Read Samba Leko Kedké Yohana Núù bìá 19 Bible Online

Kedké Yohana Núù bìá 19 - Samba Leko bible

Kedké Yohana Núù bìá 19

¹Bòórú in aa taà gə́, mə́ kììà pə̀gə̀lib nwɔŋ nə́ŋ̀ wùùà kìínmbə̀ nɛ́b zùúm bəd tóò sə̀n nwɔŋ gáàmmà lɛg bə kíin. Pə̀gə̀lib nwɔŋ də bàà: «Ìì káŋ Vɛnɛ́bá! Súúkeá, kaŋsɛ́lá, kə̀ kpɛŋsɛ́l tá, tə́ Vɛnɛ́b bə́n naú.

²Kàandə, fágə́n oò bəd də, nyìì tə́ kə̀ vɛ́nà, bít kə̀ wɔ̀ɔ̀làá. Fág kò' nɛ́ŋ kéèndo labsə̀ bə̀ gbà'á aa záálɛ́l nɛ́b zɔ̀ŋə yɛ́b bə bə̀ kə̀ labsə̀ oòrə yàá, bít Vɛnɛ́b yaà pɛ́n nɛɛ̀n oò yílú, nɛ́b tù' bə̀ ma'ǹ oò bəd nyɛ̀lə́m aa zà' rə bòórú.»

³Bít bə̀ bàà sɔ̀ŋ: «Ìì káŋ Vɛnɛ́bá! Bít laayi oòrə, dá diìn na'ǹmbə̀ lɛgə́ ní, zèd kə̀ zèrá.»

⁴Bít dam bəraa laa nə́ŋ̀ zè naarə rə, kə̀ ingalə̀ bəraa naarə rə tá, bə̀ kùm kə̀ dunlígə̀rá, Vɛnɛ́b aa kùm mə̀ə̀d bərə númú, bə̀ káŋ̀ kúnú, bít bə̀ bàà: «Oò kùm kàani. Ìì káŋ Vɛnɛ́bá.»

⁵Bít pə̀gə̀lib nwɔŋ nə́ŋ̀ vúgà mə̀ə̀d ba, bàà: «Ìì káŋ Vɛnɛ́b bə́n da, íí nɛ́b tù' bə̀ ma'ǹ oò bəd gə́ kóólé, nɛ́b aa íí tə́ù nuùn doó, yɛb bɛ̀ŋ́sə̀ bəd kə̀ nɛ́b gbàád tá!»

⁶Bít mə́ kìì pə̀gə̀lib nwɔŋ nə́ŋ̀ wùùà kìínmbə̀ nɛ́b zùúm bəd tóò sə̀n nwɔŋ gáàmmà kíin, bít kìínmbə̀ wəl gɛɛ̀n tə́ nwuu bərú kíin, bít dùm kìínmbə̀ kɔ̀myɛ́bsə̀ kpɛŋsɛ́l bə̀ kíin, bàà: «Ìì káŋ Vɛnɛ́bá! Kàandə, Báátììkpɛ̀ŋ Vɛnɛ́b Gbìntaŋ bə́n ləə gààd yàá.

⁷Báà kuùm kə̀ tɛ́m làmkèá, bít kə̀ tɛ́m nyádkeá, bít báà káŋnə̀ kúnú. Kàandə, ìì ɛ̀ga, sɛŋ wə́ə́ yàá, Bɛ̀rə̀wà dá kéèn oò kíìn pa'nàá. Kéèn oòrə kɔ̀, kùd bɛ́' si' yàá.

⁸Bə̀ piiù kpaŋ̀ oò páá gɔ̀' ɔ̀gke sɔ̀ɔ̀nkèá, bít nyɛdkèá.» Kàandə, *gɔ̀' sááke biíd aarə, kùmsə̀n tù' wɔ̀ɔ̀lə̀ bəraa Vɛnɛ́b nɛ́b gìdń bəd mà' roó.

⁹Bít *malaika nə́ŋ̀ yaà bàà mə́: «M̀ bád nwɔŋ aa yóo! Vɛnɛ́b zíg nɛɛ̀n tə́ nɛ́b aa bə̀ dɛ̀d bà, yaà boò líí Bɛ̀rə̀wà kéèn wèéd gbèd də yílú.» Malaika rə bàà mə́ sɔ̀ŋ: «Nwɔŋ bəraa rə, nwɔŋ sɔ̀ɔ̀n bəraa vúgə́là Vɛnɛ́b naà roó.»

¹⁰Bít mə́ kùm oò númú kə̀ dunlígə̀rá, bɔ̀b oò bə̀ káŋ̀mbìá, zá bàà mə́: «Ǹ gú' yíl ń da! Ǹ káŋ mə́ sí! Máá kɔ̀ mə́ nɛ́d tùsə́ bə̀ kə̀ ám kíin, bít kə̀ ɔ̀dkudvɛɛ̀l ḿ bəraa bə̀ tə́ vɛ́nà aa Yéésù bàà bə̀ rə ko'ǹ də kíin. Ǹ káŋ Vɛnɛ́bá!» «Kàandə, nwɔŋ aa Yéésù bàà bə́n də, kùmsə̀n nwɔŋ yíl bə̀ aa *Vɛnɛ́b gbantumsə̀ bəd bád bə̀ dàà roó.»

