Read Samba Leko Ibraniŋko bəraa 9 Bible Online

Ibraniŋko bəraa 9 - Samba Leko bible

Ibraniŋko bəraa 9

¹*Gú'dúgke éèn də̀gə̀ də̀gə̀ bə̀ rə, tə́ kə̀ indaŋ̀mbə̀, nɛɛ̀n aa nɛ́ŋə̀ dá Vɛnɛ́b pɔ̀bm̀ dú rə naú, bít tə́ kə̀ láŋsə́ wúl gìdń zɔ̀ŋə yɛ́b bə bə̀ naú.

²Nɛ́b bəd kùd *dìí nə́ŋ̀, bə̀ pɛ̀d bàgə̀l iira kə̀ gɔ̀sá. Bàgə̀l éèn də̀gə̀ də̀gə̀ bə̀ rə, bə̀ dɛ̀d zɔ̀ŋ *gìdńná, lampə̀ rú wərə̀ kə̀ table tá. Bə̀rɛ́d bəraa bə̀ pii Vɛnɛ́b də, bə̀ ləə table yílú wərà.

³Wúl bàgə̀l iirúb də kɔ̀, bə̀ dɛ̀d zɔ̀ŋ Gìdń aa kàn nɛɛ̀n doó.

⁴Wərə̀ rə, table wàà wərà, bə̀ pùg kə̀ bəŋzɔsá. Bə̀ luu in sol sɔ̀ɔ̀nkè bə̀ wərà, bít akoti gú'dúgke bə̀ wərà, pugmíìn kə̀ bəŋzɔsá. Kɛ̀lwà bəŋzɔ' bə̀ nə́ŋ̀ akoti aarə rú wərà. Bə̀ páá inlíìnmbə̀ aa bə̀ dɛ̀d *mana rə kɛ̀lwà rú wərà; *Aruna gbàsaa mà' laan də, ləə akoti rú wərə̀ kɔ̀, bít bəŋ pɛgə́l yɛb iira, wərə̀ sɔ̀ŋ. Bəŋ pɛgə́l yɛb bərə, bə̀ bád nwɔŋ *gú'dúgke bə̀ bəd bə wərà.

⁵*Akoti yílə́ wərə̀ rə, bə̀ kùd in yɛb iira, lúŋ *malaika bərá. Bə̀ dɛ̀d bə̀ *Cherubin, bə̀ wɔ̀d bɛgə̀l boò bəd wərà. *Akoti yílə́ wərə̀ rə, bə̀ zàd nyɛ̀lə́m sadaka bə̀ wərà, bɔ̀b nɛ́b bəd invaksə́ oò daamíìn kúnú. Zá bə́ŋyée, bə́ kə̀ sɛŋ naà nwɔŋ gáàmbə̀ in bəraa rə kóólé yílə́ sé.

⁶In bəraa kóólé, ləə dìí rú wərə̀ kə̀ aakíin. *Nɛ́b láŋsə́ bə̀ ma'ǹ bəd bə̀ pìì wúl bàgə̀l éèn də̀gə̀ də̀gə̀ bə̀ rú wərə̀ sɛŋ gə́ kóólé, tù' boò bəd dáàn ma'ǹmbìá.

⁷Zá wúl bàgə̀l iirúb də rú gə́, *láŋsə́ gààd gbà'á pìì sə̀ní. Zèd gə́ kóólé, pìì sɛŋ nə́ŋ̀. Tə́ piìn dú wərə̀ gə́, ɛ̀m kə̀ gɔ̀g nyɛ̀lə́m bəraa dá Vɛnɛ́b piìn, bɔ̀b yíl oò bìá, bít nɛ́b bəd kóólé invaksə́ bòórú roó. Invaksə́ aa bə̀ mà' bə̀ gàb síndə bòórú.

⁸Nwul Gìdń í' bə̀ i'ǹmbə̀ in bəraa yílú. Bə́ŋ̀ wúl bàgə̀l éèn də̀gə̀ də̀gə̀ bə̀ tə́ túrú gə́, kpaŋ̀ piìnmbə̀ zɔ̀ŋ gìdń aa kàn nɛɛ̀n də rú rə, bə́ŋ̀ ked sé.

⁹Wúl bàgə̀l éèn də̀gə̀ də̀gə̀ bə̀, í' bə́n in aa ma'míìn bə́ŋyée rə də́'ǹ i'ǹmbìá. Í' baànmbə̀ gə́, in aa wéé ìì pii Vɛnɛ́b kìínmbə̀ sadaka kíin də, bán nɛ́ŋə̀ aa tə́ Vɛnɛ́b pɔ̀bm̀ də tɛ́m nyɛ́'ǹmbìá, bídǹ bí'ǹmbə̀ oò bə̀ gìdń gá.

