Read Samba Leko 2 Piyɛr 3 Bible Online

2 Piyɛr 3 - Samba Leko bible

2 Piyɛr 3

¹Ɔ̀dzéd mə́ í'sɛ̀lbə̀ bərá, aa yée kùmsə̀n núúboòd iirúb aa mə́ tə́ ii bádǹ doó. Núúboòd bəraa iirə yérə kóólé, in aa mə́ sàà rə, mə́ í' ìì bɔ̀b inselké sɔ̀ɔ̀ná, kə̀ aí bə̀ in kambəd seèlzá'ǹmbìá.

²Mə́ í' sèl ìì zá' nwɔŋ bəraa *Vɛnɛ́b gbantumsə̀ *gìdń bəd bə̀ gám nyàamdoorú roó, bít sèl ìì zá' Báátììkpɛ̀ŋ Nɛ́d Nɛ́ŋə̀ bə̀ Súùn bə́n indaŋ̀mbə̀ aa *Yéésù gbantumsə̀ bərì sániyà roó.

³Ìì gàb in aa yée kíìn sɔ̀ɔ̀nkè' sɛŋ bəraa dá dugǹ kə̀ bòd də bə gə́, nɛ́b aa bə̀ tə́ inlɛ'kè vaksə́ boò tɛ́m bə bə̀ bagǹ də, lòò yaà bə̀ dá ii kèéd bí'nàá,

⁴bít bə̀ dá baàn: «Máàn bàà bəǹ dáà kíìn yaanì? Oò tə́ bá? Doo bə́n bəd val kòd bə̀ yàá, zá in nə́ŋ̀má pɛ́n sé, sɛŋ aa yɛ́b sɔ̀d dú roó, yaà wə́ə́ kə̀ bə́ŋyée kíin zé.»

⁵Yid bə̀ bɔ̀' in aa yée kə̀ sòòrá' Vɛnɛ́b séé lɛg kə̀ yɛ́b tá, nyàamdoorú kpɔ̀ɔ̀m, kə̀ nwɔŋ aa vúg oò gú' bəroó. Vɛnɛ́b vú'à yɛ́b wəlú, bít kə̀ wəlá, yɛ́b kudmíìn taá.

⁶Kə̀ aarə kíin sɔ̀ŋ, wəl gbà'á yɛ̀l sə̀n yɛ́b aa nyàamdoorú rə kə̀ zɔ̀ŋtá.

⁷Zá lɛgá, kə̀ yɛ́b aa bə́n tə́ən bé'ǹ bə́ŋyée rə tá, Vɛnɛ́b tə́ bə̀ sə̀n nwáàn kə̀ nwɔŋ oò aarə ní, bɔ̀b boò bə̀ dú'ǹmbə̀ kə̀ laá. Nwán bə̀ tə́ kə̀ nwɔŋ oò aa roó, sɛŋ aa yaà dá nɛ́b aa məə bə̀ dààù rə fágǹ, bít dá bə̀ bɔ̀'ǹ bərə bìá.

⁸Ɔ̀dzéd mə́ bərá, in nə́ŋ̀ tə́ túrú, yid ìì bɔ̀' sí' Báátììkpɛ̀ŋ naà gə́, nyàm nə́ŋ̀ tə́ kìínmbə̀ zèd laa núnà zɔ̀ŋ kób kíin, bít zèd laa núnà zɔ̀ŋ kób kɔ̀, tə́ kìínmbə̀ nyàm nə́ŋ̀ kíin.

⁹Nɛ́b kam sèl bə̀ bàà, Báátììkpɛ̀ŋ náŋ tə́ kíìn nwɔŋ aa bàà dàà rə ma'ǹmbìá. Vɛ́nà bə̀ gə́, náŋ sé. Zá sìri tə́ kúnú. Kàandə, í' nɛ́ŋə̀ nə́ŋ̀má oò bɔ̀b sí, zá í' nɛ́b bəd kóólé boò sɔ̀g kúnú.

