Read Samba Leko Kedké Yohana Núù bìá 14 Bible Online

Kedké Yohana Núù bìá 14 - Samba Leko bible

Kedké Yohana Núù bìá 14

¹Bít mə́ bé' Bɛ̀rə̀wà tə́ diìn kɔ̀l aa bə̀ dɛ̀d Siyona rə ba, bít nɛ́b aa bə̀ bád bə̀ nə́gə́l oò kə̀ Báá oò nə́gə́l tá, gbə̀sú rə, bə̀ kə̀ oò tá. Nɛ́b bəd də, ká'sɛ́l boò rə, mà'ì laa núnà zɔ̀ŋ kób zɔ̀ŋ laa núnà kə̀ laa núnà zɔ̀ŋ kób zɔ̀ŋ laa iira zè naara.

²Bít mə́ kìì pə̀gə̀lib nwɔŋ nə́ŋ̀ vúgà lɛgə́ poú, dùm kìínmbə̀ wəl nwuu gbàád wál tə́ ɔ̀dbə kíin, bít pél kìínmbə̀ yɛ́bsə̀ kpɛŋké kíin. Bít pə̀gə̀lib nwɔŋ aa mə́ kìì yérə, kìínmbə̀ nɛ́b pààd bə̀ mɛɛ̀l bəd tə́ pààd boò bəd mɛɛ̀l kíin.

³Bít bə̀ nàà náb puuá, mə̀ə̀d númú, ingalə̀ bəraa naarə rə númú, kə̀ *dam bəd númú. Zá nɛ́ŋə̀ nə́ŋ̀má bán náb aarə naàn sáànmbə̀ gá, sìná nɛ́b aa boò laa núnà zɔ̀ŋ kób zɔ̀ŋ laa núnà kə̀ laa núnà zɔ̀ŋ kób zɔ̀ŋ laa iira zè naarə rə ní, nɛ́b aa Vɛnɛ́b káákè' bə̀ zɔ̀ŋə yɛ́b bəroó.

⁴Boò gə́, bə̀ nwán yíl boò kíìn sɔ̀ɔ̀nkè, bə̀ gàb kɛ́ɛ̀m nwɔŋ sé. Nɛ́b aarə, bə̀ bàg Bɛ̀rə̀wà bòórú, zɔ̀ŋ aa tə́ dáàn bərə gə́ kóólé. Bə̀ kùmsə̀n nɛ́b aa Vɛnɛ́b káákè' nɛ́b bəd tə́ŋú, bɔ̀b boò kùm nɛ́b aa éèn sàà bə̀ vúŋ bə̀, boò kùm Vɛnɛ́b bìá, kə̀ Bɛ̀rə̀wà bə̀ roó.

⁵Bít kìì bə̀ bèd gúsuúm nwɔŋ nə́ŋ̀má boò gú' bə sé. Bə̀ bɔ̀b invaksə́ nə́ŋ̀má boò bə̀ álǹmbə̀ bə sé.

⁶Bít mə́ bé' *malaika ɔ̀d nə́ŋ̀ tə́ zá'ǹ lɛgú, nwulú, ɛ̀mà kə̀ *Nwɔŋ Puu Sɔ̀ɔ̀nkè naú, yaàn baànmbə̀ nɛ́b aa bə̀ ləə zɔ̀ŋə yɛ́b bərə gə́ kóólé, kun gə́ kóólé, nɛ́b aa bə̀ gám nwɔŋ, nwɔŋ luùm gɔ̀ŋ gɔ̀ŋ bərú roó, bít nɛ́b bəd kóólé.

⁷Malaika aarə, bàà kə̀ pə̀gə̀lib nwɔŋ kpɛŋsɛ́l bìá: «Ìì nùù Vɛnɛ́bá, bít ìì káŋ̀ kúnú; kàandə, sɛŋ aa dá nɛ́b bəd fágǹ bərə wə́ə́ yàá. Ìì káŋ màn aa séé lɛgá, yɛ́bá, nwuu gbà'á, bít kə̀ wəl yíl bəd doó.»

⁸Bít malaika iirúb də, bàg malaika éèn də̀gə̀ də̀gə̀ bə̀ rə bòórú, bàà: «Láá yàá! Láá yàá! *Babiloniya bìl gbà'á láá yàá! Oòra nyə́' sə̀n nɛ́b aa yɛ́b bərə kóólé, badn labsə̀ bə̀ ma'ǹ oòra.»

⁹Bít *malaika toorúb aarə, bàg malaika bəraa iirə yée bòórú, bàà kə̀ pə̀gə̀lib nwɔŋ kpɛŋsɛ́l bìá: «Dáà nɛ́ŋə̀ nə́ŋ̀ káŋ gɔ̀g fɔ̀gúbə̀ aa yàá, kə̀ nyìsə̀ oò tá, bít dáà bɔ̀b bírə́ì gbə̀sú, sínkɔ̀ nɛɛ̀n tɛ́mú gə́,

¹⁰dá Vɛnɛ́b badn nɔ̀m bə̀ aarə nyəə̀n kɔ̀. Badn nyɛdkè aa Vɛnɛ́b kə́d dəgə̀wà nɔ̀m bə̀ oò rú roó. Bít dá búúd bé'ǹ laarú, kə̀ laa zəəmú, malaika gìdń bəd númú, kə̀ Bɛ̀rə̀wà númú.

