Read Samba Leko Kedké Yohana Núù bìá 12 Bible Online

Kedké Yohana Núù bìá 12 - Samba Leko bible

Kedké Yohana Núù bìá 12

¹Inkɔrə bə̀ gbà'á nə́ŋ̀ vúg yaà ì' yíl oò lɛgə́ poú. Bít mə́ bé' nɛ́ŋ kéèndo nə́ŋ̀ páá nyààmá, sòò kɔ̀ oò dun dùú. Bít *mə̀lə̀ aa páá yíləsə́ rə, dùdù yɛb bə wərə̀ kób zè iira.

²Bít nɛ́ŋ kéèndo aarə, kə̀ bàgə̀lá, bít páá kpə̀ə́ǹ kə̀ nwuukèá; kàandə, sɛŋ aa dá lɛbm̀ bərə, wə́ə́ yàá.

³Bít inkɔrə bə̀ ɔ̀d nə́ŋ̀ vúg yaà ì' yíl oò lɛgə́ poú. Bít mə́ bé' inzaan gbà'á gbìntaŋ nə́ŋ̀ yɛ̀ɛ́lá, kə̀ yílə naà nə́ŋsínà, kə̀ gà' kób, bít yílə gə́ kóólé kə̀ *mə̀lə̀ oòra.

⁴Bít yaà tə̀d dùdù yɛb aa lɛgə́ paà, pɛɛ̀l zɔ̀ŋ toorə rə, zɔ̀ŋ nə́ŋ̀ dú wərə̀ kə̀ díìm oòra, bít lɛ́l bə̀ yɛ́b ba. Bít yaà dìì nɛ́ŋ kéèndo aa dá Wàà lɛbm̀ də númú, bɔ̀b lɛ̀b Wàà rəì gə́, pà' dákíìn fu'nàá.

⁵Bít nɛ́ŋ kéèndo rə, lɛ̀b Wàà váàndoá, oòra dá sə̀n gààd ləə̀n yɛ́b kə̀ zɔ̀ŋtə́ yílú, kə̀ gbà' ba'wà bìá. Zá pà' dá bə̀ zíg wàà oòrə Vɛnɛ́b númú, kə̀ *Vɛnɛ́b gààd mə̀ə̀d númú.

⁶Bít nɛ́ŋ kéèndo aarə, nùù ɛ̀m fɔ̀gú, zɔ̀ŋ aa Vɛnɛ́b kùd zígə̀ zɔ̀ŋ bərə ba. Zɔ̀ŋ aarə ba, bə̀ dáù taà bɔbm̀ zaàn sɛŋ laa núnà zɔ̀ŋ kób kə̀ laa núnà zɔ̀ŋ iira kə̀ laa toora.

⁷Bít kàanyée gə́, bùm zá' pí' taà lɛgə́ poú. *Mikailu kə̀ *malaika oò bəd tá, ìì nə́' taà bùm kə̀ inzaaná, bít inzaan kɔ̀ kə̀ malaika oò bəd tá, bə̀ nə́' taà kə̀ *Mikailu malaika bərá.

⁸Zá *Mikailu kə̀ malaika oò bəd tá, nə́' ìì kàn inzaanì kə̀ malaika oò bəd tá. Kə̀ taàbìá, inzaan kə̀ malaika oò bəd tá, bə̀ bɔ̀b zɔ̀ŋ nə́ŋ̀má lɛgə́ paà sɔ̀ŋ sé.

⁹Bít pà' làà bə̀ lɛ́'à inzaan gbà'á rə yɛ́b ba. Oòra kùmsə̀n bi' nyàam dam bə bə̀ aa bə̀ dɛ̀rə̀ Sámbàŋyɛ́ràá, sínkɔ̀ *Satan, záá tə́ nɛ́b zɔ̀ŋə yɛ́b bə bə̀ lɛ́ɛ̀l loó. Bə̀ lɛ́'ùwàì zɔ̀ŋə yɛ́b ba, kə̀ malaika oò bəd tá.

