Read Samba Leko Yuda 1 Bible Online

Yuda 1 - Samba Leko bible

Yuda 1

¹Máá mə́ Yuda, Yéésù Krístù nɛ́d tù' bə̀ ma'ǹná, Yakuba kudvɛɛ̀lá. Mə́ bád núúboòraa yée, nɛ́b aa Vɛnɛ́b sààvúŋ bà roó, aa bəraa kùm Báá Vɛnɛ́b í'sɛ̀lú, bít Yéésù Krístù tə́ bə̀ nwáàn doó.

²Mə́ nyɛ̀m Vɛnɛ́b ɛ̀g oò bé' ii búúd gbàákù, oò nyí' ii kə̀ tɛbàá, bít kə̀ í'sɛ̀lá.

³Ɔ̀dzéd mə́ bərá, mə́ bári núúboòd súúke bə̀ aa Vɛnɛ́b pii bə́nnà bə́n kóólé roó, bɔ̀b oò kùm obə́n gɔ̀ŋsə́ rú. Zá bə́ŋyée, mə́ tə́ ii núúboòraa bádǹ, bɔ̀b ìì kùm kə̀ váàndoá, bɔ̀b ìì dìì nə́gə̀d nə́'ǹmbə̀ tɛ́mbagké aa Vɛnɛ́b pii rə bòórú. Tɛ́mbagké aarə, Vɛnɛ́b pii nɛ́b *gìdń oò bərá, sɛŋ nə́ŋ̀ní tə́ŋtə́ŋ, dùg bəní.

⁴Kə̀ aakíin də, nɛ́b vaksə́ kambəd mə́' bə̀ pìì tə́ obə́n tə́ŋú; kò' bə̀ tɔ̀' nwɔŋ aa pə̀dkè Vɛnɛ́b bə́n bə̀ yílə́ rə tə́ kúnú, bɔbm̀ baànmbə̀ gə́, tù' vaksə́ bəraa bənə́ tə́ənnə́ ma'ǹ də tə́ wɔ̀ɔ̀làá, bít lɛ́' bə̀ dàà Yéésù Krístù, Nɛ̀n nə́ŋgùm bə́n da, bít Báá bə́n Tììkpɛ̀ŋá. Nyàamdoorú, bád bə̀ dàà taà nwɔŋ aarə Núúboòd Gìdńnú, fágə́n val bə̀ dáà yaànà boò yílú.

⁵Íí gàb nwɔŋ bəraa yàá nyɛdkè, mə́ tə́ ii kíìn seèl zá'nàá, nɛɛ̀n aa Báátììkpɛ̀ŋ súú nɛ́b *Israila bə̀ bəd Misra yɛ́b bəroó. Zá bòórú oòrə, nɛ́b aa bə̀ bagə̀ síndə gə́, lòd bə̀ yàá.

⁶Sèl ìì zá' *malaika bəraa məə bə̀ dàà kpɛŋsɛ́l aa Vɛnɛ́b pii bà roó, bít zá' bə̀ dàà zɔ̀ŋ kuùmbə̀ boò roó' Vɛnɛ́b zíg bə̀ tə́ zɔ̀ŋ tígə́l bə̀ rú, zɔ̀ŋə yɛ́b ba, bít tab bə̀ tə́ kə̀ sɛ̀gsɛ́g aa vəd bə gá roó, yaà dá wə́ə̀n nyàm gbà'á ba, sɛŋ aa dá bə̀ fágə́n ma'ǹ bəroó.

⁷Sèl ìì zá' Sodoma bìlá kə̀ gomora bìlá, bít kə̀ bìl yɛb aa kàrú roó. Nɛ́b aa bə̀ ləə wərə̀ rə, ìì mà' kìínmbə̀ *malaika bəraa nyàam də kíni; bə̀ pii yíl boò bəd labsə̀ ba, bít bə̀ sàà kìlə̀ wáàlǹmbə̀ nɛ́b vɔ̀ɔ̀m bəd kə̀ nɛ́b vɔ̀ɔ̀m bərá. Kə̀ taàbìá, ìì bɔ̀b taà fágə́ná, kə̀ laa aa fə́' bə gá roó. Laa aarə, dá bə̀ kíìn dúúnàá, bɔ̀b nɛ́b bəd kóólé də́dǹ oò mà' bə̀ kúnú.

