Read Samba Leko Yakuba 4 Bible Online

Yakuba 4 - Samba Leko bible

Yakuba 4

¹Álsɛ̀l bəraa aí tə́ŋú, kə̀ nə́gə̀d bəd tə́ rə, bə̀ vúgə́là bá? Bə̀ vúgə́là inselké vaksə́ bəraa bə̀ tə́ nə́gə̀d ma'ǹ sɛŋ gə́ kóólé íí tɛ́mə́ rə rú.

²Íí í' ìì in nə́ŋ̀ bɔbm̀bìá, zá íí bánə̀ bɔbm̀bə̀ síngə́, íí tə́ kpaŋú, yíl bə̀ lo'ǹná. Íí ɔ̀d in nə́ŋ̀ yàá, zá íí bánə̀ bɔbm̀bə̀ síngə́, íí mà' álsɛ̀l bərá, kə̀ nə́gə̀d bərá. In aa íí í' yàá, íí bɔ̀b síndə, kàandə, íí dɛ̀d Vɛnɛ́b naà sé.

³Bít íí dɛ̀d inì Vɛnɛ́b naú, íí bɔ̀b síngə́, inselké íí bəd sɔ̀ɔ̀n sé' in aa íí dɛ̀d də, íí í' ma'ǹmbə̀ kə̀ in aa tɛ́m aí bə̀ í' roó.

⁴Íí nɛ́b tɛ́m yɛ̀ɛ́l bəraa íí ləə Vɛnɛ́b indaŋ̀mbə̀ sín yóo! Gabm̀bə̀ in bəraa zɔ̀ŋə yɛ́b bərə í'ǹmbə̀ rə, kuùmbə̀ Vɛnɛ́b ɔ̀dmáàn də, íí gàb sínì? Màn aa í' in zɔ̀ŋə yɛ́b bə bə̀ rə, Vɛnɛ́b ɔ̀dmáàná.

⁵Seèlǹmbə̀ nwɔŋ aa Núúboòd Gìdń bàà: «Vɛnɛ́b ɔ̀d nwul aa páá obə́n dú rə tə́ kə̀ kisɛ̀l» lə, nwɔŋ tɛdń də, ìì sèl sí.

⁶Zá Vɛnɛ́b mà' bə́n pə̀dkè gbà'á aa kàŋ kàn nɛɛ̀n doó; kàandə, núúboòd Gìdń bàà: «Vɛnɛ́b zèè nɛ́b yíl kpɛŋké bə̀ bəd tə́ kúnú, bít pii í'sɛ̀l oò tə́ nɛ́b aa bə̀ tə́ yíl boò bí'ǹ bɛ̀ŋ́sə̀wà roó.»

⁷Kə̀ aakíin də, ìì ləə Vɛnɛ́bá. Ìì nə́' kə̀ Sámbàŋyɛ́ràá, bít nùù dá ɛɛ̀m zɔ̀ŋ bùúd kə̀ aíra.

⁸Ìì gbara Vɛnɛ́b sunú, oò kɔ̀ dáà gbadǹnà aí sunú. Ìì sùg nɛ̀n íí bərá, íí nɛ́b invaksə́ bə̀ ma'ǹ bəraa yóo! Sùg ìì nyɛ́' tɛ́m íí bərá, íí nɛ́b aa tɛ́m íí dìì zɔ̀ŋ nə́ŋ̀ní bə in aa íí tə́ ma'ǹ də rú gə́ kóólé sə́n yóo!

⁹Ìì kùm kə̀ tɛ́m nwuukèá! Ìì kpə̀ə̀ kúnú, ìì dàl nwɔŋ bərá. Ìì pɛ́n lóórí kə̀ kpə̀ə́ǹ bərá, bít tɛ́m làmkè íí kə̀ tɛ́m nwuukèá.

¹⁰Ìì bí' yíl íí bɛ̀ŋ́sə̀wà Báátììkpɛ̀ŋ númú, bít oò kɔ̀ mà' dá ii bí'ǹ nɛ́b pɛ̀sə́ bə̀ bərá.

¹¹Odkudvɛɛ̀l bərá, ìì gám nwɔŋ vaksə́ ɔ̀dnə́ŋ̀ bəd yílə́ sí. Màn aa gám nwɔŋ vaksə́ ɔ̀dkudvɛɛ̀l nə́ŋ̀ yílú, sínkɔ̀ fág ɔ̀dkudvɛɛ̀l nə́ŋ̀ də, gám nwɔŋ vaksə́ tə́ kə̀ indaŋ̀mbìá, bít fág indaŋ̀mbìá. Dáà ń fág indaŋ̀mbə̀ì gə́, ń ləə indaŋ̀mbə̀ sé. Ń kùmsə̀n nɛ́ŋə̀ aa tə́ù fágǹ doó.

¹²Vɛnɛ́b oò nə́ŋ̀ní tə́ŋtə́ŋ, pii sə̀n indaŋ̀mbìá, bít oòra kùmsə̀n nɛ́d fágə́n bə̀ ma'ǹná. Oò nə́ŋ̀ní tə́ŋtə́ŋ, dá sə̀n báàn nɛ́ŋə̀ súùnmbìá, bít dá sə̀n báàn nɛ́ŋə̀ lo'ǹ dúŋ̀mbìá. Zá ám gə́, ń nɛ́ɛ̀réè, ń dá taà ɔ̀dnə́ŋ̀ ń fágǹ gú?

¹³Bə́ŋyée, ìì gú' yíl íí ra, nɛ́b aa íí tə́ baàn: «Nyà'aa yóo, sínkɔ̀ nwúndùá, bá ɛɛ̀m bìl aa yée rú, bá kuùm wərə̀ zèd nə́ŋ̀, bá dùm gə́làá, bá ba' bɔbm̀» doó.

¹⁴Íí gàb in aa dá taàn nwúndù rə yèè? Íí gàb in aa dá ma'míìn aí gɔ̀ŋsə́ rú rə yèè? Íí tə́ kìínmbə̀ zààm wàà bɛ̀ŋ́sə̀wà aa vúgà bə́ŋyée ní, bít náŋ bɛ́dǹmbə̀ gá rə kíin.

¹⁵Dáà íí dá baàn: «Báátììkpɛ̀ŋ í'ì gə́, bá kuùm kə̀ gɔ̀ŋsá, bít bá in aa yée ma'nàá, sínkɔ̀ aa yóo.»

¹⁶Zá bə́ŋyée gə́, íí tə́ yíl pa'nàá, bít íí tə́ kùlə́ ma'nàá; yíl pa'ké luùm aarə, sɔ̀ɔ̀n sé.

¹⁷Dáà nɛ́ŋə̀ nə́ŋ̀ gàbì insɔ̀ɔ̀nkè ma'ǹmbìá, bít mà' síngə́, mà' invaksə́ yàá.