Read Samba Leko Yakuba 5 Bible Online

Yakuba 5 - Samba Leko bible

Yakuba 5

¹Bít bə́ŋyée gə́, ìì zɛ̀ŋ mə́ kúnú, íí nɛ́b gbaŋə̀ bə̀ bərá! Ìì kpə̀ə̀ kúnú, bít ìì də̀n búúd bəraa dáà yaànà aí yílə́ rə bòórú!

²Gbaŋə̀ íí bəd nwɔɔ̀n yàá! Yɛbsə́ bəd bə̀ líí gɔ̀' íí bəd yàá.

³Bəŋzɔ' íí kə̀ ba' tá, ìì pug tə́ kə̀ nyɛ̀ŋá. Nyɛ̀ŋ aarə, dá sedako vaksə́ ma'ǹ aí yílú. Nyɛ̀ŋ dá si' íí líìn kìínmbə̀ laa kíin. Wál íí zúm gbaŋə̀ bərì sɛŋ bəraa tə́ dugǹ kə̀ bòòd yée ba!

⁴Nɛ́b aa bə̀ tə́ tù' ma'ǹ aí lɛsə́ rə, íí káá bə̀ mú'sɛ̀l dùm boò sé. Ìì zɛ̀ŋ nwɔŋ daàlǹmbə̀ bərá! Nɛ́b aa bə̀ tə́ ii lɛ' kɛdǹ də, kpə̀ə́ǹ boò bəd wə́ə́ì Vɛnɛ́b, Báátììkpɛ̀ŋ nɛ́ŋə̀ aa séé lɛg kə̀ yɛ́b tə́ rə túŋwà rú.

⁵Zɔ̀ŋə yɛb bə gə́, íí kùm gbaŋə̀ bəd tə́ŋú, íí mà' in aa sɔ̀ɔ̀ni roó. Bə́ŋyée gə́, kìm íí sɔ̀ɔ̀n yàá, kə̀ nàà aa bə̀ dáùráàn wéèn də kíin.

⁶Íí fág, bít íí lòd nɛ́b aa mà' invaksə́ nə́ŋ̀má síndoó. Bít boò kɔ̀ bə̀ kə̀ kpɛŋsɛ́l naà aí bə̀ daŋ̀mbə̀, bɔ̀b ìì mà' sí sé.

⁷Ìì sìd kúnú ɔ̀dkudvɛɛ̀l bərá, Báátììkpɛ̀ŋ oò wə́ə́ zé. Ìì ɛ̀g nɛ́d in bə̀ laàmmá' oò gə́, nwán kə̀ tɛ́m sidkéá, insɔ̀ɔ̀nkè bəraa dá kɛdǹ yɛ́b bəroó' sìd sɛŋ aa nwan pí' bəroó, nwan yaà zá' zé.

⁸Aí kɔ̀ ìì kùm kə̀ tɛ́m sidkéá; ìì nyìì kə̀ váàndoá. Kàandə, sɛŋ aa Báátììkpɛ̀ŋ dáà yaànà bərə, gbad wə́ə́ì kə́d ba.

⁹Ɔ̀dkudvɛɛ̀l bərá, ìì gám nwɔŋ vaksə́ ɔ̀dnə́ŋ̀ bəd yílə́ sí. Fágə́n aa dá dugǹ kə̀ bòd də, sɛŋ oò wə́ə́ì kə́d ba.

¹⁰Ɔ̀dkudvɛɛ̀l bərá, sèl ìì zá' *Vɛnɛ́b gbantumsə̀ bəraa bə̀ gám nwɔŋ Báátììkpɛ̀ŋ nə́gə́lə́ roó, bə̀ bé' búúd kə̀ tɛ́m sidkéá. Aí kɔ̀, ìì mà' kə̀ boò kíin.