⁸Zá nɛ́b aarə kɔ̀, bə̀ mà' tə́ kə̀ aarə kíin. Bə̀ tə́ kə̀ lədǹ bəd naú, dìŋ àà bə̀ tə́ invaksə́ ma'ǹmbə̀ boò yílə́ ní. Bə̀ sɔ̀b Vɛnɛ́b kpɛŋsɛ́lá, bə̀ dúl *malaika bəraa tə́ Vɛnɛ́b káŋ̀ lɛgə́ paà roó.

⁹Aarə in aa *malaika bəd gààd *Mikailu kə̀ yíl oò bə̀ máá, mà' síndoó. Sɛŋ aa tə́ álsɛ̀l ma'ǹ kə̀ Sámbàŋyɛ́rə̀, bɔbm̀ gabm̀bə̀ màn aa dá Musa si' pa'ǹ də, Mikailu məə fágə́n sɔ̀ɔ̀nsə́n ma'ǹmbə̀ Sámbàŋyɛ́rə̀ yílú, zá bàà: «Báátììkpɛ̀ŋ oò í' n búúrá!»

¹⁰Zá nɛ́b aarə, bə̀ dúl in aa bə̀ gàb síndoó; bít in aa bə̀ gàb kàaní, kə̀ gɔ̀g fɔ̀g dùù bə̀ bəd kíin də kɔ̀, àà bə̀ tə́ bɔ̀bke rú.

¹¹Búúd tə́ boò yílú! Bə̀ bàg kpaŋ̀ aa Kainu bàg doó. Bə̀ pí'ì invaksə́ rú, kàandə, bə̀ páá yíl boòì basú, kìínmbə̀ *Balam mà' rə kíin, bít val kòd bə̀ yàá, gbəŋké aa bə̀ mà' kìínmbə̀ Kore kíìn də bòórú.

¹²Nɛ́b aarə, yaà bə̀ wə́ə́ì zɔ̀ŋ aa wál íí tə́ gbèd líìn bərə gə́, in sə́ə́mnúù bìá. Kàandə, sə́ə́mnúù mà' bə̀ kə̀ nɛ́b bəd gá, bít bə̀ ɛ̀g yíl boò ní. Bə̀ tə́ kìínmbə̀ mɔb aa nwul pɛ̀b kúnú, ɛ̀m kə̀ naú, bít náŋ nwan gá rə kíin. Bə̀ tə́ kìínmbə̀ téé bəraa kóó nwanú, kóó bísə̀nyàmú, bə̀ lɛ̀b yɛb gá rə kíin. Téé bəraa rə, lígə́d bəd bəəd yàá, bít vàl bə̀ dùg yàá.

¹³Nɛ́b aarə, bə̀ tə́ kìínmbə̀ wəl sulú aa wəl nyìgə̀lə́ rə kíin, bít sə́ə́mnúù boò rə, tə́ kìínmbə̀ wəl fùgsɛ́l kíni. Bə̀ tə́ kìínmbə̀ dùdùyɛb aa bə̀ gəə̀l zɔ̀ŋ gə́ kóólé rə kíin; bít Vɛnɛ́b zíg bə̀ zɔ̀ŋ boò tə́ tígə́l gbà'á aa kàn nɛɛ̀n də rú, zèd kə̀ zèrá.

¹⁴Enɔk, Adamu wàà kàá, gám sə̀n nwɔŋ nyàam kpɔ̀ɔ̀m, kə̀ aakíin: «Ìì zɛ̀ŋ túŋá' Báátììkpɛ̀ŋ dáà kíìn yaanà kə̀ *malaika *gìdń zùúm oò bəd tá,

¹⁵bɔbm̀ ma'ǹmbə̀ fágə́n in bəd kóólé yílú, bɔbm̀ fágǹmbə̀ nɛ́b vaksə́ bəd kóólé, kə̀ tù' vaksə́ boò bəraa ìì mà' roó, kə̀ gbəŋké boò bìá. Bə̀ gbəŋ̀ kə̀ Vɛnɛ́bá, bít kə̀ nwɔŋ vaksə́ bəraa ìì gám Vɛnɛ́b yílú, bə̀ ləəù síndoó.»