¹¹Laayisaa búúd boò tə́ vúgǹ də, dá na'ǹ lɛgú, zèd kə̀ zèrá. Nɛ́b bəraa bə̀ káŋ gɔ̀g fɔ̀gúbə̀ kə̀ nyìsə̀ oò tə́ roó, bít kə̀ nɛ́b aa gɔ̀g fɔ̀gúbə̀ nə́gə́l bádmíìn boò gbə̀sú rə tá, bə̀ bɔ̀b sɛŋ nyi'ǹmbə̀ bə gá, tígə́lú kə̀ nyàámbərə̀ tá.»

¹²Kə̀ taàbìá, Vɛnɛ́b nɛ́b gìdń bəraa bə̀ tə́ indaŋ̀mbə̀ oò bəd ko'ǹ, bít tɛ́mbagké boò tə́ Yéésù bərə, boò kùm kə̀ tɛ́m sidkéá.

¹³Bít mə́ kìì pə̀gə̀lib nwɔŋ nə́ŋ̀ vúgà lɛgə́ poú, bàà mə́: «M̀ bád in aa yóo: ‹Vɛnɛ́b dá nɛ́b aa val tə́ bə̀ kodǹ bə́ŋyée kə̀ Báátììkpɛ̀ŋ bagǹmbə̀ rə nɛɛ̀n zígǹ yílú!› » Nwul Gìdń bàà: «Èè, kùm bə̀ dákíìn nyi'ǹ kə̀ tù' kpɛŋsɛ́l bə̀ boò bərá; kàandə, tù' sɔ̀ɔ̀nkè bəraa bə̀ mà' rə, tə́ kə̀ boò tá.»

¹⁴Bít mə́ bé' in nə́ŋ̀ ɔ̀d kìínmbə̀ mɔb biíd kíin, bít mə́ bé' nɛ́ŋə̀ nə́ŋ̀ kùm mɔb yílú, kìínmbə̀ nɛ́ŋə̀ aa bə̀ dɛ̀rə̀ *Nɛ́ŋ Váàndo Wàà rə kíin. Nɛ́ŋə̀ aarə, páá *mə̀lə̀ yílú; *mə̀lə̀ rə, bə̀ kùd kə̀ bəŋzɔsá, bít kò' gbɔ̀ɔ̀msə̀ ùùkè nɛɛ̀n tɛ́mú.

¹⁵Bít malaika ɔ̀d nə́ŋ̀ vúgà láŋsə́ wúu, páá kpə̀ə́ǹ kə̀ kpɛŋsɛ́lá, bàà nɛ́ŋə̀ aa kùm mɔb yílə́ rə: «M̀ pà' gbɔ̀ɔ̀msə̀ aa ń kə̀ naà roó, ǹ kòò kúnú; kàandə, in aa zɔ̀ŋə yɛ́b bərə ú' yàá, sɛŋ də́ŋì kɛdǹmbìá!»

¹⁶Bít kàanyée gə́, màn aa kùm mɔb yílə́ rə, pà' gbɔ̀ɔ̀msə̀ oòra, bít kòò bɛ́' in aa zɔ̀ŋə yɛ́b bərə gə́ kóólé.

¹⁷Bít malaika ɔ̀d nə́ŋ̀ vúgà Vɛnɛ́b láŋsə́ wúl aa lɛgə́ paà rə rú, oò kɔ̀ kɔ̀' gbɔ̀ɔ̀msə̀ ùùkè naú.

¹⁸Bít malaika nə́ŋ̀ vúgà *gannyàgə̀lú. Bít oò gə́, tə́ kə̀ kpɛŋsɛ́l naà laa yílú. Ɛ̀m yaà dɛ̀d malaika nə́ŋ̀ ɔ̀raa dìì kə̀ gbɔ̀ɔ̀msə̀ ùùkè nɛɛ̀n tɛ́mú rə nwɔŋá, bààù: «M̀ pà' gbɔ̀ɔ̀msə̀ ùùkè ń da, bít ǹ sím yɛ́b ba, dáàn və̀l badn téé wàà də̀ə̀ǹ bə̀ rə kúnú; kàandə, yɛb oò bəd də, bə̀ ú' yàá.»

¹⁹Bít malaika pà' gbɔ̀ɔ̀msə̀ oòra, və̀l badn téé yɛb də̀ə̀ǹ bə̀ bəraa zɔ̀ŋə yɛ́b bəroó, bít wál bə̀ ɔ̀dba, dáá zúm in aa kòòd bə̀ sáá badn dú, Vɛnɛ́b nɔ̀m gbà'á kùm dú roó.

²⁰Zɔ̀ŋ aa bə̀ kòòd badn bəd bərə, bìl bòórú. Bə̀ kòòd badn téé yɛb də gə́, nyɛ̀lə́m gɛɛ̀n vúg in aa bə̀ tə́ badn koodǹ dú rə rú, mà' kíìn kílomɛ́tà laa núnà zɔ̀ŋ toora; pí'ke oòrə, mà' kíìn mɛ́tà nə́ŋ̀ kə̀ tɔ̀rá.