Read Samba Leko Kedké Yohana Núù bìá 16 Bible Online

Kedké Yohana Núù bìá 16 - Samba Leko bible

Kedké Yohana Núù bìá 16

¹Bít in aa taà gə́, mə́ kìì pə̀gə̀lib nwɔŋ nə́ŋ̀ wùù vúgà Vɛnɛ́b láŋsə́ wúuú zé gbɔ̀ŋ gbɔ̀ŋ. Nɛ́ŋə̀ rə, bàà *malaika bəraa nə́ŋsínə̀ rə: «Ìì ɛ̀m dá ìì zàd Vɛnɛ́b nɔ̀m aa dəgə̀ bəraa nə́ŋsínə̀ rú yérə nɛ́b bəd tə́ŋú, yɛ́b ba.»

²Bít malaika éèn də̀gə̀ də̀gə̀ bə̀ rə, ɛ̀m dáá zà' in aa oò dəgə̀ rú rə yɛ́b ba. Núgúl nwuukè vaksə́ yaà vúg nɛ́b aa ìì kə̀ gɔ̀g fɔ̀gúbə̀ bírə́ naú, bít bə̀ pɔ̀b nyìsə̀ oòrə sisú.

³Bít malaika nə́ŋ̀ ɔ̀d iirúb də, ɛ̀m dáá zà' in aa oò dəgə̀ rú rə, nwuu gbà'á rú. Wəl aarə, yaà bíl kìínmbə̀ nɛ́ŋə̀ val nə́ŋ̀ nyɛ̀lə́m kíin. Bít in bəraa ləə wəlú wərə̀ kə̀ gɔ̀ŋsə́ rə gə́ kóólé, bə̀ val yàá.

⁴Malaika toorúb də, ɛ̀m dáá zà' in aa oò dəgə̀ rú rə wəl nwuu bərú, kə̀ wəl yíl bəd ba, bít boò kɔ̀ yaà bə̀ bíl nyɛ̀lə́m yàá.

⁵Bít mə́ kìì malaika aa nwán sáá wəl lə, mɔ̀' Vɛnɛ́bá, bàà: «Ń tə́ wɔ̀ɔ̀làá, nɛ́ŋə̀ aa ń túrú, bít nyàam ń kùmà roó, ń tə́ *gìdńná. Kə̀ taàbìá, ḿ mà' taà fágə́n ń kə̀ wɔ̀ɔ̀làá.

⁶Bə̀ zà'à sə̀n nɛ́b gìdń bəd nyɛ̀lə́m kə̀ *Vɛnɛ́b gbantumsə̀ bəd nyɛ̀lə́m yée gə́, ám kɔ̀ ń nyə́ə́ bə̀ taà nyɛ̀lə́má. Kàandə, bə̀ bɔ̀b in aa bə̀ də́ŋ bɔbm̀bə̀ roó.»

⁷Bít mə́ kìì pə̀gə̀lib nwɔŋ nə́ŋ̀ vúgà *gannyàgə̀lú, bàà: «Èè, Báátììkpɛ̀ŋ Vɛnɛ́b gbìntaŋ kpɛŋsɛ́l bìá, ám gə́, fágə́n ḿ bəd nyìì tə́ kə̀ vɛ́nà, bít kə̀ wɔ̀ɔ̀làá!»

⁸Malaika naarúb də, zà' in aa oò dəgə̀ rú rə nyàm ba, bɔ̀b nyàm laa oò dú' nɛ́b bərá.

⁹Zɔ̀ŋ aa nyàm laa dú' bə̀ kàanyée gə́, bít bə̀ *gám nwɔŋ vaksə́ Vɛnɛ́b yílú; Vɛnɛ́b aa kə̀ kpɛŋsɛ́l naà, búúd nwuukè bəraa yílə́ kóólé roó. Zá bə̀ sɔ̀g sé, bít bə̀ kè' Vɛnɛ́b káŋ̀mbə̀ sé.

¹⁰Bít *malaika núnə̀ rə, ɛ̀m dáá zà' in aa oò dəgə̀ rú rə, gɔ̀g fɔ̀gúbə̀ mə̀ə̀d ba' bít tígə́l yaà laa oò gààrú zé bə́ŋ. Bít nɛ́b bəd bə̀ lùm mɛ́l bəd kə̀ nwuukè aa bə̀ tə́ kiìn doó.

¹¹Bít bə̀ *gám nwɔŋ vaksə́ Vɛnɛ́b lɛgə́ paà bə̀ yílú, nwuukè bəraa bə̀ tə́ kiìn də bòórú, bít kə̀ núgə́l boò bəd bòórú; zá bə̀ sɔ̀g kə̀ tù' vaksə́ boò bəraa bə̀ tə́ ma'ǹ də sé.