¹⁰In bəraa rə kóólé, in zɔ̀ŋə gbaarú bə̀ bərá' inlíìnmbìá, in nyəə̀nmbìá, bít kə̀ láŋsə́ wəl bə̀ nyiŋ̀ luùm gɔ̀ŋ gɔ̀ŋ bərá. In bəraa rə kóólé, Vɛnɛ́b yaà dákíìn pɛ́nàá, bít dáà in puu bəd aanàá.

¹¹Zá bə́ŋyée Krístù yaà yàá, oòra kùmsə̀n *láŋsə́ gààd gbà'á yíl bìá, insɔ̀ɔ̀nkè bəraa bə́ŋyée rə yílú. Tə́ tù' ma'ǹ dìí aa kàŋ kàn nyàamdoorú kə̀ sɔ̀ɔ̀nkè rə rú, aarə nɛ́ŋə̀ nɛɛ̀n kùd sə̀n gá, bítsɔ̀ŋ aarə séé zɔ̀ŋə yɛ́b bə gá.

¹²Sɛŋ aa Krístù pìì zɔ̀ŋ gìdń aa kàŋ kàn nɛɛ̀n də rú rə, pii sadaka kə̀ vəəváàn nyɛ̀lə́m gá, sínkɔ̀ kə̀ nààwà nyɛ̀lə́m gá. Zá pii sadaka nə́ŋ̀ní, invaksə́ gə́ kóólé bìá, kə̀ nyɛ̀lə́m oòra, bídǹ bɔbm̀bə̀ obə́n bə̀ súúke aa bɛ́d bə gá roó.

¹³Bə̀ pà' vəəváàn nyɛ̀lə́má, nààváàn nyɛ̀lə́má, kə̀ nàà nyììro aa luu bə̀ dú' rə teemá, bə̀ zàd taà nɛ́b nyìb bə̀ bəd sisú. Aarə, bí' bə̀ gìdń, kə̀ si' boò sugǹ nyɛ́'ǹmbìá.

¹⁴Ogə́ tə́ kàangə́, Krístù nyɛ̀lə́m sùg nyɛ́' dá sə̀n invaksə́ bə́n bəraa dá bə́n aàn valə́ rə kanàá. Kə̀ nwul gìdń aa dá kuùm zèd kə̀ zèd doó, Krístù, nɛ́ŋə̀ aa kə̀ invaksə́ nə́ŋ̀má naà síndə, pii taà yíl oò Vɛnɛ́b naú, kə̀ sadaka kíin. Bə́ŋyée sùg nyɛ́' bə́n kə̀ sadaka oò yée gə́, báan kíìn báàn Vɛnɛ́b galə̀ tù' ma'ǹmbìá.

¹⁵Kə̀ taàbìá, Krístù kùmsə̀n nɛ́ŋə̀ aa tə́ *gú'dúgke puu kudǹ tə́ŋ təŋ obə́n kə̀ Vɛnɛ́b doó, bɔ̀b nɛ́b aa Vɛnɛ́b dɛ̀d bə̀ rə, boò bɔ̀b *gɔ̀ŋsə́ aa bɛ́d bə gá, Vɛnɛ́b bàà dàà bəǹ dá nɛ́b bəǹ bəd piìn doó. Dákíìn ma'mínàá; kàandə, val kò' nɛ́ŋə̀ nə́ŋ̀ yàá, bɔ̀b káàn ke'ǹmbə̀ nɛ́b bəd invaksə́ aa bə̀ mà', sɛŋ aa bə̀ kə̀ *gú'dúgke doo roó.

¹⁶Nwɔŋ aa val dá nɛ́ŋə̀ ko'ǹ gə́, bàà dàà boò mà' rə, dá ma'míìn gə́, nɛ́ŋə̀ rə val kò'ù sína.

¹⁷Kə̀ aakíin də, nwɔŋ aa val dá nɛ́ŋə̀ ko'ǹ gə́, bàà dàà rə, nɛ́ŋə̀ rə tə́ kə̀ gɔ̀ŋsə́ gə́, nwɔŋ aa bàà dàà rə, kə̀ pɛ̀sə́ naà sé. Nɛ́ŋə̀ rə val kò'ùwì gə́, nwɔŋ aarə dá taà kuùm kə̀ pɛ̀sá.

