Read Samba Leko Ibraniŋko bəraa 8 Bible Online

Ibraniŋko bəraa 8 - Samba Leko bible

Ibraniŋko bəraa 8

¹Aa yée sə̀n nwɔŋ yíl bə̀ aa bə́n tə́ən gáàm doó. Bə́n tə́ən kə̀ *láŋsə́ gààd gbà'á yíl bə̀ naà kìínmbə̀ nɛ́ŋə̀ aakíin. Bít kùm tə́ lɛgə́ poú, gààd mə̀ə̀d ba, Vɛnɛ́b gbìntaŋ mə̀ə̀d nɛɛ̀n váànú.

²Oò gə́, mà' bɛ́' tù' *láŋsə́ gààd gbà'á bə̀ zɔ̀ŋ *gìdńnú, kìínmbə̀ baànmbə̀ dìí vɛ́nà bə̀ aa Báátììkpɛ̀ŋ Vɛnɛ́b kùd doó, bít nɛ́ŋə̀ kùd sə̀n gá.

³*Láŋsə́ gààd gbàád bəd gə́ kóólé, bə̀ zíg bə̀ boò pii in piìnmbìá kə̀ sadaka. Aa dá sɔɔ̀n də gə́, *láŋsə́ gààd gbà'á bə́n kɔ̀ oò pii kɔ̀.

⁴Dáà Yéésù tə́ zɔ̀ŋə yɛ́b bə gə́, bíl *nɛ́d láŋsə́ bə̀ ma'ǹ gá. Kàandə kɔ̀, *nɛ́d láŋsə́ bə̀ ma'ǹ bəraa zɔ̀ŋə yɛ́b bərə, bə̀ pii in aa *Yahudu bəd indaŋ̀mbə̀ bàà roó.

⁵Tùsaa *láŋsə́ gààd bəd tə́ ma'ǹ də, lúŋ tə́ insɔ̀ɔ̀n bəraa lɛgə́ roó. Aarə də́ŋ tə́ kìínmbə̀ in aa taà Musa yílə́ rə kíin. Nɛ́ɛ̀m sɛŋ wə́ə́ *dìí kudǹmbə̀ gə́, Vɛnɛ́b bààù: «Kùd ǹ də́' kə̀ nyìsə̀ aa mə́ ì'nnà kɔ̀l yílə́ roó.»

⁶Zá bə́ŋyée tù'saa bə̀ pii Yéésù tə́ ma'ǹ də, kànsə̀n *láŋsə́ gààd bəd bìá; Yéésù kùmsə̀n tə́ŋtəŋ obə́n kə̀ Vɛnɛ́bá, *gú'dúgke puu bìá. Kàandə, gú'dúgke puu aarə, dìì tə́ nwɔŋ sɔ̀ɔ̀nkè bəraa Vɛnɛ́b bàà dàà rə ba.

⁷Dáà gúsaa éèn bə̀ dúg nyàamdoorú rə, bə̀ bɔ̀b in nə́ŋ̀má oò bə̀ álǹmbə̀ bə̀ síngə́, bə̀ bánə̀ pɛ́ɛ̀nmbə̀ kə̀ gú'dúgke ɔ̀d gá.

⁸Zá Vɛnɛ́b bɔ̀b inyɛlké nɛ́b oò bəd naú; kə̀ taàbìá, tə́ bə̀ taà álàá. Báátììkpɛ̀ŋ bàà: «Sɛŋ nə́ŋ̀ tóò kíìn yaanàá, máá *gú'dúgke puu ma'ǹ kə̀ nɛ́b mə́ Israila bə̀ bərá, bít kə̀ Yahudiya kun bərá.

⁹Gú'dúgke aarə, də́ŋ kə̀ gú'dúgke aa mə́ tab kə̀ doo boò bəd də gá. Nyàm nə́ŋ̀ mə́ kò' bə̀ nɛɛ̀n ba, mə́ vú' bə̀ Misra yɛ́b ba. Bə̀ kùm kə̀ vɛ́nà kə̀ gú'dúgke aa mə́ tab kə̀ boò rə sé. Kə̀ taàbìá, lɛ́' mə́ dàà bə̀ taá, Báátììkpɛ̀ŋ Vɛnɛ́b bàà kàani.

¹⁰Báátììkpɛ̀ŋ bàà' zá sɛŋ wàà aa bòórú yée gə́, máá gú'dúgke nə́ŋ̀ tabm̀ kə̀ nɛ́b Israila bə̀ bərá. Gú'dúgke rə, dá kuùm tə́ kə̀ aakíin' máá indaŋ̀mbə̀ mə́ bəd pá'ǹ boò ingabké rú, máá bádǹ boò tɛ́mú. Máá bíìl Vɛnɛ́b boò ra, bít boò kɔ̀ bə̀ dá kuùm nɛ́b mə́ bərá.

¹¹Nɛ́ŋə̀ nə́ŋ̀ bán ɔ̀d oò nə́ŋ̀á, sínkɔ̀ ɔ̀dkudvɛɛ̀l oò baànmbə̀: ‹Ǹ gàb Báátììkpɛ̀ŋá!› gá. Kàandə, boò kóólé bə̀ dá mə́ kíìn gabàá, sɔ̀d yɛb bɛ̀ŋ́sə̀ boò bəd ba, yaà wə́ə́ nɛ́b gbàád boò bəd ba, bə̀ gàb mə́ yàá.

¹²Kàandə, lɛ́' máá bə̀ invaksə́ boò bəd kíìn daanàá, sèl mə́ zá' invaksə́ boò bəd gá.»

¹³Vɛnɛ́b dɛ̀d gú'dúgke aa yée gú'dúgke puu yée gə́, mà' bí' gú'dúgke éèn də̀gə̀ də̀gə̀ bə̀ rə dooá. Zá in aa bíl doo rə gə́, oò gə́, wə́ə́ì kə́d bə bɔ̀bm̀ dugǹmbìá.