¹¹Kàanyée gə́, mə́ bé' lɛg ked kúnú, bít mə́ bé' yaa biíd wərà. Nɛ́ŋə̀ aa na'à yaa yílə́ rə, nə́gə́l oò «Wɔ̀ɔ̀làá» kə̀ «Vɛ́nà.» Fág nɛ́b bəd kə̀ wɔ̀ɔ̀làá, bít nə́' bùm kə̀ wɔ̀ɔ̀làá.

¹²Núù oò bəd wèè kìínmbə̀ laa yɛ̀ɛ́l kíin. Bít pál *mə̀lə̀ bəd zùúm tə́ yílú. Bə̀ bád nə́gə́l nə́ŋ̀ tə́ oò sisú, kóó nɛ́ŋə̀ nə́ŋ̀má gàb nə́gə́l aarə sé, oòra gàb sìní.

¹³Páá dàál aa bə̀ páá nyɛ̀lə́mú roó. Oòrə bə̀ dɛ̀rə̀: «Vɛnɛ́b Nwɔŋá.»

¹⁴Bít nɛ́b bùm bə̀ nə́'ǹ bəraa lɛgə́ paà rə, bə̀ na'à yaa biíd bəd yílú, bə̀ bàgə̀ bòórú, bə̀ pál gɔ̀' ɔ̀gke sɔ̀ɔ̀nkè sisú kɔ̀.

¹⁵Bít yɛ́rə̀ bùúd nwùùkè vúg oò gú' ba, dá kə̀ nɛ́b aa zɔ̀ŋə yɛ́b bərə dubàá. Bít dá bə̀ nwáàn kə̀ gbà' ba' bìá, dá badn sɛbm̀ nagə̀l badn bə̀ sɛbm̀mú, taà kùmsə̀n Vɛnɛ́b Gbìntaŋ kpɛŋsɛ́l bə̀ nɔ̀m gbà'á.

¹⁶Bít bə̀ bád nə́gə́l nə́ŋ̀ dàál ba, kə̀ oò dun nyìì ba: «Gààd bəd Gààrá, Báátììkpɛ̀ŋ bəd Báátììkpɛ̀ŋá.»

¹⁷Bít mə́ bé'à *malaika nə́ŋ̀ dìì nyààmú, páá kpə̀ə́ǹ dɛ̀d núú bəraa zá' lɛg bərə kóólé, bàà bə̀: «Wál ìì yaà Vɛnɛ́b wálke gbèd gbà'á bə̀ ba!

¹⁸Yaà ìì fù' gààd gbàád bəd gɔ̀gá, yaà ìì fù' sóózè bəd gɔ̀gá, kə̀ gààd boò bəd bə̀ tá. Yaà ìì fù' yaa bəd gɔ̀gá, kə̀ nɛ́b aa bə̀ na'à yaa bəraa yílə́ rə gɔ̀g tá; yaà ìì fù' nɛ́b bəd kóólé gɔ̀gá. Yaà ìì fù' nɛ́b aa kɔ̀' síndə gɔ̀gá, kɔ̀' bəd gɔ̀gá, yɛb bɛ̀ŋ́sə̀ bəd gɔ̀gá, kə̀ nɛ́b gbàád gɔ̀g tá.»

¹⁹Bít mə́ bé'à gɔ̀g fɔ̀gú bìá, gààd bəraa zɔ̀ŋə yɛ́b bəroó, kə̀ nɛ́b bùm bə̀ nə́'ǹ boò bəd tá, bə̀ wál kúnú, bɔ̀b bùm nə́'ǹmbə̀ kə̀ nɛ́ŋə̀ aa kùm yaa yílə́ roó, bít kə̀ nɛ́d bùm bə̀ nə́'ǹ oò bərá.

²⁰Bít bə̀ kò' gɔ̀g fɔ̀gúbə̀ rə kə̀ Vɛnɛ́b gbantumsə̀ gúsuúm bə̀ tá. Vɛnɛ́b gbantumsə̀ gúsuúm bə̀ aa yérə, mà' inkɔrə bəd gɔ̀g fɔ̀gúbə̀ aarə númú. Kə̀ inkɔrə bəraa mà' yéroó, záá lɛ́là taà nɛ́b aa bə̀ sèd bà gɔ̀g fɔ̀gúbə̀ bírá, bít bə̀ káŋà nyìsə̀ oò roó. Gɔ̀g fɔ̀gúbə̀ aarə, kə̀ Vɛnɛ́b gbantumsə̀ gúsuúm bə̀ rə tá, làà bə̀ lɛ́l bə̀ galə̀ ní, zɔ̀ŋ aa laa tə́ duùn bə kə̀ laa zəəm tə́ rə rú.

²¹Gɔ̀g fɔ̀gúbə̀ nɛ́b bùm bə̀ nə́'ǹ bəraa nyɛ́d də, bə̀ lòd bə̀ kə̀ yɛ́rə̀ bùúraa vúgà nɛ́ŋə̀ aa na' yaa yílə́ rə gú' bəroó. Bít núú bəd kóólé, líí bə̀ wùbì kə̀ gɔ̀g boò bəd doó.