¹⁸Kə̀ taàbìá, nyɛ̀lə́m za' sína, gú'dúgke éèn də̀gə̀ də̀gə̀ bə̀ mà' taà tùsá.

¹⁹Éèn sɔ̀d də, Musa bàà ì' nɛ́b bəd númú kóólé, nɛɛ̀n aa indaŋ̀mbə̀ bəd kùm dú, núúboòd indaŋ̀mbə̀ bərú roó. Bít pà' nààvɔ̀ɔ̀m yɛb nyɛ̀lə́má, wál kə̀ wəl tá, pà' téé yɛsə̀ aa bə̀ dɛ̀d Isop (kə̀ lɛ̀ŋ yɛsə̀ kíin) doó, tab kə̀ úúlè yɛ̀ɛ́lá, bít yaà páá nyɛ̀lə́m aa bə̀ wál kə̀ wəl tə́ rə rú, yaà vàm Núúboòd Gìdń bəd ba, bít kə̀ nɛ́b bəd kóólé sisú.

²⁰Musa bàà: «Nyɛ̀lə́m aarə, tə́ *gú'dúgke aa Vɛnɛ́b bàà ìì ləə rə i'nàá.»

²¹Bítsɔ̀ŋ, Musa zà' nyɛ̀lə́m aarə *dìí yílú, bít in tù' bə̀ ma'ǹ bəraa bə̀ tə́ kə̀ Vɛnɛ́b pɔ̀bm̀ də yílú kóólé.

²²Nɛɛ̀n aa indaŋ̀mbə̀ bàg dú rə gə́, in gə́ kóólé sugmíìnì kə̀ nyɛ̀lə́má. Nyɛ̀lə́m dá sína za'nàá, invaksə́ dá taà daamínàá.

²³In bəraa dìí rú, lúŋ in bəraa lɛgə́ paà rə, bə̀ nyɛ́' bə̀ kə̀ sadaka luùm bəraa roó. Zá in bəraa lɛgə́ paà rə gə́, bə̀ ɔ̀d sadaka sɔ̀ɔ̀ná.

²⁴Kàandə, Krístù pìì zɔ̀ŋ gìdń aa nɛ́b bəd kùd də rú sé. Aarə kùmsə̀n in tɛdń aa lúŋ láŋsə́ wúl vɛ́nà bə̀ aa lɛgə́ paà roó. Zá oò gə́, pììyì lɛgə́ poú. Kàandə, í' yíl oò dáàn i'ǹmbə̀ bə́ŋyée obə́n zɔ̀ŋ ba, Vɛnɛ́b númú, kìínmbə̀ *láŋsə́ gààd kíin.

²⁵Yahudu bəd *láŋsə́ gààd gbà'á gə́, pìì zɔ̀ŋ gìdń aa kàŋ kàn nɛɛ̀n də rú, zèd gə́ kóólé, kə̀ gɔ̀g nyɛ̀lə́má. Zá Krístù gə́, pìì sɛŋ gə́ kóólé gɔ̀ŋsə́ oò piìnmbə̀ sé.

²⁶Dáà mà'ì kàangə́, sɛŋ aa yɛ́b sɔ̀d séémíìn bərə, dá yíl oò búúd kíìn í'ǹ sɛŋ zùúm. Zá vɛ́nà bə̀ gə́, ì' yíl oò bə́ŋyée sɛŋ nə́ŋ̀ní tə́ŋtə́ŋ, zəg bə sé, sɛŋ aa yɛ́b wə́ə́ì kə́d bə bɛ́dǹmbə̀ roó. Pà' zá' invaksə́ gə́ kóólé, kə̀ sadaka yíl oò bìá.

²⁷Kóó nɛ́ɛ̀réè, val dáù kíìn ko'ǹ sɛŋ nə́ŋ̀ní, bít bòórú gə́, Vɛnɛ́b dáù kíìn fágàá.

²⁸Nɛɛ̀n aarə rú sɔ̀ŋ, Krístù kɔ̀ pii gɔ̀ŋsə́ oò kìínmbə̀ sadaka kíin, sɛŋ nə́ŋ̀ní, bɔ̀b pa'ǹ zá'ǹmbə̀ nɛ́b zùúm bəd invaksá. Dáà kíìn bíràá, yaà invaksə́ pa'ǹ zá'ǹmbə̀ sɔ̀ŋ gá; zá yaà nɛ́b aa bə̀ tə́ù nwáàn də súùnmbìá.