¹⁰Sɛŋ aa Báátììkpɛ̀ŋ dáà bídǹnà bərə, dá kuùm kìínmbə̀ lííro kíin. Sɛŋ aarə bərə, lɛg dá bɔ̀bm̀ kə̀ dìímsə̀ gbà'á, si' bəraa lɛgə́ paà rə, laa dá bə̀ kíìn dúúnàá, yɛ́b kə̀ in bəraa rú wərə̀ rə tá, bɔ̀b bə̀ dákíìn dugàá.

¹¹In bəraa kóólé, dá yɛɛ̀l kə̀ aakíin yée gə́, ìì gàb nɛɛ̀n aa íí dá kuùm dú rə kúnú! Ìì kùm nɛ́b *gìdń bərá, bít ìì kùm kə̀ nɛɛ̀n aa Vɛnɛ́b í' rə kíin.

¹²Kùm ìì nwán sɛŋ aa Báátììkpɛ̀ŋ dáà yaànnà bəroó. Ìì mà' nɛɛ̀n aa íí dá báàn dú roó, bɔ̀b sɛŋ aarə oò wə́ə́ kə̀ báŋ. Nyàm aarə, lɛg dá yɛɛ̀l kə̀ laá, bít in bəraa kummíìn zɔ̀ŋə yɛ́b bərə gə́ kóólé, bə̀ dá bə́ə̀n kə̀ vé'ke laa bìá.

¹³Zá Vɛnɛ́b bàà dàà gə́, bəǹ dá bə́n lɛg puu piinàá, kə̀ yɛ́b puu tá; wɔ̀ɔ̀lə̀ dá sə̀n ləə̀n dú wərà, bít kùm bə́n tə́ən taà nwánàá.

¹⁴Kə̀ taàbìá, ɔ̀dzéd mə́ bərá, sɛŋ aa kùm íí tə́ nwáàn yée, ìì nɔ̀ŋ kuùmbə̀ nyɛdkèá, bít ìì mà' invaksə́ nə́ŋ̀má Vɛnɛ́b númú sí. Ìì kùm kə̀ tɛbə̀ kə̀ oòra.

¹⁵Ìì ɛ̀g Báá bə́n Tììkpɛ̀ŋ in sidké kìínmbə̀ kpaŋ̀ aa dá bə́n súùn də kíin, kìínmbə̀ nɛɛ̀n aa ɔ̀dkudvɛɛ̀l bə́n í'sɛ̀lbə̀ Pol báriyà kə̀ ingabké aa Vɛnɛ́b piiù rə kíin.

¹⁶Kə̀ aarə kíin, gám nwɔŋ aarə tə́ núúboòd kam bəraa bád də rú kóólé. Núúboòd oò bərú rə, nwɔŋ kam túrú, gbò' tə́ kíìn kiìnmbìá. Nɛ́b bəraa bə̀ gàb in sé, bít tɛ́mbagké boò və̀' síndə, bə̀ tɔ̀' nwɔŋ wàà oòrə tə́ kúnú, kìínmbə̀ bə̀ tə́ ma'ǹ kə̀ zɔ̀ŋ kam bəraa Núúboòd Gìdń bərú rə kíin. Kə̀ aakíin, bə̀ bɔ̀' taà yíl boò ra.

¹⁷Zá aí gə́, ɔ̀dzéd mə́ bərá, bə́ŋyée gə́, bàà bə̀ dàà ii yàá. Ìì gú' yíl íí ra, bɔ̀b ìì dàà nɛ́b vaksə́ bəd záá boò pà' ii sí, bít ìì bɔ̀' və̀'kè íí sí.

¹⁸Zá ìì kàŋ pə̀dkè rú, gàb ìì kùd Báá bə́n Tììkpɛ̀ŋ, Nɛ́d Nɛ́ŋə̀ bə̀ Súùn bə́n Yéésù Krístù ra. Sɔ̀d bə́ŋyóo, kaŋsɛ́l oò kùm oò naú, zèd kə̀ zèrá! Oò kùm kàani.