¹¹Ìì ɛ̀ga! Bə́ mɔ̀' nɛ́b aa bə̀ tə́ gbò'kè sidǹ də yàá. Íí kìì Job tɛ́m sidké nwɔŋ yàá, bít íí gàb pə̀dkè aa Báátììkpɛ̀ŋ mà'ù, sɛŋ aa bɛ́d kə̀ naà rə yàá. Kàandə, Báátììkpɛ̀ŋ gə́, nyìì tə́ kə̀ tɛ́m burúmá, bít kə̀ sɔ̀ɔ̀nkèá.

¹²Ɔ̀dkudvɛɛ̀l mə́ bərá, aa yée in aa íí dá gabm̀ doó' ìì nwɔ̀m in sí. Ìì pà' lɛgá, yɛ́bá, sínkɔ̀ in ɔ̀dnə́ŋ̀ gɔ̀ŋ kìínmbə̀ sedako kíin sí. Ìì bàà èè sɛŋ aa tə́ èè roó, ìì bàà ə́ùwə́ sɛŋ aa tə́ ə́ùwə́ roó, bɔ̀b fágə́n Vɛnɛ́b bə̀ oò kò' ii sí.

¹³Nɛ́ŋə̀ nə́ŋ̀ í' búúd tə́ bée aí tə́ŋə́ì? Oò nyɛ̀m Vɛnɛ́bá. Nɛ́ŋə̀ nə́ŋ̀ tə́ bée kə̀ tɛ́m làmkèì? Oò nàà Báátììkpɛ̀ŋ nábá.

¹⁴Nɛ́ŋə̀ nə́ŋ̀ tə́ kə̀ mad aí tə́ŋə́ì? Oò dɛ̀d nɛ́b gbàád *Eklisiya bə̀ bərá, bə̀ dáù kílə́m sáŋ̀ yílú, Báátììkpɛ̀ŋ nə́gə́lú, bít bə̀ dá Vɛnɛ́b nyɛɛ̀m oò yílú, Báátììkpɛ̀ŋ nə́gə́lú.

¹⁵Vɛnɛ́b aa bə̀ nyɛ̀m kə̀ tɛ́mbagké yérə, dá nɛ́d mad bə̀ rə kíìn súúnàá' Báátììkpɛ̀ŋ bít dáù kpɛŋsɛ́l kíìn piinàá, bít lɛ́' dáù invaksə́ bəraa mà' rə kíìn daanàá.

¹⁶Kə̀ aakíin də, bàà ìì vú' invaksə́ íí bəd aí bòdba. Nɛ́b kam boò nyɛ̀m Vɛnɛ́b kə̀ nɛ́b ɔ̀d kam bərá, bɔ̀b si' boò oò gág kúnú. Vɛnɛ́b aa nɛ́ŋə̀ wɔ̀ɔ̀lə̀ nyɛ̀m də, tə́ kə̀ kpɛŋsɛ́l naà gbàákù.

¹⁷*Eliya kɔ̀ nɛ́ŋə̀ kə̀ obə́n kíin, dìì Vɛnɛ́b nyɛɛ̀mbə̀ kə̀ tɛ́m nə́ŋ̀ní, bɔ̀b nwan oò naŋ̀ sí, bít nwan naŋ̀ sé, zèd toora kə̀ tɔ̀rá.

¹⁸Bòórú gə́, nyɛ̀m Vɛnɛ́b sɔ̀ŋ, kàanyée gə́, lɛg piià nwan yàá. Bít inluùm bəd vúgə́lì yɛb bə sɔ̀ɔ̀nkè.

¹⁹Ɔ̀dkudvɛɛ̀l mə́ bərá, dáà nɛ́ŋə̀ nə́ŋ̀ aí tə́ŋú, zá' dàà vɛ́nà yàá, bít nɛ́ŋə̀ nə́ŋ̀ bí'ùwàì kpaŋ̀ sɔ̀ɔ̀nú gə́,

²⁰ìì gàb kúnú: «Màn aa bí'à nɛ́d invaksə́ bə̀ ma'ǹnì kpaŋ̀ sɔ̀ɔ̀nə́ rə, dáù kíìn súùn valú, bít invaksə́ zùúm bəd lɛ́' dákíìn daamínàá.»