Read Samba Leko Yakuba 1 Bible Online

Yakuba 1 - Samba Leko bible

Yakuba 1

¹Máára mə́ Yakuba ra, mə́ nɛ́d Vɛnɛ́b tù' bə̀ ma'ǹná, bít mə́ nɛ́d Báátììkpɛ̀ŋ Yéésù Krístù tù' bə̀ ma'ǹná. Mə́ dɔ̀m kun bəraa kób zè iirə, bə̀ sa' zɔ̀ŋə yɛ́b bərəì kóólé.

²Ɔ̀dkudvɛɛ̀l mə́ í'sɛ̀lbə̀ bərá, sɛŋ aa íí sáŋì kə̀ gbò'kè luùm gɔ̀ŋ gɔ̀ŋ bəd də, ìì kùm kə̀ tɛ́m làmkèá.

³Íí gàb yàá, dáà tɛ́mbagké aí bə̀ kùmì kpɛŋké gbò'kè bərú gə́, sɛŋ gbò'kè bəd də, pii ii tɛ́m sidkéá.

⁴Zá tɛ́m sidké íí oò bé'míìn kíìn sɔ̀ɔ̀nkè, bɔ̀b ìì kùm nyɛdkèá kə̀ və̀'kèá, bít in nə́ŋ̀má oò kpánə́ sí.

⁵Dáà nɛ́ŋə̀ nə́ŋ̀ aí tə́ŋú, kə̀ ingabké naà síngə́, oò dɛ̀d Vɛnɛ́bá, Vɛnɛ́b dáù kíìn piinàá. Kàandə, Vɛnɛ́b pii nɛ́b bəd kóólé in kə̀ tɛ́m làmkèá, bít ál nɛ́ŋə̀ bə gá.

⁶Zá báà dɛdǹ in kə̀ tɛ́mbagkéá, báà ma'ǹ pìrə̀ bə sí. Màn aa mà' pìrə̀ rə, lúŋ tə́ wəl fùgsɛ́l bə̀ aa wəl gbà'á rú, nwul wá' tə́ bí'ǹ zɔ̀ŋ gə́ kóólé roó.

⁷Nɛ́ŋə̀ aarə, oò sèl in nə́ŋ̀má bɔbm̀bə̀ Báátììkpɛ̀ŋ Yéésù naà sí.

⁸Kàandə, tɛ́m oò dìì zɔ̀ŋ nə́ŋ̀ní bə sé, in aa tə́ ma'ǹ də rú gə́ kóólé.

⁹Ɔ̀dkudvɛɛ̀l í'sɛ̀lbə̀ aa tə́ nɛ́d búúd bə̀ rə, oò kùm kə̀ tɛ́m yádkeá, Vɛnɛ́b zá'ùwì lɛgə́ gə́ roó.

¹⁰Bít ɔ̀dkudvɛɛ̀l gbaŋə̀ bə̀ kɔ̀, oò kùm kə̀ tɛ́m yádkeá, Vɛnɛ́b bí'ùwì nɛ́d búúd bə̀ gə́ roó. Nɛ́d gbaŋə̀ bə̀ gə́, tə́ kìínmbə̀ téélaan aa fɔ̀gə́ rə kíin, ləə sɛŋ zùúm gá.

¹¹Nyàm go' kə̀ laa vé'ke oò tá, bít wád téé kúnú. Laan pí' kúnú, sɔ̀ɔ̀nkè oò bɛ́d kúnú. Nɛ́d gbaŋə̀ bə̀ kɔ̀ tə́ kə̀ aarə kíni. Nyàm nə́ŋ̀ gə́, dá kuùm in oò bəraa kə̀ naà rə tə́ŋú, bít dákíìn bɔ̀bàá.

¹²Nɛ́ŋə̀ aa sìd tə́ zɔ̀ŋ gbò'kè báàn də, Vɛnɛ́b dáù nɛɛ̀n zígǹ yílú, kə̀ tɛ́m làmkèá. Kàandə, nɛ́ŋə̀ aa bɔ̀' tɛ́mbagké oò síndə, Vɛnɛ́b dáù mə̀ə̀lə̀ gɔ̀ŋsə́ bə̀ piinàá, mə̀ə̀lə̀ gɔ̀ŋsə́ bə̀ aa bàà dàà bəǹ dá nɛ́b aa bə̀ tə́ bəǹ í'ǹ də piìn doó.

¹³Sɛŋ aa nɛ́ŋə̀ nə́ŋ̀ í'ì invaksə́ ma'ǹmbə̀ rə, oò bàà: «Vɛnɛ́b záá páá mə́ sə̀n invaksə́ rú» sí. Vɛnɛ́b í' invaksə́ ma'ǹmbə̀ kɔ̀ gá, bít tì' àà nɛ́ŋə̀ nə́ŋ̀má invaksə́ ma'ǹmbə̀ gá kɔ̀.

¹⁴Kóó nɛ́ɛ̀réè, inlɛ'kè vaksə́ oò tɛ́m bə bə̀ záá pááù sə̀n invaksə́ rú. Inlɛ'kè vaksə́ tɛ́m bə bə̀ aarə, záá pà'ù kúnú, bít sùd ààù kúnú.

