Read Samba Leko Yakuba 2 Bible Online

Yakuba 2 - Samba Leko bible

Yakuba 2

¹Ɔ̀dkudvɛɛ̀l mə́ í'sɛ̀lbə̀ bərá, nɛ́b aa íí tə́ Báátììkpɛ̀ŋ Yéésù Krístù, Báá bə́n Tììkpɛ̀ŋ aa nyìì kə̀ kaŋsɛ́l laa nyɛdkè rə bagǹ doó, ìì mà' pɛlké nɛ́b bəd tə́ŋə́ sí.

²Kìínmbə̀ baàn də́'ǹmbə̀ kíin' nɛ́d yàám bə̀ nə́ŋ̀, páá gɔ̀' ba' bìá, kə̀ kɛ̀ɛ́ŋ aa bə̀ kùd kə̀ bəŋzɔ' roó, yaà pìì zɔ̀ŋ aa wál íí tə́ Vɛnɛ́b nyɛɛ̀m bəroó. Nɛ́d búúd bə̀ nə́ŋ̀ kɔ̀, páá gɔ̀' dooá, yaà pìì wərə̀ kɔ̀.

³Íí pii nɛ́ŋə̀ aa páá gɔ̀' sɔ̀ɔ̀nkè bəd də kaŋsɛ́l gbàákù. Íí bààù: «Aí gə́, yaà ìì kùm zɔ̀ŋ sɔ̀ɔ̀nkè aa yée ba!» Zá nɛ́d búúd bə̀ gə́, íí bààù: «Ám gə́, ǹ dìì lɛgú!» Sínkɔ̀: «Ǹ kùm zɔ̀ŋə yɛ́b ba, máá dun dùú!»

⁴Íí mà'ì kə̀ aakíin gə́, aarə íí mà' pɛdké tə́ aí tə́ŋú. Aarə, íí fág yíl aí bə̀ tə́ kə̀ tɛ́m vaksá.

⁵Ìì kìì kúnú, ɔ̀dkudvɛɛ̀l mə́ í'sɛ̀lbə̀ bərá! Íí ɛ̀g də, Vɛnɛ́b sààvúŋ nɛ́b búúd bə̀ bəd nɛ́b zɔ̀ŋə yɛ́b bə bə̀ bəd núùrú sínì? Vɛnɛ́b bí' bə́ nɛ́b gbaŋə̀ bə̀ bərá, tɛ́mbagké rú. Bít pii nɛ́b aa tə́ù í'ǹ də gààraa bàà dàà roó, kìínmbə̀ valligə̀ kíin.

⁶Nɛ́b aa mà' bə̀ tə́ ii pigə̀l, bít bə̀ tə́ ii aàn zɔ̀ŋ fágə́n bə̀ rú rə, nɛ́b gbaŋə̀ bə̀ bərá. Kàan géè?

⁷Nɛ́b gbaŋə̀ bə̀ bəd lò' ìì tə́ ii sə̀n kèéd bí'ǹ kə̀ nə́gə́l sɔ̀ɔ̀nkè aa Vɛnɛ́b pii ii roó.

⁸Núúboòd Gìdń pii indaŋ̀mbə̀ Vɛnɛ́b bə̀ aa yóo: «Ǹ í' ɔ̀dnə́ŋ̀ ń kìínmbə̀ ń í' yíl ámbə̀ rə kíin.» Dáà íí mà'ì kə̀ tù' gə́, íí mà' sɔ̀ɔ̀nkèá.

⁹Zá íí mà' pɛdké tə́ kíìn nɛ́b bəd tə́ŋə́ gə́, aarə íí mà' invaksá. Bít Musa indaŋ̀mbə̀ fág dá ii kíìn ko'nàá, kàandə, íí kɛ̀d indaŋ̀mbə̀ yàá.

¹⁰Èè, màn aa kò' indaŋ̀mbə̀ bəd gə́ kóólé, bít nyɛ́d nə́ŋ̀ də, mà' invaksə́ì kə̀ indaŋ̀mbə̀ bəd gə́ kóólé.

¹¹Màn aa bàà: «Ǹ mà' labsə̀ sí» rə, bít bàà zəg sɔ̀ŋ: «Ǹ lò' yíl sí.» Ń mà' labsə̀ sé, zá ń lò' yílì gə́, kə̀ aakíin də, ń kɛ̀d indaŋ̀mbə̀ yàá.

¹²Ìì gám nwɔŋ, bít ìì mà' tù' kìínmbə̀ nɛ́b aa bə̀ dá bə̀ fágǹ kə̀ indaŋ̀mbə̀ aa bìn lɛ́' nɛ́b bəd indaŋ̀mbə̀ doo rú rə kíin.

¹³Kàandə, sɛŋ aa Vɛnɛ́b dá fágə́n ma'ǹ bərə, nɛ́ŋə̀ aa ɛ̀g bé' nɛ́b kam búúd síndə, Vɛnɛ́b kɔ̀ ɛ̀g bé'ù búúd gá. Zá nɛ́ŋə̀ aa ɛ̀g bé' nɛ́b bəd búúrì rə, Vɛnɛ́b kɔ̀ ɛ̀g dáù búúd kíìn bé'nàá.

