Read Samba Leko Kedké Yohana Núù bìá 1 Bible Online

Kedké Yohana Núù bìá 1 - Samba Leko bible

Kedké Yohana Núù bìá 1

¹Aa yée in aa Yéésù Krístù ì'à nɛ́b tù' bə̀ ma'ǹ oò bəd doó. Vɛnɛ́b pii sə̀n Yéésù Krístù in aa roó, bɔ̀b oò ì' nɛ́b tù' bə̀ ma'ǹ oò bəd in aa dá ma'míìn zɔ̀ŋə númú zɔ̀gɔ̀ roó. Bít Yéésù Krístù tùmà *malaika oò, nɛ́d tù' bə̀ ma'ǹ oò Yohana sunú, yaà oò ì'ù in aa roó.

²Yohana ùd in bəraa bé'à rə gə́ kóólé. Ùd Vɛnɛ́b nwɔŋá, bít kə̀ nwɔŋ sɔ̀ɔ̀n aa Yéésù Krístù bàà ì'à roó.

³Nɛ́ŋə̀ aa gád ì' nɛ́b kambəd nwɔŋ aa *Vɛnɛ́b gbantumsə̀ báád núúboòraa rú yée yàá, bít nɛ́b bəraa bə̀ kìì nwɔŋ bəraa yée yàá, bít bə̀ mà'ì kə̀ tù' rə, Vɛnɛ́b dá bə̀ nɛɛ̀n zígǹ yílú. Kàandə, sɛŋ aa in bəraa dá ma'míìn bərə, wə́ə́ì kə́d ba.

⁴Núúboòraa vúgà máára mə́ Yohana naú, bád mə́ tə́ *Eklisiya bəraa nə́ŋsínà, Aziya yɛ́b bərə dɔ̀màá. Nɛ́ŋə̀ aa túrú, nɛ́ŋə̀ aa nyàam kùmà roó, nɛ́ŋə̀ aa dáà yaànnà roó, bít kə̀ nwul bəraa nə́ŋsínà, oò mə̀ə̀d númú rə tá, boò mà' ii pə̀dkèá, bít boò pii ii tɛbàá.

⁵Bít Yéésù Krístù kɔ̀, oò pii ii tɛbàá, bít oò mà' ii pə̀dkèá. Oòrə, sedako vɛ́nà bìá, nɛ́d éèn də̀gə̀ də̀gə̀ bə̀ aa díím val bəd tə́ŋə́ roó, bít oòra kùmsə̀n gààd gbà'á, gààd bəraa zɔ̀ŋə yɛ́b bərə bìá. Yéésù Krístù kùmsə̀n nɛ́ŋə̀ aa tə́ bə́n í'ǹ doó, bìn lɛ́' bə́n sə̀n invaksə́ bə́n bərú, kə̀ nyɛ̀lə́m oòra.

⁶Mà' bə́n báà kuùm nɛ́b oò gààrú bə̀ bərá, bít báà ma'ǹ Báá bəǹ Vɛnɛ́b tù' kìínmbə̀ *nɛ́b láŋsə́ bə̀ ma'ǹ bəd kíin. Kaŋsɛ́l kə̀ váàndo tá, boò kùm oò naú, zèd kə̀ zèrá. Oò kùm kàani.

⁷Ìì ɛ̀g núùá, Yéésù ɛ̀mà tóò mɔbú! Kóó nɛ́ŋə̀ déè, dáù kíìn bé'nàá; nɛ́b bəraa sàbə̀ rə má, bə̀ dáù kíìn bé'nàá. Bít nɛ́b kun bəraa zɔ̀ŋə yɛ́b bərə gə́ kóólé, kpə̀ə̀ bə̀ dá nwɔŋ daàl oò bòórú. Èè, in aarə dákíìn ma'mínàá. Oò kuùm kàani.

⁸Báátììkpɛ̀ŋ Vɛnɛ́b bàà: «Máára mə́ kùmsə̀n *Alfa, bít mə́ kùmsə̀n *Omega. Mə́ túrú, mə́ nɛ́ŋə̀ aa nyàam kùmà, bít nɛ́ŋə̀ aa dáà yaanà roó. Mə́ kùmsə̀n Vɛnɛ́b Gbìntaŋ kpɛŋsɛ́l bìá.»

⁹Máára mə́ kùmsə̀n Yohana ra, ɔ̀dkudvɛɛ̀l íí Krístù rú bìá. Bə́n tə́ən nə́ŋ̀ní, wálke bə́n kə̀ Yéésù ra. Wál bə́n í'ǹ búúd tə́ kúnú, kàandə, bə́n tə́ən *Vɛnɛ́b gààrú, bít bə́n sidǹ búúraa bə́n í'ǹ yérə tə́ kúnú. Dá bə̀ kúm mə́ yɛ́b aa wəl tə́ŋú, bə̀ dɛ̀d Patmos də rú, Vɛnɛ́b nwɔŋ aa mə́ ùd də bòórú, kə̀ vɛ́nà aa mə́ bàà Yéésù yílə́ rə bòórú.

