Read Samba Leko 1 Piyɛr 4 Bible Online

1 Piyɛr 4 - Samba Leko bible

1 Piyɛr 4

¹Kə̀ aakíin, íí gàb yàá, Krístù bé' búúrì zɔ̀ŋə yɛ́b ba. Ìì kùd si' búúd bé'ǹmbə̀ kə̀ oò kíin. Kàandə, màn aa bé' búúrì rə, mà' invaksə́ sɔ̀ŋ gá.

²Sɔ̀d bə́ŋyóo, nɛɛ̀n aa íí dá kuùm zɔ̀ŋə yɛ́b bərə, oò kùm kə̀ nɛɛ̀n aa Vɛnɛ́b í' rə kíin, zá kìínmbə̀ inlɛ'kè vaksə́ bəraa nɛ́b bəd tɛ́mú rə kíin gá.

³Kə̀ aakíin də, kùm íí tá'à sɛŋ zùúm, kə̀ nɛɛ̀n aa nɛ́b aa bàg Vɛnɛ́b síndə, bə̀ tə́ ma'ǹ də kíin. Sɛŋ aarə, íí kùmà labsə̀ bərú, inlɛ'kè vaksə́ bərú, wìdkè rú, in ságǹ vaksə́ bərú, wálke badn bə̀ nyəə̀n bərú, bít kə̀ vɔɔm vaksə́ pɔ̀bm̀bə̀ rú.

⁴Bə́ŋyée gə́, wál íí mà' invaksə́ kə̀ nɛ́b aa bə̀ bàg Vɛnɛ́b síndə tə́ sé. In aarə kò' bə̀ yíl tə́ kúnú; kə̀ taàbìá, bə̀ tə́ ii taà piìn dúlǹmbìá.

⁵Zá bə̀ dá tù' boò bəd i'ǹ Vɛnɛ́b, nɛ́ŋə̀ aa tə́ si' kudǹ, bɔ̀b nɛ́b galə̀ bəd fágǹmbə̀ kə̀ val bəd tə́ rə númú.

⁶Kə̀ taàbìá, val bəd máá, Krístù bàà bə̀ taà *Nwɔŋ Puu Sɔ̀ɔ̀nkèá. Val boò aarə, fágə́n Vɛnɛ́b bìá, kìínmbə̀ nɛ́b bəd kóólé, val dá bə̀ kodǹ də kíin. Zá ìì bàà bə̀ Nwɔŋ Puu Sɔ̀ɔ̀nkè rə, bɔ̀b boò kùm kə̀ si' nwulú bìá, kə̀ nɛɛ̀n aa Vɛnɛ́b kùm dú rə kíin.

⁷In gə́ kóólé, wə́ə́ì kə́d bə bɛ́dǹmbìá. Ìì nwán yíl aí bìá, ìì ləə ləəm sí, bɔ̀b Vɛnɛ́b nyɛɛ̀mbìá.

⁸Aa kàn nɛɛ̀n də, ìì í' ɔ̀dnə́ŋ̀ bəd íí bòdba, kə̀ í'sɛ̀l vɛ́nà bìá. Kàandə, íí í' ɔ̀dnə́ŋ̀ tə́ kíìn íí bòdbə gə́, lɛ́' íí dá invaksə́ aa nɛ́ŋə̀ mà' ii rə kíin daanàá.

⁹Ìì kè' ɔ̀dnə́ŋ̀ bəd íí bòdbə aí yiilú, kə̀ tɛ́m làmkèá, ìì tab gbə̀' naà sí.

¹⁰Kóó nɛ́ɛ̀réè aí tə́ŋú, oò mà' tù' sɔ̀ɔ̀n kə̀ in tɛdńní bə̀ bəraa Vɛnɛ́b piiù roó. Oò mà' nɛ́b bəd sɔ̀ɔ̀nkè kə̀ in tɛdńní bə̀ oò aa bɔ̀bà Vɛnɛ́b naà roó.

