Read Samba Leko 1 Yohana 3 Bible Online

1 Yohana 3 - Samba Leko bible

1 Yohana 3

¹Ìì ɛ̀g nɛɛ̀n aa Báá Vɛnɛ́b í' bə́n dú roó! Nɛɛ̀n aa í'sɛ̀l oò ká' rú obə́n yílə́ rə, bə̀ dɛ̀d bə́n taà Vɛnɛ́b yɛbá! Aarə vɛ́nà nwɔŋ sɔ̀ɔ̀ná, bə́n yɛb oò bərá! Kə̀ taàbìá, nɛ́b aa zɔ̀ŋə yɛb bərə, ìì gàb Vɛnɛ́b síndə, ìì gàb bə́n taà sé.

²Ɔ̀dzéd mə́ bərá, bə́ŋyée gə́, bə́n kuùmmì Vɛnɛ́b yɛbá. Zá in aa báan bíìl lə, bə́ŋ̀ nyɛd sé. Sɛŋ aa Yéésù Krístù dáà bídǹnà bərə, báan kuùm kə̀ oò kíin. Báannə̀ kíìn bé'nàá, nɛɛ̀n aa kùm dú roó.

³Bít kóó nɛ́ɛ̀réè, sèlì kàangə́, oò nyɛ́' yíl oòra, kìínmbə̀ Yéésù Krístù kùm nyɛdkè rə kíni.

⁴Kóó nɛ́ɛ̀réè, mà' invaksə́ì gə́, məə dàà Vɛnɛ́b indaŋ̀mbə̀ yàá. Ma'ǹmbə̀ invaksə́ gə́, məə̀n daànmbə̀ Vɛnɛ́b indaŋ̀mbìá.

⁵Íí gàb yàá, Yéésù gə́, Vɛnɛ́b Wàá, yaà nɛ́b bəd invaksə́ pa'ǹ zá'ǹmbìá. Bít oò gə́, kə̀ invaksə́ naà oò tɛ́mə́ sé.

⁶Kə̀ aakíin də, kóó nɛ́ɛ̀réè, kùm wálì kə̀ oò tə́ gə́, dá invaksə́ kíìn daàn ma'ǹmbìá. Zá kóó nɛ́ɛ̀réè, tə́ diìn invaksə́ ní ma'ǹmbə̀ gə́, bé'ù sé, bít gàbə̀ sé.

⁷Yɛb í'sɛ̀lbə̀ mə́ bərá, ìì dàà nɛ́ŋə̀ nə́ŋ̀má oò záá ii sí! Màn aa mà' insɔ̀ɔ̀n də, kə̀ yíl oò má, nɛ́ŋə̀ wɔ̀ɔ̀làá, kìínmbə̀ Yéésù Krístù kɔ̀ nɛ́ŋə̀ wɔ̀ɔ̀lə̀ rə kínì.

⁸Màn aa tə́ diìn invaksə́ ma'ǹmbə̀ rə, Sámbàŋyɛ́rə̀ nɛ́ŋàá. Sámbàŋyɛ́rə̀ gə́, nɛ́d invaksə́ bə̀ ma'ǹná, sɛŋ aa sɔ̀d dú roó. Vɛnɛ́b Wàà yaà zɔ̀ŋə yɛ́b bərə, yaà Sámbàŋyɛ́rə̀ tù' lo'ǹmbìá.

⁹Kóó nɛ́ɛ̀réè, tə́ Vɛnɛ́b Wàà gə́, dá invaksə́ kíìn daàn ma'ǹmbìá. Kàandə, kpɛŋsɛ́l gɔ̀ŋsə́ bə̀ aa vúgà Vɛnɛ́b naà rə, tə́ oò rú. Vɛnɛ́b kùmsə̀n Báá oòra, bán taà invaksə́ ma'ǹ dáànmbə̀ kə̀ númú gá.

¹⁰Ìì ɛ̀g in aa pɛ̀d Vɛnɛ́b yɛb kə̀ Sámbàŋyɛ́rə̀ yɛb bəd nyɛdkè dág doó. Nɛ́ŋə̀ aa mà' in wɔ̀ɔ̀lə̀ sé, sínkɔ̀ í' ɔ̀d oò nə́ŋ̀ síndə, Vɛnɛ́b Wàà gá.

¹¹Ìì zɛ̀ŋ nwɔŋ aa íí kìì nyàamdoorú, sɛŋ aa sɔ̀d dú roó. Báà í'ǹ ɔ̀dnə́ŋ bəd bə́n bòdba.

