ̀bà bùmú rə, pɛ̀l zɔ̀ŋ kób, zɔ̀ŋ nə́ŋ̀ gə́, pii oòra.

⁵Nɛ́b aa bə̀ Levi yɛb kàá, bít bə̀ *láŋsə́ gààd bəd də, kə̀ nɛɛ̀n aa indaŋ̀mbə̀ bàà rə kíin gə́, bə̀ tə́ kə̀ kpaŋ̀ naà nɛ́b Israila bə̀ bəd baànmbə̀ boò pɛ̀l in aa bə̀ kə̀ naà rə zɔ̀ŋ kób, zɔ̀ŋ nə́ŋ̀ gə́, boò bìá. Bə̀ kè' in aarə ɔ̀dkudvɛɛ̀l boò bəd naú. Ɔ̀dkudvɛɛ̀l bəraa rə kɔ̀, bə̀ Abraham yɛb kàá bərá.

⁶Malkisadaka rə, Levi wàà kàá gá. Zá Abraham in aa kə̀ naà rə, pɛ̀l zɔ̀ŋ kób, zɔ̀ŋ nə́ŋ̀ gə́, pii oòra, bít zíg nɛɛ̀n màn aa Vɛnɛ́b bàà dààù nwɔŋ də yílú.

⁷Pìrə̀ nə́ŋ̀má bə sé, màn aa zíg nɛ́ŋə̀ nɛɛ̀n yílə́ rə, sə̀n gbà'á kə̀ nɛ́ŋə̀ aa zígə̀ nɛɛ̀n yílə́ roó.

⁸Levi yɛb kàá bəraa boò gə́ bə̀ pɛ̀l innì zɔ̀ŋ kób gə́, bə̀ bɔ̀b nə́ŋ̀ də, bə̀ kùmsə̀n nɛ́b aa val dá bə̀ kodǹ doó. Zá Malkisadaka gə́, bɔ̀b in aarəì nə́ŋ̀ gə́, val kò'ù gá, kìínmbə̀ núúboòd bàà rə kíin.

⁹Kìínmbə̀ baànmbə̀ kíin, Abraham pii in nə́ŋ̀, in kóbú, insɔ̀ɔ̀n oò bərú. Kə̀ Abraham da, Levi yɛb kàá bəd kɔ̀ bə̀ dá sə̀n in aarə bɔbm̀ má, bə̀ pii kɔ̀.

¹⁰Kàandə, bɔ̀b bə́ŋ̀ bə̀ lɛ̀b Levi sé, bə́ŋ̀ tə́ dooù Abraham sisú, sɛŋ də, bə́ŋ̀ Malkisadaka yaà sáŋ sə̀n kə̀ Abraham da.

¹¹Vɛnɛ́b pii nɛ́b Israila bə̀ bəd indaŋ̀mbìá, mà' bí' Levi kun bəd *nɛ́b láŋsə́ bə̀ ma'ǹ bərá. Dáà tùsaa Levi bəd ìì mà' rə, bí' nɛ́ŋə̀ tə́ gìdń gə́, kə̀ níìbə̀ *nɛ́d láŋsə́ bə̀ ma'ǹ nə́ŋ̀ lúŋ taà Malkisadaka, bít vúgà taà *Aruna kunú gá, dáà taà vúgǹnà zɔ̀ŋ nə́ŋ̀ gɔ̀ŋ bə gú?

¹²Kàandə, dáà *láŋsə́ gààd pɛ́nì gə́, indaŋ̀mbə̀ kɔ̀ dáàn pɛ́ɛ̀n kɔ̀.

¹³Nwɔŋ bəraa yée gámmíìn tə́ Báá bə́n Tììkpɛ̀ŋ yílú. Báátììkpɛ̀ŋ də, vúgà kun ŋə́ŋ̀ gɔ̀ŋú; kun aarə rú rə, nɛ́ŋə̀ nə́ŋ̀má mà' bèd tù' *gannyàgə̀lú sé.

¹⁴Nɛ́b bəd kóólé, bə̀ gàb yàá, bə̀ lɛ̀bə̀ Yahudiya kunú. Bít Musa gám bèd nwɔŋ kun aarə yílə́ sé, sɛŋ aa gám *láŋsə́ gààd bəd nwɔŋ doó.

¹⁵Ǹ ɛ̀g nɛɛ̀n aa bí' in gə́ kóólé nyɛdkè roó. *Nɛ́d láŋsə́ bə̀ ma'ǹ nə́ŋ̀ vúg yàá, lúŋ tə́ Malkisadaka ra.

¹⁶Kùm *láŋsə́ gààd kə̀ *nɛ́b bəd indaŋ̀mbə̀ bəd gá. Zá kùm *láŋsə́ gààd kə̀ kpɛŋsɛ́l gɔ̀ŋsə́ aa nɛ́ŋə̀ bán yɛɛ̀lǹmbə̀ gá rə bìá.