¹²Bít malaika nɔ̀ŋgɔ̀s oòrə, ɛ̀m dá zà' in aa oò dəgə̀ rə́ rə, wəl nwuu aa bə̀ dɛ̀d Efrata rə rú. Wəl nwuu rə, ú' kúnú, bɔ̀b gààd bəraa vúgə́là nyììrə̀ rə kpaŋ̀ kudǹmbìá.

¹³Bít mə́ bé'à nwul vaksə́ bəd toora, bə̀ lúŋ bə̀sə̀ bərá. Nə́ŋ̀ boò tə́ŋə́ gə́, vúgà inzaan nuú, nə́ŋ̀ ɔ̀d kɔ̀ vúgà gɔ̀g fɔ̀gúbə̀ nuú, bít nə́ŋ̀ toorúb də kɔ̀ vúgà *Vɛnɛ́b gbantumsə̀ gúsuúmbə̀ nuú.

¹⁴Aarə nwul vaksə́ bərá; bə̀ tə́ kə̀ kpɛŋsɛ́l naà inkɔrə bəd bə̀ ma'ǹná. Nwul vaksə́ bəraa toorə yérə, zá' bə̀ ɛ̀m gààd bəraa zɔ̀ŋə yɛ́b bə kóólé rə sunú, bɔ̀b boò bə̀ dáàn wáàlǹmbìá, bít bùm dáàn nə́'ǹmbə̀ kə̀ Báátììkpɛ̀ŋ Vɛnɛ́b gbìntaŋ kpɛŋsɛ́l bə̀ nyàm gbà'á ba.

¹⁵Sèl ìì zá' nwɔŋ aa Krístù bàà: «Ǹ ɛ̀ga, máà yaànà kìínmbə̀ lííro kíin; Vɛnɛ́b dá nɛ́ŋə̀ aa kùm tə́ nwáàn, bít tə́ gɔ̀' páàn sisú, bɔ̀b bəǹ ɛ̀m zání sí, bít bəǹ dàà sə́ə́mnúù kə̀ nɛ́b aa bə̀ tə́ bəǹ ɛgǹ kə̀ aakíin də sí rə nɛɛ̀n zígǹ yílú.»

¹⁶Nwul bəd dá bə̀ wál gààd bəd, zɔ̀ŋ aa bə̀ dɛ̀d bə kə̀ Ibraniŋko nwɔŋú, Armagadon də ba.

¹⁷Bít malaika nə́ŋsínà oòrə, zà' in aa oò dəgə̀ rú rə lɛgú. Pə̀gə̀lib nwɔŋ kpɛŋsɛ́l bə̀ nə́ŋ̀ vúgà láŋsə́ wúuú, Vɛnɛ́b mə̀ə̀d ba, bàà: «Aarə ma'míìn yàá.»

¹⁸Yɛ́bsə̀ bəd ib yàá, nwan dùm kúnú, yɛ́bsə̀ pél yàá, yɛ́b wááì gbàákù. Sɔ̀d sɛŋ aa Vɛnɛ́b séé nɛ́b bəd yɛ́b bəroó, yɛ́b wáá bèd kə̀ aarə kíin sé.

¹⁹Bìl gbàád bəd pɛɛ̀l zɔ̀ŋ toora, bít bìl gbàád bəraa zɔ̀ŋə yɛ́b bərə kóólé, láál yàá. Kàanyée gə́, Vɛnɛ́b sèl zá' Babiloniya bìl gbà'á yàá, bɔ̀b oò bə̀ dəgə̀ aa badn nɔ̀m vaksə́ bə̀ oò tə́ dɔbm̀ dú rə piìnmbìá.

²⁰Yɛ́b bəraa wəl tə́ŋə́ rə gə́ kóólé, bɔ̀bə́l kúnú, bít kɔ̀l nə́ŋ̀má bé'míìn sɔ̀ŋ sé.

²¹Gágə́rə́ gbàád bəd pílà lɛgú, nɛ́b bəd yílú. Gágə́rə́ bəraa píl lə, nə́ŋ̀ pi'kè oòrə, dáàn wə́ə̀n kílo laa iira. Bít nɛ́b bəd bə̀ gám nwɔŋ vaksə́ Vɛnɛ́b yílú, búúd nwuukè aa gágə́rə́ tə́ bə̀ piìn də bòórú. Kàandə, búúd nwuukè aarə, kàŋ taà nɛɛ̀nì gbàákù.