Read Samba Leko 1 Yohana 4 Bible Online

1 Yohana 4 - Samba Leko bible

1 Yohana 4

¹Ɔ̀dzéd mə́ bərá, nɛ́b bəraa ìì bàà bənə́ tə́ənnə́ kə̀ Nwul Gìdń naà rə, ìì bàg bə̀ sí. Zá də́' ìì ɛ̀g bə̀ sína, nwul aa boò naà rə, vúgà tə́ Vɛnɛ́b naà gə́ roó. Kàandə, *Vɛnɛ́b gbantumsə̀ gúsuúm bə̀ bəd zùúm, ìì sa' tə́ zɔ̀ŋə yɛ́b ba.

²Ìì ɛ̀g nɛɛ̀n aa dáà tə́ Vɛnɛ́b Nwul gə́, íí dá gabm̀ kə̀ kùrú roó. Kóó nɛ́ɛ̀réè, bààì nyɛdkè dág, Yéésù Krístù yaà bíl nɛ́ŋə̀ì vɛ́nà gə́, tə́ kə̀ nwul aa vúgà Vɛnɛ́b naà rə naú.

³Zá kóó nɛ́ɛ̀réè, məə nwɔŋ aa Yéésù yílə́ yéeì ke'ǹmbə̀ gə́, kə̀ Vɛnɛ́b Nwul naà sé. Nwul aa kə̀ naà yérə, Yéésù Krístù ɔ̀dmáàn gbà'á nwulá. Íí kìì yàá, bə̀ bàà gə́, dáà kíìn yaanàá, bít bə́ŋyée kɔ̀, yaà wə́ə́ì zɔ̀ŋə yɛ́b bə gbòód.

⁴Zá aí gə́, yɛb í'sɛ̀lbə̀ mə́ bərá, íí Vɛnɛ́b yɛbá, bít íí kàn *Vɛnɛ́b gbantumsə̀ gúsuúm bə̀ bəd yàá. Kə̀ aakíin də, Nwul aa íí kə̀ naà rə, kànsə̀n nɛ́ŋə̀ zɔ̀ŋə yɛ́b bə bə̀ nwulá.

⁵Bə̀ nɛ́b zɔ̀ŋə yɛ́b bə bə̀ bərá. Bə̀ gám nwɔŋ tə́ kə̀ nɛ́b zɔ̀ŋə yɛ́b bə bə̀ bəd kíin; bít nɛ́b zɔ̀ŋə yɛ́b bə bə̀ bəd kɔ̀ ìì kè' taà nwɔŋ boò bərá.

⁶Zá obə́n gə́, bə́n Vɛnɛ́b yɛbá. Màn aa gàb Vɛnɛ́bì rə, dá bə́n kíìn zɛŋàá, màn aa Vɛnɛ́b wàà síndə, zɛ̀ŋ bə́n nwɔŋ gá. Kə̀ aarə kíin, báan taà báàn in aa pɛ̀d Nwul Vɛ́nà bə̀ kə̀ nwul gúsuúm bə̀ rə gabm̀bìá.

⁷Ɔ̀dzéd mə́ bərá, báà í'ǹ ɔ̀dnə́ŋ̀ bəd bə́n bòdba. Kə̀ aakíin də, í'sɛ̀l gə́, vúgà Vɛnɛ́b naú. Kóó nɛ́ɛ̀réè, í' ɔ̀dnə́ŋ̀ì gə́, Vɛnɛ́b wàá, bít gàb Vɛnɛ́b yàá.

⁸Màn aa í' ɔ̀dnə́ŋ̀ síndə, gàb Vɛnɛ́b sé. Kàandə, Vɛnɛ́b kùmsə̀n í'sɛ̀lá.

⁹Ìì ɛ̀g nɛɛ̀n aa Vɛnɛ́b ì'à í'sɛ̀l oò rú obə́n tə́ŋə́ roó. Tùmà Wàà oò nə́ŋgùm zɔ̀ŋə yɛ́b ba, bɔ̀b báà bɔbm̀ gɔ̀ŋsə́ kə̀ oòra.