¹⁷Kə̀ aakíin də, Núúboòd Gìdń bàà: «Ń dá kuùm *nɛ́d láŋsə́ bə̀ ma'ǹ sɛŋ gə́ kóólé bìá, kìínmbə̀ Malkisadaka kíin.»

¹⁸Kə̀ aakíin də, indaŋ̀mbə̀ nyàamdoorú bə̀ gə́, lɛ́' bə̀ dàà yàá. Kàandə, kə̀ kpɛŋsɛ́l naà sé, bít kə̀ pɛ̀sə́ naà sé.

¹⁹Kə̀ taàbìá, Musa indaŋ̀mbə̀ gə́, mà' bɛ́' bə́n in nə́ŋ̀má gá. Zá bə́ŋyée gə́, bə́n bɔbm̀ tɛ́m zígke aa kàn nɛɛ̀n də yàá. Kə̀ tɛ́m zígke aa roó, bə́n tə́ən taà gbadǹ Vɛnɛ́b sunú.

²⁰Bítsɔ̀ŋ, Vɛnɛ́b in nwɔɔ̀mbə̀ tə́ yílú wərà. Nɛ́b aa nyàam bə̀ kùmà *láŋsə́ gààd də, in nwɔɔ̀mbə̀ boò yílú kə̀ aakíin sé.

²¹Zá Yéésù kùm *nɛ́d láŋsə́ bə̀ ma'ǹ kə̀ Vɛnɛ́b in nwɔɔ̀mbìá, sɛŋ aa Vɛnɛ́b bààù: «Báátììkpɛ̀ŋ Vɛnɛ́b nwɔ̀m inì gə́, bí' bòórú kɔ̀ gá: ‹Ń dá kuùm *nɛ́d láŋsə́ bə̀ ma'ǹ zèd kə̀ zèd› doó.»

²²Kə̀ aakíin də, Yéésù mà' sùnú, bə́n bɔbm̀ taà *gú'dúgke aa sɔ̀ɔ̀n kàn nɛɛ̀n doó.

²³In nə́ŋ̀ ɔ̀d pɛd tə́ kíìn sɔ̀ŋ' *nɛ́d láŋsə́ bə̀ ma'ǹ bəraa nyàamdoorú bə̀ boò zùúm də, kàandə, val dàŋ bə̀ sə̀n tù' boò bəd ma'ǹ dáànmbə̀ kə̀ númú.

²⁴Zá Yéésù gə́, tə́ kə̀ gɔ̀ŋsə́ sɛŋ gə́ kóólé, nɛ́ŋə̀ nə́ŋ̀má bán *láŋsə́ gààd tù' oò aarə pa'ǹmbə̀ gá.

²⁵Kə̀ taàbìá, Yéésù dákíìn báàn nɛ́b aa àà bə̀ Vɛnɛ́b númú rə súùnmbìá, bə́ŋyóo, bít sɛŋ gə́ kóólé. Kàandə, tə́ kə̀ gɔ̀ŋsá, sɛŋ gə́ kóólé, bɔ̀b Vɛnɛ́b nyɛɛ̀mbə̀ boò yílú.

²⁶Tə́ kàangə́, Yéésù kùmsə̀n *láŋsə́ gààd gbà'á aa bə́n í'ǹ doó. Oòra dá bə́n sə̀n láŋ̀ bə insɔ̀ɔ̀nkè bəraa bə́n í'ǹ də rú. Oò gə́, tə́ *Gìdńná, invaksə́ oò naà sé, kóó zɔ̀gɔ̀. Oò gə́, pɛrì kə̀ nɛ́b invaksə́ bə̀ ma'ǹ bərá, bít zá' na'ì lɛgə́ poú.

²⁷Yéésù gə́, kə̀ *láŋsə́ gààd gbàád kam bəraa kíin sé. Oò gə́, sàà sadaka piìnmbə̀ sɛ́ŋ gə́ kóólé invaksə́ oò bə̀ sé, bít nɛ́b bəd invaksə́ bə̀ sé. Zá gɔ̀ŋsə́ oò aa pii rə, sadaka sɛŋ gə́ kóólé bìá, sɛŋ aa pii kə̀ yíl oò roó.

²⁸Musa indaŋ̀mbə̀ sààvúŋ nɛ́b invaksə́ bə̀ ma'ǹ bərá, boò kùm *láŋsə́ gààd gbàád bərá. Zá Vɛnɛ́b nwɔŋ aa bàà dàà kə̀ in nwɔɔ̀mbə̀ oò, indaŋ̀mbə̀ wə́ə́ sína rə, sààvúŋ Wàà oò aa sɛŋ gə́ kóólé kə̀ invaksə́ naà síndə, oò bíl *láŋsə́ gààd gbà'á.