¹⁵Bít màìgə́, bə́n daàn inlɛ'kè vaksə́ tɛ́m bə bə̀ aarə lɛ̀b invaksá, invaksə́ aarə kɔ̀ kàŋì gə́, lɛ̀b valá.

¹⁶Ɔ̀dkudvɛɛ̀l mə́ í'sɛ̀lbə̀ bərá, ìì zá' yíl íí sí.

¹⁷Insɔ̀ɔ̀nkè bəraa tə́ bə́n wə́ə̀n də gə́ kóólé, insɔ̀ɔ̀nkè bəraa bə̀ pii bə́n tɛdńní, vúgə́là lɛgə́ paà roó. Bə̀ vúgə́là Vɛnɛ́b naú, màn aa séé nyàm kə̀ dùdù yɛb tə́ roó. Oò naà gə́, in nə́ŋ̀má pɛ́n bə sé, in nə́ŋ̀má wáá bə sé, bít nyìsə̀ bə sé.

¹⁸Vɛnɛ́b í' bə́n gɔ̀ŋsə́ piìnmbə̀ kə̀ nwɔŋ sɔ̀ɔ̀ná, bɔ̀b báà kuùm in bəraa éèn séé rə kóólé númú.

¹⁹Ɔ̀dkudvɛɛ̀l mə́ í'sɛ̀lbə̀ bərá, ìì gàb in aa yée kúnú' Kóó nɛ́ɛ̀réè, oò kìì nwɔŋ kə̀ báŋ, zá oò gám nwɔŋ kə̀ báŋ sí, oò mà' nɔ̀m kə̀ báŋ sí.

²⁰Kàandə, nɛ́d nɔ̀m bə̀ bán in aa Vɛnɛ́b í' rə ma'ǹmbə̀ gá.

²¹Kə̀ aakíin də, làà ìì lɛ́' in lígə́d bə̀ gə́ kóólé, in aa tə́ vaksə́ rə gə́ kóólé. Ìì kè' kə̀ tɛ́m ɔ̀gkeá, nwɔŋ aa Vɛnɛ́b wùù aí tɛ́mə́ roó. Dá ii kíìn báàn gɔ̀ŋsə́ súùnmbìá.

²²Ìì zá' yíl aí bə̀ kə̀ Vɛnɛ́b nwɔŋ kuùm kiìnmbə̀ ní sí. Zá ìì mà' nwɔŋ aarə kə̀ tù' aí gɔ̀ŋsə́ rú.

²³Èè, màn aa kìì Vɛnɛ́b nwɔŋ yàá, bít mà' kə̀ tù' síndə, lúŋ tə́ nɛ́ŋə̀ aa ɛ̀g núù oò mádúbé rú, bít bé' nɛɛ̀n aa yíl oò kùm dú roó.

²⁴Ɛ̀g núù oò gə́, bít ɛ̀m kúnú; bít bə́ŋyée ní, nyid bɔ̀' nɛɛ̀n aa núù oò kùm dú rə yàá.

²⁵*Nwɔŋ Puu Sɔ̀ɔ̀nkè kùmsə̀n Vɛnɛ́b indaŋ̀mbə̀ nyɛdkèá, tə́ sə̀n nɛ́b bəd vú'ǹ indaŋ̀mbə̀ doo rú. Dáà nɛ́ŋə̀ nə́ŋ̀ sán nwɔŋ bəraa Nwɔŋ Puu sɔ̀ɔ̀nkè rú rəì sɔ̀ɔ̀nkè, yid bɔ̀m in aa Nwɔŋ Puu sɔ̀ɔ̀nkè sánə̀ rə sé, mà'ì kə̀ tù' gə́, nɛ́ŋə̀ aarə, Vɛnɛ́b dáù nɛɛ̀n zígǹ yílú.

²⁶Dáà nɛ́ŋə̀ nə́ŋ̀ zígì oò tɛ́mú, bəǹ nɛ́d Vɛnɛ́b bə̀ bagǹ sɔ̀ɔ̀ná, zá nwán mɛ́l lígə̀d oò síngə́, záá yíl oòra. Nɛɛ̀n aa tə́ tù' ma'ǹ kə̀ Vɛnɛ́b bagǹmbə̀ oòrə, in tɛdńná.

²⁷Báá bə́n Vɛnɛ́b núùrú gə́, aa yée nɛɛ̀n aa nɛ́ŋə̀ dá tù' ma'ǹ dú nyɛdkè kə̀ Vɛnɛ́b bagǹmbə̀ roó' val yɛb ko'ǹ kudǹmbìá, kə̀ val kɛ́ɛ̀m bəd láŋ̀mbə̀ bə búúd boò rú, yíl ámbə̀ nwáànmbə̀ kə̀ in zɔ̀ŋə yɛ́b bə bìá, bɔ̀b boò bɔ̀b invaksə́ nə́ŋ̀má ám naà sí.