Read Samba Leko Kedké Yohana Núù bìá 18 Bible Online

Kedké Yohana Núù bìá 18 - Samba Leko bible

Kedké Yohana Núù bìá 18

¹Bít in aa taà gə́, mə́ bé'à *malaika nə́ŋ̀ ɔ̀d tóò síìmmà lɛgə́ poú' oòrə kə̀ kpɛŋsɛ́l gbà'á naú, bít kaŋsɛ́l laa nyɛdkè oòrə, nyɛ́' bɛ́' yɛ́b kə̀ zɔ̀ŋtá.

²Bít páá kpə̀ə́ǹ kə̀ kpɛŋsɛ́lá, bàà: «Láá yàá! *Babiloniya bìl gbà'á rə láá yàá! Bít yaà bíl nwul vaksə́ bəd zɔ̀ŋ ləə̀nmbə̀ yàá. Nwul vaksə́ luùm bəd gɔ̀ŋ gɔ̀ŋ, ìì ləə tə́ wərà, núú luùm vaksə́ bəraa nɛ́b bəd zèè rə, ìì ləə tə́ rú wərà.

³Kàandə, nɛ́b aa zɔ̀ŋə yɛ́b bərə kóólé, bə̀ nyəə badn labsə̀ bə̀ oò yàá, badn labsə̀ vaksə́ bə̀ oò roó. Gààd bəraa zɔ̀ŋə yɛ́b bərə, bə̀ mà' labsə̀ì kə̀ oòra, bít nɛ́b dùm bə̀ gə́ə̀l bəd kɔ̀, bə̀ mà' gbaŋə̀ì kə̀ kpɛŋsɛ́l sɔɔnsɛ́l bə̀ oò roó.»

⁴Bít mə́ kìì pə̀gə̀lib nwɔŋ ɔ̀d wùùà lɛgə́ poú, bàà: «Íí nɛ́b mə́ bərá, ìì vúgə́l kíìn zɔ̀ŋə bìl aa yée rú, bɔ̀b wál ìì mà' invaksə́ bəd kə̀ oò tə́ sí, bít búúd nwuukè bəraa kɔ̀ boò wə́ə́ ii sí.

⁵Kàandə, invaksə́ oò bəd wálká' wə́ə́ì lɛg ba, bít Vɛnɛ́b sèl zá' tù' vaksə́ oò bəraa tə́ ma'ǹ də yàá.

⁶Mà' ìì bí'ù kìínmbə̀ nɛɛ̀n aa mà' tù' oò rú rə kíinní, bít tùsaa mà' rə, ìì ká'ù gə̀b iira. Ìì nyíí magə̀wà oòrə gə̀b iira kə̀ badnná; badn aa kpɛŋ̀ kàn aa gə́' pii ii roó.

⁷Ìì piiù nwuukè gbàákù, kə̀ búúd tá, nɛɛ̀n aa pii yíl oò káŋke rú, bít yàámú rə kíin. Bàà oò tɛ́mú: ‹Máára mə́ gààd kéèndoá, mə́ kùm tə́ mə̀ə̀d ba; bít mə́ val kéèn gá, val í' mə́ búúd sɔ̀ŋ gá.›

⁸In aarə bòórú, búúd nwuukè dáà yaànà sɛŋ nə́ŋ̀ní, oò yílú' Valá, nwɔŋ daàlǹmbìá, kə̀ gulùmá. Bít laa dáù sə̀n dúúnàá. Kàandə, Báátììkpɛ̀ŋ Vɛnɛ́b aa tə́ù fágǹ də, tə́ Gbìntaŋá.»

⁹«Bít gààd gbàád yɛ́b bə bə̀ bəraa bə̀ mà' labsə̀ kə̀ oòra, bít bə̀ kùm yàámú kə̀ oò tə́ rə, bə̀ dákíìn kpəənàá, bít bə̀ dá nwɔŋ daàl bìl aa yée bòórú, màìgə́ bə̀ bé' laa aa tə́ù dú'ǹ də laayi oòì gə́ roó.

¹⁰Bə̀ dá diìn zɔ̀ŋ bùúd ba, də́dǹ dá bə̀ ma'ǹ kə̀ búúraa dìì bə̀ dá bé'ǹ bìl aa yée rú roó, bít bə̀ dá baàn: ‹Búúrá! Búúrá! *Babiloniya bìl gbà'á, bìl kpɛŋsɛ́l bìá! Vɛnɛ́b fágə́n kò' n taà ba'wà nə́ŋ̀ní wa!›

¹¹«Bít nɛ́b dùm bə̀ gə́ə̀l bəraa zɔ̀ŋə yɛ́b bərə, bə̀ tə́ kíìn kpəənàá, bít bə̀ tə́ nwɔŋ bəd daàl kɔ̀. Kàandə, bə̀ bɔ̀b nɛ́ŋə̀ nə́ŋ̀má dá bə̀ in dùm bə̀ boò bəd də lɛ́bm̀ sɔ̀ŋ sé.

