Read Samba Leko 1 Piyɛr 5 Bible Online

1 Piyɛr 5 - Samba Leko bible

1 Piyɛr 5

¹Bə́ŋyée mə́ gám nwɔŋ aa tə́ kə̀ aí, íí *dam bərá. Máá kɔ̀ mə́ damá, mə́ kùmsə̀n sedako Krístù búúd bəraa í' rə bìá, bít máá kɔ̀ má kaŋsɛ́l laa nyɛdkè aa dáà vúgǹnà yérə kíìn bɔbm̀ kɔ̀. Aa yée in aa mə́ dɛ̀ri roó'

²Ìì nwán bɛ̀rə̀ gə̀b aa Vɛnɛ́b pii ii rə kúnú, ìì nwánə̀ kìínmbə̀ ìì pè' ii tə́ bòórú kíin sí, zá ìì nwánə̀ kə̀ tɛ́m sɔ̀ɔ̀ná, kìínmbə̀ nɛɛ̀n aa Vɛnɛ́b í' rú rə kíin. Ìì nwánə̀ basaa íí dá bɔbm̀ də bòórú ní sí, zá ìì nwánə̀ kə̀ tɛ́m yádkeá.

³Ìì sàà gààd ləə̀nmbə̀ nɛ́b aa Vɛnɛ́b pii ii, ìì nwán bə̀ kíin də yílə́ sí, zá ìì ì' bə̀ kpaŋ̀ sɔ̀ɔ̀n aa bə̀ dá bagǹ doó.

⁴Bít sɛŋ aa bɛ̀rə̀ yibə̀ bəd gààd gbà'á yaà ì' yíl oòì rə, íí dá mə̀ə̀lə̀ kaŋsɛ́l bə̀ aa bɔ̀' nyɛdkè oò bə gá rə bɔbàá.

⁵Íí nɛ́b bəraa íí nɛ́b gbàád síndə kɔ̀, ìì ləə nɛ́b gbàád íí bərá. Íí kóólé, ìì kùm nɛ́b yíl lə́ə́ke bə̀ bəd íí bòdba; kàandə, Núúboòd Gìdń bàà: «Vɛnɛ́b zèè nɛ́b yíl bə̀ pa'ǹ bərá, zá nɛ́b yíl lə́ə́ke bə̀ bəd gə́, mà' bə̀ pə̀dkè oòra.»

⁶Ìì lə́ə́ yíl íí Vɛnɛ́b nɛɛ̀n kpɛŋsɛ́l bə̀ dùú, bɔ̀b pà' oò zá' ii lɛgú, sɛŋ aa və̀d zíg də ba.

⁷Pii ìì dààù inselké aí tɛ́mú bə̀ gə́ kóólé, kàandə, oòra tə́ ii sə̀n nwánàá.

⁸Ìì ləə ləəm sí, kùm ìì nwán yíl ii ra! Kàandə, ɔ̀dmáàn íí Sámbàŋyɛ́rə̀ gəə̀l tə́ kìínmbə̀ gbàál nyìg kíin, kpə̀ə̀ tə́ nɛ́ŋə̀ aa dá fu'ǹ də saanàá.

⁹Ìì kùm və̀'kè tɛ́mbagké íí rú, ìì nə́' kə̀ oòra. Kàandə, íí gàb yàá, nɛ́b bagké bəraa kə̀ aí kíin zɔ̀ŋə yɛ́b bərə gə́ kóólé, bə̀ bé' búúd tə́ kə̀ nɛɛ̀n aa íí tə́ bé'ǹ də kíin.

¹⁰Zá bòorə́ íí bé' búúrì zɔ̀gɔ̀ gə́, Vɛnɛ́b aa tə́ ii í'ǹ sɛŋ gə́ kóólé, dɛ̀riyà bə̀ yaà ìì kùm kaŋsɛ́l laa nyɛdkè bəǹ aa bɛ́d bə gá rə rú, kə̀ wálke aí bə̀ kə̀ Krístù rə, dá ii bí'ǹ nyɛdkè kə̀ yíl oòra; dá ii kíìn və́'nàá, dá ii kpɛŋsɛ́l piinàá, bít dá ii zígǹ wúl bèl və̀'kè ba.

¹¹Kaŋsɛ́l oò kùm oò naú, zèd kə̀ zèrá! Oò kùm kàani.

¹²Mə́ bári núúboòd kə́ddo wàà aa yée, kə̀ láŋke Silas bìá. Silas də, mə́ ɛ̀gə̀ tə́ kìínmbə̀ ɔ̀dkudvɛɛ̀l aa tə́ Vɛnɛ́b bagǹ kə̀ tɛ́m nə́ŋ̀ní rə kíin. Mə́ í' ii váàndo piìnmbìá, bít mə́ í' ii baàn nyɛ́'ǹmbə̀ gə́, aarə kùmsə̀n Vɛnɛ́b pə̀dkè sɔ̀ɔ̀ná. Ìì kùm və̀'kè oò rú.

¹³Nɛ́b bagké *Eklisiya bə̀ bəraa Babiloniya bìlə́ rə, bə̀ dɔ̀mi yàá. Boò kɔ̀ bə̀ nɛ́b bəraa Vɛnɛ́b sààvúŋ doó. Wàà mə́ Markus kɔ̀, dɔ̀mi yàá.

¹⁴Ìì dɔ̀m ɔ̀dnə́ŋ̀ bəd íí bòdba, kə̀ sɔ̀ɔ̀nkèá, kìínmbə̀ ɔ̀dkudvɛɛ̀l bəd kíin. Tɛbə̀ oò kùm kə̀ aí tə́ kóólé, íí Krístù nɛ́b bəraaú!