Read Samba Leko Yakuba 3 Bible Online

Yakuba 3 - Samba Leko bible

Yakuba 3

¹Ɔ̀dkudvɛɛ̀l mə́ bərá, ìì ká' kuùmbə̀ nɛ́b nɛ́b bəd in bə̀ sáàn bəd sí. Kàandə, íí gàb yàá, nɛ́b aa bə́n tə́ən nɛ́b bəd in sáàn də, bə̀ dá bə́n fágə́n nwuukè bə̀ ma'ǹ, dá sə̀n nɛ́b kambəd bə̀ kanàá.

²Bə́n kóólé, bə́n ma'ǹ invaksə́ tə́ gbàákù. Dáà nɛ́ŋə̀ nə́ŋ̀ gám nwɔŋ yàá, mà' invaksə́ síngə́, oò gə́, nɛ́ŋə̀ nyɛdkèá, dákíìn báàn si' oò nwáànmbə̀ kə̀ zɔ̀ŋtá.

³Màìgə́, bə́n páàn yaa ba' gú' bərə, bɔ̀b oò ləə bə́n kúnú, bít oò àà bə́n zɔ̀ŋ aa bə́n í'ǹ bəroó.

⁴Ìì ɛ̀g kə̀d gbàád bəd kɔ̀' nɛɛ̀n aa bə̀ kàŋ dú rə gə́ kóólé, bít nɛɛ̀n aa wul tə́ bə̀ tiìn kə̀ kpɛŋsɛ́l lə gə́ kóólé, kə̀ kə̀ə̀d tə́ə́ wàà bɛ̀ŋ́sə̀wàá, nɛ́d kə̀ə̀d bə̀ sabm̀ sàb ɛ̀m bə̀ taà kə̀ zɔ̀ŋ aa í' bəroó.

⁵Mɛ́l kɔ̀ tə́ kə̀ aarə kínì. Zɔ̀ŋ wàà bɛ̀ŋ́sə̀wà nə́ŋ̀ sisə́ bìá, zá dákíìn báàn kùlə́ ma'ǹmbə̀ kə̀ in gbàád bərá. Ìì ɛ̀g núùá! Laa wàà bɛ̀ŋ́sə̀wà ní, nɛ́ŋə̀ dá wàg gbà'á dú'ǹ kə̀ kùrú.

⁶Mɛ́l kɔ̀ tə́ kìínmbə̀ laa kíìn; oòrə, zɔ̀ŋ aa invaksə́ ləə gààd bəroó. Zɔ̀ŋ ləə̀nmbə̀ oò tə́ obə́n sisú, bít yɛ̀l bɛ́' si' bə́n tə́ kə̀ zɔ̀ŋtá. Sɛŋ aa bə́n tə́ən kuùm zɔ̀ŋə yɛ́b bərə, dú' yɛ̀l bɛ́' bə́n si' tə́ kə̀ laa aa fə́' bə gá roó.

⁷Nɛ́ŋə̀ dákíìn báàn gɔ̀g fɔ̀g dùù bə̀ bəd ma'ǹ bí'ǹmbə̀ boò ləə nɛ́ŋàá' núú yɛbá, in bəraa gubə̀l kə̀ bàgə̀l loó, bít kə̀ díb bərá; bít mà' bí' bə̀, bə̀ ləə nɛ́ŋə̀ yàá!

⁸Zá mɛ́l gə́, nɛ́ŋə̀ nə́ŋ̀má bánə̀ ma'ǹmbə̀, bɔ̀b oò ləə nɛ́ŋə̀ sé! Oòrə invaksá, bít dàà wá'ǹmbə̀ sé. Nyìì tə́ kə̀ mɛ̀n nɛ́ŋə̀ bə̀ lo'ǹná.

⁹Kə̀ mɛ́lá, bə́n mɔ̀'ǹ taà Vɛnɛ́b aa ləə gààd obə́n yílú, bít kùmsə̀n Báá bə́n, bə́n kóólé roó. Bít kə̀ oòra sɔ̀ŋ, bə́n ma'ǹ taà nɛ́b aa Vɛnɛ́b kùd də́'à kə̀ oòrə nwɔŋyɛɛ̀lá.

¹⁰Mɔ̀'keá, kə̀ nwɔŋyɛɛ̀lá, bə̀ vúgə́là gú' nə́ŋ̀ní aarə ba. Ɔ̀dkudvɛɛ̀l mə́ bərá, in aarə oò ma'míìn kaàn sí.

¹¹Wəl sɔ̀ɔ̀n kə̀ wəl nyááke tá, ə' bə̀ dáà bée vúgǹnà wəl yíl nə́ŋ̀ní beè?

¹²Gààm nyìì bán lèéǹ wàà lɛbm̀bə̀ gá. Kə́ə̀l nyìì kɔ̀ bán gààm wàà lɛbm̀bə̀ gá. Kə̀ aarə kíin, wəl sɔ̀ɔ̀nkè bán ə'ǹ vúgǹnà bə̀ wəl nyááke yíl bə gá.

¹³Nɛ́d in bə̀ gabm̀ nə́ŋ̀ tə́ béení aí tə́ŋə́ì? Nɛ́d yílə bə̀ nə́ŋ̀ tə́ béení aí tə́ŋə́ì? Oò ì' yíl oò kə̀ insɔ̀ɔ̀n aa tə́ ma'ǹ doó, kə̀ tùsaa mà' kə̀ ɔ̀gkeá, bít kə̀ ingabké roó.

¹⁴Zá dáà íí tə́ kə̀ kisɛ̀l vaksə́ tɛ́mú, bít íí í'ì nɛ́b kambəd kaànmbə̀ gə́, ìì mà' kùlə́ sí. Ìì dùg gúsuúm kə̀ vɛ́nà məə̀n daànmbə̀ sí.

¹⁵Ingabké luùm aarə, vúgà lɛgə́ paà gá, vúg zɔ̀ŋə yɛ́b ba, vúg nɛ́ŋə̀ naú. Aarə vúgà Sámbàŋyɛ́rə̀ naú.

¹⁶Kàandə, zɔ̀ŋ aa kisɛ̀l vaksə́ kə̀ í'sɛ̀l ɔ̀dnə́ŋ̀ bə̀ kaàn tá, bə̀ kùm bərə, in gə́ kóólé tə́ sagədkéá, bít in vaksə́ luùm gɔ̀ŋ gɔ̀ŋ tə́ sə̀n wərà.

¹⁷Zá ingabké lɛgə́ paà bə̀ gə́, tə́ nyɛdkèá, bít tə́ kə̀ tɛbə̀ naú; tə́ ɔ̀gkeá, bít sàà wáàlǹmbìá, nyìì tə́ kə̀ sɔ̀ɔ̀nkèá, bít mà' tù' sɔ̀ɔ̀nkè bərá. Oò gə́, pɛ̀d nɛ́b bəd bə sé, bít kə̀ gú' bàrə̀b naà sé.

¹⁸Nɛ́b bəd tə́ tù' tɛbə̀ bə̀ ma'ǹ kə̀ tɛ́m tɛbə̀ gə́, bə̀ bɔ̀b sɔ̀ɔ̀nkè nɛɛ̀n aa bə̀ mà' tɛbə̀ rə bòórú.