¹⁰Ìì ɛ̀g nɛɛ̀n aa í'sɛ̀l oò kùm dú roó' éèn obə́n da bə́n í'ǹ sə̀n Vɛnɛ́b gá, zá éèn oòra í' bə́nnà sùnú; tùmà Wàà oò kìínmbə̀ sadaka kíin, bɔ̀b lɛ́' oò dàà bə́n invaksə́ bə́n bəraa bə́n ma'ǹ doó.

¹¹Ɔ̀dzéd mə́ bərá, Vɛnɛ́b í' bə́nnì kə̀ aakíin gə́, obə́n kɔ̀ báà í'ǹ ɔ̀dnə́ŋ̀ bəd bə́n bòdba.

¹²Nɛ́ŋə̀ nə́ŋ̀má bé' bèd Vɛnɛ́b sé. Bə́n tə́ən ɔ̀dnə́ŋ̀ bəd í'ǹ bə́n bòdbə gə́, Vɛnɛ́b kùm tə́ obə́n tɛ́mú, bít í'sɛ̀l dá taà vúgǹ nyɛdkè obə́n tɛ́mú.

¹³Ìì ɛ̀g nɛɛ̀n aa báan gabm̀ kə̀ kùrú, bə́n kuùm tə́ Vɛnɛ́bú, bít Vɛnɛ́b kɔ̀ kùm tə́ obə́n dú roó' pii bə́nnà Nwul oòra.

¹⁴Bə́n bé'ǹ yàá, bít bə́n ma'ǹ sedako yàá, Báá bə́n Vɛnɛ́b tùm àà Wàà oò, yaà oò kùm *Nɛ́d Nɛ́b bəd bə̀ Súùn zɔ̀ŋə yɛ́b ba.

¹⁵Kóó nɛ́ɛ̀réè, bàà nyɛ́' yàá bəǹ kè' yàá, Yéésù Vɛnɛ́b Wàà gə́, Vɛnɛ́b tə́ oò rú, bít oò kɔ̀ tə́ Vɛnɛ́bú.

¹⁶Obə́n gə́, bə́n gabm̀ í'sɛ̀l aa Vɛnɛ́b í' bə́n kə̀ kùrú rə yàá, bít bə́n bagǹ yàá. Vɛnɛ́b gə́, í'sɛ̀lá; màn aa kùm í'sɛ̀lə́ rə, kùm tə́ Vɛnɛ́bú, bít Vɛnɛ́b kɔ̀ kùm tə́ oò rú.

¹⁷Bə́n tə́ən kə̀ í'sɛ̀l nyɛdkè obə́n tɛ́mə́ gə́, də́dǹ mà' bə́n fágə́n nyàmú gá. Nɛɛ̀n aa Yéésù Krístù kùm dú rə, obə́n kɔ̀ bə́n tə́ən kə̀ oò kíin, zɔ̀ŋə yɛ́b ba.

¹⁸Də́dǹ gə́, wál kə̀ í'sɛ̀l gá, í'sɛ̀l nyɛdkè nìŋ də́dǹ kúnú. Də́dǹ ì' gə́, fágə́n tə́ túrú. Kə̀ aakíin sɔ̀ŋ, màn aa tə́ kə̀ də́dǹ naà rə, í'sɛ̀l nyɛdkè oò naà sé.

¹⁹Obə́n gə́, Vɛnɛ́b sɔ̀d í' bə́n sùnú; kə̀ taàbìá, bə́n tə́ən taà ɔ̀dnə́ŋ̀ bəd í'ǹ kɔ̀.

²⁰Nɛ́ŋə̀ bààì obəǹ gə́, bəǹ í' Vɛnɛ́b yàá, bít tə́ ɔ̀d oò nə́ŋ̀ zeèn gə́, oò gə́, nɛ́d gúsuúm bìá. Kə̀ aarə kíin sɔ̀ŋ, í' ɔ̀d oò nə́ŋ̀ aa bé' núùrú rə síngə́, bán Vɛnɛ́b aa bé' núùrú síndə í'ǹmbə̀ gá.

²¹Ìì ɛ̀g indaŋ̀mbə̀ aa Vɛnɛ́b bàà báà ko'ǹ doó' màn aa bàà bəǹ í' Vɛnɛ́bì rə, oò í' ɔ̀d oò nə́ŋ̀ kɔ̀.