Read Samba Leko 1 Yohana 2 Bible Online

1 Yohana 2 - Samba Leko bible

1 Yohana 2

¹Yɛb í'sɛ̀lbə̀ mə́ bərá, mə́ bári in bəraa yée, bɔ̀b ìì mà' invaksə́ sí. Zá dáà nɛ́ŋə̀ nə́ŋ̀ mà' invaksə́ì gə́, bə́n tə́ən kə̀ nɛ́ŋə̀ nə́ŋ̀ naà, Báá bə́n Vɛnɛ́b sunú. Nɛ́ŋə̀ rə, bə̀ dɛ̀rə̀ Yéésù Krístù. Oòrə, nɛ́ŋə̀ wɔ̀ɔ̀làá. Mà' invaksə́ kɔ̀ gá, gám dá bə́n sə̀n ke'ǹ Vɛnɛ́b númú.

²Kə̀ aakíin də, Yéésù pii yíl oò bə̀ valú, bɔ̀b invaksə́ bə́n bəd boò daamíìn kúnú. Bít invaksə́ obə́n bə̀ ní gá, zá nɛ́b bəd kóólé bìá!

³Dáà bə́n ke'ǹ Vɛnɛ́b indaŋ̀mbə̀ bərì gə́, bə́n gabm̀ Vɛnɛ́bì vɛ́nà.

⁴Dáà nɛ́ŋə̀ nə́ŋ̀ bààì: «Mə́ gàbə̀ yàá.» Zá bít kò' indaŋ̀mbə̀ oò bəd síngə́, nɛ́ŋə̀ aarə nɛ́ŋə̀ gúsuúm bìá, vɛ́nà oò naà sé.

⁵Zá màn aa ləə nwɔŋ aa Vɛnɛ́b bàà rəì rə, nɛ́ŋə̀ aarə, í' Vɛnɛ́b tə́ kíìn kə̀ nyɛdkèá. Ìì zɛ̀ŋ nɛɛ̀n aa báan gabm̀ kə̀ kùrú, kùm bə́n wáàl tə́ kə̀ Vɛnɛ́b doó.

⁶Màn aa bààì kùm bəǹ wál tə́ kə̀ Vɛnɛ́b də, oò mà' Vɛnɛ́b tù' kìínmbə̀ Yéésù kíni.

⁷Ɔ̀dzéd mə́ í'sɛ̀lbə̀ bərá, indaŋ̀mbə̀ aa bád mə́ pii ii yérə, indaŋ̀mbə̀ puu gá; zá aarə indaŋ̀mbə̀ doo aa sɔ̀d íí bɔ̀bà nyàamdoorú roó. Indaŋ̀mbə̀ doo aarə, kùmsə̀n nwɔŋ aa kìì íí bèrì roó.

⁸Zá kàandə máá, aarə indaŋ̀mbə̀ puuá bád mə́ pii ii taá. Nwɔŋ sɔ̀ɔ̀n oòrə, vúŋ yíl oò tə́ Krístù sisú, bít aí sisə́ kɔ̀. Kàandə, tígə́l tə́ kíìn bɛ́ràá, bít nwúun tə́ kíìn sɔ̀dǹ nyɛdǹmbìá.

⁹Dáà nɛ́ŋə̀ bààì bəǹ kùm tə́ zɔ̀ŋ nyɛdkè rú, bít tə́ ɔ̀d oò nə́ŋ̀ zeèn gə́, bə́ŋ̀ kùm tə́ tígə́lú.

¹⁰Nɛ́ŋə̀ aa í' ɔ̀d oò nə́ŋ̀ də, kùm tə́ zɔ̀ŋ nyɛdkè rú. Bít kə̀ aakíin də, in nə́ŋ̀má oò sisú, dá báàn nɛ́ŋə̀ ɔ̀d sudǹ lɛ́'ǹmbə̀ invaksə́ rú sé.

¹¹Zá màn aa tə́ ɔ̀d oò nə́ŋ̀ zeèn də, kùm tə́ tígə́lú. Ɛ̀m tə́ tígə́lú, bít gàb zɔ̀ŋ aa tə́ ɛɛ̀m bərə sé; tígə́l lè'ù núù yàá.

¹²Yɛb mə́ bərá, invaksə́ íí daamíìnì Yéésù Krístù nə́gə́lú; kə̀ taàbìá, mə́ bári taà núúboòraa yóo.

¹³Báá bərá, íí gàb nɛ́ŋə̀ aa éèn kùm sɛŋ aa yɛ́b sɔ̀d dú rə yàá, kə̀ taàbìá, mə́ bári taà núúboòraa yóo. Íí yɛb gbàád bərá, íí kàn Nɛ́ŋə̀ Vaksə́ì kə̀ kpɛŋsɛ́lá, kə̀ taàbìá, mə́ bári taà núúboòraa yóo.

¹⁴Yɛb í'sɛ̀lbə̀ mə́ bərá, íí gàb Báá yàá, mə́ bári taà núúboòraa yóo. Báá bərá, íí gàb nɛ́ŋə̀ aa éèn kùm sɛŋ aa yɛ́b sɔ̀d bərə yàá, kə̀ taàbìá, mə́ bári taà núúboòraa yóo. Yɛb gbàád mə́ bərá, íí tə́ kə̀ kpɛŋsɛ́l naú, kə̀ taàbìá, mə́ bári taà núúboòraa yóo, Íí kò' Vɛnɛ́b nwɔŋì aí tɛ́mú, bít íí kàn Nɛ́ŋə̀ Vaksə́ì kə̀ kpɛŋsɛ́lá.