¹⁰Nwul Gìdń kò' mə́ Báátììkpɛ̀ŋ nyàmú, bít mə́ kìì pə̀gə̀lib kpɛŋsɛ́l bə̀ nə́ŋ̀ máá bòórú, kìínmbə̀ yaagà' kíin.

¹¹Pə̀gə̀lib nwɔŋ də bàà: «M̀ bád in aa ḿ bé' rə, núúboòd kalké nə́ŋ̀ú, bít tùm m̀ àà núúboòd kalké rə *Eklisiya bəraa nə́ŋsínà yóo' Efesus bìlú, Samirna bìlú, Pɛrgamus bìlú, Tiyatira bìlú, Sardes bìlú, Filadelfiya bìlú, bít kə̀ Laodikiya bìlú.»

¹²Sɛŋ aarə, mə́ kìì pə̀gə̀lib nwɔŋ kàangə́, lìb mə́ bí' núù bòórú, mə́ ɛ̀g nɛ́ŋə̀ aa gám nwɔŋ doó, bít mə́ bé' in bəraa zíg bə̀ sáá lampə̀ bə, bə̀ kùd kə̀ bəŋzɔ' rə nə́ŋsínà.

¹³Mə́ bé' nɛ́ŋə̀ nə́ŋ̀ kìínmbə̀ nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə kíin, dìì in bəraa zíg bə̀ sáá lampə̀ bəd bərə tə́ŋə́ wərà. Páá gɔ̀' nə́ŋ̀ bùùd yaà wə́ə́ dun bə díú, bít tab və̀d gíìl kə̀ kaasə́ aa bə̀ kùd kə̀ bəŋzɔ' roó.

¹⁴Yílə oò, kə̀ yíl gí' oò bəd tá, kàan biíd tál, kìínmbə̀ kúmə́ kíin, bít kə̀ zàm kíin. Bít núù oò bəd kìínmbə̀ laa yɛ̀ɛ́l kíin.

¹⁵Bít dun oò bəd kìínmbə̀ ba' yáàm aa bə̀ páá laarú, yɛ̀ɛ́l sɔ̀'í rə kíin, bít pə̀gə̀lib nwɔŋ oò dùm kìínmbə̀ wəl nwuu gbàád bəraa gɛɛ̀n tóò síìmmà zɛɛ̀ bərə kíin.

¹⁶Bít kò' dùdù yɛb nə́ŋsínà nɛɛ̀n váànú, yɛ́rə̀ bùúd gú' iirúb nwùùkè bə̀ vúgà oò gú' ba; bít gbə̀' laa oò nyɛd kìínmbə̀ nɛɛ̀n aa nyàm laa dùù kə̀ kpɛŋsɛ́l oò tə́ kóólé rə kíin.

¹⁷Zɔ̀ŋ aa mə́ bé'ù gə́, mə́ yi' oò númú, kìínmbə̀ val kò' mə́ì kíin, bít yaà zíg nɛɛ̀n váàn oò máá yílú, bít bàà: «Ǹ nùù də́dǹ sí! Máára mə́ sɔ̀d sùnú, bít mə́ dùg sə̀n kə̀ bòòrá.

¹⁸Mə́ nɛ́ŋə̀ aa tə́ kə̀ gɔ̀ŋsə́ roó. Val kò' mə́ kúnú, bít ìì ɛ̀ga, mə́ tə́ kə̀ gɔ̀ŋsá, zèd kə̀ zèrá. Mə́ kàn valì kə̀ kpɛŋsɛ́lá, bít mə́ ləə gààd tə́ zɔ̀ŋ aa val bəd ləə bəroó.

¹⁹«Kə̀ aakíin də, m̀ bád in aa ḿ bé' yérə kíìn kóólé, bít m̀ bád in bəraa taà bə́ŋyée roó, bít in bəraa dáà yaànà númú roó.

²⁰Dùdù yɛb aa ḿ bé'à máá nɛɛ̀n váànú nə́ŋsínà, bít kə̀ in bəraa zíg bə̀ sáá lampə̀ bəraa nə́ŋsínà bə, bə̀ kùd kə̀ bəŋzɔ' rə, *inmə́'ke boò rə yóo' Dùdù yɛb aa nə́ŋsínà rə, bə̀ kùmsə̀n *malaika *Eklisiya bəraa nə́ŋsínà rə bìá; bít in bəraa nə́ŋsínà, zíg bə̀ sáá lampə̀ bəd bə yérə, bə̀ kùmsə̀n *Eklisiya bəraa nə́ŋsínà roó.»