Read Samba Leko Kedké Yohana Núù bìá 11 Bible Online

Kedké Yohana Núù bìá 11 - Samba Leko bible

Kedké Yohana Núù bìá 11

¹Kàanyée gə́, bə̀ pii máà gbàsaa də́' bə̀ sáá kə̀ in doó, bít bə̀ bàà mə́: «Ǹ zá' lɛgú, ɛ̀m dá ǹ də́' Vɛnɛ́b wúlá, kə̀ *gannyàgə̀lá, bít ǹ gád nɛ́b aa bə̀ tə́ Vɛnɛ́b pɔ̀bm̀ dú wərə̀ roó.

²Zá ǹ də́' zɔ̀ŋ láŋsə́ wúl gbaarú bə̀ gə́ sí, ǹ dàà kàaní. Kàandə, bə̀ pii nɛ́b aa bàg Vɛnɛ́b síndoó, bít bə̀ dá sə̀n gààd ləə̀n bìl Gìdń yílú, dá ma'ǹ sòò laa iira zè iira.

³Bít máá sedako mə́ bəraa iirə rə kpɛŋsɛ́l piinàá, bə̀ dá gɔ̀' val bə̀ gídǹ páánàá, bít bə̀ dá nɛ́b bəd nwɔŋ aa vúgà Vɛnɛ́b naà rə baàn sɛŋ laa núnà zɔ̀ŋ kób kə̀ laa kób zè laa toora.»

⁴Sedako bəraa iirə yérə, bə̀ kùmsə̀n Oliva nyìì bəraa iirə roó, bít bə̀ kùmsə̀n in lampə̀ bə̀ zígǹ bəraa iirə roó. In bəraa zíg bə̀ sáá lampə̀ bəd bə iirə yérə, bə̀ dìì tə́ Báátììkpɛ̀ŋ aa ləə gààd zɔ̀ŋə yɛ́b bərə númú.

⁵Bít dáà nɛ́ŋə̀ nə́ŋ̀ í' bə̀ì invaksə́ ma'ǹmbə̀ gə́, laa vúg boò gú' ba, bít dáá lòd ɔ̀dmáàn boò bəd də kúnú. Nɛ́ŋə̀ aa tə́ saàn boò bə̀ invaksə́ ma'ǹmbə̀ rə, bə̀ dáù lo'ǹ kə̀ nɛɛ̀n aarə kíin.

⁶Bə̀ tə́ kə̀ kpɛŋsɛ́l naà lɛg bə̀ ke'ǹná, bɔ̀b nwan oò naŋ̀, sɛŋ aa bə̀ tə́ nwɔŋ aa vúgà Vɛnɛ́b naà rə udǹ də bə sí. Bít bə̀ tə́ kə̀ kpɛŋsɛ́l naà wəl pɛ́ɛ̀n bí'ǹmbə̀ nyɛ̀lə́má; bít bə̀ tə́ kə̀ kpɛŋsɛ́l ɔ̀d naà sɔ̀ŋ, zibm̀bə̀ nɛ́b aa zɔ̀ŋə yɛ́b bərə, kə̀ búúd nwuukè luùm gɔ̀ŋ gɔ̀ŋ, sɛŋ aa bə̀ í' bəroó.

⁷Zá bàà bə̀ bɛ́' nwɔŋ boò bərì gə́, bít inzaan aa vúgà lɔ̀ŋ pí'ke gbà'á rú rə, yaà dá nə́'ǹ kə̀ boò ra, nə́' dá bə̀ kíìn kannàá, bít dá bə̀ kíìn loràá.

⁸Val boò bəd də, dá ləə̀n tə́ kpaŋ̀ tɛ́mú, bìl gbà'á rú, zɔ̀ŋ aa bə̀ bág Báá boò Tììkpɛ̀ŋ Yéésù bə téélɛŋké bəroó. Bìl aarə, nə́gə́l oòrə, dɛ̀d bə̀ də́' tə́ kə̀ *Sodoma, bít kə̀ Misra yɛ́bá.

⁹Bít nɛ́b luùm bəd kóólé, nɛ́b kun bəd kóólé, nɛ́b aa bə̀ gám nwɔŋ, nwɔŋ luùm gɔ̀ŋ gɔ̀ŋ bərú rə kóólé, nɛ́b bəd kóólé, bə̀ dá val boò bəd ɛgǹ sɛŋ toora kə̀ tɔ̀rá; bít bə̀ pii bə̀ kpaŋ̀, val bəraa rə ləə̀nmbə̀ gá.

¹⁰Bít nɛ́b bəraa kùm zɔ̀ŋə yɛ́b bərə, bə̀ dá tɛ́m làmkè kiìn kə̀ nɛ́b bəraa iirə yée valá. Bə̀ dá wálke bəd ma'nàá, bít tùm bə̀ dá ɔ̀dnə́ŋ̀ bəd in tɛdńní bə̀ bəd piinàá. Kàandə, *Vɛnɛ́b gbantumsə̀ bəraa iirə yérə, bə̀ í' nɛ́b aa zɔ̀ŋə yɛ́b bə yée búúrì gbàákù.