¹²Báà kuùm kìínmbə̀ Kainu kíin sí. Oò gə́, Nɛ́ŋə̀ Vaksə́ wàá, lò' taà kudvɛɛ̀l oòra. Kə̀ níìbə̀ lò'ù taà gú? Oò gə́, mà' tù' vaksá. Zá kudvɛɛ̀l oò gə́, mà' tù' wɔ̀ɔ̀làá, lò'ù taàbìá.

¹³Ɔ̀dkudvɛɛ̀l mə́ í'sɛ̀lbə̀ bərá, dáà nɛ́b bəraa zɔ̀ŋə yɛ́b bərə tə́ ii zeèn gə́, oò kò' ii yíl sí.

¹⁴Bə́n gabm̀ yàá, nyàam də, bə́n kuùmmà valú. Zá bə́ŋyée gə́, bə́n piìnnì gɔ̀ŋsə́ rú. Bə́n í'ǹ ɔ̀dnə́ŋ̀ bəd də, bə́n piìn taà gɔ̀ŋsə́ rú. Zá màn aa í' ɔ̀d oò nə́ŋ̀ síndə, bə́ŋ̀ tə́ val nɛɛ̀n tɛ́mú.

¹⁵Kóó nɛ́ɛ̀réè, tə́ ɔ̀d oò nə́ŋ̀ zeèn gə́, nɛ́d yíl bə̀ lo'ǹná. Nɛ́d yíl bə̀ lo'ǹ nə́ŋ̀má kə̀ *gɔ̀ŋsə́ aa bɛ́d bə gá rə naà sé.

¹⁶Ìì zɛ̀ŋ nɛɛ̀n aa bə́n gabm̀ í'sɛ̀l kùm dú roó. Yéésù Krístù pii yíl oò obə́n bòórú. Kə̀ aarə kíin, obə́n kɔ̀ báà piìn yíl bə́n ɔ̀dkudvɛɛ̀l bə́n í'sɛ̀lbə̀ bəd bòórú.

¹⁷Dáà nɛ́d gbaŋə̀ bə̀ nə́ŋ̀, bé' ɔ̀dkudvɛɛ̀l oò í'sɛ̀lbə̀ nə́ŋ̀ tə́ búúrú, zá ɛ̀g bé'ù búúd síngə́, ééleè dá taà seèl baàn, bəǹ tə́ kə̀ í'sɛ̀l Vɛnɛ́b bə̀ naà obəǹ tɛ́mú gú?

¹⁸Yɛb í'sɛ̀lbə̀ mə́ bərá, í'sɛ̀l obə́n bə̀ gə́, oò kùm kə̀ nwɔŋ ní, bít kə̀ gú' làmkè ní sí, zá oò kùm kə̀ í'sɛ̀l vɛ́nà bə̀ aa ì' yíl oò kə̀ tù' roó.

¹⁹Ìì ɛ̀g nɛɛ̀n aa báan gabm̀ kə̀ kùrú, bə́n bagǹ tə́ nwɔŋ vɛ́nà roó. Ìì ɛ̀g nɛɛ̀n aa tɛ́m bə́n dá kuùm kə̀ tɛbàá, nùù də́dǹ Vɛnɛ́b númú gá roó.

²⁰Tɛ́m bə́n fág kò' bə́n tə́ kíin gə́, Vɛnɛ́b aa gàb in gə́ kóólé rə, gàb tɛ́m bə́n yàá.

²¹Kə̀ aakíin, ɔ̀dzéd mə́ í'sɛ̀lbə̀ bərá, tɛ́m bə́n fág kò' bə́n síngə́, báan diìn Vɛnɛ́b númú, tɛ́m lɔb bə́n gá.

²²Bə́n ke'ǹ indaŋ̀mbə̀ oò bəd yàá, bít bə́n ma'ǹ insɔ̀ɔ̀nkè bəraa í' rə yàá. Kə̀ taàbìá, in aa bə́n nyɛɛ̀m də kóólé, bə́n bɔbm̀ taá.

²³Ìì ɛ̀g indaŋ̀mbə̀ aa Vɛnɛ́b pii bə́nnà roó. Bàà báà bagǹ Wàà bəǹ Yéésù Krístù ra, bít báà í'ǹ ɔ̀dnə́ŋ̀ bəd bə́n bòdba, kìínmbə̀ Krístù bàà bə́n də kíni.

²⁴Màn aa kò' Vɛnɛ́b indaŋ̀mbə̀ bəd də, kùm tə́ kə̀ Vɛnɛ́b tá, bít Vɛnɛ́b kɔ̀ kùm tə́ kə̀ oò tá. Ìì ɛ̀g nɛɛ̀n aa bə́n gabm̀ kə̀ kùrú, Vɛnɛ́b kùm tə́ kə̀ obə́n tə́ roó. Bə́n gabm̀ kə̀ Nwul Gìdń aa pii bə́nnà roó.