¹¹Màn aa tə́ nwɔŋ udǹ də, oò ùd Vɛnɛ́b nwɔŋá, màn aa tə́ tù' ma'ǹ də kɔ̀, oò mà' kə̀ kpɛŋsɛ́l aa Vɛnɛ́b piiù roó, bɔ̀b kóó níì rú gə́ kóólé, Vɛnɛ́b oò káŋmíìn kúnú, kə̀ Yéésù Krístù ra. Yéésù Krístù kùmsə̀n màn aa kaŋsɛ́l kə̀ kpɛŋsɛ́l tá, oò naà zèd kə̀ zèd doó. Oò kùm kàani.

¹²Ɔ̀dzéd mə́ í'sɛ̀lbə̀ bərá, gbò'kè bəraa íí tə́ bɔbm̀ bə́ŋyée rə, boò kò' ii yíl kìínmbə̀ in puu tə́ ii sə̀n wə́'ǹ kíin sí.

¹³Ìì kìì làmkè, pɛdǹ gabm̀bə̀ búúraa Krístù tə́ bé'ǹ doó, bɔ̀b aí kɔ̀, ìì nyìì kə̀ tɛ́m làmkèá, sɛŋ aa dáà bídǹnà kə̀ kaŋsɛ́l laa nyɛdkè oò tə́ roó.

¹⁴Nɛ́b bəd dúliyì Krístù nə́gə́lə́ gə́, Vɛnɛ́b dá ii nɛɛ̀n zígǹ yílú. Kàandə, Vɛnɛ́b Nwul kaŋsɛ́l laa nyɛdkè dá síìm aí yílú.

¹⁵Nɛ́ŋə̀ nə́ŋ̀má aí tə́ŋú, oò í' búúd kìínmbə̀ nɛ́d yíl bə̀ lo'ǹ kíin sí, kə̀ lííro kíin sí, kə̀ nɛ́d invaksə́ bə̀ ma'ǹ kíin sí, sínkɔ̀ kə̀ piìnmbə̀ nwɔŋ aa páù síndə rú sí.

¹⁶Zá nɛ́ŋə̀ nə́ŋ̀ í' búúd yàá, nɛɛ̀n aa kùm dú nɛ́d bagké Yéésù bə̀ rə bòórú gə́, sə́ə́mnúù oò mà'ù sí. Aa dá sɔɔ̀n də, oò káŋ Vɛnɛ́bá, nə́gə́l aa bə̀ dɛ̀rə̀ nɛ́d bagké Yéésù bə̀ yérə bòórú.

¹⁷Kə̀ aakíin də, sɛŋ wə́ə́ yàá, Vɛnɛ́b sɔ̀d dá fágə́n ma'ǹ kə̀ nɛ́b oò bərá. Kàandə, Vɛnɛ́b sɔ̀d fág tə́ obə́n gə́, nɛ́b aa bə̀ məə *Nwɔŋ Puu Sɔ̀ɔ̀nkè oò ke'ǹmbə̀ rə gə́, fágə́n boò nwuu dá nɛɛ̀n kaàn dú.

¹⁸Kìínmbə̀ Núúboòd Gìdń bàà rə kíin: «Dáà nɛ́b wɔ̀ɔ̀lə̀ bəd bə̀ súúì kə̀ gbò'kè gə́, dá kuùm leè kə̀ nɛ́b aa məə Vɛnɛ́b bagǹmbə̀ roó, bít kə̀ nɛ́b invaksə́ bə̀ ma'ǹ bəd gú?»

¹⁹Kə̀ aakíin də, nɛ́b aa bə̀ tə́ búúd í'ǹ kìínmbə̀ nɛɛ̀n aa Vɛnɛ́b í' rə kíin də, boò dìì insɔ̀ɔ̀nkè ma'ǹmbìá, bít boò pii yíl boò kə̀ zɔ̀ŋtá, Vɛnɛ́b aa séé bə̀ rə naú. Oò gə́, dá in aa bàà bəǹ dá ma'ǹ də kíìn ma'nàá, sɛŋ gə́ kóólé.