Read Samba Leko Kedké Yohana Núù bìá 15 Bible Online

Kedké Yohana Núù bìá 15 - Samba Leko bible

Kedké Yohana Núù bìá 15

¹Bít mə́ bé' inkɔrə ɔ̀d nə́ŋ̀ lɛgə́ poú, gbà'á, bít kò' yíl kúnú. Malaika bəd nə́ŋsínà, bə̀ kò' búúd nwuukè bəd nə́ŋsínà nɛɛ̀n tɛ́mú. Boò ra bə̀ kùmsə̀n búúd nwuukè bəraa dùg kə̀ bòd doó; kàandə, Vɛnɛ́b nɔ̀m bɛ́d kə̀ boòra.

²Bít mə́ bé' in nə́ŋ̀ kìínmbə̀ nwuu gbà'á biíd sááke kíin, nyìì kə̀ laá; bít mə́ bé' nɛ́b aa nə́' bə̀ kànà gɔ̀g fɔ̀gúbə̀ kə̀ nyìsə̀ oò tə́ roó, bít kə̀ lámbà aa də́ŋ kə̀ nə́gə́l oò roó. Bə̀ dìì bəd nwuu gbà'á biíd sááke aarə kàd ba, bít bə̀ kò' bəd pààd bəraa Vɛnɛ́b pii bà rə naú.

³Bít bə̀ nàà bəd Musa, nɛ́d Vɛnɛ́b tù' bə̀ ma'ǹ nábá, kə̀ Bɛ̀rə̀wà nábá, nàà bə̀ bàà: «Tù' bəraa ń tə́ ma'ǹ də, tù' gbàád bərá, bít kò' yíl tə́ kúnú, Báátììkpɛ̀ŋ Vɛnɛ́b Gbìntaŋ kpɛŋsɛ́l bìá, gààd yɛ́b bəd gə́ kóólé bìá. Kpaŋ̀ ḿ bəd tə́ wɔ̀ɔ̀làá, bít tə́ vɛ́nà.

⁴Nɛ́ɛ̀réè nùù n sə̀n gá gú, Báátììkpɛ̀ŋá? Bít nɛ́ɛ̀réè dá sə̀n məə̀n nə́gə́l ámbə̀ káŋ̀mbə̀ gú? Kàandə, ń kùmsə̀n nɛ́ŋə̀ gìdń ám nə́ŋ̀ní, bít nɛ́b bəraa yɛ́b bərə kóólé, bə̀ dáà yaànà ám sunú, bít bə̀ dá n kíìn káŋàá; kàandə, nɛɛ̀n aa ń fág nɛ́b bəd dú kə̀ wɔ̀ɔ̀lə̀ rə, i'míìn yàá.»

⁵Bít bòórú mə́ ɛ̀g núù sɔ̀ŋ gə́, mə́ bé' láŋsə́ wúl aa lɛgə́ paà rə keèd yàá. Láŋsə́ wúl aarə, *Vɛnɛ́b dìí *gú'dúgke bə̀ rú wərà.

⁶Bít mə́ bé'à *malaika bəraa nə́ŋsínà, bə̀ kò' búúd nwuukè bəd nə́ŋsínə̀ nɛɛ̀n tɛ́mú rə, bə̀ tə́ vúgǹ Vɛnɛ́b láŋsə́ wúuú. Bít bə̀ pál gɔ̀' biíd tál tál bəd sisú, tab bə̀ və̀d gíìl kə̀ kaasə́ bəraa bə̀ kùd kə̀ bəŋzɔ' roó.

⁷Ingalə̀ bəraa naarə rə, nə́ŋ̀ boò tə́ŋú, piià *malaika bəraa nə́ŋsínə̀ rə, dəgə̀ bəraa bə̀ kùd kə̀ bəŋzɔ' rə nə́ŋsínà. Dəgə̀ bəraa rə, bə̀ nyìì kə̀ Vɛnɛ́b aa kùm zèd kə̀ zèd də nɔ̀má.

⁸Vɛnɛ́b láŋsə́ wúl nyìì kə̀ laayisá. Laayisaa rə, vúgà Vɛnɛ́b kaŋsɛ́l laa nyɛdkè rú, kə̀ oò kpɛŋsɛ́lú. Kóó nɛ́ŋə̀ nə́ŋ̀má bán piìnmbə̀ Vɛnɛ́b láŋsə́ wúu wərə̀ sɔ̀ŋ gá, búúd nwuukè bəraa nə́ŋsínà, *malaika bəd nə́ŋsínə̀ nɛɛ̀n tɛ́mú rə, dá bɛ́dǹ zé.