¹⁵Ìì í' yɛ́b aa sí, sínkɔ̀ ìì í' in bəraa zɔ̀ŋə yɛ́b bərə sí. Dáà nɛ́ŋə̀ nə́ŋ̀ í' yɛ́b aaì gə́, oò gə́, kə̀ í'sɛ̀l Báá bə̀ naà sé.

¹⁶In bəraa zɔŋə yɛ́b bərə gə́ kóólé' inlɛ'kè vaksə́ tɛ́m bə bə̀ bərá, inselké vaksə́ bərá, kə̀ yíl pa'ǹmbə̀ kə̀ gbaŋə̀ bəraa zɔ̀ŋə yɛ́b bəroó. In bəraa rə, vúgə́là Báá Vɛnɛ́b naà gá, zá in zɔ̀ŋə yɛ́b bə bə̀ bərá.

¹⁷Yɛ́b tə́ kíìn taanàá, kə̀ in bəraa nɛ́b bəd tə́ í'ǹ zɔ̀ŋə yɛ́b bərə tə́ kóólé; zá màn aa mà' in aa Vɛnɛ́b í' rəì rə gə́, dá kuùm zèd kə̀ zèrá.

¹⁸Yɛb í'sɛ̀lbə̀ mə́ bərá, sɛŋ nyɛ́d tə́ zɔ̀gɔ̀ní, yɛ́b dákíìn bɛ́ràá! Íí kìì bə̀ bàà Krístù ɔ̀dmáàn gbà'á dáà kíìn yaanàá. Bə́n gabm̀ yàá, Yéésù ɔ̀dmáàn bəd vúgə́l tə́ kíìn zɔ̀ŋə yɛ́b ba. Bít kə̀ aakíin də, bə́n gàb yàá, sɛŋ bɛ́dke yɛ́b bə̀ tə́ sə̀n wə́ə́nàá.

¹⁹Nɛ́b aarə, vɛ́nà gə́, bə̀ nɛ́b bə́n bəd gá; kə̀ taàbìá, zá' ìì dàà bə́n taá. Kàandə, dáà bə̀ tə́ nɛ́b bə́n bəd gə́, lɛ́' bə̀ dàà bə́n gá. Zá zá' ìì dàà bə́n də, bɔ̀b báà gabm̀ kíìn nyɛdkè, bə̀ nɛ́b bə́n bəd gá.

²⁰Nɛ́ŋə̀ Gìdń, zà' Nwul Gìdń aí yílú. Bít íí kóólé, íí gàb vɛ́nà yàá.

²¹Mə́ bári nwɔŋ aarə, aarə í' baànmbə̀ íí gàb vɛ́nà sín gá, íí gàb vɛ́nà yàá. Íí gàb yàá, gúsuúm nə́ŋ̀má bán vúgǹmbə̀ nwɔŋ sɔ̀ɔ̀nú gá.

²²Kàandə, nɛ́ɛ̀réè kùmsə̀n nɛ́d gúsuúm bə̀ gú? Nɛ́ŋə̀ aa bàà bə̀ Yéésù Krístù Vɛnɛ́b Wàà gá rə, oòra sə̀n nɛ́d gúsuúm bìá. Nɛ́ŋə̀ aarə, kùmsə̀n Yéésù Krístù ɔ̀dmáàná. Məə dàà Báá Vɛnɛ́b kə̀ Wàà oò tá.

²³Màn aa məə dàà Wààì rə, dá Báá oò kíìn məə̀n daàn kɔ̀. Màn aa kè' Wààì rə, dá Báá oò kíìn ke'ǹ kɔ̀.

²⁴Kə̀ taàbìá, kò' ìì kùd nwɔŋ aa íí kìì sɛŋ aa sɔ̀d dú rə kíìn sɔ̀ɔ̀nkè. Íí mà'ì kàangə́, íí dá kuùm Báá rú, kə̀ Wàà rú.

²⁵Ìì zɛ̀ŋ in aa Yéésù Krístù bàà bəǹ dá bə́n piìn doó. Bəǹ dá bə́n *gɔ̀ŋsə́ aa bɛ́d bə gá rə piinàá.

²⁶Mə́ bári nwɔŋ aa tə́ nɛ́b aa bə̀ í' ii záàn páànmbə̀ kpaŋ̀ vaksə́ rú rə yílú.

²⁷Zá aí gə́, Nwul Gìdń aa Yéésù Krístù tùm piiiyà rə, oò kùm aí tɛ́mú. Kə̀ taàbìá, nɛ́ŋə̀ nə́ŋ̀ oò sánì sə̀n in sí; kàandə, Nwul Gìdń tə́ ii sə̀n in sáàn in gə́ kóólé yílú. In bəraa tə́ì sáàn də, nwɔŋ sɔ̀ɔ̀n bərá. Nwɔŋ gúsuúm bə̀ rú wərə̀ sé. Kìínmbə̀ nɛɛ̀n aa sáni rə kíin, ìì kùm oò rú.

²⁸Zá bə́ŋyée gə́, yɛb í'sɛ̀lbə̀ mə́ bərá, kùm ìì wál kə̀ Yéésù Krístù tá, bɔ̀b ìì nùù də́dǹ sí, bít ìì nyìì kə̀ sə́ə́mnúù oò númú, sɛŋ aa dáà bídǹnà bərə sí.

²⁹Íí gàb yàá, Yéésù Krístù gə́, nɛ́ŋə̀ wɔ̀ɔ̀làá; bítsɔ̀ŋ, ìì gàb kúnú, nɛ́ŋə̀ aa tə́ in wɔ̀ɔ̀lə̀ ma'ǹ də, kùmsə̀n Vɛnɛ́b Wàá.