¹⁰Bít mə́ kìì pə̀gə̀lib kpɛŋké nə́ŋ̀ vúgà lɛgə́ poú, tə́ baàn: «Bə́ŋyée gə́, sɛŋ súúke bə̀ wə́ə́ yàá! Bə́ŋyée gə́, Vɛnɛ́b bə́n ləə gààd tə́ kə̀ kpɛŋsɛ́l oòra. Bə́ŋyée gə́, Krístù aa tùmà rə, yaà ì' kpɛŋsɛ́l oò yàá! Kàandə, pà' làà bə̀ lɛ́'à màn aa luu tə́ ɔ̀dkudvɛɛ̀l bəd sáàn Vɛnɛ́b númú, tígə́lə́ kə̀ nyàámbərə̀ tá, lɛgə́ paà rəì zɔ̀ŋə yɛ́b ba.

¹¹Ɔ̀dkudvɛɛ̀l bə́n bagké bəd gə́, nə́' bə̀ kànə̀ kə̀ Bɛ̀rə̀wà nyɛ̀lə́má, bít bə̀ kànə̀ kə̀ sedako nwɔŋ aa bə̀ bàà nɛ́b bəd doó. Bə̀ í' gɔ̀ŋsə́ boò gbàákù sé, kə̀ taàbìá, bə̀ kè' taà gɔ̀ŋsə́ boò piìnmbə̀ val naú.

¹²Ogə́, ìì kùm kə̀ tɛ́m làmkèá, lɛg bərá, kə̀ nɛ́b aa íí ləə rú wərə̀ rə tá! Búúd tə́ aí yílú, yɛ́b kə̀ nwuu gbà'á tá. Zá Sámbàŋyɛ́rə̀ símàì aí tə́ŋú, nyìì tə́ kə̀ nɔ̀m gbà'á. Kàandə, gàb yàá sɛŋ bəǹ nyɛ́d tə́ zɔ̀gɔ̀ní.»

¹³Bít zɔ̀ŋ aa inzaan bé' pà' làà bə̀ lɛ́'ùwà yɛ́b bə kàanyée gə́, zá' pí' nɛ́ŋ kéèndo aa lɛ̀b wàà váàndo rə niŋ̀ bagǹmbìá.

¹⁴Zá bə̀ pii nɛ́ŋ kéèndo rə laalaàn gbà'á bɛgə̀l iira, bɔ̀b zá' oò ɛ̀m fɔ̀gú kə̀ kùrú, zɔ̀ŋ oò aa Vɛnɛ́b zígə̀, dáùráàn zaàn bərə ba. Ɛ̀m dá kùm wərə̀ zèd toora kə̀ tɔ̀rá, zɔ̀ŋ aa bi' bánə̀ bɔbm̀bə̀ bə gá rə ba.

¹⁵Kàanyée gə́, nɛ́ŋ kéèndo aarə bòórú, bi' gɔ̀ŋ wəl kə̀ wəl nwuu kíin, bɔ̀b wəl dá oò pú'ù kúnú.

¹⁶Zá yɛ́b yaà láŋ nɛ́ŋ kéèndo rə ba' bít yɛ́b tà' gú' tə̀ə̀m wəl nwuu aa inzaan gɔ̀ŋà roó.

¹⁷Bít inzaan nyìì kə̀ nɔ̀m kə̀ nɛ́ŋ kéèndo aa roó; zá' ɛ̀m dá nə́' bùm kə̀ nɛ́ŋ kéèndo rə yɛb kàá bəraa bə̀ tə́ Vɛnɛ́b indaŋ̀mbə̀ bəd bagǹ, bít bə̀ tə́ nwɔŋ aa Yéésù tə́ baàn də ko'ǹ doó.

¹⁸Bít inzaan yaà dìì nyìŋsə́ aa nwuu gbà'á kàd bərə ba.