Read Samba Leko Kedké Yohana Núù bìá 10 Bible Online

Kedké Yohana Núù bìá 10 - Samba Leko bible

Kedké Yohana Núù bìá 10

¹Bít mə́ bé' *malaika kpɛŋsɛ́l bə̀ símà lɛgə́ poú, bít gɔ̀' oòrə, páà mɔbá, kɔ̀mtágsaad kaàl oò yíləsú. Bít gbə̀' laa oò sáá bììd kìínmbə̀ nyàm laa kíin. Bít dun oò bəd kɔ̀ kìínmbə̀ laa mɛ́l bəd kíin.

²Bít kò' núúboòd kalké bɛ̀ŋ́sə̀wà nɛɛ̀n tɛ́mú, núúboòd kalké aarə kedkéá; bít dí'à dun váàn nwuu gbà'á yílú, dun kéèn kɔ̀ dí'à yɛ́b ba.

³Bít páá kpə̀ə́ǹ lɛgə́ kə̀ kpɛŋsɛ́lá; kpə̀ə́ǹ oòrə, dùm kìínmbə̀ gbàál nyìg bə̀ kíin. Bít zɔ̀ŋ aa páá kpə̀ə́ǹ kàangə́, mə́ kìì yɛ́bsə̀ bəraa nə́ŋsínà rə pə̀gə̀lib nwɔŋá.

⁴Bít zɔ̀ŋ aa mə́ kìì yɛ́bsə̀ bəraa nə́ŋsínà rə pə̀gə̀lib nwɔŋ gə́, máá nwɔŋ aa bàà rə bádǹ gə́, zá mə́ kìì pə̀gə̀lib nwɔŋ ɔ̀d nə́ŋ̀ lɛg ba; nɛ́ŋə̀ rə bàà mə́: «M̀ bád nwɔŋ aa yɛ́bsə̀ bəraa nə́ŋsínà, bə̀ bàà rə sí, bít m̀ mə́' nwɔŋ aarə kúnú.»

⁵Bít malaika aa mə́ bé'à dì'à nwuu gbà'á yílú, bít kə̀ yɛ́b bərə, zá' nɛɛ̀n váàn lɛgú,

⁶bít nwɔ̀m iná, bàà: «Mə́ nwɔ̀m in Nɛ́ŋə̀ aa kuùm zèd kə̀ zèd də nə́gə́lú. Nɛ́ŋə̀ aarə, séé sə̀n lɛgá, kə̀ in bəraa rú wərə̀ rə tá; bít yɛ́bá, kə̀ in bəraa rú wərə̀ rə tá, bít séé nwuu gbà'á, kə̀ in bəraa rú wərə̀ rə tá.» *Malaika rə, nwɔ̀m in bàà: «Və̀d bə̀ zíg sɛŋ bə sɔ̀ŋ gá.

⁷Zá sɛŋ aa malaika nə́ŋsínà bə̀ kùd si' dá yaa gà' oò bə̀ íìl bərə, *inmə́'ke aa Vɛnɛ́b sèl zíg də, dákíìn ma'mínàá. In aa Vɛnɛ́b sèl zíg də, *Nwɔŋ Puu Sɔ̀ɔ̀nkè aa bàà nɛ́b tù' bə̀ ma'ǹ oò bəd, *gbantumsə̀ oò bəd yílə́ roó.»

⁸Bít pə̀gə̀lib aa mə́ kìì vúgà lɛgə́ paà rə, bàà mə́ sɔ̀ŋ: «Ɛ̀m dáàn pà' núúboòd kalké aa ked naà rə, *malaika nɛɛ̀n tɛ́mú. Aarə, malaika aa dìì nwuu gbà'á yílú, bít kə̀ yɛ́b bəroó.»

⁹Bít zá' mə́ ɛ̀m malaika sunú, dáá mə́ nyɛ̀mə̀ oò pii mə́ núúboòd kalké bɛ̀ŋ́sə̀wà aa yéroó, oò kɔ̀ bàà mə́: «M̀ pà' kúnú, ǹ lííù kúnú. Bít dá kuùm làmkè ám gú' ba, kìínmbə̀ núúd kíin. Zá ń lííùwì gə́, dá kuùm nyááke ám bàgəlú.»

¹⁰Bít mə́ kè' núúboòd kalké bɛ̀ŋ́sə̀wà rə oò nɛɛ̀n tɛ́mú, mə́ lííù kúnú, kùm làmkè máá gú' bə̀ kìínmbə̀ núúd kíin. Zɔ̀ŋ aa mə́ lííù gə́, dáá kùm nyááke máá bàgəlú.

¹¹Kàanyée gə́, bə̀ bàà mə́: «M̀ bàà nɛ́b bəd in aa dá nɛ́b kun bərá, yɛ́b bərá, nɛ́b aa bə̀ gám nwɔŋ, nwɔŋ luùm gɔ̀ŋ gɔ̀ŋ bərú roó, kə̀ gààd bəd tá, wə́ə̀n də sɔ̀ŋ.»