Read Samba Leko Kedké Yohana Núù bìá 17 Bible Online

Kedké Yohana Núù bìá 17 - Samba Leko bible

Kedké Yohana Núù bìá 17

¹In aa taà gə́, *malaika nə́ŋ̀, malaika bəraa nə́ŋsínà, ìì kò' in aa dəgə̀ nə́ŋsínà rú rə tə́ŋú, ɛ̀m yaà bàà mə́: «Ǹ yaà kúnú, máan nɛɛ̀n aa bə̀ dá nɛ́ŋ kéèndo labsə̀ bə̀ gbà'á aa fágǹ dú rə i'nàá. Nɛ́ŋ kéèndo aarə, ləə tə́ wəl nwuu zùúm kàd ba.

²Gààd bəraa zɔ̀ŋə yɛ́b bərə, ìì mà' labsə̀ì kə̀ oòra, bít nɛ́b aa zɔ̀ŋə yɛ́b bərə kɔ̀, bə̀ nyəə labsə̀ barəm oò yàá, bít bə̀ wìd yàá.»

³Nwul Gìdń símà máá yílú, bít *malaika pà' àà mə́ fɔ̀gú. Bít mə́ bé' nɛ́ŋ kéèndo nə́ŋ̀ gɔ̀g fɔ̀gúbə̀ yɛ̀ɛ́l yílú, si' oò gə́ kóólé, bə̀ bád nə́gə́l vaksə́ bəd bə wərà, Vɛnɛ́b yílú. Gɔ̀g fɔ̀gúbə̀ aarə, kə̀ yílə naà nə́ŋsínà, bít kə̀ gà' naà kób.

⁴Bít nɛ́ŋ kéèndo rə, páá gɔ̀' yɛ̀ɛ́l kìkì bərá, bít páá in gàbsə́ bə̀ ma'ǹ bəraa bə̀ kùd kə̀ bəŋzɔ' roó, kə̀ bəŋ pɛ̀sə́ bə̀ bərá, bít kə̀ síbə́ bəŋ bərá. Kò' dəgə̀ bəŋzɔ' bə̀ nə́ŋ̀ oò nɛɛ̀n tɛ́mú, nyìì kə̀ in nyìb bə̀ bərá, bít kə̀ in diíŋdo labsə̀ bə̀ ma'ǹ oò bərá.

⁵Bə̀ bád nə́gə́l nə́ŋ̀ oò gbə̀sú; nə́gə́l aarə, nwɔŋ wàà oòrə tə́ mə́'keá: *«BABILONIYA BÌL GBÀ'Á, KÙMSӘ̀N NƐ́B LABSӘ̀ BӘ̀ MA'Ǹ BƏD NÀ'Á BOÒ RA, BÍT KÙMSӘ̀N IN NYÌB BӘ̀ BƏD NÀ'Á BOÒ ZƆ̀ŊƏ YƐ́B BA.»

⁶Bít mə́ bé' nɛ́ŋ kéèndo aarə wìrì kə̀ nɛ́b gìdń bəd nyɛ̀lə́má, bít kə̀ nɛ́b aa bə̀ tə́ sedako ma'ǹ Yéésù yílə́ rə nyɛ̀lə́má. Bít zɔ̀ŋ aa mə́ bé'ù gə́, kɔ̀' mə́ yílì gbàákù.

⁷Bít *malaika bàà mə́: «Kə̀ níìbə̀ kò' n taà yíl gú? Máan nɛ́ŋ kéèndo aarə *inmə́'ke kíìn baanàá, bít máan gɔ̀g fɔ̀gúbə̀ aa kə̀ yílə naà nə́ŋsínà, bít kə̀ gà' kób, pà' nɛ́ŋ kéèndo aarə, inmə́'ke oò kíìn baanàá.

⁸Gɔ̀g fɔ̀gúbə̀ aa ḿ bé'à rə, kùm sɔ̀ŋ sé, kùmà sə̀n nyàamdoorú. Zá bə́ŋyée gə́, na' dáà kíìn vúgǹnà lɔ̀ŋ pí'ke gbà'á rú, bít dá ɛɛ̀m bɔ̀bke oò rú. Nɛ́b aa zɔ̀ŋə yɛ́b ba, sɛŋ aa yɛ́b sɔ̀d dú, bə̀ bád nə́gə́l boò núúboòd gɔ̀ŋsə́ bə̀ rú síndə, bə̀ bé' gɔ̀g fɔ̀gúbə̀ aa yérəì gə́, dá bə̀ yíl kíìn ko'nàá. Kàandə, kùmà sə̀n nyàamdoorú, kùm sɔ̀ŋ sé, bít dáà kíìn bíràá.

