Read Samba Leko 1 Piyɛr 2 Bible Online

1 Piyɛr 2 - Samba Leko bible

1 Piyɛr 2

¹Kə̀ taàbìá, lɛ́l ìì dàà invaksə́ íí bəd kíìn kóólé' gúsuúmá, gú' bàrə̀bá, kisɛ̀lá, bít kə̀ ɔ̀dnə́ŋ̀ bəd bɔɔ̀n gáàmbìá.

²Kìínmbə̀ nɛɛ̀n aa yɛb bəə í' vuùm uùm bə̀ rə kíin, aí kɔ̀ ìì í' insánke aa nyɛdkè bít ɔ̀gke roó. Kə̀ oòra, íí dá taà báàn kaŋ̀mbìá, bít íí dá taà báàn súùnmbìá.

³Kàandə, kə̀ nɛɛ̀n aa Núúboòd Gìdń bàà rə kíin: «Bə́ŋyée íí bé' sɔ̀ɔ̀nkè Báátììkpɛ̀ŋ bə̀ yàá!»

⁴Ìì gbarà Báátììkpɛ̀ŋ Yéésù səǹ íí kóólé. Oòrə, bəŋ gɔ̀ŋsə́ bə̀ aa nɛ́b bəd làà bə̀ lɛ́', bít Vɛnɛ́b sààvúŋà roó. Vɛnɛ́b ɛ̀g bé'ù kìínmbə̀ bəŋ pɛ̀sə́ bə̀ kíin.

⁵Aí kɔ̀ íí tə́ kìínmbə̀ bəŋ gɔ̀ŋsə́ bə̀ bəd kíin; ìì dàà yíl íí boò wə̀ə̀ ii kə̀ Vɛnɛ́b wúl *Gìdńná. Wál íí dá kuùm nɛ́b láŋsə́ bə̀ ma'ǹ *gìdń bəd gə̀b aa bə̀ zíg bə̀, bɔ̀b boò pii sadaka *Gìdń bəraa dá Vɛnɛ́b sɔɔ̀n, tù' bəraa Yéésù Krístù mà' rə bòórú roó.

⁶Kàandə, Vɛnɛ́b bàà Núúboòd Gìdńnú: «Sàà mə́ vúŋ bəŋ pɛ̀sə́ bìá, mááù zígǹ bə́ŋyée, kìínmbə̀ bəŋ yíl bə̀ kíin, Siyona bìlú; màn aa zíg tɛ́mì oò bərə, dàà sə́ə́mnúù gá.»

⁷Bəŋ aarə, tə́ kə̀ pɛ̀sə́ naà gbàákù, nɛ́b aa íí tə́ Yéésù bagǹ də gə́ roó; zá nɛ́b aa íí bàgə̀ síndə gə́, Núúboòd Gìdń bàà: «Bəŋ aa nɛ́b wúl bə̀ wə'ǹ bəd làà bə̀ lɛ́' rə, yaà bíl bəŋ yíl bə̀ yàá.»

⁸Núúboòd Gìdń bàà sɔ̀ŋ: «Bəŋ aarə, kùmsə̀n bəŋ aa nɛ́b bəd tə́ dunwà yíl taàn bəroó, bəŋ aa bə̀ tə́ yi'ǹ bəroó.» Nɛ́b aa bə̀ tàl dunwà yíl lə, nɛ́b bəraa bə̀ məə Vɛnɛ́b nwɔŋ ləə̀nmbə̀ roó; aarə Vɛnɛ́b sààvúŋ bə̀ sə̀n kàani.

⁹Zá aí gə́, íí nɛ́b bəraa Vɛnɛ́b sààvúŋà roó, íí nɛ́b láŋsə́ bə̀ ma'ǹ Vɛnɛ́b bə̀ bərá, yɛ́b *Gìdńná, Vɛnɛ́b nɛ́b bərá. Vɛnɛ́b sààvúŋiyà, bɔ̀b ìì bàà nɛ́b bəd nwɔŋ, tù' sɔ̀ɔ̀nkè bəǹ bəd yílú. Dɛ̀d vúŋiyà tígə́lú, bɔ̀b yaà ìì kùm zɔ̀ŋ nyɛdkè súúke bəǹ dú.

¹⁰Nyàam də, íí kùm Vɛnɛ́b nɛ́b bəd sé, zá bə́ŋyée gə́, íí nɛ́b oò bərá. Nyàam də, Vɛnɛ́b ɛ̀g gàb ii búúd sé, zá bə́ŋyée gə́, ɛ̀g gàb ii búúd yàá.

¹¹Ɔ̀dzéd mə́ í'sɛ̀lbə̀ bərá, mə́ tə́ ii kíìn baàn nyɛdkè, íí kùm tə́ zɔ̀ŋə yɛ́b bə kìínmbə̀ nɛ́b aa gəə̀l bə̀ tə́ taàn də kíin, bít kə̀ sɛ̀ɛ́n bəd kíin. Kə̀ taàbìá, mə́ tə́ ii taà nyɛmàá, nùù ìì dàà inlɛ'kè vaksə́ bəraa íí tə́ í'ǹ aí tɛ́m bəroó; boò rə, bə̀ nə́' nə́gə̀d tə́ kə̀ nyì' íí ra.