¹⁴Ɔ̀dkudvɛɛ̀l mə́ í'sɛ̀lbə̀ bərá, dáà nɛ́ŋə̀ nə́ŋ̀ bàà yàá: «Mə́ tə́ kə̀ tɛ́mbagké naú», zá mà' in aa dá i'ǹ gə́, tə́ kə̀ tɛ́mbagké naà rə síngə́, aarə dáù níì gbá'ǹ gú? Tɛ́mbagké aarə, dáù bée báàn súùnmbèì?

¹⁵Kə̀ baàn də́'ǹmbə̀ kíni, ɔ̀dkudvɛɛ̀l nə́ŋ̀á, sínkɔ̀ kun kéèn nə́ŋ̀á, bə̀ kə̀ gɔ̀' naà sé, bə̀ kə̀ inlíìnmbə̀ naà sé.

¹⁶Bít nɛ́ŋə̀ nə́ŋ̀ aí tə́ŋú, oò bàà bə̀: «Ìì ɛ̀m kə̀ tɛbàá! Ìì kùd si' íí kíìn sɔ̀ɔ̀nkè, ìì pál nwùm gó' bərá, bít ìì líí in kíìn sɔ̀ɔ̀nkè!» Zá pii bə̀ in aa dá bə̀ gɔ̀ŋsə́ ko'ǹ də síngə́, aarə dá níì gbá'ǹ gú?

¹⁷Tɛ́mbagké rə, tə́ kə̀ aarə kíni. Tə́ oò nə́ŋ̀ní tə́ŋtə́ŋ, tù' nə́ŋ̀má bə síngə́, in tɛdńná.

¹⁸Zá nɛ́ŋə̀ nə́ŋ̀ bààì: «Ń tə́ kə̀ tɛ́mbagké naú, máá kɔ̀ mə́ tə́ kə̀ tù' bəd naà» gə́, kàanyée gə́, kè' mááù í'ǹ: «Ǹ ì' mə́ nɛɛ̀n aa tɛ́mbagké ń dákíìn kumàá, tù' bə̀ gá roó. Bít máá kɔ̀ máan tɛ́mbagké mə́ i'ǹ kə̀ tù' mə́ bərá.»

¹⁹Ń sèl lə, ń bàà: «Vɛnɛ́b tə́ nə́ŋ̀níì?» Ń bàà vɛ́nà. Nwul vaksə́ bəd kɔ̀ bə̀ sèl tə́ kàani, bít bə̀ nìŋ tə́ kə̀ də́dǹná.

²⁰Ń kèérá! Ń í' boò ì' bəǹ gə́, tɛ́mbagké aa tù' bəd bə síndə, in tɛdń deè?

²¹Vɛnɛ́b ɛ̀g gàb doo bə́n Abraham leè kìínmbə̀ nɛ́d wɔ̀ɔ̀lə̀ kíniì? Aarə sɛŋ aa pii wàà oò Isiyaku *gannyàgə̀lə́ roó.

²²Ń bé' yàá, tɛ́mbagké oò, kə̀ tù' oò bəd tá, bə̀ ɛ̀m tə́ nə́ŋ̀ní! Bít tù' oò bəd də, bə̀ bí' sə̀n tɛ́mbagké oò nyɛdkèá!

²³Kàandə, nwɔŋ bəraa Núúboòd Gìdń bərə́ rə, ma'míìn tə́ kúnú: «Abraham bàg Vɛnɛ́b yàá. Kə̀ taàbìá, Vɛnɛ́b ɛ̀gə̀ taà kìínmbə̀ nɛ́ŋə̀ wɔ̀ɔ̀lə̀ kíin, Vɛnɛ́b dɛ̀rə̀ taà ɔ̀dzéd bəǹ dá.»

²⁴Íí bé' yàá, Vɛnɛ́b ɛ̀g gàb nɛ́ŋə̀ kìínmbə̀ nɛ́ŋə̀ wɔ̀ɔ̀lə̀ kíin də, kə̀ tù' bəraa mà' roó, zá kə̀ tɛ́mbagké oò ní gá.

²⁵Bít Rahab nɛ́d kéèndo labsə̀ bə̀ kɔ̀ mà' kàani. Vɛnɛ́b ɛ̀g gàbə̀ nɛ́ŋ kéèndo wɔ̀ɔ̀lə̀, kə̀ tù' oò bərá. Mə́' kè' *Yahudu bəraa pìì bə̀ sáá nɛ́ŋə̀ bàgələ́ rə oò kàrú, bít súú bə̀ kə̀ boò bə̀ paàn tá'ǹmbə̀ kpaŋ̀ nə́ŋ̀ gɔ̀ŋ ba.

²⁶Èè, wəəsɛ́l síngə́, si' vàd yàá. Kə̀ aarə kíin, tù' bəd síngə́, tɛ́mbagké vàd yàá.