⁹«Zɔ̀ŋ aa bə gə́, nɛ́ŋə̀ oò kùm kə̀ yílə naú, bít kə̀ ingabké naú' yílə bəraa nə́ŋsínə̀ yérə, kùmsə̀n kɔ̀l bəraa nə́ŋsínà, nɛ́ŋ kéèndo aarə kùm bəroó; bít bə̀ kùmsə̀n gààd bərá nə́ŋsínə̀ rə kɔ̀.

¹⁰Núnə̀ boò tə́ŋə́ gə́, bə̀ yi' yàá, nɔ̀ŋgɔ̀s oòrə, tə́ gààrú, nə́ŋsínà oòrə, wə́ə́ bə́ŋ̀ sé. Zá yaà wə́ə́ì gə́, dá gààd ləə̀n sɛŋ zɔ̀gɔ̀ní.

¹¹Gɔ̀g fɔ̀gúbə̀ aa nyàam kùmà, bít kùm sɔ̀ŋ síndə, oòra kə̀ yíl oò bìá, kùmsə̀n gààd dàgwà oò roó. Oòrə, vúgà gààd bəraa nə́ŋsínà rə tə́ŋú, bít dá ɛɛ̀m bɔ̀bke oò rú.

¹²«Bít gà' bəraa ḿ bé' kób yérə, bə̀ kùmsə̀n gààd bəraa kób, bə́ŋ̀ bə̀ ləə gààd sín yéroó. Zá bə̀ yaaì gə́, bə̀ dá kpɛŋsɛ́l gààd bə̀ ləə̀n bɔbm̀ ba' wàà nə́ŋ̀ní bìá, kə̀ gɔ̀g fɔ̀gúbə̀ tá.

¹³Gààd gbàád bəraa kób yée kóólé, wál bə̀ dúgà gú' boò nə́ŋ̀ní, bít bə̀ dá kpɛŋsɛ́l boò piìn gɔ̀g fɔ̀gúbə̀ nɛɛ̀n tɛ́mú, kə̀ kpɛŋsɛ́l gààd bə̀ ləə̀n tá.

¹⁴Bə̀ dá bùm nə́'ǹ kə̀ Bɛ̀rə̀wàá, bít Bɛ̀rə̀wà dá bə̀ kíìn kanàá. Kàandə, oòra kùmsə̀n Báátììkpɛ̀ŋ bəd Báátììkpɛ̀ŋá, bít gààd bəd gààrá. Nɛ́b aa kə̀ oò tə́ rə, nɛ́b aa dɛ̀d bà roó, nɛ́b aa sààvúŋà roó; nɛ́b aarə, nɛ́b bagké vɛ́nà bə̀ oò bərá.»

¹⁵Bít *malaika bàà mə́: «Wəl bəraa ḿ bé' yérə, nɛ́ŋ kéèndo labsə̀ bə̀ aarə kùm tə́ wərà; aarə nɛ́b bərá, nɛ́b zùúm bərá, yɛ́b bərá, bít kə̀ nɛ́b aa bə̀ gám nwɔŋ, nwɔŋ luùm gɔ̀ŋ gɔ̀ŋ bərú roó.

¹⁶Gà' bəraa ḿ bé'à kób yérə, kə̀ gɔ̀g fɔ̀gúbə̀ rə tá, wál bə̀ dá nɛ́ŋ kéèndo labsə̀ bə̀ rə zeenàá' nyá' bə̀ dá in bəraa kə̀ naà rə kíìn ke'ǹ kóólé, bít nyàd bə̀ dáù daàn záání. Bə̀ dá gɔ̀g oòrə kíìn fu'nàá, bít sàb bə̀ dáù dú'ǹ laarú.

¹⁷Kàandə, Vɛnɛ́b yaà zíg in aa í' rə boò tɛ́m ba, bɔ̀b boò mà' in aa bəǹ í' roó, bít boò pii gààd boò rə, gɔ̀g fɔ̀gúbə̀ naú, in aa Vɛnɛ́b bàà rə kóólé, oò wə́ə́ zé.

¹⁸«Bít nɛ́ŋ kéèndo aa ḿ bé'à yérə, oòra kùmsə̀n bìl gbà'á aa ləə gààd, gààd bəraa zɔ̀ŋə yɛ́b bərə yílə́ roó.»