¹²In dùm bə̀ bəraa rə, bə̀ kùmsə̀n bəŋzɔsá, kə̀ basá, bəŋ pɛ̀sə́ bə̀ bərá, bít kə̀ síbə́ bəŋ bərá, gɔ̀' táad bərá, kə̀ gɔ̀' táad yɛɛ̀l kə̀gə̀lə̀glə̀g bərá, kə̀ gɔ̀' luùm kam sɔ̀ɔ̀nkè ɔ̀gke bərá, bít yɛ̀ɛ́l kə̀gə̀lə̀glə̀gá. In dùm bə̀ ɔ̀d kam bəraa nɛ́b dùm bə̀ gə́ə̀l bəd gə́l bə̀ sáá bəd də, téé luùm gɔ̀ŋ gɔ̀ŋ solbə̀ làmkè bəd doó, kə̀ in bəraa ìì kùd kə̀ dɔ̀ɔ̀n nə́gə́l bəd doó, bít kə̀ téé pɛ̀sə́ bə̀ kam bəraa bə̀ nyì' roó, ba' yáàmá, ba'wàá; ɔ̀d kambəd kɔ̀ bə̀ kùd kə̀ bəŋ pɛ̀sə́ bìá.

¹³Nɛ́b bəraa rə, bə̀ gə́l insɔ̀ɔ̀nkè bəraa pál bə̀ sáá nwɔgə̀ rú roó, urdi bərá, *téé kuùm aa bə̀ dɛ̀d encens roó, kə̀ *urdi aa bə̀ dɛ̀d myrrhe roó, badn kə̀ kílə́m tá, zəəm kə̀ inlíìnmbə̀ aa bə̀ dɛ̀d blé rə tá, nàà bərá, *bɛ̀rə̀ bərá, yaa bərá, mɔ̀tà bəraa yaa bəd gùb sáá sə̀n doó, kɔ̀' bərá, kə̀ nɛ́b bərá.

¹⁴Nɛ́b dùm bə̀ gə́ə̀l bəd də, bə̀ bàà bìl lə: ‹Téé yɛb aa ń í' rə, bɔ̀bə́l yàá. Gbaŋə̀ ḿ bəd kə̀ sɔ̀ɔ̀nkè ḿ bəd tə́ kóólé, sàà zɔ̀ŋ úm yàá, bít ḿ bán bə̀ bɔbm̀bə̀ sɔ̀ŋ gá.› »

¹⁵Nɛ́b dùm bə̀ gə́ə̀l bəraa bə̀ mà' gbaŋə̀ bəd kə̀ dùm gə́ə̀lǹmbə̀ bìl aa yée rú rə, bə̀ dá diìn zɔ̀ŋ bùúd bə kə̀ də́dǹná, tɛ́m dá bə̀ lɔbm̀ kə̀ búúd nwuukè bəraa nɛ́b bəraa bìl aa rú rə ìì tə́ bé'ǹ doó. Bə̀ dákíìn kpəənàá, bít kpə̀ə̀ bə̀ dá nwɔŋ bəd dalàá.

¹⁶Bə̀ dá baàn: «Búúrá! Búúrá! Bìl gbà'á aarə pá'à gɔ̀' táad ɔ̀gkeá, bít yɛ̀ɛ́l kə̀gə̀lə̀glə̀gá, kə̀ yɛ̀ɛ́l bàŋ bàŋá; bít kə̀ in gàbsə́ bə̀ ma'ǹ bəraa bə̀ kùd kə̀ bəŋzɔ' roó, kə̀ bəŋ pɛ̀sə́ bə̀ bərá, bít kə̀ síbə́ bəŋ bərá.

¹⁷Kàandə, ba'wà nə́ŋ̀ní tə́ŋtə́ŋ, də́ŋ sə̀ní gbaŋə̀ bəraa bìl aa yée rú rə kóólé, yɛɛ̀l bɛ́'ǹmbìá!» «Bít nɛ́b aa tə́ kə̀ə̀d gbàád bəd sabm̀ doó, kə̀ nɛ́b aa bə̀ pii rú wərə̀ rə tá, nɛ́b aa bə̀ tə́ nɛ́b kə̀ə̀d gbàád bə̀ sabm̀ bəd láŋ̀ bəroó, kə̀ nɛ́b aa bə̀ tə́ tù' ma'ǹ dú wərə̀ rə tə́ kóólé, bə̀ dìì bəd zɔ̀ŋ bùúrá.