¹¹Zá nyàm bəraa toorə kə̀ tɔ̀d də taà gə́, nwul gɔ̀ŋsə́ bə̀ nə́ŋ̀ vúgà Vɛnɛ́b naú, yaà pìì boò rú, bít zá' bə̀ díím kúnú. Kàanyée gə́, nɛ́b aa bə̀ bé' bə̀ rə kóólé, də́dǹ gbà'á mà' bə̀ yàá.

¹²*Vɛnɛ́b gbantumsə̀ bəraa boò iirə rə, bə̀ kìì pə̀gə̀lib nwɔŋ nə́ŋ̀ vúgà lɛgə́ poú, tə́ baàn kə̀ kpɛŋsɛ́l kə̀ aakíin: «Ìì na'à zɔ̀ŋə.» Bít bə̀ na' bəd lɛgə́ kə̀ zààmú, bít ɔ̀dmáàn boò bəd kɔ̀, bə̀ tə́ bə̀ ɛgàá.

¹³Bít sɛŋ aarə bəní, yɛ́b wáá kə̀ kpɛŋsɛ́lá; bít bìl aa bə̀ pɛ̀d zɔ̀ŋ kób də, kàd nə́ŋ̀ láá yàá, bít nɛ́b bəd laa núnà zɔ̀ŋ kób zɔ̀ŋ nə́ŋsínà, val kòd bə̀ yɛ́b aa wáá rə boórú. Bít nɛ́b kam bəraa val kòd nyɛ́d də, bə̀ nyìì bəd kə̀ də́dǹná, bít bə̀ káŋ Vɛnɛ́b lɛgə́ paà bìá.

¹⁴Búúd nwuukè iirúb də taà yàá, zá búúd nwuukè toorúb də, tóò yaànà bə́ŋyóo.

¹⁵*Malaika nə́ŋsínà oòrə, íl yaa gà' oò bìá, bít pə̀gə̀lib nwɔŋ kpɛŋsɛ́l bə̀ bəd vúgə́là lɛgə́ poú, bàà: «Bə́ŋyée kpɛŋsɛ́l gààd bə̀ ləə̀n yɛ́b bə bə̀ kóólé, tə́ Báá bə́n Tììkpɛ̀ŋ naú, kə̀ Krístù naú; bít dáá gààd ləə̀n zèd kə̀ zèrá!»

¹⁶Bít dam bəraa laa nə́ŋ̀ zè naara, ìì kùm bəd mə̀ə̀d boò bəd yílú, Vɛnɛ́b múnú rə, zá' píl bə̀ wúb bəd núù yɛ́b ba, bít ìì káŋ Vɛnɛ́bá.

¹⁷Ìì bàà: «Báátììkpɛ̀ŋ Vɛnɛ́b Gbìntaŋ kpɛŋsɛ́l bìá, nɛ́ŋə̀ aa ń túrú, bít nɛ́ŋə̀ aa nyàam kùmà roó, bə́ tə́ən kíìn mɔ̀'nàá, nɛɛ̀n aa ḿ mà' tù' kə̀ kpɛŋsɛ́l gbà'á ń da, bít ń ləə gààd dú roó.

¹⁸Nɛ́b aa bə̀ bàg Vɛnɛ́b síndə, bə̀ nyìì bəd kə̀ nɔ̀má, bít nɔ̀m ámbə̀ yaà wə́ə́ yàá. Sɛŋ aa ń dá val bəd fágǹ bərə, wə́ə́ yàá. Sɛŋ aa ń dá nɛ́b tù' bə̀ ma'ǹ, *gbantumsə̀ ḿ bəd, nɛ́b gìdń ḿ bərá, bít kə̀ nɛ́b aa bə̀ tə́ən ləə̀n də, *mú'sɛ̀l dùm boò piìn dú, boò kóólé, yɛb bɛ̀ŋ́sə̀ kə̀ nɛ́b gbàád tə́ rə, yaà wə́ə́ yàá. Bít sɛŋ wə́ə́ì nɛ́b bəraa bə̀ tə́ yɛ́b yɛɛ̀l lə yɛɛ̀lǹmbìá!»

¹⁹Bít Vɛnɛ́b láŋsə́ wúl gbà'á aa lɛgə́ paà rə ked taá; bít bə̀ bé' akoti *gú'dúgke Vɛnɛ́b láŋsə́ wúu wərà. Bít yɛ́bsə̀ bəd ìb kúnú, bít yɛ́bsə̀ pɛ́l kúnú, nwan dùm kúnú, yɛ́b wáá kúnú, bít gágə́rə́ zùúm bəd píl kúnú.