¹²Kumké aí bə̀ kə̀ nɛ́b aa bə̀ bàg Vɛnɛ́b síndə tə́ gə́, oò kùm sɔ̀ɔ̀nkèá, bɔ̀b bə̀ pè' ii tə́ kìínmbə̀ nɛ́b invaksə́ bə̀ ma'ǹ bəd kíin máá, boò bé' gə́, tù' aí bə̀ tə́ nyɛdkèá, bít boò káŋ Vɛnɛ́b sɛŋ aa dáà bídǹnà bəroó.

¹³Báátììkpɛ̀ŋ bòórú, ìì ləə nɛ́b gbàád bəraa zɔ̀ŋə yɛ́b bəroó; ìì ləə gààd gbà'á, kàandə, tə́ kə̀ kpɛŋsɛ́l nɛ́b bəd kóólé yílú,

¹⁴bít ìì ləə gɔ̀mnà bəraa gààd gbà'á tùmà, bɔ̀b boò í' nɛ́b invaksə́ bə̀ ma'ǹ bəd búúrá, sínkɔ̀ boò mɔ̀' nɛ́b sɔ̀ɔ̀nkè bə̀ ma'ǹ bəd doó.

¹⁵Kàandə, Vɛnɛ́b í' gə́, ìì dàŋ nɛ́b bəraa bə̀ tə́ məə̀n nwɔŋ sɔ̀ɔ̀n ke'ǹmbə̀ rə, nwɔŋ gáàmbə̀ aí yílú, kə̀ insɔ̀ɔ̀nkè bəraa íí tə́ ma'ǹ doó.

¹⁶Ìì kùm kìínmbə̀ nɛ́b yíl bə̀ bəd kíin. Zá ìì gú' seèl baànmbə̀, bənə́ nɛ́b yíl bə̀ bəd yée gə́, bənə́ dáánnə́ invaksə́ ma'nàá. Zá aa dá sɔɔ̀n də, ìì kùm nɛ́b Vɛnɛ́b tù' bə̀ ma'ǹ bərá.

¹⁷Ìì káŋ nɛ́b bəd gə́ kóólé, bít ìì í' ɔ̀dkudvɛɛ̀l íí tɛ́mbagké rú bə̀ bərá, ìì nùù Vɛnɛ́bá, ìì káŋ gààd gbà'á.

¹⁸Íí nɛ́b tù' bə̀ ma'ǹ bərá, ìì ləə nɛ̀n íí bərá, bít ìì nùù bə̀ kúnú. Ìì ləə bít ìì nùù nɛ̀n sɔ̀ɔ̀nkè bəd kə̀ nɛ̀n ɔ̀gke bəd ní sí, zá ìì ləə bít ìì nùù nɛ̀n yíl kpɛŋké bə̀ bəd kɔ̀.

¹⁹Kàandə, ń í'ì in aa Vɛnɛ́b í' rə ma'ǹmbə̀ kə̀ tɛ́m nə́ŋ̀ní, bít ń tə́ búúd sidǹ in aa ń mà' síndə bə gə́, Vɛnɛ́b dáan pə̀dkè ma'nàá.

²⁰Kə̀ aakíin də, dáà íí mà' tə́ invaksá, íí tə́ taà dùù bəraa bə̀ tə́ ii zibm̀ də sidǹ gə́, dá ii níì gbá'ǹ gú? Dáà íí sìd dùù bəd tə́ insɔ̀ɔ̀n aa íí mà' rə bòórú gə́, aarə íí mà' insɔ̀ɔ̀n, Vɛnɛ́b númú.

²¹Vɛnɛ́b dɛ̀riyà in aa yérə bìá. Kàandə, Krístù kə̀ yíl oò máá, í' búúd aí bòórú, bɔ̀b aí kɔ̀ ìì mà' kə̀ oò kíin.

²²Krístù gə́, mà' invaksə́ sé, nɛ́ŋə̀ nə́ŋ̀má kìì bèd gúsuúm nwɔŋ oò gú' bə sín kɔ̀.

²³Krístù gə́, bə̀ dú'ù kúnú, dú' bí' sé, búúd bəraa bə̀ í'ù rə, gám oò gú' bə bəǹ dá bə̀ kíìn ma'ǹ bí'ǹ sé. Zá oò gə́, zíg tɛ́m oò Vɛnɛ́b, nɛ́ŋə̀ fágə́n wɔ̀ɔ̀lə̀ bə̀ ma'ǹ ba.

²⁴Krístù kə̀ yíl oòra, pà' invaksə́ bə́n bərì oò sisú, téélɛŋké ba, bɔ̀b báà kuùm invaksə́ kɔ̀' sɔ̀ŋ sí, zá báà kuùm kìínmbə̀ nɛɛ̀n aa Vɛnɛ́b í' rú rə kíin. Núgə́l oò bəd bòórú, íí bɔ̀b taà gɔ̀ŋsá.

²⁵Íí kùmà kìínmbə̀ bɛ̀rə̀ bɔ̀bke bəd kíin. Zá bə́ŋyée gə́, kid íí bíràì Krístù, bɛ̀rə̀ yibə̀ sɔ̀ɔ̀n aa dá nyì' íí bəd nwáàn də sunú.