¹⁸Bít zɔ̀ŋ aa bə̀ bé' bìl gbà'á aa tə́ duùn də laayi oò kàangə́, bə̀ pál kpə̀ə́ǹ bə̀ bàà: ‹Bìl gbà'á nə́ŋ̀má bé' bə́ bèd, də́ŋ kə̀ bìl aa yée kíin sé.› »

¹⁹Bít bə̀ kpə̀ə̀ kúnú, bə̀ dàl bəd nwɔŋá, bə̀ dù' yɛ́b məsə́g yíləsú, bə̀ pál kpə̀ə́ǹ bə̀ bàà: «Búúrá! Búúrá! Bìl gbà'á rə dùù yàá! Nɛ́b aa ìì kə̀ kə̀ə̀d gbàád naà wəl gbà'á rú rə kóólé, bə̀ bɔ̀b gbaŋə̀ bəd bìl gbà'á aarə gbaŋə̀ oò bòórú. Zá ba'wà nə́ŋ̀ní də́ŋ sə̀ní bìl gbà'á aarə yɛɛ̀l bə̀ wa?»

²⁰Aíra, íí nɛ́b lɛgə́ paà bə̀ bərá, ìì kùm kə̀ tɛ́m làmkèá, bìl lə yɛɛ̀l yéroó. Bít aí kɔ̀ ìì kùm kə̀ tɛ́m làmkèá, Vɛnɛ́b Nɛ́b Gìdń bərá, *Yéésù gbantumsə̀ bərá, kə̀ *Vɛnɛ́b gbantumsə̀ bərá. Kàandə, Vɛnɛ́b fágə̀ yàá, invaksə́ bəraa mà' ii rə bòórú.

²¹Bít *malaika kpɛŋsɛ́l bə̀ nə́ŋ̀, pà' bəŋ nə́ŋ̀, kìínmbə̀ nagə̀l bəŋ pi'kè kíin, bít làà lɛ́'ù nwuu gbà'á rú, bàà: «Làà bə̀ dá *Babiloniya bìl gbà'á lɛ́'ǹ kə̀ kpɛŋsɛ́l luùm aarə ní, bít sàà bə̀ bɔ̀bə̀ sɔ̀ŋ gá.

²²Bít nɛ́b aa bə̀ tə́ pààd mɛɛ̀l *Babiloniya bìlə́ rə, kə̀ nɛ́b náb bə̀ naàn bərá, nɛ́b léd bə̀ íìl bərá, kə̀ nɛ́b yaa gà' bə̀ íìl bəd tá, bə̀ kìì náb nwɔŋ boò bəd sɔ̀ŋ gá. Bə̀ bɔ̀b nɛ́b tù' bə̀ ma'ǹ nə́ŋ̀má kə̀ tù' ɔ̀d nə́ŋ̀ naà wərə̀ sɔ̀ŋ gá, bít bə̀ kìì in naàmbə̀ nagə̀lə́ bìlə́ wərə̀ sɔ̀ŋ gá.

²³Bít bə̀ bé' lampə̀ bəd nyɛd bìlə́ wərə̀ sɔ̀ŋ gá. Bə̀ kìì wèéd váàndo pə̀gə̀libá, sínkɔ̀ wèéd kéèndo pə̀gə̀lib nwɔŋ bìlə́ wərə̀ sɔ̀ŋ gá. Kàandə, nyàamdoorú rə, nɛ́b dùm bə̀ gə́ə̀l bəraa bìlə́ wərə̀ rə, kànsə̀n nɛ́b kambəd kóólé zɔ̀ŋə yɛ́b ba; bít bìl aarə záá lɛ́là nɛ́b aa zɔ̀ŋə yɛ́b bərə kóólé, kə̀ dəə̀d oò bərá. Kə̀ taàbìá, aí kɔ̀ Vɛnɛ́b dá ii taà yɛɛ̀l kàani.»

²⁴Bə̀ dá *Babiloniya bìl búúd í'nàá, kàandə, nɛ́b oò bəd bə̀ lòd *Vɛnɛ́b gbantumsə̀ bərá, nɛ́b gìdń bərá, bít kə̀ nɛ́b bəraa val kòd bə̀ zɔ̀ŋə yɛ́b bəroó.