¹⁶Nɛ́b bəraa rə, sɛŋ gə́ kóólé, bə̀ tə́ kə̀ nɔ̀má, bít bə̀ tə́ nwɔŋ dalàá; bə̀ bàg tə́ inlɛ'kè vaksə́ boò tɛ́m bə bə̀ bərá. Nwɔŋ aa tə́ vúgǹ boò gú' bərə, nwɔŋ yíl pa'ké bìá, bít bə̀ gám nɛ́b bəd gú' làmkèá, bɔ̀b in aa boò naà rə bɔbm̀bìá.

¹⁷Zá íí ɔ̀dzéd mə́ bərá, sèl ìì zá' nwɔŋ aa Báátììkpɛ̀ŋ *Yéésù Krístù gbantumsə̀ bəd bàà ii nyàamdoorú roó.

¹⁸Bə̀ bàà ii: «Sɛŋ bəraa dá dugǹ kə̀ bòd də, nɛ́b kam túrú, lò' bə̀ dá ii kèéd bí'nàá, bít boò kɔ̀, bə̀ dá kuùm inlɛ'kè vaksə́ boò tɛ́m bə bə̀ bərú.»

¹⁹Nɛ́b aarə, bə̀ dá sə̀n nɛ́b bəd pɛɛ̀l aí tə́ŋú. Invaksə́ zɔ̀ŋə yɛ́b bə bə̀ ləə gààrì boò tɛ́mú, bít bə̀ kə̀ Vɛnɛ́b nwul naà sé.

²⁰Zá ɔ̀dzéd mə́ bərá, ìì kpɛ́ŋ yíl íí tɛ́mbagké *gìdń aa yée rú. Ìì nyɛ̀m Vɛnɛ́b kə̀ Nwul Gìdń kpɛŋsɛ́lá,

²¹bít ìì kùm də̀gə̀mkè Vɛnɛ́b í'sɛ̀lú, kə̀ nwáànmbə̀ Báá bə́n Tììkpɛ̀ŋ Yéésù Krístù, insɔ̀ɔ̀nkè oò rú, oò pii ii gɔ̀ŋsə́ aa bɛ́d bə gá roó.

²²Ɛ̀g ìì bé' nɛ́b aa tɛ́mbagké boò və̀' síndə búúrá'

²³ìì vú' nɛ́b bəd laarú, ìì súú bə̀ kúnú, ɛ̀g ìì bé' nɛ́b kam bəraa tə́ invaksə́ ma'ǹ də búúrá, búúd ɛgǹ bé'ǹmbə̀ aa nyágə́l kə̀ də́dǹ tə́ roó. Zá ìì gú' yíl íí ra, ìì zèè gɔ̀' invaksə́ bə̀ ma'ǹ boò bəraa roó, boò pigi sí.

²⁴Sɔ̀d nyàamdoorú, yaà wə́ə́ bə́ŋyóo, bít zèd kə̀ zèrá, kaŋsɛ́l laa nyɛdkèá, gbà'á, kpɛŋsɛ́l kə̀ váàndo tá, boò kùm màn aa dá ii báàn nwáànmbə̀ yi'ké invaksə́ kóólé rú, dá ii ma'ǹ íí kùm kə̀ invaksə́ nə́ŋ̀má naà gá, bít dá ii nyí'ǹ kə̀ tɛ́m làmkè aa oò kaŋsɛ́l laa nyɛdkè rú rə naú. Màn aarə, Vɛnɛ́b nə́ŋgùm Nɛ́d Nɛ́ŋə̀ bə̀ Súùn bə́n da, kə̀ Yéésù Krístù, Báá bə́n Tììkpɛ̀ŋá. Oò kùm kàani.